Latest News

Chanchin thar thenkhat :

Inkharkhip kalpui zel dawn

Mizoram-a COVID-19 hri leng avanga in-kharkhip burna hman mek tukin dar 4:00-a tawp tur chu chawlhkar khat dang atan pawhsei leh a ni. Inrinni khan Mizoram Sawrkar chuan hemi chungchangah hian thuchhuah siamin lockdown inkaihhruaina hman lai mek chu tun thla ni 14 zing dar 4:00 thleng khauh taka hman chhunzawm a ni dawn tih a puang a. Mizoram chhungah COVID-19 hri leng mekin ziaawm lam a pan theihloh avangin Sawrkar chuan inkhuahkhirhna khauh taka kalpui chhunzawm zel tha a ti a ni. Mizoram Kohhran Hruaitute Committee (MKHC) chuan Inrinni vek khan Chief Minister, Zoramthanga chu a pisa-ah hmuin tuna hripui leng mek chungchang an sawiho a, tun dinhmun ah hri vei zat an la tlakhniam theih chuanloh avang leh, mitthi an pun zel avangin mipui him zawk nan a pangngai a inkharkhip chhunzawm tha a an hriat thu an sawi a ni.


Vaccine pekchhuah tan a ni

Covid-19 laka invenna tur vaccine kum 18-44 inkar te tan pekchhuah tan a ni leh tawh a, vaccine hi sawrkar laipui atangin dose 16,340 chu Mizoram sawrkarin a dawng a, ruahman dan chuan June thla chhung hian dose 25,380 dawn leh hman an beisei a ni. National Health Mission a Mission Director Dr. Eric Zomawia chuan Sawrkar laipui leh damdawi siamtu company lam te ruahmanna siam angin damdawi hi kan dawng tih a sawi a, June thla chhung hian dose 18,180 leh dose 7,200 chu dawn tura an rawn ruahman sak tih sawiin, tuna vaccine an pek pawh hi kum 45+ te dose tur atanga puk a nih thu a sawi bawk. Department lam chuan kum 45 chunglam hi la tur an awm meuh tawh lo tiin, 80-85% vel pek a nih tawh thu an sawi bawk.


CYMA in hriatthiam har ti

Central YMA chuan Siaha Joint YMA President, HVL. Hruaidawngzela tun thla ni 2 zan-a Council Vaih VLTF, Siaha duty ten kut an thlak chu hriatthiam har an tih thu leh an dem thu an sawi.


YMA leh VLTF duty ten man

Inrinni tlai khan Kolasib Sub-Hqrs. YMA Ruihhlo Do Volunteer leh Gosen Veng VLTF te tangkawp Kolasib Rengte tlangsang bulah mipa leh hmeichhe awm tha duhlo, hnamdang driver te hnen a inzuar thin mipa 2 leh hmeichhia 4 an man a. Thudawn danin heng hmeichhe 4 te hian hnamdang lirthei te chu lo pharding in kawngsir hmun fianrial ah an tawmpui thin a, hemi hlan hian mipa te hian Motor-a ruk tur awm ang ang an ru thin a ni.


MZP in Myanmar atanga raltlante an tanpui

MZP leh Mizo Society of America (MSA) tangkawp chuan June 1-4, 2021 chhung khan Siaha leh Lawngtlai District chhunga Myanmar raltlante tanpuina an pe. Tanpuina sem tur hian MZP Presidcent, B. Vanlaltana leh hruaitu dangte an kal a, June 2, 2021 khan Siaha District khaw panga-ah raltlante chhawmdawl nan Buhfai, Alu, Dal leh sum fai thahnem tak an hlan a. Raltlante chuan an riltam hlau a, an harsatna hriatthiam pui em emtu MZP leh Mizo Society of America te chungah thinlung takin lawmthu an sawi a ni. June 4, 2021 khan Central Young Lai Association (CYLA) hruaitute hnenah Rs. 1,20,000 an hlan leh bawk a ni.


Vawk thi 5,235 tling tawh

Mizoram-a Vawk pulhri hlauhawm, African Swine Fever (ASF) leng mekah nimin khan Mizoram hmun hrang hrangah Vawk thi 60 awm belh lehin nimin thlenga Vawk thi chu 5,235 zet a tling tawh a ni.

Comments

Popular News (Last 30 Days)