CHL tan Truelab Quattro Khawl pahnih lei belh

Lunglei Civil Hospital TrueNat Laboratory-a hman tur Molbio Truelab Quattro khawl pahnih leh a kaihhnawih khawl dang te chu nimin khan Lunglei thlenpui a ni.

Heng khawl te hi Lunglei West bialtu MLA C. Lalrinsanga leh Lunglei East bialtu MLA Lawmawma Tochhawng ten an MLA Fund atanga an lei niin nimin khan Aizawl atangin Lunglei hi phurh thlen a ni a, he khawl lo dawnsawnna puala inkhawm tawi neih ah HPC Vice Chairman leh Lunglei East bialtu MLA, Lawmawma Tochhawng chuan COVID-19 hrileng in zual lam a pan zel avang leh Civil Hospital Lunglei (CHL)-a RT-PCR khawl dahna tur hmun, Laboratory Block siam tum chuan hun ala duh deuh dawn avangin tun dinhmuna an mamawh lo phuhrukna turin H&FW Department hotute nen inrawn tlangin CHL Truenat Laboratory-ah khawl dah belh nise tih an rawt tih a sawi a. CHL-a Laboratory Block chu peihfel anih hunah Thorang bialtu MLA, Zodintluanga’n RT-PCR khawl a donate chu Laboratory a lakluha, hman tum anih thu a sawi bawk.

Heng MLA pahnih ten bungrua an lei te hi Truelab QUATTRO Real Time Micro PCR Analyzer pakhat (1) bakah hmanraw pawi-mawh hrang hrang te a ni a, Rs.14,56,000/- man hu, a vaiin Rs. 29,12,000/- man a ni a. Heng khawlte bakah hian accessories leh Sample Prep Kit, Sample Pre Treatment Pack etc cheng nuai 8 man hu a tel bawk a. Heng khawl te hi Lunglei Medical Superintendent Dr SR Ngurchamliana chuan a lo dawng a ni.

Heti hian tun dinhmunah Lunglei Civil Hospital TrueNat Laboratory-ah Truelab Quattro khawl (vawi khata sample pali test rual thei) pathum leh Molbio TrueLab Uno Dx (vawi khata sample pakhat test thei) khawl pakhat a awm a ni.