Latest News

Chanchin thar thenkhat :

CSR atangin bungrua dawng

Lunglei District Bawrhsap, Kulothungan A, IAS hmalaknaa India ram chhung hmun hrang hranga NGO foundation/Company/Corporation te CSR kaltlanga Lunglei District bakah chhimlam mipuite tana hlawkpui leh tangkaipui theih tur Medical lam kaihhnawih bungraw hrang hrang dil zingah ACT Grants & Swasth Alliance, New Delhi atangin Oxygen Concentrator 40 leh BiPAP Ventilator 6, a thawn man te nen cheng nuai sawmnga hu dawn a ni a. Hei bakah hian O2 for India Org atangin Oxygen Concentrator 5, a thawn man te nen cheng nuai ruk hu dawn a ni bawk a. Heng Medical Equipments te hi nimin khan H&FW Department hnena Lunglei DC chuan a hlan a. Lunglei District chhunga CCC, 4C, CQC leh mamawhna dangah te sem chhuah leh tur a ni ang.


MRB in Boxer te sum hlan

Mizoram Rural Bank (MRB) chuan WBC Youth Super Feather Weight Champion nilai, Lalrinsanga Tlau leh Boxer, NT. Lalbiakkima te chu an kalzelna tura senso phuhruk nan nimin khan sum fai Rs. 50,000/- ve ve an hlan a, heng sum te hi MRB Chairman, V. Jaya Chandra hnen atangin an dawng a ni. Nimin-a sum inhlanna hun hi Sports Minister, Robert Romawia Royte Pisa-ah neih niin Sports Minister chuan MRB in infiammi te an ngai pawimawh chu lawmawm a tih thu leh hun lo la awm turah pawh tun aia nasa zawka an luanchhuah zel a rin thu a sawi a. Nasa zawka hmasawn zel tura MRB a duhsak thu a sawi bawk.


CAU Selesih an penchhuak

College of Veterinary Science & Animal Husbandry and Krishi Vigyan Kendra, Central Agriculture University, Selesih a thawktute chuan COVID-19 hri leng meka hman turin an hlawh thawhkhawm Rs. 5,26,720/- chu nimin khan Chief Minister Relief Fund-ah an thehlut a. Hemi rual hian District pathum-a kuthnathawka eizawng te tanpuina turin Rs. 1,76,720/- hu Ar leh Ar note bakah a chaw te an pe nghal bawk.


BJP ten hmalakna chhuang

Prime Minister Narendra Modi-a’n India khua leh tui, mi tupawh kum 18 chunglam te Covid Vaccine a thlawna pek an nih tur thu a puang chu BJP Mizoram Pradesh President, Vanlalhmuaka chuan ropui an tih thu leh an chhuang takzet tih nimin-a Aizawl-a an Party Office-ah thuthar theh-darhtute a kawmna ah a sawi a. Hei bakah hian Pradhan Mantri Garib Kalayan Ann Yojna (PM-GKAY) kaltlanga Frea Ration May leh June thla a a thlawna buhfai sem, November thla thlenga chhunzawm tura ruahmanna siam a ni pawh n chhuang hle tih sawiin, Prime Minister leh a kaihhruai BJP sawrkar thlawp turin mipuite an sawm bawk.


PC Party in sawrkar phut

Peoples' Conference (PC) Party chuan nimin khan thuchhuah siamin heti khawpa CO-VID-19 hripui thawhnihna in kan ram min nuai tawh laia, a doletna tur kawng thlirhona neih thin ah reng reng Mizoram sawrkarin Political Party te a telh ve ngai miah lo chuan MNF sawrkar in hripui dona kawngah mipute hmakhua aia MNF Party mal hamthatna tur ringawt a engto zawk zia a tilang chiang hle ah an ngai tih an tarlang a. Tun ang hun khirh takin Mizoram min tlakbuak mek lai hian Party feeling dahtha a eptu party te nena lungrual taka hripui do tlan a hun tawh tih hriaa hma la turin sawrkar an phut thu an sawi bawk.


CMRF dinhmun tlangpui

COVID-19 dona atana Chief Minister’s Relief Fund-a sum thawh tlingkhawm chu nimin tlai thleng khan Rs. 23,76,22,740/- a tling tawh a, heng atang hian Rs. 23,42,56,970/- chu hmanral ni tawhin tunah hian Rs. 33,65,770/- ala awm mek a ni.

Comments

Chhiar Hlawhte