Thenzawl-a Task Force leh Police Duty te beitu manin thubuai siam sak an ni

COVID-19 hri leng avanga Duty te chunga mawilo taka che leh Police te pawh beitu-a puh mi 3 te chu Thenzawl Police ten manin nimin khan Serchhip-ah rawn lakchhoh niin District Court-ah hruai nghal an ni.

Thudawn danin tunhnaiah Thenzawl khua ah COVID-19 hri kai nasa tak an pun leh tak avangin Thenzawl Town Task Force chuan hmun hrang hrangah Duty insiamin hmarlam atanga Thenzawl khaw luh tirh, Tourist Lodge bulah Thenzawl Venghlun YMA Task Force te an duty a. Helai bulhnaiah hian chhungkaw pakhat chu hri leng avangin In lama inkhunghran (Home Quarantine) tir niin anmahni hi dan lova zu zuar nia hriat an nih bakah mi thenkhat ten tlawhpawhin hei vang hian COVID-19 hri leng avanga Duty leh Police te pawhin an man nghe nghe a. Niminpiah-a man an nih leh hnuah he In neitu Evy Lalramhluni nia insawi leh midang pahnih, Ramnunpuii leh Lalremruata te chuan an In bula Task Force Duty-na hmunah buaina siamin Evy Lalramhluni hian Task Force Duty zinga hmeichhia pakhat chu kut a thlak nia thudawn a ni bawk.

Hemi chungchangah hian Thenzawl Task Force te chuan Thenzawl Police-ah thil awmdan hi thlenin Thenzawl Police te hi an hmunah kalin thil awmdan an enfiah a, he huna kal ve Women Constable pakhat chu Evy Lalramhluni hian a lo sual leh bawk nia thudawn a ni a, anmahni hi Home Quarantine lai an nih avangin an In-ah hian Rapid Antigen Test hmanga Sample lak sak niin hri an kai lo nia a lan avangin Police te hian an man zui a, nimin khan Serchhip Police Station-ah rawn hruaichhoh niin nimin tlai khan Serchhip District Court-ah hruai nghal tura tih an ni a, thubuai chi hrang hrang siam sak an ni.

He thil a thlen hnu hian Police te leh khawtlang hruaitute hian Evy Lalramhluni In hi dap nghalin Sap zu um 24 leh Rakzu litre 610 an man leh bawk a ni.

Thenzawl Town Task Force leh Thenzawl Joint YMA te chuan nimin khan thuchhuah siamin COVID-19 hripui in Thenzawl a run mek laia hetianga duty te zah miah lova khawsa leh hripui laka midang te himna ngaipawimawh duh miahlo an awm chu pawi an ti hle tih an sawi a, an chungah na taka action lak a nih theih nan a tul angin an bawhzui zel dawn tih an sawi bawk.