Lenkawl

Panchayat Bhawan hawng

Niminpiah-a Mizoram-a Sample enfiah atangin COVID-19 hri kai mi pathum hmuhchhuah leh an ni a, Mizoram-a hri kai hmuh tawh chu 4468 an tling ta a ni.

Kum 1998-2008 inkara MNF sawrkar laia Mizoram Intodelhna Program (MIP) kalpui dana sum eiru-a puh,  khatih hunlâia Chief Minister Zoramthanga, Agriculture Minister H. Rammawi, Adviser to Chief Minister Lalhuapzauva leh Mizoram Venus Bamboo Products Pvt. Ltd. neitu KK. Shah te chu Prevention of Corruption Act (PC Act) Special Court chuan nimin khân puh an nihnaah thiam a chantir.

Nimin khan Serchhip District-ah Sample 2 enfiah niin hri kai hmuhchhuah an awmlo a, heng Sample enfiah te hi TrueNat Laboratory leh Rapid Antigen Test hmangin Sample pakhat ve ve an ni.

Serchhip District-a COVID-19 Vaccine pek hna kalpui chu chhunzawm mek zel a ni.

April 17, 2021-a Serchhip bial-a Assembly bye-election lo awm tura Election Commission of India-in General Observer tur a ruat, Lokesh Kumar IAS chuan niminpiah khan Serchhip a rawn thleng tawh a, General Observer hi inthlan kaihhnawih thila zawh duh leh biak duhna nei chuan Email-lokesh.janid@ias.nic.in ah emaw, Mobile No. 9362603048-ah te biak theih a ni. General Observer duh dan angin nitin chawhnu dar 3:00 -5:00 PM inkarah DC Conference Hall-ah hmaichhana biak theih a ni bawk ang. Hetianga amah kawm duh te chuan Reception Counter, DC Office kawt-a siamah in report hmasak thin tur a ni. General Observer, Lokesh Kumar hian nimin khan Serchhip DC Meeting Hall-ah Election Nodal Officer te thutkhawm neihpui nghalin Nodal Officer hrang hrangte hian an chanvo te hrilhin an hmalak tawh china thil pawimawh zual te an tarlang bawk a ni.

Nizan hmasa dar 9:30 vel khan Serchhip Dinthar Veng-a chenna In 4, chhungkaw pali ten an luahlai chu a kangral vek a, bungrua engmah chuh hman ni lovin mihring thi leh hliam erawh an awmlo thung .

Ruling Wave a awm theilo - PC. Tlana Indian National Congress (INC) chuan Serchhip bial Assembly bye-election neih tur atana Campaign hawnna chu nimin khan Serchhip-ah an nei a, he hunah hian INC Candidate, PC. Laltlansanga chuan tun tum bye-election neih turah Ruling Wave a awm theilo tih a sawi.

CADC-ah CEM nilai a bang

Central YMA chuan Myanmar raltlan Mizoram-a lo lut te tha taka lo dawngsawng turin Sub-Hqrs./Group/Branch YMA te a ngen.

ZPM Party Thalaite chuan Chief Minister, Zoramthanga chu a thusawi avangin thuthar thehdarhtute hnena ngaihdam dîl tùra an phut thu an sawi.

Health Minister, Dr. R. Lalthangliana chuan kum 2023 ralhma in thingtlang lama Sub-Centre zawng zawngte upgrade hman vek an tum thu a sawi.

Chhiahtlang atanga Lamchhip panna kawng, Darzika Road tia sawi thin-a PCC Flooring hna thawh chu zawhfel a ni tawh nia thudawn a ni a, amaherawh chu tui pek chhunzawm ala tul dawn avangin tunkar chhung chuan lirthei ke 2 nei chi tan lo chuan kaltlang phal ala ni lo thung.

Thla thar April 17-a Serchhip bial Assembly bye-election neih tur atana chuh tum te tana hming pekluh hun chu Vawiin, March 30, 2021 hian a tawp dawn ta a, tun thlengin he inthlanna chuh tur hian mi pali (4) ten Nomination Paper thehlut tawhin Vawiin hian BJP Candidate, Lal Hriatrenga Chhangte leh PC Party Candidate, Vanlalruata te chuan Nomination Paper hi an thehluh rin a ni.

Association for Voluntary Blood Donation (AVBD) Serchhip Branch chuan nimin khan kum 2021-2023 chhunga an hruaitu tur thlanna an nei.

Serchhip-a MJA Member thenkhat te chuan nimin khan Serchhip District Jail tlawhin an hmalakna leh hnathawh dan te an thlir.

ZPM Legal Board hruaitute chuan nimin khan Serchhip Press Club-ah thuthar thehdarhtute kawmin MLA atanga Lalduhoma paihthlak chhan chu Dan ngaih pawimawh vang ni lovin, Assembly House-ah thudik a tlangau pui thin vanga hnawksak tih vanga thuneihna hmachhuana ban a nih thu an sawi.

Chenna In 27 kangral

Mizoram-ah COVID-19 hri kai hmuhchhuah an la awm belh zel a, hri kai enkawllai pawh an pung zel.

Mizoram-ah COVID-19 Vaccine lak tur la zo tawh Health Care Workers mi 10,296 leh Frontline Workers mi 3071, an vaiin 13,367 an awm tawh.

Lunglei High Powered Committee chuan Tlabung kaltlangin a tam thei ang ber Bangladesh-ah Iskut thawnchhuah tumin hma an la mek.

Chief Minister Zoramthanga chuan Myanmar ram buaina avanga Mizoram-a rawn tlanlutte chu duat takin enkawl zel an nih tur thu a sawi.

April 1, 2021 atanga hman tan turin Mizoram-a khawlphetha (power) hman man chu 20.68%-in tihsan a ni a. Tun dinhmuna Power Unit khat hman man chawhrual chu Rs. 5.56 niin Tariff tharah chuan Power Unit khat hman man chawhrual chu Rs. 6.71 a ni dawn a ni.

Myanmar ramchhung buaina avanga Serchhip District-a raltlan rawn lut te chhawmdawlna atana Zirtawpni kalta-a Serchhip khawpui chhung hmun hrang hranga Mobile Concert neih-a sum hmuh te chu Inrinni khan semchhuah niin Lungkawlh YMA te hnenah Rs. 105,000/- leh Sailulak YMA te hnenah Rs. 50,000/- hlan an ni a, raltlan hliam tuar, Ser-chhip damdawi In a rawn dah kanna atan Rs. 5000/- pek a ni bawk.

Mizoram Ranking Table Tennis Championship chu Inrinni khan Aizawl-ah zawhfel niin Serchhip District atanga kal ten Medal 6 lain a pumpui-ah pahnihna an ni.

Nimin March 28, 2021 (Pathianni) kha Kristian te Ni pawimawh, Tumkau Ni (Palm Sunday) a ni a, Kohhran hrang hrangte chuan he ni hi urhsun taka hmangin Kohhran tam ber te chuan zingkar-ah Tumkau chawi-a khawlai fangin Pathian faka zaiin an aurual a ni. Nikum lamah hri leng avanga Tumkau Ni hi kumdang anga hman theih a nih loh avangin kumin hian kumdang zawng aiin hlut a hlawh niin a lang.

Vawiin March 29 hi Hindu te Kut pawimawh, Holi a ni a, sawrkar chawlh a nih angin zirna In leh sawrkar Pisa te khar a ni ang.

Serchhip District Anti-Tobacco Squad te chuan Inrinni zing khan Serchhip Bazar leh a chhehvel-ah puipunna hmuna mei zuk khapna Dan bawhchhia an awm leh awmloh enfiahin Dan bawhchhia mi 2 an man a, pawisa chawitir an ni.

Serchhip District Bawrhsap chuan tun thla ni 23-a Mizoram sawrkar in COVID-19 laka mipuite kan him theih nana kaihhruaina a siam te chu zawm theuh turin mipuite a hriattir.

Serchhip bial-a Assembly bye-election neih tur atana inbuatsaihna kal zelah Inrinni khan he inthlanna atana hman tur EVM First Randomization chu Serchhip DC Office-a DIO Room-ah neih a ni a. Hemi hmalam kumin Feb. 10 atang khan Serchhip-a EVM te hi enfiah lo ni tawhin Serchhip District-ah hian Balloting Unit 120, Control Unit (CU) 116 leh Voter-Verified Paper Audit Trail (VVPAT) 105 te a awm mek a. Heng EVM leh VVPAT te atang hian EVM First Randomization-ah hian inthlanna atana hman tur EVM leh VVPAT bakah inthlan buai-puitu tur ten training-na atana an hman tur te chu thliar fela dahhran nghal an ni.

Election Commission of India (ECI) chuan Serchhip bial-a Assembly Bye-Election neih tur atana Inthlan Result lo inrinlawk siakna lam hawi hrim hrim chhuah a khap.

Zoram Peoples’ Movement (ZPM) chuan Serchhip bial Assembly bye-election neih tur atana Campaign hawnna leh Official Candidate puanna hun Inrinni khan Serchhip-ah an nei a, he hunah hian an Candidate, Lalduhoma chuan Phatsantu hremna chu phatsan lo tu chungah a letling-a hman a nih thu a sawi.

Tunhnaia Myanmar ramchhung buaina thleng avanga Serchhip District chhunga raltlan rawn lut te tanpuina turin nimin khan Serchhip khawpui chhung-ah Mobile Concert neih a ni a, he Mobile Concert hi Mizo Zaimi Inzawmkhawm (MZI) bakah MJA, YMA, MHIP, S|P, MZP, MSU leh MUP te huaihawta neih niin mi tlawmngai te sum thawhkhawm chu Rs. 1,75,915/- zet a tling a ni.

Keitum leh Bungtlang inkar-a NH. 54 zauhna tura hna thawh mek chu nimin khan Serchhip Sub-Hqrs. YMA hruaitute chuan tlawhin hnathawh kallai chu chhunzawm tawh rihlo tura hnathawktute an ngen bakah NHIDCL lamah pawh an hnathawh chungchang hi thlen an tum thu an sawi.

Inthlan ni sawn turin ngen

Ni thum chhung awh 4th Inter District Mizoram Wrestling Championship, 2021 chu nimin khan zawhfel a ni.

Health & Family Welfare Minister, Dr. R. Lalthangliana chuan nimin khan Zoram Medical College-ah Viral Research & Diagnostic Laboratory, Animal House, MRI & CT Scan Centre, Community Medicine leh Clinical Skills & Advance Learning Centre Building a hawng.

Niminpiah-a Mizoram-a Sample enfiah 719 te atangin COVID-19 hri kai mi 6 zet hmuhchhuah leh an ni a, a tam zawk te chu tunhnaia State pawn atanga rawn haw an ni.

Information & Public Relation Minister, Lalruatkima chuan nimin khan Tuiphal Group YMA Conference vawi 47-na chu Chiahpui khua ah a hmanpui.

Mizoram sawrkar hnuaia Engineering lam zirna In hmasa ber tur Lunglei Pukpui-a Mizoram Engineering College (MEC) chu a building tur sak zawh ni tawh mah se, tun thlengin zirna hi tan theih ala ni lova, he building hi Mizoram University, Southern Campus atana hman tir lailawk turin ruahmanna siam a ni.

BJP Mizoram Pradesh chuan thla thar April 17-a Serchhip bial-a Assembly bye-election lo awm turah Lal Hriatrenga Chhangte chu BJP Official Candidate a ni dawn tih an puang.

Serchhip bial Assembly bye-election neih tura PC Party Campaign Committee chu nimin khan Aizawl-a an Party Office-ah thukhawmin hmalak dan tur an sawiho a. PC Party hian he inthlanna neih turah hian an Party Sr. Vice President, Vanlalruata chu an din tir dawn tih puang tawhin March 30, 2021-ah Nomination file an tum thu leh karleh atangin campaign rusum thlak an tum thu an sawi. He thutkhawm ah hian an Candidate tur Vanlalruata chuan Serchhip bial MLA bye-election lo awm tura Candidate te zingah Serchhip bial enkawl turin a tha ber tih sawiin, “Serchhip bial mipuite ham-thatna leh hmasawnna phuhruksak turin kei tluka a ngaihna hria leh hmangchang hria candidate te zingah an awm lo,” a ti bawk.

Nehru Yuva Kendra (NYK) Serchhip District leh NSS Govt. Serchhip College Unite te tangkawp buatsaihin nimin khan Poshan Pakh-wada 2021 chu hman a ni.

Mizoram People Forum (MPF) chuan Assembly bye-election neih tura Candidate te tana Joint Platform buatsaih an lo rel tawh chu ngaihtuah that leh nise an ti.

Serchhip bial Assembly bye-election neih tura Indian National Congress (INC) Candidate, PC. Laltlansanga chuan nimin khan Zawlpui a Mat phai tlawhin Nul siamtute nen inkawmna an nei.

Serchhip bial-a Assembly bye-election neih tura Mizo National Front (MNF) Official Candidate, Vanlalzawma chuan nimin khan he inthlan chuh tur hian Nomination Paper a thehlut.

MSCU Office leh Training Centre building hawng

Mizoram-ah COVID-19 hri kai hmuhchhuah belh zel niin nimin thlenga hri kai hmuh tawh chu 4454 an ni.

School Education Minister, Lalchhandama Ralte chuan Zirna siamthat hna thawh mekah sawrkar School thenkhatah chuan sikul-a naupang inziak lut an pung ta tih a sawi.

Mizo Students’ Union (MSU) chuan Mizo-ram Rural Bank (MRB) hnuaia Office Assistant atana chhawr lai hnamdang mi paruk (6) te an hun pel veka hnathawk lai te chu tun thla chhunga ban an nih loh chuan a tul anga hma lak zel an tum thu an sawi.

Mizoram Upa Pawl (MUP) Serchhip District te chuan tunkar Thawhtanni khan Assembly neiin kum 2021-2023 chhunga hruaitu tur thlanna an nei.

Serchhip District Anti-Tobacco Squad te chu nimin khan an Chairman leh District Bawrhsap, Kumar Abhishek hova thukhawmin an hmalakna leh hmachhawp te an thlirho.

Serchhip-a PHE Department chuan thla thar, April ni 1, 2021 atang khian Serchhip Town leh Thenzawl Town-ah te hmun leh hmuna Bill print nghal theihna (Spot Billing) chu hmang turin rua-hmanna an siam a, hemi atan hian niminpiah khan Meter Reader leh Bill pekna hmuna Duty te chuan Training pawh an nei tawh a ni.

Thla thar April 17-a Serchhip bial Assembly bye-election neih tur chuh turin mi pathum te chuan an hming an pelut tawh.

Serchhip bial-a Assembly bye-election neih tur atan sawrkar in hriattirna a tihchhuah hnuah inbuatsaihna ngawrh taka kalpui mek a ni.

Serchhip bial-a Assembly bye-election neih tur chungchangah hian Mizoram People Forum (MPF) te chuan nimin khan Serchhip-a thuthar thehdarhtute kawmin inthlanna thianghlim, Lal Isua zuitu zia tilang ngam turin mipui, Candidate leh Party te an ngen tih an sawi.

Dhaka-ah Dr. Thangtea zin

Zirtawpni leh Inrinni-a Sample enfiah atangin Mizoram-ah COVID-19 hri kai mi pakhat ve ve hmuhchhuah niin nimin khan hri kai mi pahnih enkawl dam an ni bawk.

Chief Minister, Zoramthanga chuan Ayodhya hmuna Ram Mandir sak nan Mizoram sawrkarin cheng khat mah a thawh lo niin a sawi.

National Highway-44A Darlak leh Bawngva inkar Teirei lui-a Lei dawh hna thawh mek chu a him tawklo ni a an hriat avangin Mamit Sub-Hqrs. YMA leh Taitesena Group YMA te chuan thawk chhunzawm tawhlo turin an hriattir.

Rural Development Minister, Lalruatkima chuan Inrinni khan Khawzawl Darngawn Veng-ah District Rural Development Agency (DRDA) Office a hawng.

Mizoram-ah chhan hrang hrang vanga Kohhran huang chhung nilo, Court a innei an pung ve zel a, nikum leh kumin kum kal mek chhungin Aizawl DC hmaa The Special Marriage Act, 1954 (Act No. 43 of 1954 section 13) Dan hnuaia innei nupa tuak 16 an awm.

ZPM Vice President, K. Sapdanga chuan, “ZPM hi Mizoram-ah politics tha hmanga ram rorelna tha tundin tuma beitute awmkhawm kan ni,” a ti.

Inrinni thleng khan Mizoram-ah Health Care Workers mi 10,246 te chuan COVID-19 Vaccine an lak tur la zo tawhin Frontline Workers mi 1333 te pawhin hri danna hi an la zo tawh.

Mizoram Journalist Association (MJA) General Conference vawi 47-na chu naktuk khian Lunglei-ah neih a ni dawn a, I&PR Minister, Lalruatkima chu khuallian a ni ang. MJA General Conference hi nikum lamah hri leng avanga neih theih a nihloh hnuah kumin hian neih theih beisei niin he Conference hmang tur hian MJA (SD) member te pawhin Vawiin hian Lunglei an pan dawn a, naktip khian Lunglei a sawrkar hmalakna thenkhat te chu MJA te hian an tlawh chhunzawm nghal dawn bawk a ni. He khawmpui neih tur avang hian ni 3 chhung tualchhung chanchinbu an chawl dawn a ni.

Nimin March 21, 2021 kha United Penticostal Church (UPC) NEI hnuaia Penticostal Youth Department (PYD) dinchampha a ni a, he Ni pual hian Serchhip Dinthar Bial PYD te chuan Inrinni khan Serchhip Blood Bank-ah thisen an pe a, mipa 22 leh hmeichhia 5, an vaiin mi 27 ten thisen hi an pe a ni. Serchhip Dinthar Bial PYD te hian nikum-a Bial Conference thurel bawh-zuiin Serchhip atanga Thenzawl panna kawng, Zawlpui peng bulah Vantlang Zun In siamin hei hi Inrinni vek khan a hawnna an nei bawk.

All Mizoram Karate Association (AMKA) Serchhip District hruaitu thlanna chu Inrinni khan neih niin President atan H. Sanghmingliana (Bazar Veng) leh Secretary atan Zomalsawma (Tuikhuah Veng) te thlan an ni. Inrinni vek khan Serchhip District Archery Association (SDAA) te pawhin hruaitu thlanna neiin President atan Lalramnghaka Kawlni (Tuikhuah Veng) thlan a ni bawk.

Vawiin hian khawvel pumah Tui humhalh a pawimawh zia inzirtirna ni, World Water Day chu hman a ni dawn a, Serchhip-ah chuan he ni pual hian PHE Department chuan tukin dar 6:00 hian Serchhip AOC Veng atanga Bazar thleng Rally neih a ni dawn a, hemi hnu hian Serchhip Bazar-ah he Ni puala inkhawm tawi neiin District Bawrhsap, Kumar Abhishek chuan a hmanpui anga, he ni puala Essay inziahsiakna lawmman sem nghal a ni ang. Kumin-a World Water Day-ah hian thupui atan ‘Tui kan rohlu’ tih chu hman a ni dawn a, District chhung khaw hrang hrang ah pawh hun hman a ni bawk ang.

April 17, 2021-a Serchhip bial Bye-Election neih turah inbuatsaihna chu kalpui mek niin Election Commission of India thupek angin kum upa, Rualbanlo leh Covid kaihhnawiha harsatna nei ten Postal Ballot hmanga vote an thlak theihna turin hmalak tan a ni. District Election Officer leh he inthlan-a Returning Officer tur, Kumar Abhisek chuan kum 80 chunglam, Rualbanlo leh Covid-19 hrivei, rinhlelh leh khunghran mek ten Postal Ballot hmanga Vote an thlak theih nan Booth Level Officer leh Sector Officer te chu hmala turin a hriattir a, BLO te chu heng a chunga tarlante hi an chenna In ngeiah zawng chhuak a, Postal Ballot hmanga vote an thlak duh anih chuan dilna Form, 12 D pein, Form hi March ni 28 aia tlai lovah District Election Office, Serchhip-ah theh-luh vek tur a ni.

Serchhip District chhungah thla hnih (2) chhung COVID-19 hri kai hmuhchhuah an awm tawh lo a, kumin January 20 hnu lamah Serchhip District-ah hian COVID-19 hri kai hmuhchhuah awm tawh lovin Serchhip District atang hian COVID-19 hri kai mi 413 enkawl dam an ni tawh thung.

Inthlanna felfai nei tura hmalak

Union Minister hnenah thlen

Niminpiah khan Mizoram-ah Sample 686 enfiah niin COVID-19 hri kai hmuhchhuah an awm lo.

Tunhnaia Serchhip-a dah tur Khawnvartui rawn thleng kimlo hnawhkhahna atana barel 10 rawn dah leh te chu AAY Ration Card nei te hnenah Special quota-a pekchhuah a ni dawn a, karleh Thawhtanni atanga Nilaini thleng khian zing dar 9:00 atanga tlai dar 4:00 thlengin Serchhip-a AAY Card nei te tan Litre 5 zela lak theih a ni dawn a, a man hi Rs. 187/- a ni ang.

Serchhip bial Assembly bye-election neih tura MNF Candidate, Vanlalzawma chuan nimin khan Brilliant HSS Serchhip a tlawh a. School Managing Board Member leh he School-a thawk ten lo dawngsawngin he School in harsatna a tawh hrang hrangte chu a hriatpui thu leh thlantlin a nih chuan theihtawp a chhuahpui dawn tih a sawi bawk.

Serchhip bial bye-election neih tura Indian National Congress (INC) Candidate, PC. Laltlan-sanga chuan bye-election neih turah Ruling Wave a awm theilo niin a sawi.

Kum kalta (2020) chhung khan Serchhip District-ah mi 2169 te thisen enfiah atangin HIV hrik pai mi 53 hmuhchhuah an ni a, Sample enfiah atanga za zela 2.44 te chuan HIV hrik an kai a ni.

Serchhip Thalai Pawl (STP) te chuan nimin khan Election Commission of India-ah lehkha thehlutin Serchhip Bial Assembly bye-election neih tura Vote thlak ni leh Vote chhiar ni te chu sawn turin an ngen a. He an lehkha thehluh ah hian Vote thlak ni tura ruahman, April 17 chu Kristian Sakhaw ni pawimawh, Seventh Day ni serh a nih thu leh Vote chhiar ni tur, May 2 pawh Mizo Kristian te ni serh, Pathian biakna hun leh Biak In-a programme awm vek hun a ni tih an tarlang a. Hei vang hian Serchhip Bial-a bye-election lo awm tura Vote thlak ni leh Vote chhiar ni te hi Inrinni leh Pathianni-a tla lo tura ruahmanna siamsak turin an ngen a ni.

Mizoram People Forum (MPF) chuan nimin khan thutkhawm neiin Serchhip bial-a Assembly bye-election neih tur chungchang an thlirho a, April 5-ah Common Platform buatsaih nise an ti.

Nimin khan Govt. Serchhip College-ah India ramin zalenna a hmuh kum 75-na lawmna kal mek Celebration of India's 75 years of Independence (Azadi Ka Amrut Mahotsav) pualin Seminar neih a ni.

ZPM Party-a OB lo ni tawh thin nia insawi mi thenkhat te chuan Serchhip bialtu MLA atana thlantlin, Lalduhoma chu India Danpui a bawhchhiat avanga MLA atanga ban an nih thu an sawi a. Lalduhoma’n rinawmna thu a tiamna nia a sawi ZPM Tangrual Pawl chu phumbo leh vuiliam a nih tawh thu an sawi bawk.

Epidemiological Centre hawng

Serchhip bial-a Assembly bye-election neih hun atana Election Commission of India in April 17, 2021 a ruat chu Inrinni a nih avang leh Vote chhiar hun tura ruat May 2, 2021 chu Pathianni a nih avangin Political party hrang hrangte chuan he ruahmanna hi an duhloh thu leh he hun lo ruahman tawh hi sawn an duh thu an sawi.

Nimin khan 'Khelo India : Sports for Peace and Development' hnuaia Football, Volleyball leh Boxing-a District Level inelna te chu zawhfel a ni.

Serchhip bial Assembly bye-election neih tura MNF Official Candidate, Vanlalzawma chuan nimin khan New Serchhip VC area chu tlawhin an khawtlang mamawh hrang hrang a sawipui a, Vanlalzawma hi VC member te lo dawngsawngin VCP, C. Lalrotluanga te In-ah inkawmhona hun an hmang a, he hunah hian an khawtlang mamawh lo thlenin heng zingah hian Thlanmual kawng Black topping te, Futsal Ground siam te, VC House sakte, Kawngpui Blacktop leh Side Drain tha laih te, High Mast dahte leh New Serchhip YMA Hall sakte a tel a ni. Heng khawtlang mamawh an lo thlen te hi Vanlalzawma chuan a hmunah te a theih anga tlawhin an dinhmun a enpui a, a hlawh-tlin ngei theih nan a theih ang tawp a hma lakpui a tum tih a sawi a ni.

Serchhip bial-a Assembly bye-election neih tur atana inbuatsaihna kal zelah nimin khan Serchhip DC Meeting Hall-ah Political Party hrang hrang aiawhte chu kohkhawm niin boruak muanawm tak hnuaia inthlanna neih a nih theih dan tur sawihona neih a ni a, he hun hi District Election Officer, Kumar Abhishek chuan kaihruaiin Model Code of Conducts tha taka zawm a nih theihna tura hmalak dan tur bakah Candidate leh Political Party hrang hrang ten Campaign senso chhut dan turte chu Serchhip DRDA Project Director, Malsawm-tluanga leh Election Officer, Vanlalhmachhuana te chuan an hrilhfiah a ni. He hunah hian Ser-chhip-a Political party hrang hrang aiawhte telin sawihona neih nghal a ni bawk.

Serchhip bial bye-election neih tura Indian National Congress (INC) Candidate, PC. Lal-tlansanga chuan niin khan Serchhip-a lehkha a lo zir tawhna thin hmun te a tlawh.

Nimin khan Govt. Serchhip College chuan Annual Sport Week kharna hmangin College Principal, PC. Lalremsiama chuan khuallian niin hun a hmanpui.

Thla thar April 17-a 26-Serchhip (ST) A/C-a bye-election neih tur atana mawhphurhna pawimawh chelhtu, Nodal Officers te chu nimin khan District Election Officer, Kumar Abhishek hovin an thukhawm.

Niminpiah khan Mizoram-ah Sample 650 enfiah niin COVID-19 hri kai mi pathum hmuhchhuah an ni a, hri kai hmuhchhuah zinga mi pakhat chu nizan hmasa khan a boral zui nghal.

Rural Development Minister, Lalruatkima chuan nimin khan Saitual-ah Sub-Hqrs. YMA Office sak thar chu a hawng.

P&E Minister leh Tawi bialtu MLA, R. Lalzirliana chuan nimin khan Saitual-ah District Rural Development Agency (DRDA) Office thar a hawng.

Mizo Zirlai Pawl (MZP) Rorelna sang ber dawttu, Federal Council Sitting vawi 53-na chu nimin khan Aizawl-a MZP Pisa Pui-ah neih a ni.

March ni 31,2021 hmaa Assam Rifles ten Aizawl khawpui laili-a an awmna hmun an chhuahsan ngei theih nan Chief Minister Zoramthanga chuan Union Home Minister hnenah DO Letter a thawn a, a chhanna ngaihchan mek a ni tih Home Minister, Lalchamliana chuan a sawi.

Demand sawina ah tel duhlo

Mizoram Legislative Assembly 8-na thutkawm vawi 7-na chu nizan khan zawhfel a ni ta a, nimin-a Assembly Budget Session chhunzawm-ah hian Minister pahnih te Department enkawlna tura sum ruahman chu pawm leh niin nizan khan Speaker, Lalrinliana Sailo chuan thutkhawm hi tiamchin awm lovin a titawp a ni.

Serchhip District Volleyball Association buatsaih 'Khelo India : Sports for Peace and Development' hnuaia Serchhip RD Block Level Volleyball Tournament chu nimin khan Final khela zawhfel a ni.

Niminpiah-a Mizoram-a sample enfiah 813 atangin COVID-19 hri kai mi pathum ngawt hmuhchhuah leh an ni.

Mizo Students’ Union (MSU) chuan Mizo-ram Rural Bank (MRB) hnuaia thawk tura lak Local Language Proficiency Test paltlang zo lo mi 6 te chu an hna atanga chawlhtir turin nimin khan MRB Chairman hnenah an thlen.

Nimin khan Prime Minister, Narendra Modi, Home Minister Amit Shah, State hrang hrang Chief Minister te leh UT Administrator ten rampuma COVID-19 dinhmun leh hri danna (vaccination) kalpui dan chungchang te Video Conferencing kaltlangin an thlirho.

Serchhip Sports Complex-a Synthetic Running Track siam hna thawh mekah Line rin hna chu thawh tan a ni ta.

Mizoram sawrkar in Serchhip DC Office a SDO (Sadar) hna chelh tura a ruat, C. Laltleipuii chuan niminpiah khan a hna thar hi a rawn zawm tawh a, a mamawh te tan dawr theih a ni tawh ang. C. Laltleipuii hi Serchhip District-a East Lungdar-ah BDO hna chelhin hun engemaw chen a lo awm tawh a ni.

Thla kalta-a Serchhip-a Khawnvartui sem tur rawn thleng kimlo bawhzuina kal zelah heng Khawnvartui rawn phurtu Tank Lorry Driver in a tlin lohna ang te hnawhkhah leh a intiam angin nimin khan Khawnvartui Litre 2180 chu Ser-chhip rawn thlenpui a ni a, Legal Metrology-a thawk ten an enfiah hnuah hlanthlak nghal a ni. Heng Khawnvartui te hi Dealer pakhat in an la dawn a, miharsa zawk te hnena sem turin SDCA te nen ruahmanna siam a ni ang.

Serchhip District-a COVID-19 Vaccine pek hna kalpui mekah mi za riat chuang te chuan hri danna an lak tur hi an la kim tawh a ni.

Serchhip bial Assembly bye-election neih tura Media Certification and Monitoring Committee (MCMC) chu nimin khan thukhawmin inthlanpui-a senso hrang hrang chhut dan turte an thlirho.

Serchhip Bial-a Assembly bye-election neih hun tur puan a nih hnuah he inthlanna neih tur atan hian inbuatsaihna ngawrh taka kalpui nghal niin he inthlanna atan hian mawhphurhna hrang hrang pawh siam a ni tawh.

Niminpiah khan Mizoram-ah Sample 535 enfiah niin heng atang hian COVID-19 hri kai mi pahnih hmuhchhuah an ni.

Mizoram Pradesh Congress Committee (MPCC) chuan Law Minister, TJ. Lalnuntluanga chu ngaihdam dil tura an phut thu an sawi.