Latest News

Health Minister in a bial mipui thlaphang lo turin chah

Health Minister Dr.R. Lalthangliana chuan nimin khan a bial chhunga awm, District Hospital Hnahthial tan COVID-19 hri dona atana hmanrua pawimawh tak tak pein, a bial mipuite chu thlaphang lo turin a chah nghal bawk.

Heng hmanrua te hi Health Minister hian a aiawh tirin District Hospital hi thlenpui a ni a. Hnahthial District-ah COVID-19 hri kai hmuhchhuah an awm ta nual chu pawi a tih thu a sawi rualin tumah in dem lo turin bial mipuite a chah a, “COVID-19 hian tumah a thliar loh avangin kan duh leh tum vang reng ni lovin hri kai thei theuh kan ni a, indem hman kan ni lovin theihtawp chhuah tlangin lungrual taka hri do beihpui hi kan thlak reng a ngai zawk a ni,” a ti a. Chuvangin Sawrkar-in tih tur leh tih loh tur a tihte hi thuawih taka zawm tlang zel turin a bial mipuite chu a chah bakah lungngai leh thlaphanga awm lo turin a chah bawk.

Hnahthial District-ah hian COVID-19 hri kai 63 hmuhchhuah an ni tawh a, heng zinga 29 te chu enkawl dam ni tawhin enkawllai 34 an la awm a, hri kai hmuhchhuah 63 zinga a tam zawk, mi 35 te hi June thla chhunga hmuhchhuah an ni bawk.

Comments

Chhiar Hlawhte