Latest News

Chanchin thar thenkhat :

Speaker Virtual Meeting nei

India hmarchhak State-a Assembly Speaker te chuan nimin khan Virtual Meeting neiin he hunah hian Mizoram atangin Assembly Speaker, Lalrinliana Sailo pawh a tel a ni. He Meeting hi Arunachal Pradesh Legislative Assembly Speaker, Commonwealth Parliamentary Association (CPA) Zone-III Chairman nilai mek chuan kaihruaiin Hmarchhak miten chi leh hnam avanga enhranna kan tawh thin chungchang leh chumi avanga harsatna thleng thinte sawiho a ni a. Mizoram Assembly Speaker, Lalrinliana Sailo chuan hmarchhak mi ten ram hruaitu te thleng pawha enhranna an lo tawh thin thu sawiin, Hmarchhak Legislative Assembly te inzawm khawmna forum, CPA India Zone-III hminga heng harsatna kan tawh thin te a lo reh theihna tura tanrual leh hmalak tul a tih thu a sawi bawk.

He hunah hian sawihona an neih hnuah Hmarchhak Assembly Speaker te hmingin hmar-chhak miten chi leh hnam avanga enhranna leh harsatna kan tawh thinte a lo reh theihna tura hma la turin Prime Minister, Chairman Rajya Sabha leh Speaker Lok Sabha te hnenah ziaka thlen nise an ti a. A tul anga delegation pawh Central India-ah in tirh nise tih a ni.


MSU in CM hnenah thlen

Mizo Students’ Union (MSU), General Hqrs. Aizawl chuan College zirlaite Admission Fee pêk atanga sawrkar-a Revenue chhûnluh thin chu tihtlem a nih theih nan Chief Minister hnenah rawtna a thlen a. MSU chuan Higher Secondary School Fees-ah zirlai pakhatah Rs. 100/- zel sawrkar Revenue-ah chhûnluh a nih laia College zirlai pakhat zel atanga Rs. 1,320/- chhûnluh a ni chu College mamawhna te enin a sâng hle tih sawiin, heng sum chhûnluh atang hian Tuition fee hi a nihna ang taka hman a nih theih nan sawrkar revenue-a chhûng lût tel tawh lova, College tinin anmahni mamawh leh zirlaite tana pawimawhah an hman nghal theih nan dah ni zawk se an duh thu an sawi a ni.


MZP in tanpuina an hlan

MZP General Hqrs. leh Mizo Society of America (MSA) tangkawp chuan tunkar Ningani khan Myanmar atanga râltlân, Hnahthial District (Cher-hlun, Thingsai, leh New Ngharchhip) khuaa mite hnenah tanpuina an hlan a, tanpuina hlan tur hian MZP General Secretary, Lalnunmawia Pautu hovin an hruaitu rual te an kal a ni. He hunah hian MZP hian buhfai, Alu leh Dal bakah pawisafai Rs. 70,000 zet an sem a, MZP chuan heng tanpuina an sem ah hian khaw hrang hranga Village Level Task Force (VLTF) ten tha taka lo dawngsawngin, sawrkar in a duan Standard Operating Procedure (SOP) uluk taka vawng chunga an lo buaipui thu sawiin, an lawm hle tih an sawi bawk.



Karlui-I ah COVID-19 hri kai hmuhchhuah an tam

Lawngtlai District khawthlanglam, Vaseikai thlang a awm Karlui-I ah COVID-19 hri kai zawnchhuah hna thawh mek niin hrikai mi 146 hmuhchhuah a ni tawh. Karlui-I hi Doctor pathumin an thutchilh mek a, Medical Team ten niminpiah khan Sample 306 endikin hri kai mi 65 hmuhchhuah a ni a, Sample endik hi nimin-ah chhunzawm niin nimin khan Sample 372 endik leh niin hri kai 81 hmuhchhuah a ni leh bawk nia thudawn a ni.

Karlui-I hi hrikai zawnchhuah a awlsam zawk nan District Magistrate in Containment Zone-a a puanlai a ni a, In 274 awmin mihring cheng 930 vel an ni a. Chhungkua a hrikai te chu an mahni In lamah khunghran an nih bakah 4C-ah mi ahnem tak dahluh an ni bawk.

Comments

Chhiar Hlawhte