HSLC Exam-2021 result tihchhuah niin Exam zinga za zela 82.43 in an pass

Mizoram Board of School Education (MBSE) chuan kumin a pawl 10, High School Leaving Certificate (HSLC) Exam result chu nimin khan tichhuakin zirlai exam 18,012 zinga 14,847 in an pass a, zirlai exam zinga za zela 82.43 pass ang niin Mizoram pumah Lalnunmawia, St. Joseph HSS chu pakhatna a ni.

Hrileng kara MBSE in kumin April ni 1 atanga HSLC Exam a buatsaih result hi nimin chhun dar 12:00 khan tihchhuah niin hrileng avanga inkhuahkhirhna kalpui mek a nih avangin kum dang angin result hi pawn lama tarchhuah a awm lova, Internet hmanga result hi tarchhuah a nih bakah pdf leh Phone call hmang te in result hi tihchhuah a ni. Kumin a HSLC Exam result tihchhuah takah hian kumdang ang bawkin exam bei tura inziaklut zingah mipa aiin hmeichhia an tam zawk a, mipa 8346 leh hmeichhia 9666 ten Exam beiin Exam laia hnawhchhuah leh Exam hmachhawn kim lo an awm lova, Regular Candidate 17,775 leh Private Candidate 237, an vaiin zirlai 18,012 an Exam a ni. Heng zirlai Exam atang hian Regular-ah 14,685 leh Private-ah 162, an vaiin zirlai 14,847 ten pass in hei hi za zela 82.43 a ni a, Distinction-ah mi 2904 an pass a, First Division-ah mi 5218, Second Division-ah 4863 leh Third Division-ah mi 1862 an pass a, Subject bat nei, Compartmental Chance nei zirlai 309 an awm bakah Zirlai hlawhtling zo ta lo 2856 an awm bawk a ni. Tun tuma HSLC result chhuak ah hian zirlai zawng zawng Pass vek-na School 175 an awm laiin Failed vek School 7 an awm thung a ni.

HSLC result chhuak ah hian a pumpuiah Lalnunmawia S/o RL. Chanchinmawia, St. Joseph HSS chuan Mark 500-ah mark 486 hmuin pakhatna a ni a, Lalliansanga S/o Lalthlahliani, AR ELSS School, Aizawl chuan mark 485 hmuin pahnihna a ni a, Lalpekhlui Renthlei D/o Lalsawmliana Renthlei, St. Paul’s HSS chuan mark 483 hmuin pathumna a ni bawk. Kumin hian Top 10-ah mi 13 an lang a. St Joseph Higher Secondary School Aizawl atang mi 5, St. Paul’s HSSl atangin mi 3 leh AR ELSS School Aizawl atangin mi 3 an lan bakah Aizawl khawpui pawnlam atang Holly Faith School, Lunglei leh Marian High School, Serchhip atangin pakhat ve ve an lang bawk.

Tun tuma Compartmental Chance la nei te tan hian COVID-19 vanga exam kim theilo te nen a rualin Exam la buatsaih leh tur a ni dawn a, exam hun tur erawh la tihchian a ni lova. Mahni result-a lungawilo tan subject pahnih chin ah June 18 thleng endik nawn dil theih a ni bawk ang.

Education Minister in thawktute inpekna a chhuang :

School Education Minister, Lalchhandama Ralte chuan hrileng kara HSLC Examination 2021 leh result buatsaih a ni chu thawktute thahnem-ngaihna leh inpekna a ni a, a chhuanawm hle a ni, a ti. Minister chuan Mizo mipuiten an ngaihhlut leh nghahhlelh HSLC (Matric) result a chhuak thei ta chu lawmawm a tih thu sawiin, Hripui leng avangin India ram State dangah HSLC Exam pawh an nei hlei thei lova. Result siam dan turah an buaiin zirlaite an chi-ai nasat thu news-ah kan hmuh hnem viau laiin Result tihchhuah theih a ni ta a, MBSE leh School Education Department-a thawktute thahnemngaihna leh inpekna a chhuanawmin fak an phu takzet a ni, a ti. Hripui leng karah Exam him leh felfai tha neih theihna tura ruahmanna siampuitu State Executive Authority, LLTF/VLTF te leh Mizo mipuite tawng-taina chungah lawmthu a sawi bawk.

Education Minister Lalchhandama Ralte chuan HSLC Result chhuaka hlawhtlinna changtu zawng zawngte, nu leh pa leh an zirtirtute a lawmpui thu a sawi a. Zirlai hlawhtling ve ta rihlo te pawh beidawng mai lova, tumruhna leh huaisenna thar neia beidawng lova hmalam thlir tlat turin a fuih nghal bawk a ni.

MZP General Hqrs. chuan MBSE in High School Leaving Certificate (HSLC) 2021 result felfai tak a tichhuak thei chu lawmawm an tih thu sawiin, MBSE thawktute thawhrimna ah lawmthu an sawi a. Ram leilungfa zirlaiin Pakhatna dinhmun a luah chu lawmawm an ti takzet tih an sawi bawk.

MSU General Hqrs. chuan HSLC Result chhuak ah Sawrkar School zingah Pass awm lohna an la awm chu sawkar tan chuan inenfiahna tham ah an ngai tih sawiin, Sawrkar School ten Result tha zawk an neih theih nana nasa zawka tan la turin sawkar a ngen nghal bawk.