Lenkawl

Vawiin June 30, 2023 hi MNF leh India sawrkar ten remna an ziahna ni champha, Remna Ni vawi 37-na a ni a, Sawrkar Pisa chawlh ah puan a ni. MNF ten India laka zalenna an sual avanga kum 1966 atanga Mizoram chu ram buai a nih hnuah kum 20 zet Mizoram in rambuai a tawh chu India sawrkar leh MNF ten chuan rambuai atanga kum 20 leh thla thum chuang hnuah Remna Thuthlung hi an ziak a, he Remna Thuthlung hi MNF leh India sawrkar aiawh te chuan Dt. 30.06.1986 zan dar 1:00 PM khan ziakin India sawrkar aiawhin Home Secretary of India R.D. Pradhan; MNF Party aiawhin  an President Laldenga leh Mizoram sawrkar aiawhin Chief Secretary Lalkhama te chuan hming an signed hnan a ni.

Serchhip bialtu MLA leh ZPM Leader Lalduhoma chuan Nilaini tlai khan Serchhip rawn thlengin Serchhip-a an party Unit hrang hrangte a tlawhchhuak mek a, nimin lamah an Party Unit pali (4) tlawhin Vawiin hian Unit pathum (3) a tlawh leh anga, naktuk Inrinni-ah Unit pakhat tlawhin chawhnu lamah Aizawl a pan leh dawn a ni. Serchhip bialtu MLA Lalduhoma hian Thenzawl khua in kum 2025-a Mizoram Kohhran Hmeichhe Inkhawmpui lian an thlen tur atana thutkhawm nimin-a Thenzawl-a neih chu a telpui nghal bawk a ni.

Serchhip CMO hnuaia awm Ngentiang khuaa cheng nuai 266.5 senga Primary Health Centre (PHC) Building sak thar chu nimin khan Health Minister Dr. R. Lalthangliana chuan a hawng a, he hun hi bialtu MLA leh AH&Vety Minister Er. Lalrinawma pawhin a hmanpui bawk a ni.

Serchhip District Chess Association leh Serchhip Sub-Hqrs. YMA tangkawp buatsaih 'Inter-Branch YMA Team Chess Tournament' chu nimin khan Serchhip-ah khelh tan niin YMA Branch hrang hrang atangin Team 17 an tel a ni.

Serchhip District Football Association (SDFA) chuan nimin khan General Body Meeting neiin he hun hmanpuitu MNF Publicity Board Vice Chairman J. Malsawmzuala Vanchhawng chuan Serchhip District chu Football-ah kan sang hle nia sawiin, hmabak erawh kan la nei tam hle niin a sawi.

Serchhip-a awm 42nd Bn. Assam Rifles te chuan Remna ni 2023 pualin niminpiah khan Serchhip District Hospital Blood Bank-a dah turin thisen Unit 6 an pe a, thisen petute hi mipa vek niin Serchhip Blood Bank-ah kalin thisen hi an pe a ni. Serchhip District Hospital Blood Bank atanga thu kan dawn danin, tun thla ni 14 atanga Remna ni puala thisen pekna hun hawn a nih hnuah nimin thleng khan Mipa 65 leh hmeichhia 13, an vaiin mi 78 ten thisen an pe tawh a, heng zinga a tam zawkte chu pawl hming-a thisen pe niin mahni-a Blood Bank-a kala thisen pe mi 4 an awm bawk a ni.

Mizoram Pradesh Youth Congress Committee (MPYCC) hruaitute chuan Deputy Chief Minister Tawnluia Department chan pakhat hnuaia cheng nuai 100 chuang hnathawhna awm loa ziahral nia Assembly Speaker in a sawi awm chu a rang thei ang bera chhui chiang tur leh thubuai ziaklut turin Chief Minister leh Deputy Chief Minister te an phut thu nimin khan thuthar thehdarh-tute kawmin an sawi,.

Mizo National Youth Front (MNYF) Kolasib Block chuan nimin khan Kolasib-ah Conference neiin he hun hmanpuitu MNYF Hqrs. President Dr. L. Thangmawia chuan Mizoram tâna din Political party tam tak an awm tawh thu leh Mizo hnam tâna din awm chhun erawh MNF party chauh a ni tih a sawi. He hunah hian Ko-lasib bialtu MLA K. Lalrinliana chuan an party zawm thar mi 144 a lawmlut bawk a ni.

Kolasib District MJA te chuan nimin khan an District chhunga Mizoram chak lakna kawngpui lirthei tana zawh harsa khawpa a chhia te chu a hmunah tlawhin an enfiah a, Mizoram chak lakluhna kawngpui ber enkawl dan chu a fel lo tih MJA chuan sawiin, mipui hmakhaw ngaiin tun ang lo deuha enkawl a tul thu leh sawrkar pawhin ngaih pawimawh zual ah nei se an duh thu an sawi bawk.

Nimin June 29, 2023 khan Muslim Sakhaw zuitute ni pawimawh I'dul Zuha pualin Aizawl Mosque Committee & Muslim Welfare Society Mizoram buatsaihin Vaivakawn Joint YMA Field-ah a huho-a tawngtaina neih a ni a, he hunah hian an Secretary Mamon Majumdar-a chuan I'dul Zuha pualin Mizoram mipui zawng zawngte chibai bukin, ram ralmuang tak hnuaia Mizorama Muslim Sakhaw zuitute thlamuang taka an awm theihna ah sawrkar leh Mizoram mipuite chungah an lawm em em tih a sawi a, Mizoram-a Muslim awmte chu Ddanin a phut angin Inner Line Permit (ILP) dik taka kalpuia nei tura hrilhin, Mizorama Kohhran, tlawmngai pawl hrang hrang leh Mizoram sawrkar te nen thawhhona tha tak neia tun hun an hmang thei chu lawmawm a tih thu a sawi bawk.

Mizoram Cooperative Apex Bank (MCAB) Ltd. Annual General Assembly vawi 28-na chu niminpiah khan Aizawl Vanapa Hall-ah neih a ni a, he hunah hian MCAB Chairman T. Lalmuanpuii chuan Mobile Banking Apps/G-Pay hman theihna tlangzarhin, kum 2022-23 chhunga Annual Report, Annual Statement of Account leh Annual Budget te sawiho a pawm a ni. Apex Bank hian tunhnai kum 10 liamta atang khan kawng hrang hrangah hma sawnin, kum 2022-23 chhung khan hlep cheng nuai 3,965.69 an nei a ni. He hunah hian kum 2023-2028 chhung atana Board of Directors thlanna neih nghalin, Chairman leh Vice Chairman bakah Board Member tur mi pali an thlang bawk.

Remna ni vawi-37na puala Information & Public Relations Department, Mizoram Journalist Association (MJA) leh Mizo Photographer’s Society (MPS) te buatsaih Photo Exhibition chu nimin khan Aizawl-a Vanapa Hall-ah neih a ni.

Nimin zing khan Chief Minister Zoramthanga hovin Zuangtui a FCS&CA Kudam chu Unity Mall sakna atana a remchan theih dan tur thlithlai a ni.

Mizoram-a Sawrkar damdawi In leh Health Centre hrang hrangte faina-a inelna, Kayakalp Award chu nimin khan Aizawl-ah semchhuah a ni a, Siaha District Hospital chu Hospital fai ber ah thlan niin Champhai District Hospital in Eco-Friendly Award an dawng a. Sub-District Hospital (SDH) leh Community Health Centre (CHC) fai berah Saitual CHC thlangin Biate CHC leh Thenzawl CHC ten an dawt bawk. Serchhip District-a PHC fai lawmman chu E. Lungdar PHC, N. Vanlaiphai PHC leh Khawlailung PHC ten dawngin Health & Wellness Centre-Sub-Centre fai lawmman Hualtu leh Sailulak in an dawng bawk.

Remna Ni 2023 lawmna atana buatsaih State Level High School Quiz Competition chu nizan hmasa khan Aizawl-a Ignite Studio-ah neih a ni a, he hunah hian Serchhip District aiawhin Govt. JM High School zirlai Lalhlimpuii leh Laldinzuala te telin a pumpui ah pathumna an ni. Nizan hmasa a Quiz Competition hi School Education Minister Lalchhandama Ralte chuan telpuiin Remna Ni chu Mizoram tan Ni chhuanawm leh hriatreng tlak a nih thu leh rambuai tia hriat hlawh chu khawvela phochhuah tham remna tluantling nei a lo ni ta tih a sawi a ni.

Bharat Scouts & Guides, Serchhip District chuan nimin khan Vantlang tana thil tha tihna ni, Social Work Day hmangin Serchhip khawpui lunlai-ah bawlhhlawh chharfai hnatlang an nei.

Mizoram sawrkar chuan Information & Public Relations Department hnuaia Mizoram Information Service (MIS) Officer te awmna hmun a siksawi a, hemi ang hian Deputy Director nia Serchhip DIPRO hna chelh mektu K. Saitluanga chu Press Information Officer (PIO) to Chief Minister hna chelh tura sawn niin a aiawh tur hian Deputy Director nilai Lalnunmawii chu Aizawl atangin rawn dah a ni thung.

Mizoram sawrkar-a hnathawk te Pension kum hmanlai kum 60 ni mek chu kum 62 ni tura sawrkar hnathawk inzawmkhawm pawl, Federation of Mizoram Government Employees & Workers (FMGE&W) an nawr chungchang sawihona chu niminpiah khan Secretariat Conference Hall-ah DP&AR Secretary Lalramnghaka hovin NGO te nen neih a ni a. Thudawn danin MUP, MZP leh MSU te chuan pension kum tihsan an duh loh thu sawiin, YMA leh MHIP chuan sawrkar thutlukna an pawm theih thu an sawi thung a ni.

Sports Minister Robert Romawia Royte chuan nimin khan MTT Hall, Kawltheihuan, Mission Veng-ah Mizoram Table Tennis Association (MTTA) Season Opening Championship 2023 hawnna inkhawm a hmanpui a. He Season Opening Table Tennis Championship hi ni 3 chhung neih tur niin Category 16-ah Infiamna hi neih a ni anga, District hrang hrang atangin Club leh Association 21 an tel dawn a ni. Tun tumah hian tum danga tel ngailo Men's Double leh Mix Double telh thar a ni bawk.

Manipur tualchhung buaina avanga sahimna zawnga nimin thlenga Mizoram-a raltlan rawn lut chu mi 12,244 an tling tawh a, raltlan lut tamna ber Kolasib District-ah mi 4359 an lut tawh a ni. Manipur atanga raltlan te tan hian hmun 35-ah Relief Camp siam niin mi 2932 an awm a, Relief Camp pawnlama awm mi 9312 an awm bawk.

Mizoram-a Trade Union pawl hrang hrang NTUM, MMA, CITUM leh FOMTU te telna Mizoram Trade Union Co-Ordination Committee chuan Mizoram Sawrkar Council of Minister-in Cabinet Meeting-a an pass Shop & Establishment Act chu a taka hmang ngei turin Mizoram sawrkar an ngen bakah July 2023 ralhma in Notification pawh tichhuak se an ti a. July thla ralhmaa Notification hi a tichhuak lo a nih chuan an thiam dan ang angin hma an lak dawn thu leh Sawrkar hian Notification a tichhuak ngam lo a nih chuan Notification hi a chhuah ngei theih nan Court lama kal mai an tum thu an sawi bawk.

Vawiin June 29, 2023-a 'National Statistics Day' vawi 17-na lo thleng tur pualin nimin khan Economics & Statistics Conference Hall-ah hun hman a ni. 'National Statistics Day' hi June 29-ah hman thin ni mah se kumin hian Sawrkar chawlh a nih avangin nimin khan hman a ni a, hemi puala hun hman ah hian Secretary, Planning and Prog-ramme Implementation Department Lalmalsawma Pachuau chuan ram in hmasawnna tha leh dik a neih theih nan ‘Statistic Data’ felfai tak a ngai tih sawiin, Mizoram in data rintlak a neih theihna tura thahnem ngai taka thawk thin Economics & Statistics Department te chhuanawm a tih thu a sawi a. Economics & Statistics Department-ten ‘Statistical Handbook’ an tihchhuah thin chu mi tam takin an hmang tangkaiin an hlawkpui hle tih pawh sawiin, Data felfai tak anih avangin in ram hmasawnna tur a ke pen naah nasa takin a tanpui a ni, a ti bawk.

Deputy Chief Minister Tawnluia chuan nimin khan Khawzawl Dinthar Veng-ah DRDO building thar a hawng a, he hun hi RD Minister Lalruat-kima pawhin a hmanpui a ni. Khawzawl DRDO Office building hi MNREGS leh MLA-LADS Convergence atangin cheng nuai 166.91 senga sak a ni a, March ni 24, 2021 khan a sakna tur lungphum phumin sak zui nghal a ni. DRDO Office Building thar hi Zopa chhiara chhawng li (4) niin Ground Floor-ah Chowkidar Quarters, Ccanteen leh lirthei dahna a awm a. First Floor-ah Establishment Section leh Officer Room 2, Second Floor-ah Project Director Office leh Officer Room 1, Third Floor-ah Officer Room 2 leh Conference Hall a awm a ni.

Manipur tualchhung buaina avanga Mizoram a Zohnahthlak raltlante chungchang chu nimin khan Health Minister Dr. R. Lalthangliana hovin a Pisa-ah sawiho a ni.

Art & Culture Department Director Carol VLMS. Dawngkimi chuan Lunglei Sazaikawn-a Lunglei District Museum Building sak mek chu nimin khan a hmunah a tlawh. Museum Building hi Ministry of Culture, Govt. of India kaltlanga sum hmuh cheng nuai 827 bakah Mizoram Sawrkar in a tum ve cheng nuai 91.91 hmanga sak niin cheng nuai 620.41 hmanral a ni tawh a, Final Instalment nghah mek a ni. He building sak hna hi Okahito Consultancy Services, Khatla, Aizawl ten thawkin Zopa chhiara chhawng thum a ni a, a dung ft. 148 leh a vang ft. 80 a zau a ni a, Museum-ah hian Gallery hrang hrang siam niin heng zingah hian Lunglei District History tarlan theihna tur Gallery pawh dah tura ruahman a ni.

AH&Vety Department changtu Minister Er. Lalrinawma chuan Mizoram in Sa leh Artui-a kan intodelh nana Department-in hma alo lak tawhna te chuan rah tha a chhuah nia a hriat thu a sawi.

Rural Development Department changtu Minister Lalruatkima chuan nimin khan Puilo RURBAN Commercial Centre leh Chawngtlai RURBAN Commercial Centre te a hawng.

Chief Minister Zoramthanga chuan, “Mizoram ralmuanna chu State dang leh ramdangte awh ber a ni,” a ti.

Environment, Forest & Climate Change (EF &CC) Department changtu Minister TJ. Lalnuntluanga chuan nimin khan Champhai Zotlang hmun-hlui Botanical Garden-ah Nature Learning Centre (NLC) dinna tur lungphum a phum.

Chief Minister Zoramthanga chuan nimin zing khan Sairang-ah FCS&CA Kudam thar sakna tur lungphum phumin, he Godown hi Zuangtui-a FCS&CA Kudam sawnna tur a ni a, Chief Minister chuan Sairang-a Rel lu lo lut tur nen awlsamna nasa zawk a thlen ngei a rin thu a sawi.

Nimin khan Serchhip-ah Mission Vatsalya, tunhmaa Integrated Child Protection Scheme (ICPS) tia hriat thin hnuaia District Sponsorship & Foster Care Approval Committee thukhawm chuan kum 2022-2023 chhunga Sponsorship dawngtu tur naupang 54 an thlangchhuak.

Serchhip khawpui lunlai-a dawr bungrua (hardware) hlanthlak (unload) theih hun chu siamthat a ni.

Mizoram sawrkar-a General Administration Department (GAD) chuan nikum October 25-a thuchhuah lo siam tawh chu siamthain Section 25 of the Negotiable Instruments Act, 1881 leh Govt. of India, Ministry of Home Affairs No.25/20/56/Pub-I dt.06.09.1957 tlawhchhanin June 29, 2023 (Idu'l Zuha) chu Bank leh Financial Institution te tan a pangngai a hnathawh ni atan hman tur a nih thu a tarlang a. Hemi ang hian June 29, 2023-ah Bank leh Financial institution te chu chawl lovin mipui tan dawr theih an ni dawn a ni.

Governor Dr. Hari Babu Kambhampati chuan nimin tlai khan Indian Institute of Mass Communication (IIMC), North Eastern Regional Campus, MZU, Aizawl-a zirlaite leh Zirtirtute Raj Bhavan-ah kawmin tunlai khawvela Media pawimawh leh a tangkaina te a sawi bakah Journalism, Advertising, Content creation, Public Relations leh a kaihnawih thil dang te hmanga mipui kaihhruai chungchang leh thudik puanchhuah kawnga media pawimawhna bakah New media chungchang te a sawipui bawk. IIMC North Eastern Regional Campus hi Mizoram University (MZU) Campus-ah Aug. 8,2011 khan kalpui tan niin a zirchhuak ten hna an la hmu vek a ni.

Mizoram Pradesh Youth Congress Committee (MPYCC) chuan CTI Sesawng-a Martar te lungphun champha vawi 26-na hriatrengna hun hman nimin khan an hmang a, he hun hi Congress Legislature Party (CLP) Leader Zodintluanga MLA chuan hmanpuiin Sesawng CTI hmuna Martar lungphun-ah hian rambuai avanga nunna chan mi 1168 te hming ziahlan a ni.

Nimin khan Lawngtlai-ah District Level Committee for Implementation of National Social Assistance Programme (NSAP) chu thu-khawmin chhungkuaa eizawngtu ber an thih avanga an kalsan chhungkua te tanpuina Scheme, NFBS hnuaia kum 2022-2023 chhunga Lawngtlai District atanga tanpuina dawng thei tur mi 41 te an thlangchhuak.

Deputy Chief Minister Tawnluia chuan kumin a HSLC leh HSSLC pass tha te chawimawina  hun nimin-a MZP Hqrs. Khawzawl in an buatsaih chu hmanpuiin zirlai kalkhawmte chu Mizo tawng ngaisang tur leh vawnghim turin a sawm a, hnamdang tawng pawh thiam a pawimawh thu a sawi bawk.

Food Civil Supplies & Consumer Affairs Directorate chuan thuchhuah siamin Manipur State in harsatna a tawh avanga Mizoram-a an sahimna tur zawnga raltlan ten ei leh bar a harsatna an tawh a lo ziaawm theih nan Mizoram sawrkar chuan hma a lak thu tarlangin, Central sawrkarah raltlan zinga NFSA beneficiary (AAY leh PHH family) ten One Nation One Ration Card (ONORC) hmanga an buhfai quota an lak ve theih dan tur ruahmanna a siam chu an rawn tihfel tak thu an tarlang a. Hei vang hian raltlan ten an raltlanna hmun atanga FPS (Retailer) hnai berah an buhfai quota an lak ve theih tak thu leh Ration la tur hian Ration card number emaw, Adhaar number emaw an hriat chuan a lak theih vek tih an tarlang bawk. Tun dinhmunah ONORC hnuaiah hian chhungkaw thum (member pasarih) te pek tawh a ni.

Sawrkar laipui chuan ramchhunga State 16 tan Special Assistance to States for Capital Investment (SASCI) 2023-24 Scheme hnuaiah hmasawnna hna thawhna atan cheng vbc. 56,415 chu kumin Financial Year chhung atan a pawm a, Mizoram pawhin tun tumah hian cheng vbc. 399 a dawng ve dawn a ni. Heng hnathawhna zingah hian hriselna lamte, Zirna, Irrigation, Ttui Supply, Kawlphetha, Kawngpui, Lei leh Railway te pawh an tel a, State sawrkarin hmasawnna atana sum a hman tihpunna tur niin Jal Jeevan Mission leh Pradhan Mantri Gram Sadak Yojana hnuaia State tum ve tur sum pawh he Scheme atang hian puih a ni bawk. State 16 zingah hian hmarchhak atangin Mizoram bakah Arunachal Pradesh leh Sikkim an tel a ni.

ZPM Thalaite chuan Aizawl South-I Bial huamchhunga SASCE atanga hna hlawm pathum chhuak an zirchianna-ah thil dik lo a awm nia ngaiin nimin khan Mizoram Lokayukta-ah complaint an thehlut.

Lengteng bialtu MLA leh Human Resources Development Board Vice Chairman Dr. L. Thangmawia MLA chuan ‘Hlunsanga Malsawmna Scheme’ hnuaia Lengteng bial chhunga Rangva Inchung la nei lo chhungkaw 45 te tana Rangva sem tur chu nimin khan a vailiam.

Lunglei Municipal Council (LMC) Board of Councillors Meeting hmasa ber chu nimin khan neih a ni.

Mizoram Pig Producers’ Cooperative Federation (PIGFED) Ltd. chuan nimin khan Annual General Meeting vawi 28-na hmangin AH & Vety Minister Er. Lalrinawma chuan a hmanpui a ni.

Information & Public Relations (I&PR) Department leh Mizoram Art Development Society (MADS) tangkawp buatsaih ‘MADS Annual Art Workshop cum Seminar’ chu nimin khan Aizawl Art Gallery-ah neih tan niin I&PR Joint Director F. Lalfakzuala chuan a hawng a, DIPR chu Arts lama Nodal Agency an nih angin MADS te tan kum khat budget-ah cheng nuai 20 an dah thu leh hei hian Mizote zinga Art lamah thiamna bik neite a chawikanna tur a nih thu a sawi. Tun thla ni 30 thleng awh tur Art Workshop cum Seminar-ah hian lemziak thiam mi 64 an tel dawn a, nimin chawhnu lama Seminar neih ah Sculpting leh Painting chungchang inhrilhhriatna hun hman nghal a ni.

Mizo Hnam Sipaite (MNF Returnees) te tana Revenue Department in Maumual, Chaltlang ram-a Survey an neih atanga House Site Plan/Plot an siam chu July thla chhung ngeia engkim peihfel tum a ni.

MNF President leh Chief Minister Zoramthanga chuan, “Tun thlengin MNF chuan Zofate rorelna pakhat hnuaia awm hi kan la bei reng,” a ti.

Aizawl Smart City Limited in Smart City kum 8 a tlin pualin nimin khan Mizoram Journalist Association (MJA) Member te tan Local Media Tour an buatsaih a. He hunah hian AMC area a Aizawl Smart City Mission hnathawh hrang hrangte chu a hmunah an tlawh a ni.

Serchhip Field Veng Village Council-a Seat ruak (General Seat) hnawhkhahna tura bye-election neih tur atana inbuatsaihna atan nimin khan Draft Electoral Roll tarchhuah niin July 18, 2023-ah Final Electoral Roll tarchhuah a ni ang.

Khawvel puma ruihhlo hmansual leh tawlhruk dona ni, International Day Against Drug Abuse and Illicit Trafficking chu nimin June 26, 2023 khan khawvel hmun hrang hrangah hman niin Serchhip-ah pawh ‘Ruihhlo hi ram leh hnam hmelma a ni’ tih thupui hmangin hun hman a ni.

Serchhip-a Kel vulhtu pawl tia hriat, Serchhip Livestock Farmers’ Cooperative Society chuan nimin khan Assembly neiin hruaitu thlanna an nei.

Mizoram Bharat Scouts and Guides Serchhip District hruaitute lakluhna hun chu nimin khan Serchhip DC Meeting Hall-ah neih a ni.

Mizoram sawrkar chuan School Education Department hnuaia High School Teachers mi 20 te chu tunhnai khan High School Headmaster-ah a kaisan tir a, an zingah hian Govt. H/S Serchhip a Teacher H. Lalengzauva pawh telin Govt. H/S Lungpho-ah a awm ang. Hemi rual hian Govt. H/S Keitum a thawk turin D. Thangchuanga (Govt. H/S, Sialsuk) chu dah niin Govt. H/S E.Lungdar a thawk turin K.C. Lalduhawma (Govt. PM H/S Lungdai) chu dah thar a ni bawk.

Serchhip District chhung Sailulak khuaa an Sial vulh te chu tunhnai khan Chinghnia in sehin Sial hi 10 chuang a seh tawh nia thudawn a ni.

Mizoram-a Centrally Sponsored Scheme (CSS) hnuaia thawktu pawl hrang hrang ten an thilphut nawr nana nimin-a Pen down/ Tool down Strike an neih avangin Serchhip-a sawrkar Pisa thenkhat ah harsatna a thleng.

Mizoram Police-te chuan International Day Against Drugs Abuse and Illicit Trafficking 2023 denchhenin nimin khan ruihhlo an man sa cheng vbc. 5.33 hu chu Trinity Hospital, Silaimual-a incinerator-ah Addl. DGP Ajay Choudhry hovin an halral a, ruihhlo an halral te hi Heroin kgs. 17.88, tualchhunga hralhna a cheng vbc. 3.57 man leh Methamphetamine kgs. 65.32, tualchhunga hralhna a cheng vbc. 1.76 man te a ni.

Press Information Bureau (PIB), Ministry of Information & Broadcasting buatsaihin nimin khan Aijal Club-ah 'One Day Media Workshop Vartalap on 9 years of Seva, Sushasan and Garib Kalyan' neih niin he hun hi Dr. ZR. Thiamsanga MLA chuan kuallian niin a hmanpui a, I&PR Joint Director PB. Lianthang-puii leh MJA General Hqrs. President C. Lal-rambuatsaiha te pawhin an hmanpui a ni.

Sangau-a Govt. Blue Mountain H/S chuan an School Headmaster Denghmingliana chu thla 3 vel chauh a awm hnuah tunhnai khan hmun danga sawn leh a nih duh loh lantirna atan nimin khan an Zirtirtute School kal tur an dang a, Lai Students' Association (LSA) Sub-Hrqs. Sangau chuan he hmalakna hi an thlawp thu an sawi bawk.

Tipa Joint Action Committee chuan an khaw damdawi In-a Doctor dah thuai phutin nimin khan Tipa khawchhunga Sawrkar Pisa leh Zirna In-a kai turte an dang a, hemi hmalam tun thla ni 13 khan lungawi lohna lantir tawhin, an hmalakna hian awmzia a neih loh avangin Inrinni khan an kal zel dan tur ngaihtuahin an thukhawm a, an thilphut chu Sawrkar-in a ngaihven lehzual theih nan tun thla ni 26 atanga ni 28 chhung Tipa khawchhunga Sawrkar Pisa leh Zirna In zawng zawng khar vek ni se an tih angin Pisa kai tur leh zirna In a kai turte hi an dang a. He an hmalakna hian awmzia a nei lo a nih chuan tun thla ni 30 khian na zawka hmalak dan tur an rel leh dawn tih an sawi bawk.

Mizoram Board of School Education (MB-SE) chuan kumin a HSLC (pawl 10) leh HSSLC (pawl 12) Exam a buatsaih a Subject bat nei te tana Compartmental Exam tun thla ni 13-a an buatsaih result chu nimin khan a tichhuak a, HSLC ah zirlai 54 ten Exam neiin mi 16 an pass a, HSSCL-ah zirlai 4 ten exam beiin pass an awm lo thung a ni. Compartment result tihchhuah rual hian Post Publication Scrutiny (PPS), Re-evaluation leh Compartment result chhuah hnua HSLC leh HSSLC 2023 result pawh tihchhuah nghal a ni a, HSLC ah zirlai exam bei zawng zawng 18,102 atangin mi 12,897 an pass a, zirlai za zela 71.25 ten an pass a. HSSLC-ah mi 14,091 exam bei atangin 11,088 in pass in hei hi za zela 78.69 a tling bawk a, Arts Stream-ah za zela pass zat hi 78.35 niin, Science Stream-ah 77.79% leh Commerce Stream-ah 86.5% a ni bawk.

Aizawl Hunthar Veng a lei tlahniam siamthat mek chu nimin khan Disaster Management and Rehabilitation Minister Lalchamliana chuan a hmunah kalin a enfiah.

Tripura a inbengbel tawh, Mizoram Electoral Roll-a hming la chuang Bru te Mizoram Electoral Roll atanga an hming paih hna chu chak taka kalpui a ni dawn.

Aizawl East-II bialtu MLA Robert Romawia Royte chuan, “Aizawl East-II ka tlanchhiat san lova, MNF Candidate tan ka rochun zawk a ni,” a ti.

ZPM Leader Lalduhoma chuan an Party chhungah harsatna lian a awm lo tih sawiin, “Kan hritlang ve lik lek chauh a, damdawi In-ah admit ngai erawh an awm lo,” a ti.

Khawvel pum huap ruihhlo dona Ni 'International Day Against Drug Abuse and Illicit Trafficking' chu nimin khan Deputy Chief Minister Tawnluia hovin Aizawl Vanapa Hall-ah hman a ni.

Mizoram-a Centrally Sponsored Scheme (CSS) hnuaia thawktu pawl hrang hrang ten an thilphut nawr nana nimin atanga hnathawk lova lungawi lohna an lantir chu Chief Minister hova inbiakna an neih hnuah an titawp lailawk.

Health Minister Dr. R Lalthangliana chuan nimin khan Lunglei Municipal Council (LMC) Office tlawhin, Councillor te chu Lunglei khawpui an enkawlna kawngah hmathlir thui tak nei turin a chah.

Serchhip-a Excise & Narcotics Department te chuan nimin chawhnu dar 2:00 vel khan Serchhip Tuikhuah Veng-ah Heroin No. 4 nia hriat  gram 12.05-a rit manin a neitu nia hriat Malsawmtluanga (33), Serchhip Saron Veng nia insawi pawh man nghal a ni a. Nimin tlai dar 5:45 vel khan Zothangpuii (23), New Serchhip Venglai nia insawi hnen atangin Heroin No. 4 gram 7.11 chu man bawkin heng mite hi thubuai siam sak nghal an ni.

All Mizoram CSS Employees Co-Ordination Committee hmalaknain Mizoram-a CSS hnuaia thawktu hrang hrang te chuan Vawiin atanga tunkar Nilaini thleng khan lungawilohna lantirin Pen/Tool down Strike an nei dawn.

Kristian Thalai Pawl (KTP) Chhiahtlang Pastor Bial te chuan Serchhip Blood Bank-a dah turin Inrinni khan thisen Unit 35 an pe a, thisen petute hi mipa 23 leh hmeichhia 12 niin heng mi tlawmngai te thisen la tur hian Serchhip Blood Bank-a thawktute Chhiahtlang-ah kalin thisen hi an la a ni. Chhiahtlang Bial KTP te hian nimin Pathianni hmang khan Chhiahtlang Venghlun Koh-hran Biak In-ah Member intawhkhawmna an nei a, hemi denchhen hian thisen hi an pe a ni.

Thenzawl Zone Football Association (TZFA) buatsaih chawlhkar hnih chhung awh Football chu Inrinni khan khelh zawh a ni.

Serchhip Field Veng Village Council-a Member pakhat (General Seat) chu a boral avanga a hmunruak mek hnawhkhatna atan bye-election nei tura inbuatsaihna kalpui mek a ni a. Hemi atana inbuatsaihna pakhat atana Electoral Roll enfiah hna chu Vawiin hian thawh tan tum niin chawhma dar 11:30-ah DC Meeting Hall-ah Draft Roll tarchhuah a ni ang.

Aizawl Falkland Veng-a Mizoram Rifles Association (MRA) Shooting Centre siam mek chu Inrinni zing khan Sports Minister Robert Romawia Royte chuan a hmunah kalin a tlawh a, he Shooting Range hi Mizoram-a Qualified 50 Metre Shooting Range hmasa ber leh awmchhun tur niin he Centre-ah hian building pakhat leh Shooting Range metre 50-a awm dawn a, a sak chhunzawm nan sum ngaihtuah sak nghal a tum thu leh PMJVK Project tharah telh a nih theih nan hmalak a nih tur thu Minister hian a sawi. Minister hian MRA Centre bula Falkland Local Council ten Sports Centre tur an ruahman chu a tlawh nghal bawk.

Hreichuk khua-a ranchaw siamna hmunpui (Hreichuk Feed Mill) chu Inrinni khan bialtu MLA leh Deputy Govt. Chief Whip Lalrintluanga Sailo chuan a hawng a. District Co-operative Office, Mamit atanga Integrated Cooperative Development Project (ICDP) Loan cheng nuai 7 leh Subsidy cheng nuai 2 hmangin ranchaw herna khawl leh a hmun sakna hi Hreichuk Piggery Co-operative Society Ltd. te hnenah pek niin nikhat-ah Quintal 10 her chhuah theih a ni a, khawl hian Unit dryer leh Packing-na hmanrua a keng tel a ni. He Society-ah hian Member 28 an awm mek a ni.

Mizoram State Bharat Scouts & Guides State Chief Commissioner atan Sports & Youth Director Lalnunhlua chu Zirtawpni khan lakluh niin State Chief Commissioner’s Office-ah hian Mizoram State Bharat Scouts & Guides State Executive Meeting chu neih zui nghal a ni a, kumin Favang hun remchangah Scouts & Guides reunion neih tura ruahman niin, Scouts & Guides a lo tang tawh te hun buatsaih tum a ni a. Mizoram Bharat Scouts & Guides Tentative Programme 2023 - 2024 chu State Council Meeting a pharh tura pawm a nih bakah Scouts & Guides Headquarter building tur Tlangnuam Primary School-III hmuna sak tur chu State Council Meeting ah ngaihtuah tura tih a ni bawk.

UD&PA Department changtu Deputy Chief Minister Tawnluia chuan Inrinni khan MINECO a sak mek Aizawl Convention Centre chu a hmunah tlawhin hnathawh mek te a enfiah a. He Centre sak mek hi Phase-I niin Phase-II pawh thawh tan thuai tura ruahman a ni bawk. Aizawl Convention Centre Phase-I hi SPA Scheme hnuaia sak niin Project Cost chu cheng nuai 2499.99 a ni a, Zopa chhiara chhawng nga (5) tura ruahman niin Basement-ah Parking bakah Gymnasium leh Store a awm anga, Ground Floor-ah Seminar Hall leh Offices, Emergency Care Unit, VIP Lounge leh Room dang a awm ang. First Floor-ah Lecture Hall, Board Room leh VIP Lounge awmin Second Floor-ah Food Stall leh VIP Lounge a awm anga, Third Floor-ah Auditorium leh VIP Lounge te a awm bawk ang.

Mizo National Front (MNF) Media & Publicity Department chuan kumin inthlanpui-ah MNF chuan hnehna sang tak a chan leh ngei an beisei tih an sawi.

Mizoram Pradesh Congress Committee (MPCC) chuan Zirtawpni khan Aizawl Press Club-ah chanchinbumite kawmin MNF party chuan mipui hnena an thutiam tihhlawhtlin theih loh langsar pali (4) an nei tih an sawi.

Mizoram BJP hnuaia BJP Scheduled Tribe Morcha chuan Manipur-a buaina awm mekah Manipur Sawrkar N. Biren Singh kaihhruai chu mawhphurtu ah an ngai tih sawiin, sawrkar laipui chu Manipur sawrkar hi thiata President's Rule a puang thuai tura an phut thu an sawi. Inrinni-a thuchhuah an siamah BJP Scheduled Tribe Morcha chuan Manipur State chhunga Tlangmi te'n harsatna nasa tak an tawk chu pawi an tih thu leh buaina vanga Zohnahthlak nunna chân mi 100 chuang leh an chhungte an lainat thu an sawi a. Meitei hnam ten Scheduled Tribe-te an la beih chhunzawm reng chu pawi an tih thu sawiin, Hnam leh Sakhua anga inhmelmakna nasa zawk a chhuah hma ngeia buaina tihtawp thuai tul an tih thu an sawi bawk a ni.

Mizoram Lok Sabha MP C. Lalrosanga chuan Union Home Minister hova thutkhawm neih ah Manipur chu Preident's Rule a dah mai tha zawka a hriat thu a sawi.

Central YMA chuan kumin a pawl 10 leh 12 pass tharte tan Inrinni khan Aizawl Vaivakawn YMA Hall-ah Career Guidance an buatsaih a, he hunah hian Central YMA President R. Lalngheta chuan zirlaite chu Mizo hnam innghahna an nih angin thahnemngai taka zir zel turin a fuih a, Rev. Dr. Lalchungnunga leh ZoCareer Solutions Founder& Managing Director Lalhruaitluanga ten zirlaite hmaah thu an sawi bawk a ni.

District Hospital Siaha-a Paediatric Intensive Care Unit (PICU) leh High Dependency Unit (HDU) chu Inrinni khan Health Minister Dr. R. Lalthangliana chuan a hawng.

Smart City Mission hnuaiah Aizawl khawpui thuam mawi-a tih changkan nan tun dinhmunah Project-40 chuang kalpui mek a ni.

Lunglei Luangmual Principal Distribution Centre (PDC)-a hman tur Digital Weighbridge chu Inrinni khan Lunglei HPC Vice Chairman Lawmawma Tochhawng MLA chuan a hawng.

Persons with Disability (PwD) Commissioner Vanlaldiki Sailo chuan rualbanlote tana sawrkar hna za zela pali (4%) hauhsak chu Mizoram sawrkarin a kalpui tha nia a hriat thu a sawi a. Hmun hrang hranga rualbanlo te kal ve theihna tur siam kawngah erawh duhthusam lo a la tam thu a sawi thung.

Cheng vbc. 3 senga Mizoram Youth Commission (MYC) in an sak Serchhip Darnam Tlang-a 'MYC Youth Centre' chu nimin khan Mizoram Youth Commission Chairman Dr. Vanlaltanpuia MLA chuan a hawng a, Serchhip-a MYC Youth Centre-ah hian Office leh Guest Room te bakah Volleyball Court a awm a ni. 

Integrated Child Protection Scheme (ICPS) hnuaia District Jail Inspection Team te chuan nimin khan Principal Magistrate Josangzeli Tlau hovin Serchhip District Jail tlawhin naupang kum tling lo tang an awm leh awm loh an enfiah a, Jail tang zingah kum 18 hnuailam awm lovin nu te an tan avanga Jail-a awm ve naupang erawh pahnih an awm thung. Heng naupang leh an nu te hi Jail Inspection Team te hian harsatna an neih leh neih loh te zawtin, harsatna an neih loh thu leh thawktute pawhin an ngaihsak thu an sawi a ni. Serchhip District Jail-ah hian tun dinhmun ah tang mi 64 awm mekin an zinga 6 chu hmei-chhia an ni.

Pradhan Mantri Awas Yojana (Urban)-PMAY (U)/Housing For All hnuaia Serchhip atanga In sak tanpuina dawng tur 1st DPR a mi te chuan karleh khian tanpuina an dawn tur thawh khatna chu an dawn kim hman beisei a ni.

Block Agriculture Officer (BAO) Office East Lungdar leh Serchhip-a Pui Pui Enterprise te tangkawp chuan nimin khan BAO East Lungdar hnuaia Che Zau, Khawlailung-ah Bio-Fertilizer an sem.

Serchhip District Police te chuan nizan hmasa khan Serchhip District Mizo Cement Mistiri Association hnamdang ILP enfiahna an nei a, he hunah hian dan lova ILP Sponsor tu ni lo hna thawk mi 2 hmuhchhuah niin hun remchang ah enfiah leh an tum thu an sawi bawk. Serchhip District Mizo Cement Mistiri Association  ILP dik taka hmang tura mipuite chu ngenin, dan lova mahni sponsor tu ni lo hna thawk leh ILP hmang diklo an awm lohna tura hmalak zel an tum thu an sawi bawk.

Manipur atanga Sahimna zawnga raltlan rawn lut pun belh zelin nimin tlai thleng khan mi 12,140 zet an rawn lut tawh a,Kolasib District chu raltlan rawn lut tamna ber niin mi 4336 zet an lut tawh a, Aizawl District-ah 4047 an rawn luh tawh bakah Saitual District-ah 2940 an rawn lut tawh bawk a ni. Heng bakah hian Champhai District-ah 340, Mamit District-ah 134, Khawzawl District-ah 124, Lunglei District-ah 69, Serchhip District-ah 61, Lawngtlai District-ah 48, Siaha District-ah 30 leh Hnahthial District-ah 11 an rawn lut tawh a ni.

Nimin June 23, 2023-a ZPM Nomination Committee thukhawm chuan Mizoram Legislative Assembly inthlan lo awm turah 13-Aizawl East-I (General) Assembly Constituency bial chu ZPM Party tana bial hima lo vil turin an Party Vice President Lalthansanga (Chatea), Ex-MLA chu an ruat a, he bial lo vil tur hian PL. Liandinga chu ruat ni tawhin a taksa chak tawk lohna avanga a vil zui theih dawn loh thu ziaka phatna a thlen chu ZPM PAC thukhawm chuan an lo pawmpui tawh a ni. He bial vil tura ruat Lalthansanga (Chatea) hi Hrang-turzo bial atangin tum khat MLA-ah thlantlin a lo ni tawh a ni.

BJP National Minority Secretary Delson Notlia chuan nimin khan Governor Dr. Hari Babu Kambhampati chu Raj Bahvan-ah kawmin Palak Assembly Constituency a cheng mipui te'n harsatna an tawh hrang hrangte a sawipui a. Delson Notlia chuan Tipa RD Block hnuaiah khua 41 awmin tunah hian Rural Bank Branch pakhat chiah a awm thu leh ATM Booth pakhat pawh an neih loh avangin thingtlang miten harsatna an tawk nasa hle tih a sawi a. An harsatna sukiang tura hmalakpui tura Larsap chu ngenin, Larsap hian SBI Chairman chu a Phone sak nghal a, hma lo la turin a ngen nghal bawk a ni.

Law & Judicial Minister TJ. Lalnuntluanga chuan nimin khan Khawzawl-a District Court sakna tur, thawktute chenna hmun (Residential Area) tur leh District Jail sakna tura ruahman te a enfiah a, Court hmun tura ram ruahman hi karleh Thawhtanni atangin Darngawn VC te'n an samfai anga, July thla tir lamah a hmunhma hi tehfel tum niin 2nd I.R Bn. Hqrs. pawh Minister hian a tlawh bawk.

Deputy Chief Minister Tawnluia chuan nimin khan Aizawl Tuikual North-ah Multi Utility Cum Convention Centre sakna tur lungphum a phum a, I&PR Minister Lalruatkima pawhin a hman-pui a ni. Multi Utility Cum Convention Centre Project hi NEC atanga hmuh niin, Planning and Programme Implementation Department chu Nodal Department an nih bakah UD&PA Department chu Implementing Agency an ni a, Project cost hi cheng nuai 299.91 niin Futsal Ground leh a bula sak tur Building hian chhawng 3 a nei anga, Restaurant, Vegetable Market, Conference Hall leh Parking lot te awm thei tura duan a ni.

Mizoram Police leh Mizoram State AIDS Control Society(MSACS) tangkawp chuan nimin khan Aizawl SP Conference Hall-ah Ruihhlo bansan tawh te leh ruihhlo ngaite pualin inkawm-hona hun, ‘Interactive Session with People who Injected Drugs (PWID)’ an buatsaih a, he hun hi tun thla ni 26-a khawvel pum huapa Ruihhlo Dona Ni (International Day Against Drug Abuse and Illicit Trafficking) denchhena buatsaih niin ruihhlo lo ti thin nghei tawh ten ruihhlo lakah an talchhuah dan chanchin te an sawi a, ruihhlo an nghei nana anmahni puitu nia an ngaih thenkhatte sawiin, chungte chu ruihhlo nghei nana OST a pawimawh zia te, ruihhlo bawih atanga talchhuak turin Kohhran belhin awmzia thui tak a neih dan te, hun awl hnawh-khah nan khawtlang leh Kohhran thil tih leh prog-ramme siama tel tam te, mahni insiamthat nan midang tanpuina an mamawh dante an tarlang a ni.

Nimin khan Champhai-ah an District chhung khaw hrang hranga Vawk hri, African Swine Fever (ASF) leng dinhmun leh a darh zel loh nana hmalak dan tur bakah Vawk thi sawngbawl kawnga hmalak tulte ngaihtuah a ni.

Supply Minister K. Lalrinliana chuan Furpui lo thleng turah Mizoram in buhfai-a harsatna a tawh loh nan Kudam 52-ah buhfai chhek-khawl ngah a ni tawh tih a sawi.

Social Welfare & Tribal Affairs Minister Er. Lalrinawma chuan nimin khan Mizoram State Commission For Protection of Child Right Office tlawhin he Office-a thawktute nen an inkawm bawk.

Public Works Department (PWD) changtu Chief Minister Zoramthanga chuan Executive Engineer thuthmun tur PWD Division Office chu nimin khan Hnahthial-ah a hawng.

Special Assistance to States for Capital Investment (SASCI) Scheme hnuaiah kum 2022-2023 chhung khan Serchhip District-ah hna chi hrang hrang panga (5) thawhna atan cheng nuai 1896 ruahman niin heng zinga hna pahnih te chu zawhfel la ni lovin hna pathum te erawh zawhfel a ni tawh.

Kumin a Remna ni lo thleng tur pualin nimin khan Serchhip District-a Home Department hnuaia thawktu hrang hrangte chuan Serchhip Blood Bank a dah turin thisen Unit 9 an pe.

Home Minister leh Hrangturzo bialtu MLA Lalchamliana chuan kumin a Mizoram Assembly inthlanpui neih turah din a tum tawh lo tih a sawi.

Serchhip Sub-Hqrs. YMA-a Training and Youth Affairs Committee chuan Mizoram Public Service Commission (MPSC) in tunhnaia Mizoram Civil Service (Combined Civil Service) Preliminary Examination, 2023 Result a tihchhuaha Sub-Headquarters YMA, Serchhip huamchhung atanga inziak tling zawng zawngte thinlung takin an lawmpui thu thuchhuah siamin an tarlang a. An hmabak exam tur leh tih tur la awm te tha taka ti turin duhsakna an hlan bakah, Serchhip District tihmingthatu ni tur leh hlawh-tlinna sang zawk chang ngei turin duhsakna sang ber an hlan thu an tarlang a ni. Kumin a MPSC in Mizoram Civil Service (Combined Civil Service) Preliminary Examination result a tihchhuah ah khan hriat theih chinah Serchhip District atangin mi 11 an tling a ni.

Manipur tualchhung buaina avanga sahimna zawnga Mizoram-a raltlan rawn lut chu 12,006 an tling tawh a, heng zinga mi 2941 te chu Relief Camp-a awm niin Relief Camp hi District 3-ah 35 a awm tawh a, midang 9065 te chu Relief Camp pawn lama awm niin Serchhip District-ah raltlan hi 61 an rawn lut tawh a ni.

Lunglei-a Excise & Narcotics Department leh Assam Rifles te tangdun chuan nizan hmasa dar 11:50 vel khan khan Lunglei Ser-kawn-ah Heroin No. 4 nia hriat Hawng 79, kg. 1.13 a rit an man a, a neitu nia hriat mi 5 pawh manin a phurhna atana hman Motor Bolero Pik-Up pawh hren nghal a ni bawk.

Champhai District-a Ngur khuaa chhungkaw 80 vel te chuan kumin hian Dawnfawh chingin tunah hian a zatve vel la tawhin lirthei lian chi phur 10 chuang an thawnchhuak tawh tih an sawi a, an beisei anga hralhna a that loh avang leh a chi an chin-ah a dum chi a tam zawk avangin harsatna an tawk tih an sawi a. Sawrkar in a hralhna ngaih-tuahpui se an duh tih an sawi bawk.

Chakma Autonomous District Council (CA-DC) sawrkar thara Budget Session hmasa ber kum 2023-2024 atana tunhnaia CEM Rasik Mohan Chakma pharh chu nimin khan sawiho a nih hnuah pawm a ni a, kum 2023-2024 chhunga sum hmuh tura ruahman zawng zawng chu cheng nuai 11684.34 niin, sum hmanral tur chu cheng nuai 18002.66 a ni a. Heta tang hian cheng nuai 6318.62 chu State sawrkar atanga Supplementary Demands for Grants-in a huam ang.