Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Sawrkar in ngenna siam

Disaster Management & Rehabilitation Department-a Secretary leh State Executive Committee-a Member Secretary, Lalbiaksangi chuan In leh Dawr neitute hnenah ngenna tichhuakin COVID-19 hri chuan Mizoram-ah pawh harsatna nasa tak min thlen thu leh hun rei tak chhung Lockdown kalpui te a ngaih thin avangin ei leh bar zawn kawngah pawh mi tam takin harsatna kan tawk tawh tih a tarlang a. Tunah pawh COVID-19 thawhhnihna-in min nuai leh mek avangin ni 100 dawn kan lo inkharkhip leh ta tih tarlangin, Sum-dawng leh nitin-a inhlawhfa, thlatin-a dawr luahman leh In luahman pek ngai; mahse, Lockdown avanga sumdawnna leh nitin inhlawhfakna kalpui rem-chang si lo mi tam kan awm mek thu a tarlang a. Hetiang hun harsa kan tawn mek avang hian In leh Dawr neitute chu Lockdown kalpui chung atan an In leh dawr luahtute hrethiam chunga dawr leh In luahman te inawl emaw, ti hniam turin a ngen bawk a ni.


Hmalakna tur thlirhona nei

Mizoram State Health Society Executive Committee thutkhawm vawi 25-na chu nimin khan Health Secretary, R. Lalramnghaka kaihhruaina in Secretariat Conference Hall-ah neih a ni a, he hunah hian natna hrang hrang TB, Malaria, Hepatitis, Phar leh hrivenna pek chungchanga hmalakna tur te, NCD natna hrang hrang chung-chang bakah nu leh nausen, naupang leh tleirawl te hriselna kawnga hmalakna tur hrang hrangte thlirhona an nei a ni a. National Health Mission a Mission Director, Dr. Eric Zomawia chuan District hrang hranga NHM hmalakna turte a tarlang bawk.


CMRF atangin tanpuina sem

Champhai District in hri leng avanga ruihhlo ngai leh naupang enkawlna hmun hrang hrangte chhawmdawlna tura Chief Minister’s Relief Fund for Covid-19 atanga Rs. 2,29,500/- a dawn chu nimin khan Champhai District chhunga De-Addiction Centre leh Child Care Institution hrang hrang 8-ah semchhuah a ni.


Chief Minister in tlawh

Chief Minister Zoramthanga chuan nimin khan a bial chhung Sihphir, Sihphir Venghlun, Muthi, Muanna Veng, Zuangtui, Thuampui, Falkland, Zemabawk North leh Zemabawk-a VLTF leh LLTF te tlawhin COVID-19 hri leng mek laka vengchhung mipui an him theih nana theihtawp chhuahtute chungah lawmthu a sawi a. “Indo lai kan ni a, thil awlai ni lo mahse zawi zawiin kan hneh in beisei chungin theih tawp kan chhuah tlang zel a ni,” tiin an mamawh tur a hlan nghal bawk.


AIR-a thawktu ten hlan

All India Radio (AIR) Aizawl-a thawktute chuan an ni khat hlawh thawhkhawmin Zoram Medical College & Hospital-a Covid Poor Fund-ah nimin khan an chhunglut a, an sum thawhkhawm hi Rs. 1,10,292/- tlingin All India Radio Director, DR. Lalropuia chuan Covid Poor Fund incharge, K. Lalbiaknguri, Sr. Nursing Superintenent hnenah a hlan a, Covid Poor Fund chu mi harsa te inenkawlna senso atan tangkai taka hman thin a nih thu a sawi bawk.


Vegetable Supply Chain kalpui turin sawrkar ngen

Aizawl South-II bialtu MLA, Lalchhuan-thanga chuan Vegetable Supply Chain chu a rang thei ang ber a kalpui turin Mizoram sawrkar a ngen. Lailak khua chuan tunlai boruak-ah an thlai thar hmasa te chu ei leh bar, sum leh pai lam thila an harsat avanga mangan puiin, tihralna mai tur hre lovin an buai hle a, hei hi hriain Aizawl South-II bialtu MLA hian ama sum-a lei sakin 407 Truck Trip khat chu nimin khan a bial chhung Tlangnuam leh Tlangnuam Vengthar LLTF kutah a mamawh te hnena sem turin a hlan a. Zoram hmun hrang hrang atanga kuthnathawktute luan chhuah dan chu fakawm a tih thu sawiin, Kuthnathawk-a eizawngte hian a thlawna luanchhuah reng theih chu duh viau mahse nitin khawsak mamawhna thil avangin a thlawna luanchhuah reng theih a ni biklo tih a sawi a. Hripui avangin an thlai tharchhuah te sum pai-a chantir theih ang ang han thehthang tur pawn harsatna nasa tak an tawk mek tih pawh sawiin, “Chuvangin Mizoram sawrkar hian heng harsatnate sukiang tur hian Vegetable Supply Chain hi a rang thei ang ber a kalpui turin ka ngen tak meuh a ni,” a ti bawk.


Kawng laih turah inremna nei

Kawlkulh leh Dulte Joint NGOCC chuan tunkar Thawhtanni khan Dulte - Kawlkulh bypass kawng lai tur, Dhariwal BuildTech Limited (DBL) hnathawk leh khawl te chu kaltlang phal lovin an dang leh a, hemi chungchangah hian niminpiah khan Khawzawl DC, Zothanmawia chuan heng khaw pahnih te hi tlawhin an hmalakna te chu Dan kalh a nih thu hrilhin, nimin khan an kal zel dan turah inremna siam a ni a. Hemi ang hian Puilo leh Dulte inkar kawng laih hna chu tan rihloh tur niin Tuichang leh Puilo inkarah chuan a tul angin hna thawh theih a ni anga, kawng laihna tura bungraw mamawh te chu harsatna awm lovin an kaltlang thei dawn bawk a ni.


Phu tawk hremna pe turin MZP in an ngen

Mizo Zirlai Pawl (MZP) chuan Mizoram Board of School Education-in HSSLC 2021 result a tihchhuah taka Govt. Mizo HSS zirlai mi 25-te Internal Marks thehluh ve anih loh avanga zirlaiten an result ah harsatna nasa tak an tawk chu pawi an tih thu leh an ngai thutak hle tih sawiin, he thil-a mawhphurtu chu a hna a tlinlo ah ngaiin a phutawk hremna pe ngei turin Education Minister chu an ngen bawk.

Comments

Chhiar Hlawhte