Hri kai 97.11% dam tawh

Serchhip District-ah COVID-19 hri kai hmuh-chhuah mi 658 atangin mi 639 enkawl dam an ni tawh a, hri kai hmuhchhuah atanga za zela 97.11 te chu enkawl dam an ni tawh.

Serchhip District-a COVID-19 hri kai hmuhchhuah, ZMC-a enkawl zingah niminpiah khan mi pakhat chu enkawl dam niin ZMC atang hian chhuahtir ve leh a ni a, nimin khan 4C East Lungdar atangin pakhat chhuahtir ve leh a ni bawk a, Serchhip District-a hri kai te zingah mi 639 te chu enkawl dam an ni tawh a ni. Nimin khan Serchhip-a Sample enfiah atangin hri kai hmuhchhuah an awm lova, TrueNat Laboratory-a Sample enfiah result pawh nizan lam khan hriat theih beisei a ni bawk.

Heti hian nimin thleng khan Serchhip District-a hri kai hmuhchhuah chu 658 niin heng zinga 639 te chu enkawl dam an ni tawh a, tunah hian hri kai enkawllai mi 16 la awmin hri kai zingah nunna chan mi 3 an awm tawh a, hri kai hmuhchhuah atanga za zela 97.11 te chu enkawl dam an ni tawh a ni.