Latest News

Hri leng avanga inkhuahkhirhna kalpui mek chungchang Health Minister hovin thlirho a ni

Nimin khan Health Minister, Dr. R. Lalthangliana hovin sawrkar mi pawimawh hrang hrangte an thukhawm a, hri leng avanga inkhuahkhirhna hman mek chungchang bakah vaccine pek mek chungchang te leh Covid hri kai enkawl mek te chungchang bakah thil pawimawh hrang hrang sawiho a ni.

He thutkhawm SAD Conference Hall-a neih ah hian tun thla ni 30 zing dar 4:00 thlenga hri leng vanga inkhuahkhirhna hman mek chu thlirho niin thla thar atanga kalpui chhunzawm dan turte pawh sawiho a ni a, ngaihdan leh rawtna hrang hrang sawiho niin State Executive Committee on State Disaster Management Authority in a tul angin July ni 1, 2021 atanga hman tur SOP an buatsaih ang.

He hunah hian Vaccine pekchhuah runpui kalpui mek chungchang report ngaihthlak niin June 24, 2021 thleng khan Vaccine dose 5,13,641 pekchhuah tawh niin, Vaccine Full Dose la tawh mi 53,960 an awm a. Vaccine pekchhuah kawngah theihtawpa hmalak niin kum 45 chunglam te First dose pekchhuah tawh zat hi India ram pumah 43% a nih laiin Mizoram-ah chuan 76% a ni a. Kum 18 – 44 inkar te vaccine pekchhuah tawh zat hi India ramah 11% a nih laiin Mizoram-ah chuan 41% a ni bawk. Vaccine Second Dose la turte pekchhuah tur stock a awm that thu pawh tarlan niin hlauhthawn tur a awm loh thu sawi a ni.

He huna tarlan a  nih danin COVID-19 hri kai zinga a na zualte enkawlna hmun, Zoram Medical College (ZMC)-ah COVID-19 hri kai mi 1342 admit tawh niin, chawhrualin damlo pakhat hi ni 11 chhung enkawl ang an ni a, enkawl rei ber chu ni 63 chhung admit a ni. Damlo admit zinga 83.5% hi kum 18 - 59 inkar an ni a, CT Scan tih sak mi 535 zinga 30% chu COVID Pneumonia vei an ni. Damlo admit zinga 18% hi ICU a dahluh ngai an ni a, admit ruala ICU-a dahluh nghal ngai hi 12% niin admit hnua ICU-a dah ngaite hi admit an nih atanga ni 6 ralhmaa dahluh deuh vek an ni bawk. ICU-a dahluh zinga 77% hian natna benvawn an nei a ni. Hei bakah hian naupang 66 admit an ni tawh a, a tam ber hi kum 1 leh a hnuai lam niin, chawhrualin ni 10 chhung vel enkawl an ni.

Hei bakah hian Medical Operational Team leh ICT Dpartment in Contact Tracing Software an buatsaih chu a tha tawka hriat niin hman thuai tura tih a ni a, hei hian Contact Tracing khawihtu Police te leh LTF te nasa taka a chhawk zangkhai beisei a ni.

Comments

Popular News (Last 30 Days)