Latest News

Serchhip-ah Green Mizoram Day hmangin thingtiak phun beihpui thlak leh a ni dawn

Kumdang-a lo hman tawh thin angin tun thla ni 11 khian Mizoram pumah ‘Green Mizoram Day’ hman a ni leh dawn a, Serchhip District-ah pawh Green Mizoram Day-ah hian thingtiak phun beihpui thlak leh tura ruahman niin sawrkar Department hrang hrang zinga thingphun enkawl tha te hnenah lawmman siam tawh tura ruahman a ni.

Serchhip District-a Green Mizoram Day-2021 hman dan tur chungchang ngaihtuah hian nimin khan District Level Committee on Green Mizoram chu an Chairman leh District Bawrhsap, Kumar Abhishek hovin biakhmuhtheihna kaltlangin an thukhawm a. He thutkhawm ah hian Bawrhsap chuan Mizoram ti hring tura Green Mizoram Day hman a ni thin chu tha a tih thu sawiin, chutihrual chuan thingphun hu a harsat loh thu leh enkawl zui erawh a harsat thu a sawi a. Hei vang hian thingtiak phun teuh a that rualin kan enkawl zawh tawk phun a pawimawh thu a sawi bawk.

Kumin-a Green Mizoram Day-ah hian ‘Tuihna leh boruak tha siam nan thing i phun ang u’ tih chu thupui ah hman a ni dawn a, nimin Meeting-ah hian District Level Committee on Green Mizoram-a Member Secretary, Margareth Lalramchhani DFO Thenzawl chuan nikum lamah hri leng avanga duh anga Green Mizoram Day hi hman theih a nih loh hnuah kumin ah pawh hripui leng avanga duh anga hman theih a nih leh dawn loh thu a sawi a, amaherawh chu sawrkar in hri leng laka himna tur, COVID-19 Appropriate Behaviour a siam zawm chunga mahni remchanna hmunah thahnem ngai taka thingphun a pawimawh thu a sawi bawk.

Kumin a Green Mizoram Day pual hian Serchhip District-ah chuan sawrkar Department hrang hrang ten anmahni hmun ah thingtiak phun theuh turin he Meeting-ah hian rel a ni a, tunah hian Sawrkar Department hrang hrangte chu thingtiak an mamawh tur zat zawh mek niin heng an thingtiak phun te hi kumtluan-a an enkawl zui dan enfiahin nakum lamah a enkawl tha te lawmman pek tura ruahman a ni a. Hei bakah hian khaw hrang hranga VC te pawh kumin a an huamchhunga ram kanna hmunah thingtiak phun tura ngen niin an mamawh zat zawh mek an ni bawk.

Serchip District-a Green Mizoram Day puala inkhawm tawi chu sawmbik te nen Then-zawl Golf Course-ah hman tura ruahman niin Tourism Minister, Robert Romawia Royte chuan rawn telpui tura beisei a ni a. He hunah hian kumin Thal chhunga kangmei veng tha thlanchhuah te hnenah lawmman sem leh a nih dawn bakah he Ni pual hian District Bawrhsap in mipuite hnena thuchah a siam chu Media hrang hrangah puanzar a ni dawn bawk a ni. He thutkhawm ah hian District Level Committee on Green Mizoram a Member te an tel tha hle a ni.

Thingphun Selfie Challenge buatsaih a ni dawn

Kumin-a Green Mizoram Day hman tur denchhenin EF&CC Department leh Mizo Photographers' Society tangkawp chuan 'Thingphun Selfie Challenge' an buatsaih dawn. 'Thingphun Selfie Challenge' buatsaih turah hian 'Tuihna leh Boruak tha siam nan mi pakhatin thingtiak pakhat tal phun ang aw' tih chu hman a ni dawn a, mi pakhat in thlalak 1, Before (thing phun hma thingtiak nen) leh After (Thing phun hnua thingphun nena selfie) Collage thehluh tur a ni dawn a,  thlalak te hi Mizo Photographers’ Society Facebook Group-ah emaw, Mizo Photographers’ Society Facebook Group-a awm lo tan mahni Facebook Acount-ah, #gmd2021efcc tih caption dah tel ngeia post tur a ni ang. Thlalakna hmanrua eng pawh hman phal niin thingtiak neilo tan EF&CC Department Office emaw, a thawkte, a hnai berah ngaihven theih a ni a, June 3 atanga June 11, 2021 tlai dar 5:00 thleng thlalak hi thehluh theih niin he inelna result chu June 15 khian a tithate puanchhuah an ni anga, mi 8 tan lawmman siam a ni dawn a ni.

Comments

Chhiar Hlawhte