Lenkawl

 

Mizoram-a Synod Bookroom chuan kum danga an lo tih tawh thin angin nimin atang khan an thil zawrh te a man pangngai aia man tlawm zawka zawrhna hun an buatsaih leh a, tunkar Inrinni thleng neih tur a ni ang.

Govt. Serchhip College-a zirlai ten Chess lama hma an sawn theihna turin tunhnai khan  Govt. Serchhip College leh Serchhip District Chess Association (SDCA) hmalakna in ‘Chess Coaching Centre’ chu Govt. Serchhip College-ah hawn a ni a. He Centre hawn thar tak hmang hian College zirlai a duh apiangte tan chawlhkar tin Zirtawpni chawhnu-ah Chess zir thin a ni dawn a ni. Hei bakah hian School naupang Chess zir duh te chuan Inrinni apiangin Govt. Serchhip College-ah hian zing dar 10:00 leh chhun dar 12:00 inkarah Chess hi zir theih a ni dawn bawk a ni.

Champhai Grape Grower Society-te chuan Tlangsam Winery-a Grape Wine siamna turin Grape an lei leh tan mek a, kar kalta khan Grape hi lei tanin kg-ah Rs. 60/-in an lei sak a, Grape leina man hi kuthnathawktute hnenah pek nghal zel a ni bawk. Grape hi quintals 32 lei tawhin tunkar hian lei chhunzawm zel tum a ni bawk.

Tunhnaia Myanmar tualchhung buaina chhuak thar leh avanga Vaphai leh a chhehvel-a raltlan rawn lut mi engemaw zat chu nimin khan an ram lanah an kir a, nimin-a an ram lama kir te hi chhungkaw 124-a mi 435 an ni a, midang 207 te chu an ram lamah hian la kir ngam lovin Vaphai-ah hian an la awm thung a ni.

Kawrthah Forest Division chuan tunlai Digital platform hmasawnna zulzuiin Division Office leh Division hnuaia Range Office hrang hrangte inbiakpawhna (Correspondence) chu Digital Mode-ah an let a, lehkha hmanga inbiakpawhtawnna chu thlakin, Email kaltlangin Division leh Range Office hrang hrang ah lehkha an kal tir tawh dawn a, data leh information thehluhna tur ruahmanna pawh siam nghal a ni bawk.

Nimin khan Saitual-ah a vawi khatna atan District Vigilance Committee on Fertilizer (DV-CF) chu Bawrhsap Dr. Lalngura Tlau kaihhruai in an thukhawm a, Fertilizer kawng bo a lo awm thin chu pawi a tih thu sawiin, hun kal tawh chu theihnghilh a tun atanga bul tan tha a, dik taka theihtawp chhuah tlang turin he thutkhawm a tel te chu a sawm bawk. He hunah hian loneitu ten Fertilizer mamawh DAO, DHO leh AMFU hruaitute hnena an thlen thuai theih dan turte, loneitute hnenah Fertilizer a thlen zung zung theih dan turte, Wholesale Dealer-ten dan dik taka a tam thei ang Retailer an neih theih dan tur leh Mukta Fertilizer stock tihral dan turte sawiho a ni.

Nimin khan Chief Secretary leh Chief Vigilance Officer Khilli Ram Meena hovin Mizoram Anti-Corruption Bureau hotute chu Chief Secretary Conference Hall-ah thukhawmin Mizoram a ACB hnathawh kal mekte leh tunhnaia ACB hmasawnna leh hmalakna hrang hrangte an sawiho a. He huna tarlan a nih danin tun dinhmunah Mizo-ram ACB-te hian Case chhui lai (investigation) 12 leh Preliminary Enquiry tih mek 13 an nei a, kum 2025 bikah Regular case 4 chhui zo tawhin Preliminary Enquiry chhui zawh tawh 7 an nei bawk a ni. Chief Secretary chuan ACB Staff-te hna-thawh chu fakawm a tih thu leh a thlawp tlat thu sawiin, tan la thar zel turin a fuih a, ram dan leh dunte uluk taka zirchianga, corruption dona kawnga theihtawp chhuah zui zel turin a chah bawk.

MNF President Zoramthanga chuan MNF Party chu Pathian in kum 64 a hruai tawh tih sawiin, “Kan chak zual zel a ni,” a ti.

ZPM Thalai Southern Hqrs. Lunglei chuan Lunglei HPC Vice Chairman leh Lunglei North bialtu MLA V. Malsawmtluanga chu Social Media-ah mawi lo tak leh thu belhchian dawl lo hmanga tih mualpho a nih thu sawiin, nimin khan Lunglei Police Station-ah an President Vanlalliana Pachuau hmingin FIR an thehlut. Voice Call, Video Call, Facebook leh Whatsapp-ah te dawt leh thu dik lo hmanga tih hmingchhiat leh tih mualpho a nih thu sawiin, a titu chhuichhuaka dan anga hma lak sak turin an ngen a ni.

BJP Mizoram chuan nimin khan Aizawl-a an Party Office-ah kar thar inhlanna leh Political Session neiin MLA, K. Hrahmo chuan thu a sawi a. India ram-a BJP leh a thawhpui te'n Sawrkarna an siam dawn khan keini State pawh Sawrkara tel ve tura sawm an nih thu sawiin, “Nimahsela kan Sawrkar hrawn mek khan kan hotute sawmna chu Issue based-a an Support tur thu an puang ta a, khang hunlai khan kan Sawrkar hrawn mek ZPM hian issue based ni lovin lo zawm mai sela chuan Mizoram in tun huna suma harsatna kan tawh mek te, Mizoram tana policy an duan pawh tuna mipui dem luai luai tawk lo leh fakna tawngkam tam tak an dawn theihna kha an tichhe ta a ni,” a ti.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Monday Devotion leh Political Session neiin Aizawl District Congress Committee (ADCC) Presoident Lalhmingthanga Pachuau chuan thu a sawi a. “Kan hotuten kan ram hi tih takzetin an lo kaihruai tawh thin a, chuvangin kan ram hian tun dinhmun hi a thleng thei a ni,” tiin “Kan ramin hma a sawn lo tih te hi thu belhchian dawl lo tak a ni. Hun kal tawhah khan kan hotute khan thil tam tak an lo ti tawh a, tun dinhmun hi kan thleng thei a ni. Kan sawrkar hrawn mek hian sawrkar kal tawh te tihsa sawihnawm hi a tih theih tawk a ni a, enkawl pawh enkawl zui hlei thei lo a ni. Heng hi mipui hian an hrethiam tawh a, 'Congress nge nge kha an lo tha ber' an ti tan tawh a ni,” a ti a. “Mipuite hian ‘Congress chuan kan thutiam kan hlen thin’ tih an hria, hruaitu tha leh rintlak, dawt sawi ve ngailo kan nei bawk a, mipuite hian rorel leh tura an beisei ber kan ni leh tawh a ni. Kan hotute hi kan ringtawk a, ka...

Home Minister K. Sapdanga chuan kum khat lek chhungin an Flagship Programme an tihlawhtling nghal tih sawiin, “Mahni Flagship programme, sawrkar kum khatnaa bawhzui awmchhun chu ZPM sawrkar chauh hi a la ni,” a ti a, Sawhthing hralhna la hmu lo ten reilote ah an hmuh tur thu a sawi bawk.

Mizo Students’ Union (MSU) General Hqrs. chuan Chin unau pawl hrang hrangte thleibik awm lovin a remchan dan ang angin an thawhpui thin tih an sawi.

Thla khat kalta chhung khan Aizawl-a Central Jail atangin mi tang 3 an tlanchhuak a, tun thlengin tumah man an la ni lova. Prison Department a thawkte chuan tang tlanchhuah thin chhan hi tang vengtu indaihloh vang a nih ber thu an sawi.

Mizoram Larsap General (Dr) Vijay Kumar Singh chuan nimin khan Champhai tlawhin Sawrkar Department hotute a kawm bakah Assam Rifles COB, Champhai tlawhin Assam Rifles hotute a kawm bawk.

Mizoram sawrkar-a Health & Family Welfare Department chuan nimin khan Office Memorandum tichhuakin Review Committee on MUHCS in a rel angin Mizoram Universal Healthcare Scheme hman tan ni, 1 April, 2025 atanga Sawrkar hnathawkte leh an chhungte (dependent family member), Empaneled Hospital ni lova lo inenkawl tawh te Medical Reimbursement Bill chu mahni thawhna Department-ah MR Bill form pangngai hmangin thehluh theih a ni tih an tarlang a. Chung Bill te chu Head of Department/Head of Office ten Chairman, MUHCS Review Committee-ah thehlutin Review Committee hian damlote inenkawlna senso pek dan tur chu a tul angin a ngaihtuah thin ang tih an tarlang bawk. Medical Reimbursement Bill thehluh theih hian April 1, 2025 atanga he thu tihchhuah a nih thleng hi huamin hemi hnu ah erawh chuan Empanelled Hospital ni lova in admit te chu Empaneled Hospital atanga Doctor in a refer-na emaw, Sawrkar hnathawkte leh an chhungte damlo an in-admit atanga darkar 48 chhunga Mizoram State Healthcare S...

Chief Minister Lalduhoma chuan nimin khan Prime Minister Narendra Modi chu New Delhi-a a chenna In-ah hmuin an inkawm a, Mizoram thil pawimawh hrang hrang an sawidun.

Sub-Hqrs. YMA Serchhip chuan kumin a Central YMA hruaitu thlanna neih turah Nominate siam loh nise an ti.

Samagra Shiksha, Serchhip District buatsaihin Zirtawpni (July 11, 2025) khan ‘Foundational Literacy and Numercy on NIPUN Bharat & ECCE training cum discussion’ chu Serchhip DIET Assembly Hall-ah neih a ni.

Central YMA buatsaih-a Ignite Studio, Aizawl-a neih, LBS Suzuki Inter Branch YMA Quiz Competition 2025 chu Zirtawpni zan khan zawh niin Sub-Hqrs. YMA Serchhip huamchhung atanga tel Chhiahtlang Kawn Veng Branch chu pathumna an ni ta a, lawmman ah Rs. 50,000/- an dawng a ni. He Quiz Competition-ah hian Republic Veng Branch YMA chu pakhatna niin lawmman ah Rs. 1,00,000, Trophy leh Citation an dawng a. Pahnihna Vaivakawn Branch-in Rs. 70,000/- an dawng bawk a ni.

Tuikum Assembly Bial chhunga mi te tana buatsaih 'Basic Food Processing Course' Batch 74-na Mizoram Food Processing Research and Training Centre (MFPRTC) Incubation Centre, Seling Phaibawk-a neih chu Zirtawpni khan zawhfel a ni a, he training hi MFPRTC in an buatsaih niin Tuikum Bial chhunga khaw 5- Thentlang, Chhingchhip, Chhiahtlang, Baktawng, Hmuntha khua atangin hmeichhia mi 20 an tel a, Pickle siam, Juice siam, Jam siam, Powder siam, Powder siam, Chips siam dan leh vawnthat dan bakah Food Safety chungchang zirtir an ni. He Training hi Tuikum Bialtu MLA leh Minister PC. Vanlalruata ruahmanna anga neih niin July 8 atang khan neih a ni a, a khatna hi Minister hian a telpui a ni.

 

 

Tun dinhmunah Mizoram-ah Covid hri kai enkawllai mi 4 an awm mek a, kumin ah Covid hri kai mi 11 hmuhchhuah ni tawhin an zinga mi 7-te chu enkawl dam an ni tawh.

Tunhnaia Maynmar ramchhung Chin State khawthlang lama chi leh chi inkara buaina thleng chuan ziaawm lam a pan leh tak avangin Mizoram-a raltlan rawn lut tam tak te chu an kir leh tawh a, Champhai District chhimlam East Tuipui Assembly Bial chhunga raltlan rawn lut te erawh chu an la kir lo thung.

India leh Bangladesh ramri-a venhimna hna thawka duty BSF 152 Battalion te chuan Inrinni zing khan Bangladesh-a tawlhluh tur ni a hriat Teak tum 52 an man a, a neitu nia hriat te chu man hman lohin an tlanchhe hman thung a ni.

Inrinni zing dar 1:30 vel khan Aizawl Central Jail-a tang pahnih, Lianhmingthanga (36) s/o Ginzananga, Thingsulthliah leh Malsawmdawnga (28) s/o Zanhrechina, Farkawn khua te chu Jail atangin an tlanchhuak a. Heng mi pahnihte hian an tanna Jail Ceiling tichhiain Iron rod hmangin Jail bang an lawn liam nia hriat a ni a, Police ten man tumin an zawng leh mek a ni.

Mizo Students’ Union (MSU) General Hqrs. hruaitute chuan Zirtawpni khan Adviser to CM (Finance) TBC. Lalvenchhunga chu a Pisa-ah hmuin kan ramin Company hnathawkte hnen atanga Education lam tihhmasawnna atana CSR a hman tangkai lehzual dan tur an sawipui a, MSU chu CSR hmang thei turin 12A leh 80G nei anih thu te pawh an sawipui bawk a ni.

Excise and Narcotics Department chuan kumin-a chanve chhungin ruihhlo thahnem tak man tawhin mi 3906 bakah lirthei 91 an man tel bawk. Excise and Narcotics Department thuchhuah tarlan danin kumin kumtir atanga kum chanve thleng khan Heroin kg. 34 chuang an man tawh a, Ganja kg. 156 chuang man niin Opium gram 945 an man bakah Rakzu litre 39,000 dawn an man a, Zu bilhlai tam tham tak an man bakah dawidim kg 75 leh Sapzu leh thildang te an man bawk a ni. Excise and Narcotics Department hian ruihhlo leh a kaihhnawih NDPS Act 1985 hmangin nasa takin ruihhlo a tlem theih nan hma an la a, dan bawhchhiate dapchhuah bakah ruihhlo do kawngah tlawmngai pawl hrang hrang nen thawkho in ruihhlo a rem theih nan theihtawp an chhuah mek zel a ni.

Mizoram sawrkar-a Planning & Programme Implementation Department changtu Commissioner & Secretary Vanlaldina Fanai chuan kar kalta Zirtawpni khan Sailam khua ah ‘Sailam Community Weaving Centre’ a hawng a. Sailam Community Weaving Centre hi Village Level Development Program (VLDP) hnuaia Entry Point Activities (EPA) project kalpuina khaw 6 zinga pakhat a ni a, Sailam khaw mipui ten puantah an zirna hmunpui atana ruahman a ni. He project atan hian cheng nuai 10 dah niin Centre sakna bakah puantahna khawl 8 leh puanbu kim, bungrua leh hmanrua chi hrang hrang te lei a ni. He Centre hawnna hun hi Planning Department changtu Secretary Lalmalsawma Pachuau chuan a kaihruai a ni.

Zirtawpni kalta, July 11, 2025 khan ‘National Fish Farmer's Day’ lawmna chu College of Fisheries, Tripura leh North East Society for Fisheries and Aquaculture(NESFA) te tangkawp chuan Lembucherra, Tripura-ah an buatsaih a, he hunah hian Sakawrdai (Aizawl District)-a cheng K.Hranghmingthanga hnenah ‘Best Fish Farmer Award,2025’ hlan a ni a, Award dawngtu K.Hranghmingthanga hian kumtin Sangha note, Indian Major Carp leh Common Carp nuai thum a tharchhuak thin a ni.

Mizoram Journalist’s Association (MJA) chuan 'Myanmar Civil War' Documentary Producer pahnih HC.Vanlalruata leh Isaac Zoramsanga te chu Inrinni khan lawmpuina hun Aizawl Press Club-ah an buatsaih a, he hunah hian MJA President C. Lalrambuatsaiha chuan tunhnaia Emmy Award dawng Mizo Journalist pahnih chu lawmpuina hlanin, khawvel huap lawmman ropui an dawng chu chhuanawm a tih thu a sawi a, Chanchinbumite chawimawina sang dawng thei MJA member an awm chu lawmawm a tih thu a sawi bawk.

Sialhawk khua chuan an Lakhuihthei tharchhuah te khawchhia avangin Guwahati lamah an hralh chhunzawm thei lo a, Mizoram hmun hrang hrangah an hralhchhuak mek. Sialhawk-ah hian Lakhuihthei quintal 950 vel an tharchhuak tawh a, Guwahati-a Aromatic Company nen an inrem angin kumin-a an Lakhuihthei thar tam zawk chu an hnenah hian an hralh a, tunah hian quintal 550 vel chu hralh hman tawh mah se tunhnaia khua a that loh vangin Guwahati-ah hian an thawn thei lo a, hei vang hian tualchhung leh khaw thenawmah te zuarchhuakin quintal 400 vel chu Guwahati a hralh lovin an tiral tawh a ni. Sialhawk khua hian kumin ah Lakhuihthei hi quintal 12,000 vel thar theih an inbeisei a, nikum khan quintal 9,000 vel an tharchhuak a ni.

Tamil Nadu-a awm Karunya University chuan Mizoram Chief Minister Lalduhoma hnenah Honorary Doctorate Degree an hlan.

Health Minister Lalrinpuii chuan Sawrkar-in HIV darh zel tur ven leh inzirtir lamah nasa takin hma a la tih a sawi.

Mizoram Universal Health Care Scheme (MUHCS) hnuaia inziaklut chu chhungkaw 14,266 an awm tawh.

The Mizoram (Maintenance of Household Registers) Bill 2019 chu kum 6 hnuah President pawmpuina hmuh a nih theih nan Sawrkar laipui chuan hma a la dawn.

Sawrkar laipui duhdan anga Myanmar raltlante chhinchhiah hna, ‘biometric enrolment’ chu July thla tawp hian bultan hman hram tum a ni a, he hna thawh nan hian cheng nuai 38 ruahman chhin a ni.

Mizoram Sawrkar, Tlawmngai Pawl leh Kohhran tangkawp in Synod Revival Camping Center, Sihphir Neihbawi-a an buatsaih Hulhliap Short Stay Centre chu Inrinni khan a thawh khatna zawhfel a ni.

Myanmar leh Bangladesh atanga raltlan rawn lutte tanaBiometric Enrolment of Displaced Persons through Foreigner's Identification Portal chungchang chu nimin khan Serchhip-ah sawiho a ni a. Tun dinhmunah Serchhip District-ah hian Myanmar atanga raltlan 647 leh Bangladesh atanga raltlan mi 266, an vaiin mi 913 an awm mek nia chhinchhiah a ni.

Kum 2023 hnu lama Serchhip District chhunga ruihhlo mankhawm sa cheng nuai 55 chuang hu chu nimin khan Serchhip Drugs Disposal Committee ruahman angin halral a ni.

Serchhip District Fire Prevention Committee chu nimin khan thukhawmin kumin-a kangmei venna kawnga an hmalakna te an thlirlet bakah kum lo kal zel tura hmalak dan tura tha nia an hriat te an sawiho.

Nimin khan Serchhip-ah District Level Monitoring Committee on Mission Organic Value Chain Development - NER Phase IV chu thukhawmin hmalak dan tur an sawiho.

Nimin zing khan Serchhip AOC Veng-ah ruang pakhat chhar niin Vanramengmawia (30), Serchhip Field Veng tih hriatchhuah nghal a ni a, nimin vek khan vuiliam nghal a ni.

Central YMAhruaitute chuan nimin khan Health Minister Lalrinpuii hmuin Mizoram Universal Health Care Scheme (MUHCS) chung-changa Mizoram sawrkar leh Private Hospital te inremlohna avanga mipuiin harsatna tawh mek chungchang an sawiho a, Minister hian biak theiha an inhawn reng thu leh an hmalakna te a lo hrilh a ni.

Chief Minister Lalduhoma leh Department of Public Enterprises, Ministry of Finance-a Secretary K. Moses Chalai IAS te chu nimin khan New Delhi-ah inkawmin CSR sum hailuh kawnga Mizoram hmasawnna turte an sawi dun a. Mizo-ram in CSR tam zawk a hailuh theihna turin theihtawp a lo chhuahpui zel tur thu a sawi a ni.

Lunglei Municipal Council (LMC) Board of Councillors (BoC) thutkhawm vawi 11-na chu nimin khan BoC Meeting Hall-ah an Chairman Lalzuithanga kaihhruaiin neih a ni a, 'The Mizoram Urban Areas Building Regulations, 2024' chu LMC huamchhungah hman turin pawm a ni a, LMC atangin 'The Lunglei Municipal Council Building Regulations, 2023' chu Mizoram sawrkar ah pawmpui tura thehluh a nih laiin, sawrkar chuan 'The Mizoram Urban Areas Building Regulations, 2024' hmang zawk turin rawtna a siam a. He rawtna zulzui hian LMC huamchhungah he Regulations hi hmang turin an pawm a ni.

Fire & Emergency Services Department chuan nimin khan Aizawl-a an Department Conference Hall-a an hmalakna thlirletna hun an hmang a, he hun hi Home Minister K. Sapdanga chuan hmanpuiin F&ES Department chu kangthelh baka an hnathawh pawimawh tak, rikrum thil leh chhiatna thleng thuta an hnathawh chu a hlu a tih thu a sawi a, F&ES Department chu vantlang tana thawk tur leh chhiat tawhnaa hmatheh tur atana sawrkar in rin ngama a rawihte an nihna lai hre reng turin a chah bawk. He huna tarlan a nih danin F&ES Department hnuaiah hian Fire Station 14 awm mekin kangthelh motor (Fire Tender) 47 leh kangthelh Bike 4 a awm mek a, 15th Finance Commission Grant-in-Aid Phase-I kaltlangin an mamawh bungrua engemaw zat an lai bawk a. Kum 2024 chhung khan In kang 40, ramkang 45 leh chhiatna dang ah tum 28 kohna an dawng a, kangmei vanga nunna chan mi 4 an awm a ni.

International Year of Cooperatives (IYC) -2025 lawmna kalpui mekah 'Ek Ped Maa Ke Naam' pualin nimin khan Mizoram Governor General (Dr) Vijay Kumar Singh leh Cooperation Minister PC. Vanlalruata te chuan Aizawl-a Raj Bhavan-ah Ashoka Tree tiak an phun a, Larsap leh Cooperation Minister-te hian 'Cooperatives Build a Better World' tih thupui hmanga International Year of Cooperatives-2025 lawmna kalpui mek leh hmachhawpte bakah pawimawh dangte an sawidun bawk.

Aizawl khawpui-a lirthei intlanchhawk dan kalpui mek chu thla khat chhung atan kawng dangin enchhin a ni dawn.

India rampuma Common Service Centre (CSC) din champha-phak lawmna, ‘CSC Diwas’ chu nimin khan Mizoram-ah pawh neih a ni.

Mizoram Resource Mobilisation Committee (MRMC) hnuaia Sub-Committee on Tax and Non-Tax chu nimin khan thukhawmin Mizoram Sawrkar-a GST tam zawk a luh theih dan tur an ngaihtuah.

Disaster Management and Rehabilitation Department hmalaknain khuarel chhiatna a lo thlen thulha hman tur inc hhanchhuahna hmanrua chi hrang hrang semchhuahna hun chu nimin khan neih a ni.

School Education Minister Dr. Vanlalthlana chuan Mizoram-a Zirtirtu indaihlohna a nasa tih sawiin, tul leh mamawh avanga Zirtirtu sawn an nihin midang kheuhtu an awmin harsatna a thlen phah thin tih a sawi a, hetiang hi a awm tawh loh nan hma an la dawn tih a sawi bawk.

Tukin (July 11, 2025) zing khan Serchhip AOC Veng-ah ruang pakhat chhar a ni a, he ruang chhar hi Vanramengmawia (30), Serchhip Field Veng nia hriat a ni.

National Highway-54 laihzauh leh siamthat hna thawh mekah Chhiahtlang khuaa ram lak tawh a In pakhat la thiah loh chu nimin khan khawl hmanga thiah sak an ni.

Sawrkar kum kalta 2024-2025 chhungin Mizoram-ah HIV hrik pai mi 2021 hmuhchhuah ni tawhin Serchhip District-ah pawh mi 65 hmuhchhuah an ni tawh a, HIV hrik kai hmuhchhuah thar zingah hian mipa tam zawkin tleirawl ten HIV leh AIDS natna chungchang an hriatchian lehzual theih nan inzirtirna kalpui tum a ni.

Central YMA chuan tunhnaia ruahsur nasa avanga chiattawk te tanpuina atan sum pechhuakin Sub-Hqrs. YMA Serchhip huamchhungah pawh mi 36 te hnenah tanpuina hi pekchhuah tura ruahman a ni.

Mzoram Governor in a Discretionary Fund a pekchhuah atangin nimin khan Serchhip District-a Home panga (5) te hnenah tanpuina sem a ni a, District Bawrhsap Paul L. Khuma leh SDO (Sadar) Rebecca Laldinmawii Hrahsel te chuan Governor aiawhin tanpuina hi an sem a ni. Nimin a thilpek hlanna hunah hian Bawrhsap hian Adult Rehabilitation Centre, Chhiahtlang; Beiseina In (Old Age Home), New Serchhip leh Zoar Urban Deprived Home, New Serchhip tlawhin SDC Dr Marilyn Lalruatkimi’n a tawiawm a, SDO (Sadar) hian Unity Orphanage Home, Hmar Veng leh Shalom Special School, New Serchhip te a tlawh a, Governor aiawhin Rs. 25,250/- theuh bakah DC Office aiawhin thilpek an hlan bawk.

Serchhip-a District Urban Development Office chuan nimin khan mipuite hnena PMAY 2.0 hrilhfiahna hun buatsaihin ‘Responsible use of financial assistant under PMAY(U) 2.0-HFA’ (Insak tanpuina i dawng ve em?) tih thupui hmangin Darnam Tlang-ah lemchan an entir a ni a. PMAY 2.0 diltute hnenah a dil dan phung leh In sak dan tur leh thil pawimawh dangte inzirtir a ni bawk.

Govt. Aizawl College Golden Jubilee lawmna puala ni hnih awh ‘National Seminar on Analyzing Contemporary Issues in North East India: Problems and Opportunities’ chu nimin khan an College Conference Hall-ah neih a ni a, he hun hi H&TE Minister Dr. Vanlalthlana chuan a hawng a, mithiam kalkhawmte chu zirna thuk zawk nei zel tur leh mahni larna lam ni lo a, sawrkar leh ram tana thil tha zawk zirchhuak a, a tulna leh ramin a mamawhna zawnah nasa zawka insawrbing zel turin a fuih bawk.

Sawrkar laipui chuan Mizoram tiamin Fur ruahsur nasa, tuilian leh leimin avanga harsatna tawk ramchhunga State parukte tan chhawm-dawlna cheng vbc. 1066 pek a remti a, Mizoram tan cheng vbc. 22 ruahman a ni.

Aizawl District Police te chuan nimin khan Crime Review Meeting neiin an District-a Police Station-ah kumin January atanga June thla chhungin thubuai 818 ziahluh a nih thu leh heng zingah hian inrawk leh rukruk a tam ber thu tarlan a ni.

India rama sawrkar Damdawi In tha bik tehna ah Mizoram-a Primary Health Centre (PHC) pathum chu an tling thar tih National Health Mission (NHM) Mizoram-a Mission Director Dr. Lily Chhakchhuak chuan a sawi a, India rama sawrkar Damdawi In tha bik tehna, National Quality Assurance Standards (NQAS)-a tling thar PHC pathum te hi Mamit District-a Kang-hmun PHC bakah Darlawn PHC leh Buarpui PHC te an ni a, tehfung chi hrang hrang hmanga teh anih hnuin Kanghmun PHC hian 95.19% hmuin Darlawn PHC in 85.84% leh Buarpui PHC in 93.69% an hmu a ni. Heti hian Mizoram chhunga PHC zingah NQAS National Certificate hmu hi 22 an awm ta a, Mizoram-a Sawrkar Damdawi In 32 te chu NQAS National Certificate nei tawh an ni a. Tunah hian sawrkar Damdawi In 23-in State Level Certificate nei tawhin National Certificate result nghak mek 8 an awm bawk.

Cheng nuai 235 senga sak Hnahthial-a District Veterinary Hospital, Laboratory leh Quarters chu nimin khan AH&Vety Minister C. Lalsawivunga chuan a hawng.

Commerce & Industries Department Minister F. Rodingliana chuan nimin khan Lengte-a Export Promotion Industrial Park (EPIP) tlawhin Industrial Unit hrang hrangte awmze nei zawka bun a nih theih nan ruahmanna siamte a enpui.

Lunglei High Powered Committee (HPC) Vice Chairman V. Malsawmtluanga chuan nimin khan Lunglei District tan 'National Mission on Natural Farming (NMNF) 2025-2026' chu a hawng.

Indian Red Cross Society (IRCS), Mizoram State Branch chu tharthawh leh niin nimin khan Govt. Aizawl College, Mualpui-ah hemi pual hian hun hman a ni a, he hun hi Larsap chuan hmanpuiin Mizoram-a Youth Red Cross Unit din hmasa ber Govt. Aizawl College leh a pahnihna Govt. T. Romana College-te hnenah Institutional Membership Certificate a hlan bawk.

New Delhi-a cham mek Chief Minister Lalduhoma chuan BSNL hotute leh Highrange Rural Development Society (HRDS) hotute kawmin Mizoram tana hmalakna tur hrang hrang a sawipui.

BJP Mizoram chuan Autonomous District Council chungchanga Governor thuthlukna chu State Cabinet Minister lo ni tawh ten Press Conference meuh kova an sawisel an la hre ngai lo tih an sawi.

Mizoram sawrkar-a Public Works Department (PWD) chuan National Highway Vairengte to Sairang chungchangah thuchhuah siamin NHIDC, Executive Director, Virender Jakhar-a thusawi chu a dik tawk lo niin an sawi.

Mizoram Universal Health Care System (MUHCS) hnuaia IVF tih theihna empanelled hmasa ber, AM Medical Centre Pvt. Ltd chu Chanmari West Aizawl-ah mipui pan theih a hawn a ni.

Central YMA buatsaih LBS Suzuki Inter Branch YMA Quiz Competition 2025 chu Aizawl-ah neih mek niin Sub-Hqrs. YMA Serchhip a\anga tel Chhiahtlang Kawn Veng Branch te chuan nizan khan Semi Final intihsiakna neiin Final an lut a, Zirtawpni zan-ah Final neih a ni ang.

Serchhip Police ten tunhnaia Rakzu an man tam tham tak chu nimin khan Court thuchhuak angin leihbuak a ni.

Kumin January atanga June thla chhung khan Serchhip District-ah nau piang 309 chhinchhiah niin mitthi 135 an awm bawk a, mihring 1000 zelah nau piang 3.70 awm ang an nih laiin mihring 1000 zelah mitthi 1.62 awm ang an ni bawk.

Kumin June thla tir-a Serchhip Dinthar Veng atanga Chhim Veng panna kawng lei tlahniam chu Vawiin, July 10, 2025 atanga July 13, 2025 chhung hian Serchhip Dinthar Village Council ten a siamthat hna an thawk dawn a, hei vang hian Serchhip SP Gavit Gogna IPS chuan hemi hun chhung hian helai kawng hi lirthei kaltlang phal lohna hmunah a puang a ni.

Mizoram Transformation Movement (MTM) huaihawta tlawmngai pawl pali (4) te inhmukhawm chuan Mizoram in kawng tha a neih theihna tura hma la a thawkho zel turin Joint Civil Society of Mizoram (JCM) an din a, he thawhhona huang-ah hian Mizoram hmasawnna leh thatna duh Civil Society dang te pawh tel turin an sawm bawk.

Mizoram Hindi Prachar Sabha hnuaia Board of Examination chuan Hindi Exam 2025 First Examination Result chu nimin khan a tichhuak a, Hindi Prathama -Madhyama (Class IV - VI)-ah Exam paruk awmin pakhat a fail a, Hindi Praveshika (Class VIII)-ah Exam pariat awmin an pass vek a, Hindi Prabodh (Class X)-ah exam 18 zingah pakhat fail bawkin Hindi Visharad (PU)-ah chuan exam 14 zingah fail an awm lo a, Hindi Praveen (BA) 1st Sem-ah Exam 33 atangin fail mi pahnih an awm a, 2nd Sem-ah exam 13 awmin an pass vek bawk. Heti hian nimin-a Hindi Exam result chhuak ah hian Exam mi 92 awmin Fail mi pali an awm a, zaa 95.65 pass ang an ni.

Joint Council of Mizoram Rural Bank Union chuan Central Trade Union-in nimin-a rampum huapa nawrh a huaihawt chu zawmin Bank te khar a ni a. He nawrhna hi mimal kutah Regional Bank hlan (privatisation) duh loh vang te, National Rural Bank of India hminga Regional Bank hrang hrang khaikhawmtu Apex Body siam phut vang te, a nghet lo a hna hrang hrang thawk dah ngheh phût vang te bakah, tun dinhmuna hna ruak hnawhkhah phut vang te a ni a, Mizoram Rural Bank thawktu inzawm-khawm chuan MRB Head Office, MINECO-ah punkhawm neiin sawrkar laipui laka an thilphut te tarlangin hun an hmang a ni.

Kolasib Police leh Kolasib Sub-Hqrs. YMA Kumpuan Duty te chuan nizan hmasa dar 10:00 khan Kolasib bul New Builum-ah Sapzu case 112 leh Beer case 6 an man a, heng te hi Pik-Up Truck pakhat-ah Alu leh Purun bag karah dah niin he Motor khalhtu erawh a tlanbo hman a ni. Heng Zu an man te hi Royal Stag case 86, Royal Parrys case 26 leh Kingfisher Beer case 6 a ni. Hetihlai hian Mamit-a Excise & Narcotics Department chuan Mamit Bazar Veng-ah dan lova Grape Wine zuar MART dawr atangin dan lova zawrh Grape Juice chi hrang hrang um 40 zet an man bawk.

Mizoram Legislative Assembly Speaker Lalbiakzama chuan nimin khan Aizawl Mission Veng-a Synod Conference Centre-ah Hming-chungnunga ziak ‘The Reflection of Mizo Nationality: with special reference to Hmar Culture’ tih lehkhabu chu a tlangzarh a, khawvel huap a lehkhabu hlu leh darhzau ni tur chuan a ziahna tawng (language) a pawimawh thu leh a hnam ang pawhin saptawnga Mizo hnam chanchin ziahna lehkhabu chu hmasawn kan ngaihna lam tak a ni tih a sawi a. Zofate inpumkhatna tur leh khawvel ram tin a Zofate chanchin a darh theihna tura lehkhabu tangkai tak a nih ngei a beisei tlat thu a sawi bawk.

Chakma Autonomous District Council (CA-DC) huamchhung 7-Kamalanagar West MDC Bial-a by-election neih tur atana inbuatsaihna atan nimin khan Chawngte-ah Draft Electoral Rolls tlangzarh a ni a, he Bial-a MDC Sanjiv Chakma chu a boral avangin by-election hi neih tura hma lak mek a ni. 7-Kamalanagar West MDC Bial ah hian Vote nei thei mi 1728 awm mekin khaw pathum- Kamalanagar-IV, Saizawh West leh Rajmandal ten an awm a, Electoral Roll-a hming thun thar, paih leh siamthat ngai te tan July 14, 2025 thleng dil theih niin July 21-ah Final Electoral Roll tlangzarh a ni ang.

Rural Development & Administration Minister Prof. Lalnilawma leh SELCO Foundation hotute chu nimin khan Minister Pisa-ah inkawmin thingtlanga kuthnathawktute'n an thlai tharchhuahte chhun zan zawma an zawrh theih nan Bazar Shed/Road Side Market-a Power Supply changtlung tak pek dan tur an rel a. SELCO Foundation te'n nizung tha chakna hmanga power supply (Solar powered lightning) an pek theih chuan thingtlang lama kuthnathawktute'n an thlai tharte chhun zan zawmin an zuar chhuak thei dawn tih Minister chuan sawiin, a taka puitlin a nih ngei theih nana theihtawp chhuahtlan a tul thu leh a tul angte bawhzui turin RD leh SELCO Foundation hotute a chah a ni. He hunah hian a bultanna leh enchhinna hmasa atan RD Department chu Zokhaw lama thlai thar zawrhna Bazar Shed/Road Side Market, hmalakna hmasa turte thlangchhuak tura ruat an ni a, SELCO Foundation te'n hma an la anga, a tul dan ang zela kalpui chhoh tum a ni.

Nimin khan Kolasib-ah District Development Coordination and Monitoring Committees (DISHA) Study Group thutkhawm neiin DISHA chungchanga hriat tur pawimawh hrang hrang inzirtir a ni.

Social Welfare Department (SWD) Director Dr. Lalhriatzuali Ralte chuan thalai ten nunphung dik an zir theihna bul chu chhungkua a ni tih sawiin, ruihhlo do kawngah Kohhran leh Pawl hrang hrang nen tanrual a pawimawh thu a sawi.

Mizo Students’ Union (MSU) General Hqrs. chuan kumin-a Under Graduate result chhuaka Mizo Topper mi 24 te chawimawina hun nimin khan an buatsaih a, he hun hi EF&CC Minister Lalthansanga chuan khuallian niin a hmanpui a ni.

Lunglei Municipal Council (LMC) chuan Lunglei khawpui chhunga lirthei leh mipui chetvelna (traffic) him leh felfai zawk a awm theih nana kawngpui leh a vel cheina leh siam thatna atan kum 2024-2025-a lirthei hun man (parking fee) an khawn chhuah atangin Rs. 5,41,075/- chu nimin khan Lunglei District Police kutah an hlan.

Midang zirtir chhawng tura ruat Kohhran hmeichhia leh Hmeichhe NGO-te tana ruihhlo hmansual laka inven dan inzirtirna ni hnih awh chu nimin khan zawhfel niin he Training kharna hun hi Social Welfare, Women & Child Development Minister Lalrinpuii chuan a hmanpui a ni.

Serchhip Dinthar Veng-a Chawngbuangi Memorial School (Middle Section) chu Serchhip Chhim Veng-a Govt. Modern M/S Building-ah Class kal rih tura ruahman a ni.

Nimin July 8, 2025 atang khan District Hospital, Serchhip-ah ‘NextGen e-Hospital HMIS’ chu hman tan a ni ta a. HMIS-ah hian QR Code hmangin OPD/Casualty-a damlo inziahluh bakah appointment Book leh cancel a tih theih tura ngaih a ni a, damlo inentir tur ten Aadhar Card leh Smart Phone kengin damlo inentir te chu an nat dan leh inenkawlna te chu khawl hmangin Doctor ten an chhinchhiah vek tawh dawn a, heng te hi hmundang-ah an inentir leh a nih pawhin anmahni remtihna in haichhuah leh theih a ni ang. Aadhar card neilo tan pawh inentirna hi a ngai anga kalpui reng a ni bawk.

Mizoram State Legal Services Authority-a Executive Chairman leh Gauhati High Court Judge Justice Michael Zothankhuma chuan nimin khan Serchhip District chhunga North Vanlaiphai bakah Cherhlun khua ah Legal Aid Clinic a hawng.

Sawrkar kum kal mekah MRNREGA hnuaiah hna 5,758 thawh tan a ni tawh.

Khawzawl-a Krishi Vigyan Kendra (KVK) chuan nimin khan an District chhung khaw 6- Khawzawl, Khualen, Rabung, Neihdawn, Chawngtlai, Ngaizawl leh Khawhai atanga chhungkaw thlanchhuah te hnenah Pradhan Mantri Rashtriya Krishi Vikas Yojana (PM-RKVY) kaltlangin thlai tiak chi hrang hrang an semchhuak a. Heng thlaitiak an semchhuah te hi Khanghu tiak 417 leh Zawngtah tiak 1700 bakah, Ser tiak chi hrang hrang - Serthlum, Sisu, Sertawk Zammir leh Serfang 250 niin a vaiin thlai tiak 2357 semchhuah a ni. Nimin-a thlai tiak semna hi Khawzawl Bawrhsap K. Vanlalthiana telpuiin KVK hmalakna leh hnathawh ropui a tih thu leh kuthnathawkte leh loneitute an ngaih pawimawh avanga lawmthu a sawi bawk a ni.

Mizo Diaspora Cell Chairman leh Commissioner & Secretary to Chief Minister Vanlaldina Fanai chuan hriattirna tichhuakin, Mizoram pawn hmun hrang hranga awm Mizo Association te chu Mizo DiasporaHub a in register turin a ngen a, Mizo DiasporaHub hi State pawna cheng Zofate inhriatpawhna leh a tul anga intanpuitawnna tur te, sawrkar hmalakna an lo hriat zung zungna tur leh sawrkara an mamawh an thlen theihna tur a nih thu a tarlang bawk.

Nizan hmasa a Central YMA Executive Committee (CEC) thukhawm chuan tunhnaia Myan-mar ramchhung Chin Hills-a HPO leh CNDF unau inkara inhriatthiam lohna avanga inkahna thleng chu pawi an tih thu sawiin, an ngenna anga inkahna a tawp ta chu lawmawm an tih thu an sawi a. Inremna a awm theihna turin Burma Chin State chhunga pawl hrang hrangte rilru inhawng taka sawiho a nih theih nan a ngaihtuahna seng tura an beisei thu pawh sawiin, he thil thleng avanga Mizorama raltlan engemaw zat an awm belh avangin buhfai leh ei turte pek an rel bawk. Central YMA chuan MUHCS chungchanga mipuiin harsatna an tawhte an sawi hoa, hun remchangah Mizoram Sawrkara thuneitute sawipui nise an ti bawk.

Kum 2023-2024 leh kum 2024-2025 chhunga Scholarship la sem loh Rs. 50,42,81,000/- sanction Order chu Ministry of Tribal Affairs chuan a tichhuak ta.

Land Revenue & Settlement Department changtu Minister B. Lalchhanzova chuan nimin khan Saitual DC Conference Hall-ah Revenue Branch thar a thawng a, mipui ten ‘Revenue Department dawr an har’ tia an lo sawi thin chu ‘Kan fel tawh dawn, tiin an intuaithar mek tih sawiin, Revenue Department chuan hna insemzai ‘decentralization’ kalpui a tum thu leh thingtlang atang pawha Aizawl pan kher ngai lovin an awmna District-ah Revenue Office an dawr thei dawn tih a sawi a, hei hian mipuite ah awlsamna a thlen dawn a ni, a ti. 

Sawrkar Flagship programme inhrilhfiahna, Leadership Sensitization Workshop in The Mizoram Bana Kaih (Handholding) Scheme chu nimin khan Aizawl-a I&WR Auditorium-ah neih a ni a, Handholding Scheme hnuaia loan support te hi Bank loan awm sa nen a kaihkawp a nih thu leh CM Special Package sem thuai a nih tur thu he hunah hian tarlan a ni.

Mizoram Larsap-in tunhnaia Chakma Autonomous District Council (CADC) Governor Rule-a a dah chu Council of Minister ngaihdan lo anga tih a nih thu Home Minister K. Sapdanga chuan a sawi.

Sawrkar laipui in 'Labour Code' a siam chu Central Trade Union chuan dodalin hei hi Regional Rural Bank (RRB) ho chuan an thlawp a. Central Trade Union hian sawrkar laipui in hma a lak mekna duhlona lantir nan leh an thilphut tih hlawhtlin ngiat nan Vawiin, July 9, 2025 hian rampum-ah nawrh huaihawt an tum a, hei hi RRB hnuaia awm Mizoram Rural Bank (MRB) pawhin thlawpin Vawiin hian Mizoram-a MRB Branch hrang hrangte chu dawr theih an ni dawn lo a ni. Vawiin-a MRB Branch te hawn a nih dawn loh bakah hian Aizawl-ah chuan MRB Head Office kawt-ah thawktute pung-khawmin an thilphut te hi an auchhuahpui dawn bawk a ni.

Nimin khan Hnahthial-ah District AIDS Prevention and Control Committee chu thukhawmin sawrkar kum liamta, April 2024 atanga March 2025 chhung khan an District-ah HIV hrik pai hmuhchhuah thar mi 15 an awm thu tarlan a ni a, heng zinga mi 10 (66%) chu mipa niin Sex hman atanga kai mi pakua (9) leh inchiuna thianghlim lo hman avanga kai hi mi pali (4) an awm thu tarlan a ni a. Kum 35-49 inkar ttangin HIV hrik pai hi hmuhchhuah hnem ber an ni tih tarlan a ni bawk. He Meeting hian Zirlai naupangte'n HIV leh STI chungchang an lo hriatchian lehzual theih nana buatsaih - Red Ribbon Quiz Competition buatsaih an rel nghal bawk a ni.

North Eastern Region (NER) District Sustainable Development Goals (SDG) Index Report (2023-24) vawi hnihna tihchhuah takah Hnahthial chu District titha ber an ni a, Champhai District chuan an dawt a ni.

Mizoram Youth Commission (MYC), Honda India Foundation leh Visan Foundation-te tangkawpin an buatsaih Project Buniyaad Hotel Management (Food & Beverages) Training Course, Phase-II hawnna hun chu nimin khan Aizawl-a MYC Auditorium-ah neih a ni a, Labour, Employment, Skill Development & Entrepreneurship Minister Lalnghinglova Hmar chuan he hun hi hmanpuiin khawvel thang zelah Hospitality Sector a than chakzia sawiin, Hotel Management te, Nursing leh Caregiving-ah te mihring mamawhna a sang chak hle a; heng ah te hian Mizo thalaite ten theihna sang tak kan neiin hnathawhna tur kawng zau tak a inhawng a ni, a ti.

North Eastern Council (NEC) atanga dawn Life Support Ambulance 1 (pakhat), Pick Up (4WD) pakhat leh Solar light 9 (pakua) inhlanna hun chu nimin khan Siaha DC Office Chamber-ah neih a ni a, he hun hi Siaha Bawrhsap VL. Hruaizela Khiangte chuan kaihruaiin Siaha DRDO Project Director M. Misael chuan L. Beimopha IRS hmalaknain North Eastern Council hnuaia Backward Community of Mara Community, Tipa RD Block, Siaha District hnuaiah heng te hi dawn a nih thu a sawi a, Solar Light hi khaw pakuaa Sub-Centre te tan a nih thu a sawi bawk. Nimin-a thilpek inhlan Rs. 32,22,486 man a ni a, he hunah hian Siaha Bawrhsap chuan Sr. CMO Dr. Lalnunziri leh District Medical Superintendent Dr. C. Lalrosanga te hnenah heng lirthei leh Solar Light te hi a hlan a ni.

New Delhi-a cham mek Chief Minister Lalduhoma chuan sawrkar laipui-a Minister te kawmin Mizoram mamawh hrang hrang a sawipui.

 

Information & Public Relation Department leh Mizoram Journalists’ Association (MJA) te tangkawp buatsaihin nimin khan Serchhip Press Club-ah ‘Media Workshop’ neih a ni.

Mizoram Journalists’ Association (MJA) General Hqrs. in MJA Member atana a pawm thar Vanlalzarzova, Editor Zawlbuk Aw (Thenzawl) chu nimin khan MJA Member atana lawmluhna hun Serchhip Press Club-ah neih a ni a, he hunah hian MJA Serchhip District President C. Lalhminghlua chuanm Member thar lawmluhna hun hmangin fuihna thu a sawi nghal bawk a ni. Tun dinhmunah MJA Serchhip District-ah hian Member mi 14 an awm mek a, an zinga mi 10 te chu Serchhip-a awm niin midang pali te hi Thenzawl-a awm an ni thung a, MJA Member mi 14 zinga 11 te hi print Media-a thawk niin mi pathum te erawh Electronic Media-a thawk an ni a, District MJA te rawt angin MJA General Hqrs. in Member thar hi an la thin a ni.

Thenzawl Laural Branch MHIP ten nimin-a MHIP Day vawi 51-na leh an Branch dinchampha vawi 25-na lawmna an neih chu Serchhip Bialu MLA leh Chief Minister Lalduhoma nupui, Liansailovi chuan khuallian niin a hmanpui a. Laural Branch MHIP te lawmpuina thu sawiin, kum 25 chhunga an Branch lo kaihruaitute chungah lawmthu a sawi bakah an kal zelna turah duhsakna a hlan bawk. Nu te chu pasalte kaihhruaina hnuaia awm tur an nih thu pawh khuallian hian sawiin, “Chhungkua ah thuneitu ber nih kan tum kher tur a ni lo. Chutih rualin, kan pasal fanauten kawng dik lo an zawh tur erawh chu kan dodal ngamin, kawng dik kan kawhhmuh ngam tur a ni thung a. Nuin kan sawi fo chuan kan pasal te pawhin zawm chin an nei nge nge thin. Fate enkawl kawngah thu tha sawi hi thil harsa lutuk a ni lo va, entawntlaka nun hi a pawimawh zawk. Kan fate hian ngawi rengin kan awm dan hi an entawn mai thin. Chuvang chuan entawntlakin nung ang u,” tiin MHIP member kalkhawm te a chah bawk.

Mizoram Larsap General VK. Singh chuan Chakma Autonomous District Council (CADC) term kallai ah sawrkar a kal mumal theih loh avangin thla ruk (6) chhung atan CADC chu Governor Rule-ah a puang ta a. CADC 11-na ah hian Rasik Mohan Chakma chu a tirah CEM niin term laklawh-ah Molin Kumar Chakma chuan a thlak a, June 17 khan sawrkar dinglai fiahna neiin fiahna a paltlang zo lo a ni. Tun dinhmunah MDC 20 awmna CADC-ah hian ZPM in MDC 16 an nei a, BJP in 2 leh MNF in pakhat neiin MDC pakhat a boral avangin Seat pakhat a ruak a ni.

Mizo Students’ Union (MSU) General Hqrs. huaihawtin nimin khan Aizawl Vanapa Hall Kawt atanga Higher & Technical Education Directorate Office Kawt thlengin ‘Quality Education Humhalhna Kawngzawh’ neih a ni a, kawngzawh hnua sawrkar nen inbiakna an neih ah sawrkar hmalakna chu tha an tih thu an sawi zui bawk a ni.

School Education Minister Dr. Vanlalthlana chuan sawrkar hmalak mekna thlawp chunga zirlai pawl ten ‘Quality Education Humhalhna Kawngzawh’ an nei chu lawmawm a tih thu a sawi.

MNF Party chuan nimin khan Aizawl-ah Mizo Hnam Run Chhung Inkhawm neiin he hunah hian MNF-a NCC leh Minister hlui Tawnluia chuan MNF Founder President Laldenga chungchang sawiin, “Thangthar zelte Hnam thinlung (nationalism) tuhtu a ni,” a ti.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Monday Devotion leh Political Session neiin General Secretary Lalhruaitluanga Bawihtlung chuan Mizoram in remna leh muanna a neih dan chanchin a sawi.

Zo Re-Unification Organisation (ZORO) chuan Myanmar ramchhung Chin State-a Chin National Organisation (CNO) leh Hualngoram Peoples Organisation (HPO) te inkara buaina chhuak leh inkahna, thisen inchhuahsakna hial a thleng chu pawi an tih thu thuchhuah siama tarlangin, CNO leh HPO te chu inngaichang tawn tur leh boruak tipunlun zawnga hma la tawh lo turin an ngen a. Unau inkara inremna a awm theihna turin a khirh zawng nilo, a dam zawnga chinfel dan kawng zawng hram hram turin an ngen bawk.

School Education Department chuan nimin khan Directorate of School Education Conference Hall-ah Common School Uniform, School Calendar leh School timing chungchang sawihona leh vantlang inrawnkhawmna hun, 'Public Consultation Meeting' an buatsaih a, he hun hi School Education Director Angela Zothanpuii chuan hovin heng thupui sawiho tur chungchangah hian an Department hnenah ngaihdan ziaka thehlut 200 chuang an awm tawh thu a sawi a. Sawrkar in policy tha tak a duan dawn chuan a hmangtu turte ngaihdan hriat a pawimawh tih a sawi bawk.

Nimin khan Saitual-ah Border Coordination Committee chu an Chairman leh Bawrhsap Dr. Lalngura Tlau hovin an thukhawm a, he hunah hian Indo-Myanmar Border-a Entry/Exit point siamna tur atan hmun 13 thlanchhuah a nih thu tarlan niin, heng zingah hian an District atangin Hrianghmun-Tuisa lui chu thlan a nih thu tarlan a ni a. Hemi atan hian Border Coordination Sub-Committee chu dinin Hrianghmun-Tuisa lui chu endik (Joint survey) a nih tawh thu te, a hungna tur hmun te, Entry/Exit Point siamna tur te, Check Post siamna tur ram te an endik tawh thu te tarlan a ni a. Check post siamna tur ram neitute pawhin an ram hmansak rem tiin Joint Inspection Team te pawhin a ram chu Checkpost siam nan a that thu report an thehlut tih tarlan a ni bawk.

Mizoram State Level Cooperative Society (Federation) hruaitute chuan nimin khan BJP Mizoram State President Dr. K. Beichhua chu a Pisa-ah kawmin Mizoram Cooperative in hma a sawn theih nan leh alo thanlen theih nana Cooperative Society te hmanga Ram hmasawnna kalpuina tur Policy ngaihpawimawh anih theih nana hmalakpui turin an ngen a. BJP President Dr. K. Beichhua chuan Cooperative Base a Development kalpuina Policy hman anih theih nan theihtawp chhuaha hmalakpui a tum thu alo hrilh a ni. 

Taxation Department-in kumin sawrkar kum kal mek, 2025-2026-a Goods & Services Tax (GST) an khawn chu kum dang aiin an hmu tlem a. Sum hmuh a tlem chhan hi contract hnathawh a tlem vang niin Taxation Department thawktute chuan an sawi.

Mizoram sawrkar in kumin April ni 1 atanga a kalpui Mizoram Universal Healthcare Scheme (MUHCS) hnuaia inziahluh theih hun chu a tawp ta a, chhungkaw 2,97,516 vel an inziaklut a. August 2025 chhung khawngaihna hun (grace period) hawng lehin inziahluh leh theih a ni ang.

India hmarchhak State pasarih-a Chief Minister leh an aiawhte chu nimin khan 16th Finance Commission member te nen inkawmin he hunah hian Mizoram Chief Minister Lalduhoma chuan Mizoram mamawh hrang hrang a thlen a ni.

Nimin July 7, 2025 kha MNF Founder President Laldenga (L) thih champha vawi 35-na niin hemi pual hian a Thlan, Aizawl Treasury Square-ah pangpar dah a ni.

Power & Electricity Department changtu Minister F. Rodingliana chuan Electric Bill an tipung lo niin a sawi.

Nimin khan New Delhi-ah Indian Council of Agricultural Research (ICAR) Society Annual General Meeting (AGM) vawi 96-na neih niin Mizoram atangin Agriculture Minister PC. Vanlalruata a tel a, Mizoram mamawh hrang hrang thlenin heng zingah hian Lunglei, Champhai leh Saitual District-a Krishi Vigyan Kendra (KVK) din thuai a nih theih nana hma la turin a ngen a ni. Hei bakah hian Mizoram sik leh sa leh a ram leilung nena inmil tlangram-a chin tur buh chi tha (High Yielding Upland Paddy) siamchhuak tura hma la turin a ngen a, Mizoramin thlai chi tha zawk kan neih theih nan ICAR chu hma lakpui tura a sawm bakah National Mission on Oilseeds - Tree-borne Oilseeds hnuaiah Mizoram Sawrkar chuan kum 2024-2025 sawrkar kum ah Tung (Vernicia Fordii) chin a tharthawh leh tih sawiin, Tung chungchangah ICAR-in research neihsak tur leh a chingtu ten tam zawk leh quality tha zawk an thar theih nan Package of Practices duan sak turin a ngen bawk a ni.

Nimin July 6, 2025 (Pathianni) kha ‘Mizo Hmeichhe Insuihkhawm Pawl’ (MHIP) dinchamphaphak, MHIP Day vawi 51-na a ni a, kumin hian MHIP Day hi Pathianni a nih avangin Inrinni khan Branch tam tak chuan a lawmna hun an hmang a ni.

Mizo Hmeichhe Insuihkhawm Pawl (MHIP) General Hqrs. President Lalliani chuan MHIP member zawng zawng bakah Mizoram mipuite chu MHIP Day chibai a buk.

Mizoram sawrkar in District Hospital Ser-chhip-a Dialysis khawl dah tura a ruahman pahnih (2) chu Serchhip rawn thlenpui a ni ta a, a dahna tura ruahman lawk, TRAUMA Building-ah dah nghalin Inrinni khan bun fel nghal a ni. Serchhip District Medical Superintendent (DMS) Dr. ZD. Lalmuanawma chuan he khawl hmang tur hian thawktu dah leh ruatfel an la awm lo tih sawiin, sawrkar in thawktu a rawn dah belh lo a nih chuan thawktu awmsa atangin Training nei tura in tirh te pawh ala ngai mai thei niin a sawi bawk.

Nimin Pathianni kha Mizoram Presbyterian Kohhran ni pawimawh, Health Sunday & Hospital Sunday (Damdawi In Pathianni) a ni a, Kohhran hrang hrangah he ni pual hian hun hman a ni.

Mizoram Larsap, General VK. Singh chuan Mizo thalai zingah ruihhlo leh a kaihhnawih tireh turin Kohhran leh Sawrkar te thawhhona tha tak neih a tul thu a sawi.

Chin Hills-a Chin National Organisation (CNO) leh Hualngoram Peoples Organisation (HPO) te chuan tun dinhmunah Inkahhai (ceasefire) neih an remti. Inrinni (July 5, 2025) zing dar 8:30 vel atang khan Zokhawthar (India) bul, Tiau lui kama Khawmawi khua ah Chin National Defence Force (CNDF), Falam lam mite leh CDF - Chin Defence Force (Hualngo sipai) te an in kap a, hetianga inkahna a thlen chungchang ah hian Central YMA chuan CNO leh an ralthuam keng Chin National Defense Force (CNDF) leh HPO leh an ralthuam keng Chinland Defense Force (CDF)-Hualngoram te chu leng-ah sawmin he buaina avanga mihring nunna chan an awm leh nunau sang tam tak thlabar manganga an awm chungchang sawiho a ni a. Central YMA hruaitute ngenna angin mipui nunau ten an tawrh zel lohnan tun dinhmunah chuan Inkahhai (ceasefire) neih an remti a, a tul angin pawl pahnih inkara inhriatthiam lohna hrang hrangte chu la sawiho zel nise an ti bawk.

Khawzawl-a District Agriculture Marketing Committee (DAMC) hmalaknaa Sawhthing lei runpui kharna chu Zirtawpni khan neih niin Khawzawl District-ah hian kumin February 20 atanga July 3 thleng khan Sawhthing hi lei a ni a, Secondary Collection Centre atangin Sawhthing kg 46,91,036 lei a ni a, District zinga lei hnem ber an ni. Sawhthing hi loneitute hnen atangin kg. khat Rs. 50/- zelin an leisak a, Sawh-thing leituten an lei ngamna zat atanga Rs. 50/- a tlinna tura sum sen ngai chu Sawrkarin a tum ve thung a ni. 

Archaelogical Survey of India (ASI), Director (Monument) AMV Subramanyam chuan Inrinni khan Lianpui khua a Pipu sulhnu awmte tlawhin ram hmun pawimawha puan a nih theihna tura hmalak ngai te a enfiah. Lianpui khua a ‘Lungphun Ropui’ hi ASI chuan kum 2021 khan ‘Ram hmun pawimawh’ a puan a nih theihna turin thuchhuah hmahruai a lo tichhuak tawh a. ASI Director chuan Delhi-a a let leh hunah thil tihfel ngaite tifelin, hun reilote chhungin Lianpui khua a Lungphunte chu ‘ram hmun pawimawh’ ah puan a ni ang, a ti. ASI Director hi Dr. Rajendra Dehuri, Superintendent of Archaelogist Gauhati, Dr. Shyam Singh, Assistant Archaelogist leh K. Lalrinchhani Assistant Archaelogist ten an tawiawm a. Lianpui Welfare Aizawl chuan hemi kawnga theihtawpa hma lakpuitu, Art & Culture Minister C. Lalsawivunga leh Rajya Sabha MP K.Vanlalvena chungah lawmthu an sawi a ni.

Khawzawl District chhunga khaw pathum Vangtlang, Chalrang leh New Chalrang-a Buh eichhetu rannung chi khat chu Agriculture Department mithiamte thurawn anga damdawi hmanga kah an nih hnuah hmuh tur an awm tawh lo nia thudawn a ni a. Heng khaw pathuma Pangang puang hi 'Buh hnah khawr pangang' an ni a, a tir lamah hlauthawng deuh mahse damdawi hmanga kah anih hnuah hmuh tur an awm ta lo a. Pangang hian buh hi a khawih chhe viau hman lo nia an hriat thu leh nghawng a nei lo tura an ngaih thu Agriculture Department chuan an sawi a ni. Hetiang Pangang hi hmundang ah pawh awm bawk mah se an thunun thei nia an inhriat thu an sawi a ni.

Tunhnai khan Sava chanchin zirmite chuan Phawngpui National Park-ah India ram hmundang a la awm ngai lo sava chi thar an hmuchhuak.

Mizoram Synod hnuaia Kristian Thalai Pawl (KTP) Member zingah nikum chhung khan Biak In hawnga Inneih mi 1577 an awm a, za zela 46.53% niin hmundanga Inneih mi 1812 an awm thung.

Mizoram Lok Sabha MP Richard Vanlalhmangaiha chuan mi 13 chuan theihna Bus, Tata Winger New Model chu Inrinni khan Association for Voluntary Blood Donation, Mizoram (AVBD) hnenah a pe.

Mizoram chakkhai lakluhna kawng pawimawh ber Sairang leh Khamrang inkar, NH-06 kawng chhia chu Inrinni khan BJP Mizoram hruaituten a hmunah an enfiah.

Mizoram PWD-in National Highway-06 bika a enkawl thenkhat chu National Highways & Infrastructure Development Corporation Limited (NHIDCL)-in a enkawl tawh dawn.

Mizoram sawrkar hnuaia zirna In-a pawl 3 atanga pawl 8 zirlai zawng zawngte'n zawhna inang an chhan theih nan ruahmanna kalpui mek a ni.

Mizoram Health Care Society chuan June, 2025 tawp thleng khan Mizoram Universal Health Care Scheme (MUHCS) hnuaiah damlo mi 14,579-te inenkawlna senso Rs. 18,15,50,923 a pe tawh.

Taxation Department-in kumin sawrkar kum kal mek, 2025-2026-a Goods & Services Tax (GST) an khawn chu kum dang aiin an hmu tlem a. Sum hmuh a tlem chhan hi contract hnathawh a tlem vang niin Taxation Department thawktute chuan an sawi.

Nimin khan Serchhip-ah Rashtriya Avishkar Abhiyan (RAA) hnuaiah District Level High School Quiz Competition chu BRC Hall, Ser-chhip-ah neih a ni.

Horticulture Department changtu Minister C. Lalsawivunga chuan nimin khan Chhingchhip a MIFCO hmunpui tlawhin MIFCO Chairman Lalthazuala Rawite leh KVI Board Chairman C. Lalremliana ten an tawiawm a ni.

Thla kalta June 2025-a ruah tam tham tak sur avanga Serchhip khawpui chhunga Leimin lian tham tak tak mipui leh vantlang tana harsatna thlen mekte thenfai dan tur chu nimin khan sawiho a ni.

Serchhip District chhung Thenzawl khuaa Vantawng Cluster Level Federation (CLF) te chuan Ministry of Rural Development (MoRD) in India ram puma Federation tha thlanna a buatsaih, Atmanirbhar Sangathan Award, 2024-ah Federation tha lawmman pakhatna an dawng a, he Award dawng tur hian India ram a Cluster Level Federation 33,736 te chu endik niin, Phase 4-ah then an ni a, Vantawng CLF te hian North East Region atangin pakhatna an dawng a ni. Award hi CLF ten an hnuaia SHG member thingtlang-a chengte tana hna an thawh that avanga pek an ni a, he Award hian sumfai cheng nuai 3 kengtelin kumin-a Independence Day lawmna New Delhi-a neih hunah Union RD Minister in CLF hruaitute kutah a hlan dawn a ni.

Thenzawl Lamlian Dung Zau-a Dragon Fruit chingtute chuan kumin-a a vawi khatna atan an Dragon Fruit tharchhuah te Local Soda Tui bon Natural Pvt. Ltd. te hnenah an hralhchhuak leh ta a, tun tumah hian quintal 67 an hralhchhuak thei a ni. Thenzawl Dragon Fruit Society-a Secretary Gaby Zosangpuii chuan Dragon Fruit hi kum khat ah vawi sarih atanga vawi 9 lawh thin a nih thu a sawi a, Thenzawl-a College of Horticulture chuan Dragon Fruit hi a hralhna turte buaipui bawkin nimin-a a hralhna hi an enpui a, a hrisel lo deuh nia lang te pawh an zirchian sak dawn a ni.

Cooperation Minister PC. Vanlalruata'n ZPM Sawrkar lo pian hnuah Co-operative Society chu chawi vul thar leh a nih thu a sawi.

Mizoram Lok Sabha MP Richard Vanlalhmangaiha'n All India Service leh Central Service-ah Mizo an tlem ta lutuk chu rualawh a na hle tih sawiin, thalaiten hetiang lam hi hawi deuh deuh se a duh thu a sawi a. MZP General Hqrs. President chuan sawrkar hna lak dik lo nia sawi chu an chhui mek thu a sawi bawk.

Sports Minister Lalnghinglova Hmar chuan Hnahthial-a Hockey Ground siamna atan cheng vbc. 9.88 dah a nih thu a sawi.

Champhai District-a Samthang khua chuan Zikhlum tharchhuah hralh kawngah harsatna tawk mekin hemi kawnga hma lak pui tura sawrkar an ngenna in awmzia a neihloh avangin Zikhlum chingtute an buai mek nia thudawn a ni a. Samthang khuaah hian chhungkaw 240 vel awmin chhungkaw 145 in eizawnna atan kumin ah Zikhlum hi an ching a, Zikhlum quital 10500 vel tharchhuah beiseiin a hralh kawngah harsatna an tawh chu sawrkarin hriatpuia State pawn atanga Zikhlum lakluh titawp hrih turin an ngen bawk.

Aizawl City Local Council Association hruaitute chuan niminpiah tlai khan Central YMA Office-ah Central YMA hruaitute hmuin Mizo hnam himna tura an ngaihpawimawh hrang hrangte an sawipui a, Inner Line Permit (ILP) pekchhuah dan leh hmansual a nih theih dan te leh Hnamdang Misitiri rawih dan chungchang bakah Theka Rate chungchang leh Ruihhlo do kawnga thawhho chungchang an sawipui a ni. He hunah hian Central YMA hotute chuan vengchhung thianghlimna tur leh hmasawnna atan thawhhona tha YMA leh Local Council ten neih a tul thu sawiin, an thu thlen chu an lo sawiho tur thu an hrilh a ni.

Myanmar leh Manipur atanga raltlan rawn lut Khawzawl khawchhunga awm mek te hnenah nimin khan Blanket sem a ni a, Khawzawl District chhungah hian Myanmar raltlan hi mi 304 leh Manipur raltlan mi 4 an awm mek a ni. Nimin a Blanket semna hun hi District Bawrhsap K. Vanlalthiana chuan hmanpuiin raltlante chu theihtawpa tuamhlawm a, tawiawm a tul zia sawiin, mamawh leh tul dangte a awm leh a nih pawhin VC te chu inthlahrung lova sawi leh zel turin a chah a ni. He hunah hian  Khawzawl SP F. Lalbiakzauva leh Joint VC President te pawhin thu an sawi a ni.

Mizoram Home Guards & Civil Defence (MRHG&CD) chuan nimin khan MRHG&CD Conference Hall-ah Review Meeting neiin Home Minister K. Sapdanga chuan a telpui a, Mizoram Home Guard leh Civil Defence-a volunteer-te chu ram leh mipui tana hna pawimawh tak tak thawktu an nih thu sawiin, Retirement benefit nei lova an awm reng chu veiawm a tih thu pawh sawiin, Mizoram Provisional Employee Savings Scheme 2024-ah an tel theih dan tur ngaihtuah a tul thu a sawi a. MRHG&CD-a volunteer-te chu ral do tura ngaih ni lo mah se ralthuam pek an nih thu leh a tul chuan ral do tura inring tur an nih thu a sawi bawk.

Saitual-a District Research Officer (DRO) Office Building thar Keifang Venghlun a mi chu nimin khan Economics & Statistics Director B. Lalrinhlua’n a hawng a, tunhnaiah an Department in hmasawnna tam tak an hmuh thu sawiin, District 11-a Office nei thei hmasa ber an nih hial a rin thu a sawi bawk. Nimin-a hawn tak DRO Office building hi cheng nuai 70 senga sak niin Zopa chhiara chhawng thum a ni a, Office bakah District Research Officers' Quarters leh Staff cum Chowkidar Quarters pawh a awm nghal dawn a ni. He Building hi March 26, 2021-a sak tan niin tun dinhmunah thawktu DRO bakah midang 4 an awm mek a ni.