Latest News

CLP Leader Zodintluanga’n PMAY-U hmanga Party Politics khelh pawi a tih thu a sawi

Congress Legislture Party (CLP) Leader, Zodintluanga Ralte chuan sawrkar laipui Flagship Programme, Housing For All (HFA) tia hriat lar tak, Pradhan Mantri Awas Yojana-Urban (PMAY-U) hnuaia In sakna tur hmanga MNF sawrkarin Party politics a khel chu pawi a tih thu a sawi.

Nimin-a thuchhuah a siamah CLP Leader, Zodintluanga Ralte chuan PMAY-U hnuaia In sakna tur sum dawngtu tur thlanfel diam tawh chu tunlai hian MNF sawrkar chuan tidanglamin, an Party-a hming pelut ve lote chuan an sum dawn tur an chan ang tiin party hamthat nan khaw hrang hrangah hman an tum nia sawiin, pawi a tih thu a sawi a. “He Scheme hnuaia In sak tanpuina dawng tura thlan tawhte hi sawrkar laipui pawmpui thlap tawh, an hminga sum a dah hran thlap tawh a nih avangin MNF sawrkarin a nawm a maka a tihdanglam theih a ni lo,” a ti.

Zodintluanga chuan PMAY-U chu June 25, 2015 khan India sawrkar chuan a kalpui tan tih sawiin, “Congress party-in sawrkarna kan chelh ve lai khan party sawi hauh lovin thahnemngai takin a buaipuitu UD&PA Department chuan 'demand/need based'-in a kalpui a, a diltute In leh lo endik vek a ni a, endikna report chu District tinah District Screening Committee (DSC)-ah pharhin DSC-in BLC Scheme hnuaia In sak tanpuina dawng thei tura pawm zat beneficiaries 17,670 hmangin khaw 23 tan BLC Detailed Project Report (DPR) siam a, sawrkar laipuiah thlen a ni,” tiin Sawrkar laipui-a a changtu Ministry of Housing and Urban Affairs (MoHUA)-in a pawmpui thlap tawh thu a sawi bawk.

PMAY-U chu uluk taka In tina kal a endik hnua Project siam a nih thu CLP Leader chuan sawiin, “A dawngtu tur thlan fel diam tawh a ni a, a dawngtu tur list hi state sawrkar emaw, sawrkar laipui emaw pawhin a tihdanglam theih a ni tawh lo. Sawrkar laipui ruahmanna leh dan siam ang thlapa thlanchhuah vek an ni tawh a, MNF sawrkarin a duh dan dana a lo sawp kual theih a ni tawh lo tih hi Housing For All dawngtu tura thlan tawh chhungkua te ka hrilh duh a ni,” a ti bawk.

He project hnuaiah hian UD&PA Department chuan DPR thar duang zelin, kumin January thla khan Aizâwl leh Dârlâwn-a PMAY-HFA diltute chu enfiah an nih thu a sawi bawk.

Comments

Chhiar Hlawhte