Latest News

World Bank atanga Mizoram sawrkar sum puk tur atan inremna ziahfel a ni

Mizoram-a damlo inenkawlna hmanrua leh a kaihhnawih tihchangtlunna turin sawrkar laipui chuan World Bank atangin US Dollar Mtd. 32 loan a puk dawn.

Tun thla ni 17 khan Sawrkar laipui, Mizoram sawrkar leh World Bank-te chuan Mizoram Health System tihchakna tur Project atana inremna hi an ziak a. He inremna hi sawrkar laipui aiawhin Ministry of Finance Department of Economic Affairs-a Additional Secretary Rajat Kumar Mishra, Mizoram Sawrkar aiawhin Mizoram Health Systems Strengthening Project-a Project Director Dr. Eric Zomawia leh World Bank Country Director, Junaid Ahmad-a ten hming an ziak a ni.

He Project hmang hian Mizoram sawrkar hnuaia Health and Family Welfare Department leh a hnuaia peng hrang hrangte tihchangtlun hna thawh tur a ni dawn a. Hei bakah hian state sawrkarin mipuite tan hriselna lama enkawlna tha leh huamzau zawk a pek theihna tur leh hmanrua leh hmunhma changtlung zawk neih theihna turin Quality Assurance Program lamah tam zawka sum dah a ni ang.

Mizoram Health Systems Strengthening Project hian State chhunga District pariat (8) a tuam dawn a. He hmalakna hnuaiah hian Pradhan Mantri Jan Arogya Yojna hnuaia damlo a thlawna enkawlna tur, Health Insurance Programme tihchak leh thawhhona tha zawk siam chu tun aia nasa in thlurbing a ni dawn bawk a. Sum leh pai harsatna avanga damdawi lama enkawlna tha dawngthei lo thinte leh mi retheite tana inenkawlna hautak lutuk thin pawh a tiziaawm dawn bawk a ni.

COVID-19 hripuiin damlo dangte enkawlna a nghawng na hle a, chuvang chuan he project hnuaiah hian hrileng thei laka invenna te leh natna dang laka inven dan te pawh thlur a ni ang tih kan thudawnna chuan a sawi a, heng zingah hian damdawi In bawlhhlawh sawngbawl thlengin a huam dawn a ni.

Comments

Chhiar Hlawhte