Lenkawl

Serchhip Chhim Veng mi leh tuna Aizawl Zarkawt-a khawsa mek, John Lalsangzuala nupui, Ruthi Lalhmangaihsangi chuan nimin khan Aizawl Civil Hospital-ah an fa pangana, mipa kg. 6 leh gram 220 a rit a hring a, Mizoram-a naupiang lian ber nia hriat a ni.

COVID-19 No Tolerance Fortnight hman mekah nimin a ni 5-na ah khan Serchhip District-ah Dan bawhchhia mi 56 man an ni leh a, an pawisa chawi tlingkhawm chu Rs. 11,400/- a ni. Nimin-a Dan bawhchhia man zinga mi 18 te hi Police te man niin Serchhip Town Area-ah mi 13 man an ni a, Thenzawl-ah mi 12 man niin Chhingchhip-ah mi 4, Baktawng-ah mi 6 leh Buangpui-ah mi 3 man an ni. Nimin-a mi 56 man hi he Fortnight hman mek chhunga Dan bawh-chhia man an tlem ber ni ala ni.

Serchhip District Hospital thuneitu ten an ruahman angin nimin khan Serchhip District Jail-a tang mek mipa 47 leh hmeichhia 4 bakah Jail enkawltute chu Rapid Antigen Test hmangin COVID-19 hri an kai leh kailoh enfiah an ni a, Sample enfiah 57 te chu hri lakah an him vek a ni. Hripui leng avanga Mizoram-a harsatna a thlen hnu khan Serchhip District Jail-ah hian hri laka himna turin nasa taka hmalak a ni a, Jail-a lut thar turte reng reng midang bula dah hmain ni 14 chhung khunghran phawt zel an ni bawk.

Chhekhnai Branch YMA te chuan an thu-dawn bawhzuiin nimin khan IOC Veng leh Bil-zel Veng inkar, NH. 54 thlang lawka Zu siamna hmun tichhiain Zu thlawrsa litre 20 zet an man a, a neitu nia hriat Bilzel Veng ami pawh Excise Department kutah hlan nghal a bawk.

Serchhip-a COVID-19 hri kai enkawl dam mi 6 te chu nimin khan anmahni enkawlna hmun atanga chhuahtir an ni.

 MZP in Saihapui V tlawh

Niminpiah-a Mizoram-a Sample enfiah atangin COVID-19 hri kai mi 38 hmuh leh an ni a, a hma ni aiin hri kai hmuhchhuah thar zat hi a tlahniam hret a ni.

Health Minister, Dr. R. Lalthangliana hovin niminpiah khan COVID-19 hri kai enkawl te chungchanga hmalakna hrang hrang thlirho a ni.

Mizoram Police te chuan nikum 2019 chhung khan tualthah thubuai 22 leh tualthah tum thubuai 13 an ziaklut.

Mizoram Pradesh Congress Committee (MPCC) chuan Mizoram sawrkarin COVID-19 hrileng a do danah politics a hlawkna tel tuma thusawi leh hmalakna tam tak a awm thin avanga mipui tawrhna thleng mek chu pawi an tih thu an sawi.

Health Minister, Dr. R. Lalthangliana chuan ZMC-a thawktute chu theihtawp chhuaha tan la mar zel turin a chah.

Niminpiah-a Lawngtlai-a vantlang inkhawm buatsaihtu, BJP Mizoram  Pradesh chu hri leng kara inkaihhruaina an zawmloh avangin Lawngtlai DC chuan Rs. 6000/- chawi turin a ti a, nimin khan BJP hian pawisa hi an pe nghal a ni.

Assam State chhungah Mizoram chak lakna kawngpui a danpin avangin Mizoram sawrkar chuan Manipur atanga Mizoram mamawh Gas leh tuialhthei phur turin nimin khan lirthei a thir tan a, heng lirthei te hi nimin khan Ch. Saprawnga Truck Terminal, Rangvamual atangin thlahliam an ni.

Nizan dar 6:30 khan Assam leh Mizoram ramri chungchangah Union Home Secretary, Ajay Kumar Bhalla hovin Mizoram Chief Secretary, Lalnunmawia Chuaungo leh Assam Chief Secretary, Kumar Sanjay Krishna te chuan Video Conference kaltlangin inbiakna an nei.

 LADC-ah Roll tlangzarh

Home Minister, Lalchamliana chuan Assam sawrkar thuneituten an mipui fuihpawrhin Mizoram mamawh phurluhna kawng an dan avangin mipuite harsatna tawh theih sukiang tura hmalak a ni tih a sawi a. Hetihlai hian Mizoram leh Assam ramri-a buaina thleng avangin nimin khan ramri vengtu, 5th Bn. IR te chu inralring tura hriattir an ni.

Veng entawntlak Serchhip Chanmari - Laldinpuia

COVID-19 No Tolerance Fortnight hman mekah nimin, a ni 4-na ah khan Dan bawhchhia mi 103 man leh an ni a, heng mite pawisa chawi tlingkhawm chu Rs. 12,100/- a ni. Nimin a Dan bawhchhia man zinga mi 22 te chu Police ten an man te an ni a, Serchhip khawpui chhung VC area hrang hrangah Dan bawhchhia mi 35 man an ni a, Thenzawl-ah mi 30 man niin Chhing-chhip-ah mi 5 man an ni a, Keitum leh Buang-pui-ah mi 4 ve ve man niin Thentlang-ah mi 2 leh Chhuanthar Tlangnuam-ah mi pakhat man an ni bawk.

Tun thla ni 19-a Serchhip damdawi In-a COVID-19 hri kai hmuhchhuah pahnih te chu enkawl dam niin nimin khan anmahni enkawlna hmun atanga chhuahtir an ni.

Nimin khan Serchhip-ah District Level Road Protection Squad chu Bawrhsap hova thukhawmin kawngpui venhim leh humhalh kawnga hmalak dan tur hrang hrang an sawiho.

Serchhip District Hospital OPD-a damlo inentir tur leh Casualty pan te zinga COVID-19 hri kai nia rinhleh te chu Damdawi In hungchhung lut lova Rapid Antigen Test (RAgT) an neih nghalna tur ruahmanna siam a ni.

Niminpiah a Mizoram-a Sample enfiah atangin COVID-19 hri kai mi 49 zet hmuh belh leh an ni a, heng zinga mi 43 te chu Aizawl khawpui chhung Veng hrang hranga hri kai hmuh te an ni.

Health Minister, Dr. R. Lalthangliana hovin nimin khan COVID-19 hri kai enkawl te chungchanga hmalakna hrang hrang thlirho a ni.

Mizoram-a COVID-19 hri kai zingah nunna chan an awm ta a, Mizoram-a COVID-19 hri kai enkawl zing ami, Lalsangkhuma, Aizawl Dawrpui Veng chu nimin khan Heart Attack avangin a boral a ni.

Health & Family Welfare Department-in COVID-19 dona kawnga an inbuatsaihna thlirhona chu nimin khan Health Minister, Dr. R. Lalthangliana hovin neih a ni a, he hunah hian hri kai ten an lo kawm hnaih tawh chhui hna thawh dan te thlirho niin hri an kaina chhuichhuah theihloh mi 51 an awm tawh thu tarlan a ni bawk.

 Tualthattu chungthu ngaihtuahna nei leh dawn

Niminpiah-a Mizoram-a Sample enfiah atangin COVID-19 hri kai mi 80 zet hmuhchhuah leh an ni a, heng zinga mi 76 te chu Aizawl District-a hri kai hmuhchhuah niin midang 4 te chu District dang-a hri kai hmuhchhuah an ni thung.

MHIP General Hqrs. chuan mipa te zingah hmeichhe chunga mawilo taka che duh an awm leh thin chu pawi an tih thu leh hetiang thil hi thleng tawhlo se an duh thu an sawi.

COVID-19 No Tolerance Fortnight hman mek ah Serchhip District-a Dan bawhchhia man pung zelin nimin khan Dan bawhchhia mi 119 zet man an ni a, an pawisa chawi pawh Rs. 12,800/- a tling a ni.

Kar hmasa Thawhtanni-a Serchhip khawpui chhung Veng pahnih-a COVID-19 hri kai mi 2 hmuh an nih avanga Chanmari Veng leh P&E Veng thenkhat te Containment Zone-a puan an nihna chu Contact Tracing leh Sample enfiah te thawh zawh a nih avang leh hrikai hmuhchhuah an nih tak loh avangin nimin khan Containment Zone-a puan an nihna chu DC in a hlip leh ta.

Niminpiah khan Serchhip-a TrueNat Laboratory-ah Sample 8 enfiah niin Rapid Antigen Test hmangin Sample 43 enfiah a ni bawk a, heng atang hian COVID-19 hri kai hmuhchhuah thar awm lovin Serchhip District-a hri kai hmuh chu mi 86 an la ni a, an zinga mi 66 te chu enkawl dam ni tawhin tunah hian hri kai enkawllai mi 20 an la awm mek a ni.

Mizorama thuziak thin inzawmkhawm pawl, Mizo Writer’s Association te chuan Serchhip pa lar, Pathian fakna hla a phuah te hmanga Mizo mipui ten an lo hmelhriat tawh, Upa T. Romama chu ‘Mizo Literary Award 2020’ an hlan dawn.

Chelsea Football Club tantu Serchhip-a intelkhawm, Mizo Chelsea Supporter's Club Serchhip Branch te chuan an dinchamphaphak vawi 2-na, Oct. 28, 2020 denchhenin nimin khan COVID-19 hripui leng avanga Serchhip-a veng pum-a inkharkhip mek, Chanmari Veng tan tanpuina sum Rs. 2000/-  an hlan a, he sum hi an pawl Treasurer, Lallawmzuali chuan Chanmari Veng VLTF te hnenah a hlan a ni. Mizo Chelsea Sup-porter's Club Serchhip Branch te hian an dincham pual hian tlawmngaia Thisen pek tumin rua-hmanna an siam a, amaherawh chu COVID-19 hri leng mek avanga a huhova punkhawm a remchan loh avangin tanpuina hi an pe ta zawk a ni.

Serchhip District Bawrhsap, Kumar Abhishek chuan Serchhip District chhunga NH. 54 kawngpui zauh tura mimal ram lak chungchangah zangnadawmna la tawh te tan huntiam, ni 60 a ral tawh avangin zangnadawmna la tawh te chu anmahni hmunhma chhuahsan vek turin a hriattir.

Mizoram Science, Technology & Innovation Council (MISTIC) bultumin nimin khan Serchhip District Level Consultation Meeting chu Serchhip DC Meeting Hall-ah neih a ni a, he thutkhawm hi District Bawrhsap, Kumar Abhishek chuan a kaihruai a ni.

Niminpiah khan Mizoram-ah COVID-19 hri kai mi 34 hmuhchhuah leh niin Mizoram-a hri kai hmuhchhuah pawh 2527 an tling ta.

Zirtawpni kalta a Serchhip leh Keitum inkar NH. 54 kawngchhuat tlabal chu lirthei kaltlang theiha siam a nih hnuah nimin khan kawngpui hi laihzauh hna thawh tan leh a ni a, he kawng en-kawl mektu NHIDCL hotute chuan kawngchhuat hi Meter thum (3)-a zauh tum a nih thu leh an hna hi kar hnih chhunga zawh an beisei thu an sawi a, mipuite tan harsatna alo awm rih a nih pawhin lo hrethiam turin an ngen bawk a ni.

Serchhip District Child Welfare Committee te chuan Serchhip-a COVID-19 hri kai zinga naupang te tanpuina atan nimin khan pawisafai an hlan.

Kar hmasa Thawhtanni-a Serchhip-a tual-chhung a hri inkaidarh nia hriat COVID-19 hri kai mi 2 hmuhchhuah ten an lo kawm hnaih te chhuina kal zelah nimin thleng khan Sample 742 lakkhawm a ni tawh a, heng zinga 317 te chu TrueNat Laboratory-a enfiah tura Sample lak niin Rapid Antigen Test hmangin Sample 425 enfiah a ni tawh bawk a, heng atang hian hri kai 17 hmuhchhuah an ni tawh a ni.

Serchhip-a COVID-19 hri kai enkawl mi pakhat chu enkawl dam a nih hnuah nimin khan chhuahtir niin Serchhip District-a hri kai hmuhchhuah zingah mi 66 te chu enkawl dam an ni ta.

 Sulhnu mobile app siam

Mizoram-ah COVID-19 hri kai enkawlna tur Dedicated Covid Health Centre (DCHC) khum 166 awmin COVID Care Centre (CCC) ah mi 2000 enkawl theihna tur a awm bawk.

Mizoram sawrkar-a Health & Family Welfare Department chuan Civil Hospital, Aizawl leh District Hospital hrang hranga COVID-19 dona atana mamawh em em Ventilator dah belh zel anih avanga an lawm thu an sawi.

Mizo Students’ Union (MSU) chuan Tripura Tuikuk ten Phuldungsei Village Council Area, Thaidawr tlang Mizoram lam chan-a Shiv Mandir sak an tumna hmuna a ruk a rala Minister hova sakhaw thil inthawina an nei mai chu an dem thu leh hriatthiam har an tih thu an sawi.

Health Minister, Dr. R. Lalthangliana chuan COVID-19 hri danna (vaccine) an hmuhchhuah hma chuan fimkhur theihtawpa kan fimkhur a ngai dawn tih Aizawl Municipal Corporation (AMC) huamchhunga inkharkhip chungchanga thuchah a sawi ah sawiin, He hripui vanga nunna chan kan awm loh hi kan duh ber leh kan duhthusam a ni,” a ti.

ZOFATE RAMRI CHINFEL A NGAI - Dr. Zaichhawna Hlawndo

 Serchhip Block MNF President pawh lo ni tawh, C. Darbiakthanga (61), New Serchhip Venglai chu nizan khan lungphuchawl in a boral a, Vawiin ah vuiliam a ni ang.

23 Sector Assam Rifles hnuaia Serchhip-a hmunpui nei Assam Rifles te chuan nimin khan Thekte khua ah COVID-19 chungchang inhrilh-hriatna hun an buatsaih a, he hunah hian Farkawn khuaa awm mek Assam Rifles te chuan mipuite chu hripui laka invenna tur kawng hrang hrang-hmaituamna vuah, kut silfai ngun, midang hlata awm leh puipunna thil huaihawtloh pawimawhna te an zirtir a. Hei bakah nitin khawsak mamawh Buhfai, Dal, Chini leh a dangte an sem nghal bawk.

Tunhnaia Serchhip P&E Veng-a COVID-19 hri kai hmuhchhuah ten an lo kawm hnaih nia hriat mi 21 te Sample lak chu niminpiah Pathianni khan TrueNat Laboratory-ah enfiah niin hri kai hmuhchhuah thar an awm lova, heti hian nimin thleng khan Serchhip District-a COVID-19 hri kai hmuhchhuah chu mi 86 niin mi 65 enkawl dam an ni tawh a, hri kai enkawllai 21 an la awm mek bawk. Hri leng avang hian Serchhip District-ah mahni In lama inkhunghrang mi 56 leh sawrkar hmunhmaa inkhunghrang mi 39 an awm bawk.

Serchhip Treasury Officer chuan nimin khan thuchhuah siamin sawrkar sum harsat avang leh Finance Department atanga hriattirna an hmuh angin October, 2020-ah sawrkar hnathawk Group C leh D te chauh hlawh pek tur a nih thu tarlangin, Treasury atanga Salary Cheque la tawh zawng zawng ten Treasury ah a rang lama thawn-kir leh vek tur a nih thu a tarlang a. Group C leh D te hlawh hi Nov. 2, 2020 atangin Cheque issue tur a nih thu pawh tarlangin, Group C leh D te hlawh chauh siam sak rih tur a ni tih a tarlang a. State Bank lam pawh Salary Cheque dawng rihlo tura ngen an nih thu a tarlang bawk.

Kar hmasa Thawhtanni-a Serchhip-a CO-VID-19 hri kai mi pahnih hmuhchhuah an nih avanga an lo kawm hnaih chhuina kal zelah mi za ruk chuang te Sample lak a ni tawh.

Presbyterian Serchhip Pastor Bial Kohhran Hmeichhia te chuan Serchhip-a COVID-19 hri kai enkawl mek te tan nimin khan Rs. 20,000/- an hlan.

COVID-19 No Tolerance Fortnight chu nimin atang khan Mizoram pumah hman tan niin Serchhip-ah pawh he Fortnight hi hman niin mipui ten Dan an awm tha viau chungin Dan zawmlo erawh mi 63 zet man an ni thung.

Insawifiah turin hriattir

Sawrkar hna diltu ten In lum atanga dilna an thehluh theihna tura MPSC Online Portal siam, mpsconline.mizoram.gov.in chu nimin khan hawn a ni.

Niminpiah-a Mizoram-a Sample enfiah atangin COVID-19 hri kai mi 46 zet hmuh leh an ni a, an zinga tam zawk chu Aizawl khawpui Veng hrang hranga hri kai hmuh te an ni.

Nimin khan Health Minsiter, Dr. R. Lalthangliana hovin naupang leh nausen COVID-19 hri kai te enkawlna tur a bika siam dan tur sawiho a ni.

Health & Family Welfare Minister, Dr. R . Lalthangliana leh Home Minister, Lalchamliana te kaihhruaina a nimin-a sawrkar mi pawimawh hrang hrangte thukhawm chuan tukin dar 4:30 atangin Aizawl Municipal Corporation (AMC) huamchhungah chawlhkar khat chhung Lockdown (inkharkhip) kalpui leh nise an ti.

Inrinni khan Serchhip District Level Task Force Committee on COVID-19 chu an Chairman leh Serchhip DC, Kumar Abhishek hovin DC Meeting Room-ah an thukhawm a, Vawiin atanga ‘COVID 19 No Tolerance Fortnight’ kalpui dan turte relin, Bawrhsap chuan kan ram chhungah CO-VID19 hri kai hmuhchhuah belh zel an nih avangin kan him tlanna tur ngaihtuah chu thil tul tak a nih thu a sawi a. Hri laka invenna damdawi ala awm loh avangin kan himna tura mithiam thurawn te kan zawm that a tul thu a sawi bawk.

Tunhnaia ruahsur avangin Serchhip leh Keitum inkar NH. 54 chu Sailiamkawn atanga KM khat vela hlan, City Light Quarry bulah Inrinni zing khan kawng chhuat balin kawngpui hi lirthei lian chi kaltlang theihloh in a awm a, Inrinni vek khan kawngpui enkawltu, NHIDCL te chuan kawngchhak lam laiin lirthei kaltlang theih turin an siam nghal a, duh anga a that tawk loh avangin nimin khan a siamthat hna hi thawh leh niin tunah chuan lirthei chi hrang hrang tan kaltlang theih a ni leh tawh a ni.

Serchhip Thalai Pawl (STP) te chuan Ser-chhip khawpui chhung hmun hrang hrangah in-rinni khan hmai tuamna (Face Mask) an sem. Serchhip Thalai Pawl te hian COVID-19 in Serchhip khawpui a luhchilh mek avangin mipui te fimkhur turin an chah tih sawiin, chutihrual chuan mamawhna hrang hrang avanga pawn lama chhuak kan awm reng avang leh heng mite hian hmai tuamna hi an mamawh avangin Face Mask hi an sem ta tih an sawi a, sawrkar thuchhuak te zawma khawlai lengchhuak reng reng chuan tha taka Face mask vuah vek turin an ngen bawk.

Zirtawpni leh Inrinni-a Sample enfiah atangin Serchhip District-ah COVID-19 hri kai mi 5 hmuh leh an ni.

 Aieng herna tih changtlun tum

Inrinni-a Mizoram-a Sample enfiah atangin COVID-19 hri kai mi 58 zet hmuhchhuah leh an ni a, Mizoram-a COVID-19 hri kai enkawllai pawh mi 249 zet an ni leh tawh.

State Election Commission (SEC) chuan Aizawl Municipal Corporation (AMC) inthlanna neih hun tur hriat theih ala nih loh thu an sawi.

MNF Party MLA 12-ten ZPM Legislature Party (ZLP) Leader Lalduhoma dan bawhchhiaa puha MLA atanga bân tura Assembly Speaker, Lalrinliana Sailo an ngen chungchangah thutlukna puan hun tur sawi theih a la ni lo a, hemi chungchangah hian Speaker Lalrinliana Sailo chuan theihtawp a dan en a nih tur thu a sawi.

Chief Minister, Zoramthanga chuan, “Kan duh ber chu ‘Zoram mipuite hripui leng lakah him ila, he natna hi inkaidarh zel lo ila, thihpui awm lo bawk ila’ tih hi a ni,” a ti.

Vawiin atang hian Mizoram pumah ‘COVID-19 No Tolerance Fortnight’ hman a ni dawn a, hei hi COVID- 19 avanga khuahkhirhna siam te mipuiin nunphung thlak danglam khawpa an hman theih nana ruahman niin COVID-19 dona kawnga Dan siam hrang hrangte chu khauh taka kenkawh a ni dawn a ni.

Serchhip District-ah COVID-19 hri kai enkawllai mi 16 awm mekin nimin khan hri kai pakhat chu enkawl dam a nih hnuah chhuahtir a ni.

Mizoram Baptist Kohhran-a rorelna sang ber dawttu, Area Baptist Council (ABC) inkhawmpui chu naktuk Pathianni hmang hian ABC tinah neih tur ni mah se hri leng avanga neih theih a nih tak loh avangin nimin atang khan ABC thenkhat ah chuan rorelna neiin Vawiin a rorel tur engemaw zat an awm bawk.

Serchhip Police te chuan tunkar Nilaini zan khan Dan lova Mizoram-a rawn phurhluh Kuhva rah tam tham tak manin Customs Department kutah an hlan nghal.

Tunhnaia Mizoram leh Assam ramri-a buaina thlenga Mizoram chhan nana thawktute puihna tura sum hmuh Rs. 88,141/- chu nimin khan ramri-a Duty te hnenah hlan a ni.

PHE Serchhip WATSAN Division-a Sr. Executive Engineer, Er. F. Lalsanglura lehkhabu ziak, 'Tui Ramvachal (The Water Heroes)' chu nimin khan MJA Serchhip District President, Kapliana Pachuau chuan a tlangzarh.

Tun hi a hun tak chu a ni - Laldinpuia

Central YMA in mipuite chah

Niminpiah-a Mizoram-a Sample enfiah te atangin COVID-19 hri kai mi 18 hmuhchhuah an ni a, an zinga tam ber te hi Aizawl District a hri kai hmuhchhuah niin Aizawl District atang hian hri kai mi 11 hmuhchhuah an ni a, Serchhip District-ah mi 4 leh Lunglei District-ah hri kai mi 2 hmuh niin Lawngtlai District-ah hri kai mi pakhat hmuh a ni bawk.

Karleh Thawhtanni, October ni 26 atanga chawlhkar hnih awh tur ‘COVID-19 No Tolerance Fortnight’ hman dan tur kalpui dan tura inrawnkhawmna chu niminpiah khan neih a ni.

School Education Minister, Lalchhandama Ralte hova nimin-a sawrkar mi pawimawh thukhawm chuan tunhnai ah Mizoram-a COVID-19 hri kai an pun avang leh zirlaite zingah hri kai an awm zel avangin 'No Tolerance Fortnight' hman hun, chawlhkar hnih chhungin School chawlh leh rih phawt nise an ti.

MZP General Hqrs. chuan Home Minister in ramri buaina hmun hrang hrang ala tlawh lo chu hriatthiam har an tih thu sawiin, Chief Minister hriatpuina lova Official te hmalakna chu an dem thu an sawi bawk.

IWRD in bung thar kai niin sawi

Science, Technology & Innovation Policy (STIP) 2020 duan kawnga inrawnkhawmna chu nimin khan Video Conference kaltlangin rampum ah neih a ni a, State 26 leh UT 4 atangin Chief Minister, Deputy Minister leh Minister hrang hrang te telin Mizoram atangin RD Minister, Lalruatkima chu a tel a ni.

Mizoram-ah niminpiah khan COVID-19 hri kai mi 31 zet hmuh-chhuah leh an ni a, heng zingah hian zirlai Hostel-a lut tur mi 8 zet an tel a ni.

Mizoram Pradesh Congress Committee (MPCC) chuan Sawrkarin hmingthat a tum lutuk avangin COVID-19 a darh tha leh niin an sawi.

Nizan hmasa zanlai vel khan Keitum khua ah Scooty pakhat chu hal ni ngeia hriatin a kang a, hemi chungchang hi Serchhip Police te chuan an chhui zui mek a ni.

Ministry of Home Affairs-a Joint Secretary (North East) Satyendra Garg chuan nimin khan Mizoram Governor, P.S. Sreedharan Pillai leh Chief Minister, Zoramthanga te chu an chenna In ah kawmin Mizoram leh Assam ramri inkara innghirnghona awm chinfel chungchanga hmalakna a sawipui.

Serchhip bialtu MLA, Lalduhoma chuan Mizoram University hnuaia Under Graduate result chhuaka Serchhip bial chhung atanga pass te chu a lawmpui thu a sawi a, Govt. Serchhip College in result tha tak a neih bakah Serchhip bial mi te pawhin Mizoram-a College dangah result tha tak an neih thu pawh tarlangin, Samuel Malsawmzuala chu B.A (Economics)-ah Topper niin Arts pumpuiah mark hmu sang berin Gold Medalist a nih thu leh an hotute sawi danin, a mark hmuh hi Record a tlin an rin thu pawh a sawi a. Amah hian IAS nih a tum niin Pathian leh Bial mipuite zarah MLA a ni ve zel a nih chuan, Malsawmzela hi MLA Fund atangin puih ngei turah a ngaih thu a sawi bawk a. Pass thar te chu a lawmpui thu leh an zir zelna turah duhsakna a hlan thu a tarlang bawk a ni.

Serchhip District Bawrhsap chuan COVID-19 hri leng mekah sawrkar Dan siam te zawm vek tur a ni tih a sawi.

COVID-19 hri leng laka mipuite an him theih dan tur ngaihtuaha nimin-a District Bawrhsap hova sawrkar mi pawimawh te thukhawm chuan COVID-19 laka himna tura Dan te khauh lehzuala kenkawh nise an ti.

Niminpiah-a Serchhip-a Sample enfiah atangin COVID-19 hri kai mi pakhat hmuh belh leh niin nimin khan hri kai pathum hmuh belh leh a ni bawk a, Serchhip District-a COVID-19 hri kai hmuhchhuah chu mi 80 tlingin tualchhunga hri kaichhawng an pung chho chak hle a ni.

Tunhnaia Mizoram leh Assam ramri-a buaina thleng chinfel a nih theih nana hmalak dan tur chungchangah nimin khan State pahnih Home Secretary te chuan Lailapur-ah inbiakna an nei.

Mau chungchang zirhona nei

Niminpiah-a Mizoram-a Sample enfiah atangin COVID-19 hri kai mi 30 zet hmuhchhuah an ni a, Mizoram-a COVID-19 hri kai pawh mi 2310 an tling tawh.

ZPM Vice President, K. Sapdanga chuan ZPM in sawrkarna an lo chang ve thei anih chuan Minister-te bathlara thlawhhma neih ngawt ang chi chu tihbo an tum thu a sawi.

MZP General Hqrs. hruaitute chuan nimin khan Chief Minister, Zoramthanga chu a Pisa-ah hmuin tunhnaia ramri-a buaina thleng kaih-hnawih leh hmalak zel dan tur chungchang an sawipui.

Karleh Thawhtanni atanga tan turin Mizoram-ah 'COVID-19 No Tolerance Fortnight' hman tum a ni.

Mizoram Public Service Commission in PWD hnuaia Mizoram Engineering Service (Civil Engineering) atana mi 17 a lak thar turah C. Vanlalrindika S/o C. Lalnunsanga, Serchhip Field Road chu tling zingah a tel.

Serchhip District-a COVID-19 hri kai hmuh atangin zaa 84.21 te enkawl dam an ni tawh.

Tunkar Thawhtanni-a Serchhip-a COVID-19 hri kai hmuhchhuah ten an lo kawm hnaih te chhuina kal zelah ni thum chhungin Sample 259 laa enfiah a ni.

Serchhip Sub-Hqrs. YMA in tunhnaia ramri a buaina thleng avanga Mizoram chhan nana thawktute tana Serchhip Town chhung YMA Branch 21-a tanpuina bawm a hun ah nimin tlai thlenga sum tla tlingkhawm chu Rs. 83,211/- zet tlingin Vawiin ah semchhuah a ni ang.

Directorate of Science & Technology hnuaia Mizoram Remote Sensing Application Centre (MIRSAC) Aizawl buatsaihin nimin khan Serchhip District-a FOCUS hnuaia thawk te tan Geographic Information System (GIS) chungchang zirhona neih a ni.

India rama Police an Duty laia hmelma te kut-a nunna chan te hriatrengna leh zahna lantirna hun, ‘Police Commemoration Day’ chu nimin khan rampum ah hman niin Serchhip-ah pawh SP Office tual-ah he Ni hi urhsun taka hman a ni a. Kum 1972 hnuah Mizoram-ah hmelma kut-a thi Police mi 56 an awm tawh a ni.

Mizoram University (MZU) chuan nizan hmasa khan Under-Graduate Result tihchhuak in Govt. Serchhip College pawhin an titha hle.

Aizawl atanga Khawlailung pan-a kal Bike pakhat-a chuang naupang kum 8 mi, Aizawl Dawr-pui Veng-a khawsa chu Serchhip leh Thenzawl inkar-ah Bike atanga a tlak avangin a boral.

Niminpiah lam-a Serchhip-a COVID-19 hri kai hmuhchhuah mi pahnih te lo kawm hnaih chhui zuina kal zelah Serchhip-ah COVID-19 hri kai mi 8 hmuh belh leh an ni.

Inrawnkhawmna neih a ni

Niminpiah-a Mizoram-a Sample enfiah atangin COVID-19 hri kai mi 27 zet hmuh leh an ni a, an zinga tam zawk hi tualchhunga hri kai hmuhchhuah tawh te nen inkawmhnaih atanga hri kai hmuhchhuah an ni.

P&E Minister, R. Lalzirliana chuan nimin khan Assam leh Mizoram inrina, Thinghlun khua tlawhin ramri-a duty-te chu ram leh hnam hum-halh nana duty an nih angin theihtawp chhuah zel turin a sawm.

Mizoram Sawrkar-a Planning & Programme Implementation Department leh Mizoram Entrepreneurship Monitoring Committee (MEDMOC) in Indian Institute of Management, Kolkota nen a tangkawpa an buatsaih, 'Mizoram Kailawn 2020-Accelerator' chu chhawpchhuah a ni ta.

Mizoram-a Zu khapna dan, Mizoram Liquor Prohibition Act 2019 hman hnua dan kalha Mizoram-a Sap Zu phurhluh Excise & Narcotics Department in an man te chu nimin khan Excise & Narcotics changtu Minister, Dr. K. Beichhua hovin leihbua-a tihchhiat a ni.

Nimin khan Serchhip-ah COVID-19 hri kai mi pahnih hmuhchhuah niin heng hri kai hmuhchhuah thar te hi hri an kaina hriat ala ni lo a. Hetianga zinchhuahna nei lemlo leh hri kaina chhan hriatloh kan neih tak avang hian kan khawpui hi kan hri leng buaipui mek hian engtiang chiahin nge min lo chim tawh tih hriat a har ta hle mai a. Hei kai hmuhna VC Area-ah inkharkhip te puan ni mah se khawpui chhung Veng hrang hrangte hi in-kalpawh nasa tak kan la nih bawk si avangin hri hian a thlen chin tur hriat a har ta hle mai a, chutihrual chuan heng hri kai kan hmuh te hriatchhuah an nih hma hian hri hian min lo luhchilh hneh tawh hle em ni tih pawh ngaih-tuah tham tak a ni bawk.

Kan Chanchinbu enkawltute Veng ah nimin-a COVID-19 hri kai hmuhchhuah niin Total Lockdown puan nghal a ni a. Hri kai hmuhchhuah te hi kan chanchinbu enkawltute nen lo inkawmhnaihna neilo mah se mipuite kan him zawk theihna turin hri kai ten an kawmhnaih te chhui hna thawh chhung chu dan pangngaiin chanchinbu a rawn chhuak mumal lo deuh dawn a, LENKAWL chanchinbu latute lo hrethiam hram hram turin kan ngen a che u. Hun reilote ah Dan pangngaia rawn tihchhuah zui leh theih beisei niin PDF Copy chhiar duh tan Ph. No. 9862647655 leh 8974773210-ah te in hriattir theih a ni ang. Editor, LENKAWL Serchhip Nitin Chanchinbu

Serchhip District Bawrhsap chuan ei leh in lakkhawm chungchanga mipuiten harsatna an tawh loh nan thuchhuah siamin mahni ei leh in (essential commodities) mamawh tawk aia tam inchhekkhawl (hoarding) loh tur a ni tih a tarlang a. Thil zuartute leh sumdawngten bungrua chheprelh emaw lakna aia to uchuak emawa hralh loh tur a nih thu pawh tarlangin, MRP aia man to-a hralhte chu dan anga hrem an ni ang tih a tarlang bawk.

Serchhip District Bawrhsap chuan Chanmari Veng huamchhung leh P&E Veng-a Little Flower Convent School leh Soil Peng inkar te chu CO-VID-19 hri kai hmuhchhuah an nih avang leh hri kai darh zel theihna a nih avanga Contact Tracing mumal leh chak taka kalpui a nih theih nan Containment Zone-ah a puang a, mipuite chu mahni In-ah inkharkhip vek tura tih niin dawr leh hnathawhna hmun te pawh khar tura tih a ni a, sawrkar Office leh zirna In te erawh chu sawrkar thupek awmsa \ha taka zawm chunga kal chhun-zawm tur niin mipui dawr theih erawh a ni lo thung a ni.

Nimin khan Serchhip-ah COVID-19 hri kai mi pahnih hmuhchhuah niin an pahnih hian hri an kaina hriat a ni lo ve ve a, hei vang hian nimin atang khan Veng thenkhat ah chuan inkharkhipna puan nghal niin hri kai ten an lo kawm hnaih te chhui hna pawh ngawrh taka thawh nghal a ni.

Deputy Speaker in tlawh

Nimin khan Horticulture Dpartment changtu, Chief Minister, Zoramthanga hovin nikum 2019-2020 chhunga Horticulture Department hmalakna leh kumin kum kallai mek 2020-2021 chhunga hmalakna hrang hrangte thlirhona leh sawihona neih a ni.

Health & Family Welfare Department-in COVID-19 hripui leng dona kawnga an hmalakna bakah Mizoram hriselna atana Department hmalakna hrang hrang thlirhona chu nimin khan neih a ni.

Tunhnaia Mizoram leh Assam ramri-a buaina thleng chungchangah Union Home Minister, Amit Shah chuan nimin khan Mizoram Chief Minister, Zoramthanga chu rawn biain boruak tha zawk a awm zel nan theihtawp a chhuahpui tur thu a rawn hrilh.

Serchhip Sub-Hqrs. YMA chuan nizan khan Serchhip Bazar-a an Office-ah \hutkhawm hmanhmawh neiin tunhnaia Assam leh Mizoram ramri a thil thleng chungchang leh hemi kaihhnawih a hmalak dan tur te an sawiho a. Ramri-a Duty te tanpuina atan Town Branch tinah Vawiin atang hian Bawm hun nise an ti bawk.