Chanchin thar thenkhat :

GMD hman dan tur rel a ni

Tun thla ni 11-a Green Mizoram Day hman dan tur ngaihtuahin nimin khan Champhai-ah District Level Committee on Green Mizoram chu an thukhawm a. Green Mizoram Day-2021 hawnna inkhawm chu New Champhai-ah neih tura rua-hman niin hemi ni hian thingphun bakah, Hring-langtlang ngaw hnuai thawlh fai/samfai hnatlang leh Hringlangtlang District Park-ah ramsa leh sava tlan chi thing par leh rah chi phun hnatlang neih nise an ti a. New Champhai-Zokhawthar kawngpui Ruantlang leh Melbuk inkar kawngkam tihfai leh thing phun hnatlang neih leh, nikum hmasa leh nikum lama Green Mizoram Day-a thing phunna hmun Mualbuhvum-ah Live Hedge Fencing ti tura hmalak nise tih a ni bawk.

Thingphun zaa 44.8 nung

Khawzawl District-ah nikum-a Green Mi-zoram Day puala thingphun 2248 zinga 1007, za zela 44.8 te chu a nung tha tih nimin-a Khaw-zawl District Level Committee on Green Mizoram thutkhawm neih ah tarlan a ni a. He thutkhawm ah hian kumin a Green Mizoram Day hman dan tur sawihona neiin, June 11 khian DC Pisa tual-ah a hawnna neiin DC Complex leh Mualvawm Field chhehvelah sawrkar Department hrang hrang, Sub-Hqrs. YMA leh Sub-Hqrs. MHIP atanga thingphun tura ruat bik ten COVID-19 inkaihhruaina a siamte zawm chungin thingphun hnatlang kalpui se an ti a. Kangmei ven kawnga titha khaw pathumte leh hla thu inphuahsiaka titha mi 3 te hnenah lawmman pek ni se an ti bawk.

Vaccine pe leh tan dawn

National Health Mission-a Director leh State Immunization Officer, Dr. Eric Zomawia chuan Vawiin, June 4, 2021 (Ningani) atang hian Aizawl-ah kum 18-44 inkar tan Vaccine pek a ni leh dawn tih thuchhuah siama tarlangin, nitin (Pathianni tiam lohvin) zing dar 8:00 ah booking hawn thin a ni ang, a ti a. District danga inpek dan tur chu CMO/DIO ten ruahmanna siamin an puangzar thin ang.

Deputy CM in bungrua hlan

Tuichang bialtu MLA leh Deputy Chief Minister, Tawnluia’n a bial chhunga African Swine Fever (ASF) leng mek dona tur hmanrua chi hrang hrang a pekte chu nimin khan District Veterinary Hospital, Khawzawl-a Veterinary Officer Dr. Phillip Lawmsangzuala hnenah hlan a ni a, bungrua a hlan te hi PPE full set 40, Sprayer 3, Hand Sanitizer litre 10, Slaked lime (chinai thi) bag 15, Bleaching powder bag 15 leh Gloves-box 5 te niin, ASF Test Kit leh Sodium Hypochloride-te pawh pek leh a ni dawn bawk a ni. Khawzawl-ah hian ASF hri leng avangin Vawk 170 zet a thi tawh a ni.

Silk Samagra tlangzarh

Sericulture Minister Dr.K.Beichhua chuan nimin khan Siaha Circuit House kawt-ah SEDP hnuaia Silk Samagra a tlangzarh a, he hmalakna hi beneficiries ten rinawm leh taima taka an kalpui phawt chuan tun atanga kum 5/6 ah chuan thingtlang khaw lama chhungkaw tam tak chu pension hlawh nei ang an ni tawh ang, a ti. Siaha District-a kalpui tur Muga Silk Development hnuaiah hian 1st installment-ah khaw 21 atangin beneficiries 400 thlanchhuah an ni a, North-Eastern State te zingah chuan Mizoram hi Muga Silk Pangang khawi nana sik leh sa thatna ber pawl a ni.