Nimin June 15, 2021 kha Mizoram-a tlawmngai pawl lian ber, YMA dinchamphaphak vawi 86-na a ni a, Serchhip-a YMA Branch hrang hrangte chuan kumin a YMA Day hi hri leng karah inkaihhruaina zawm chungin an huamchhung ah theuh a remchan dan angin an hmang a ni.
YMA Day vawi 86-na pual hian Serchhip Sub-Hqrs. YMA chuan Serchhip District chhunga COVID-19 hri kai enkawlna hmun hrang hrang 8-a hman turin Rs. 20,000/- a hlan bakah Home hrang hrang pathum-ah Rs. 2000/- theuh an hlan bawk. Serchhip Darnam Branch YMA chuan Mizoram Aero-Sports Association (MASA) te nen tang tlangin Paragliding Take-Off Point-ah thingtiak phun hnatlang an nei a. Serchhip Dinthar Branch YMA chuan zingkar-ah Hospital Poor Fund hlanin an huamchhunga damlo an kan bakah chhun lamah Thlanmual ramah thingtiak an phun bawk a, Serchhip Chhim Veng Branch YMA te chuan an Branch huamchhunga damlo te kan-in hun an hmang bawk a ni.
Serchhip Vengchung Branch YMA chuan an huamchhunga chhiat tawk an awm avanga hun ruahman sa thulhin Hospital Poor Fund-ah pawisafai an hlan a, Saron Branch YMA chuan zingkar-ah vengchhung thenfai hnatlang neiin chhungkaw 4 te tanpuina an pek bakah HSLC Pass thar te chawimawina hun an buatsaih a. Field Veng Branch YMA chuan zingkar-ah Thlanmual samfai hnatlang neiin chhun lamah Executive Member ten hnatlang an nei chhunzawm a. Serchhip Hmar Veng Branch YMA Executive Member te chuan an YMA Hall-ah YMA Day puala hun tawite hmangin YMA Hall tihfai hnatlang an nei nghal a. Chanmari Branch YMA chuan zingkar-ah Section tinah hnatlang neiin chhun lamah YMA ram hungin hruaitute an hnatlan bakah HSLC result chhuaka zirlai pass thar te chawimawina hun an hmang bawk.
Serchhip Kawnpui South Branch YMA chuan chhungtin te mahni In leh a vel tifai tura ngenin heng an thenfaina te hi chawhnu lamah Branch Executive Member ten Motor hmangin an paih sak a, Serchhip Kawnpui North Branch YMA chuan zingkar-ah hnatlang neiin an YMA Hall hmun an samfai a. P&E Veng Branch YMA chuan YMA Hall leh a vel tifai leh YMA Information Line siamthat hnatlang Branch Executive ten an nei bawk.
Chhekhnai Branch YMA te chuan Zoar Deprived Children Home leh Old Age Home te thilpek pein chhun lamah Kuang siam hnatlang an nei thung a, New Serchhip Bazar Branch YMA zingkar-ah Zoar Deprived Children Home leh Mercy Hospital-ah thilpek hlanin chhun lamah tingtiak an phun bakah nikum lama an phun tawh se enkawl zui hna an thawk a, New Serchhip North Branch chuan zan lamah an huamchhunga zirlai tithate chawi-mawina hun an hmang a. Bukpui Branch chuan an huamchhunga chhungkaw 5 te hnenah tanpuina hlanin zirlai titha chawimawina hun an buatsaih bawk.
Chhiahtlang Kawn Veng Branch chuan an huamchhunga damlo mi 8 te kanin chhun lamah Branch YMA Executive Member ten hnatlang an nei a, Chhiahtlang Chhim Veng chuan zingkar-ah YMA Information Mike hmangin YMA Kum-puan ‘Zirna uar’ leh tlawmngaihna chungchang thuchah sawiin, HSLC pass thar te chawimawina hun an hman bakah VLTF tanpuina an hlan a. Chhiahtlang Chanmari Branch chuan hri leng avangin an hun ruahman angin an hmang thei lova, Chhiahtlang Zotuithiang Branch YMA pawh an huamchhung ah COVID-19 hri kai hmuhchhuah thar an awm avangin chawp-chilh takin Programme ruahman an thulh a, an huamchhunga damlo mi 2 te erawh an kan thung. Chhiahtlang Hmar Veng Branch chuan zingkar-ah zirlai titha chawimawina hun hmangin an huamchhunga damlo mi 2 an kan bakah COVID-19 avanga inkhunghrang leh hri kai enkawl mek te hnenah pawisa leh chawhmeh an hlan bawk.
Comments
Post a Comment