Mizoram-ah hri kai hmuhchhuah an la pung zel

Mizoram-ah COVID-19 hri kai hmuhchhuah an la pung zel a, niminpiah khan Sample 3752 enfiah leh niin heng atang hian hri kai 232 zet hmuh leh an ni.

Niminpiah khan ZMC Laboratory-ah Sample 1207 enfiah leh niin heng atang hian COVID-19 hri kai mi 49 hmuh leh an ni a, heng hri kai hmuhchhuah zinga 51 te chu taksa-a hri kai lanchhuahna neilo an ni. Hri kai hmuhchhuah zinga 45 te hi Aizawl District atanga Sample lak an ni a, a tlangpuiin hri kai hmuh tawh nen inkawmhnaihna lo nei tawh niin hri kai mek awmpuitu mi pahnih an tel bawk. Serchhip District atanga Sample lak zingah hri kai mi 3 hmuh niin SGI Pvt. Ltd. hnuaia thawk tura State pawn atanga rawn lut an ni a, Lunglei ah hri kai nen inkawmhnaihna nei atangin hri kai pakhat hmuh a ni bawk.

Mizoram-a District hrang hrangah niminpiah khan Sample 286 enfiah niin heng atang hian hri kai mi 11 hmuhchhuah an ni a, an zinga mi 7 te chu Kolasib District-a hri kai hmuhchhuah niin Siaha District-ah hri kai mi 3 leh Serchhip District-ah 2 bakah Lawngtlai District-ah hri kai pakhat hmuh an ni a, an vai hian hri kai hmuhchhuah tawh nen inkawm-hnaihna nei an ni.

Rapid Antigen Test hmangin niminpiah khan Mizoram-ah Sample 2259 enfiah niin hri kai mi 172 zet hmuhchhuah an ni a, an zinga mi 133 zet chu taksa-a hri kai lanchhuahna nei an ni. Aizawl District-ah hri kai mi 116 hmuhchhuah niin an zinga mi 30 te chu Central Jail-a tang lai an ni a, Aizawl Saron Veng-ah hri kai mi 15 leh Venghlui-ah mi 14 hmuh an ni bawk. Lawngtlai District-ah hri kai mi 19 hmuh an ni a, an zinga mi 18 te chu Kamalanagar I-IV ami te an ni.

Lunglei District-ah hri kai mi 17 hmuh ni bawkin an zinga mi 9 te chu Lunglei Electric Veng ami an ni a, Kolasib District-ah hri kai mi 13 hmuh niin an zinga 8 chu Kolasib khawchhung ami an ni a, Khawzawl District-ah hri kai mi 5 hmuh niin an vaiin Dulte khua an ni a, Champhai District leh Mamit District-ah hri kai pakhat ve ve hmuh an ni bawk.

Nimin khan Mizoram-a hri kai enkawl zingah mi 147 te chu hri lakah fihlimin anmahni enkawlna hmun atanga chhuahtir leh an ni bawk a. Heti hian nizan dar 10:00 thlenga Mizoram-a hri kai hmuhchhuah tawh chu 12,631 niin heng zinga 9494 te chu enkawl dam an ni tawh a. Hei hi hri kai hmuhchhuah atanga chhutin za zela 75.16 a ni a. Tunah hian hri kai enkawllai mi 3092 an la awm a ni.

Mizoram-a hri kai enkawl zingah nizan khan nunna chan awm lehin Lenbuangi (92), Bawngkawn chu ZMC-ah a boral a, amah hi May 27-a hri kai hmuhchhuah kha niin May 28-ah ZMC-ah dahluh a ni a, BP sang nei a ni bawk. Heti hian Mizoram-a hri kai hmuhchhuah zingah nunna chan mi 45 an awm ta a ni.