Latest News

Myanmar atangin raltlan an rawn luh belh zel

Kar kalta chhung khan Champhai District-ah Myanmar atanga raltlan 200 vel an lo luh belh leh a, lo lutte zingah hri kai hmuhchhuah an awm lo.

Tuipuiral Group YMA President, MC. Lalramenga sawi danin nimin thlengin Tuipuiral khaw hrang hrangah Myanmar atanga Mizorama raltlan lo lut mi 1,419 an awm mek a. Raltlante hi Mizoram-a an rawn luh hlimin dahhran (quarantine) nghal zel an ni a, Ni 10 hnuah Covid hri an kai leh kai loh RAgT hmanga endik zel an niin tunhnaiah hri kai hmuh an awm rihlo a ni. Heng raltlan te chen lailawkna tur hian Relief Camp pahnih, mi 200 vel khawsak theihna tur chu Zawlsei khaw kiangah sak zawh a ni tawh a, tunkar hian Vaphai leh Farkawn-ah Relief Camp hi sak leh turin ruahmanna kalpui mek a ni. Hetihlai hian Tiau lui kam velah kar kalta khan mi 460 chuang raltlan an awm a, a zinga mi 200 vel chu tunhnaiah Mizoram-ah an lo lut leh tawh a ni.

Mizoram-ah COVID-19 hri leng a hluar avangin raltlan 3,200 vel chu an ram lamah an kir chho leh nia hriat a ni bawk a, heti hian Mizoram-a Myanmar raltlan awm mek zat hi mi 13,000 vel an nih rin a ni a, an zingah hian Chin State Chief Minister, Lian Luai tiamin dan siamtu pawl-a thlantlin mi 24 an tel a. An ramah chuan MP an ti vek a, Dan siam pawl-a thlantlin te hi a tam ber chu Aizawl District-ah an awm a, hmun danga awm tlem an awm bawk ni a thudawn niin heng raltlan te tan hian mimal leh pawl hrang hrang ten thilpek chi hrang hrang an hlan thin bawk a ni.

Comments

Chhiar Hlawhte