Mizoram-ah hri kai hmuhchhuah belh zel an ni

/

Inrinni khan Mizoram-ah Sample 3866 enfiah niin hri kai 345 hmuh a ni a, Inrinni-a hri kai hmuhchhuah thar tarlan zingah hian a hma lama Lawngtlai District chhung Karlui-I a hri kai lo hmuhchhuah tawh mi 147 zet chu ziahluh thar an nih avangin hri kai hmuhchhuah hi a tam phah niin a lang.

Inrinni khan ZMC Laboratory-ah Sample 1065 enfiah niin heng atang hian COVID-19 hri kai mi 44 hmuhchhuah an ni a, heng hri kai hmuhchhuah te hi Aizawl District-a Sample lak vek niin hri kai tawh nen inkawmhnaihna neih avanga inkhunghrang lai an ni.

District hrang hranga TrueNat Laboratory-ah Sample 233 enfiah niin heng atang hian COVID-19 hri kai mi 15 hmuhchhuah an ni bawk a, Champhai District-a Zokhawthar khua ah hri kai mi 6 hmuh niin Siaha District-ah hri kai mi 5 hmuh an ni a, Saitual District-ah hri kai mi 2 hmuh an nih bakah Lunglei leh Serchhip District-ah hri kai mi pakhat ve ve hmuh an ni bawk.

Rapid Antigen Test hmangin Sample 2568 enfiah ah hri kai mi 287 hmuhchhuah an ni a, Lawngtlai District-ah hri kai 154 hmuhchhuah niin heng zinga 147 te chu June 10 leh 11-a Health Department in Karlui-I a Active Case Search an neih a hri kai hmuhchhuah te an ni a, he khua awmna hi a hlat deuh avang leh Internet Signal a that tawkloh avangin SRF ID-an generate nghal thei lova, Lawngtlai an thlen hnuah tihfel theih chauh niin hei vang hian report-ah a luh har phah a. Heng bakah hian Lawngtlai District-ah hian hri kai mi 7 hmuh an ni bawk. Aizawl District-ah hri kai 85 hmuh an ni bawk a, Lunglei District-ah hri kai mi 21 hmuh ni bawkin Siaha District-ah 15, Kolasib District-ah 7 leh Champhai, Mamit, Serchhip leh Saitual District-ah hri kai mi pakhat theuh hmuh an ni bawk.

Mizoram-a COVID-19 hri kai zingah Inrinni khan mi 187 te chu anmahni enkawlna hmun atanga chhuahtir niin nimin khan mi 203 te chu chhuahtir leh an ni bawk a. Heti hian nizan tlai thleng khan Mizoram a COVID-19 hri kai hmuhchhuah chu 15,266 niin heng zinga 11,748 te chu enkawl dam an ni tawh a, tunah hian hri kai enkawllai 3453 la awmin hri kai hmuhchhuah atanga za zela 76.95 te chu enkawl dam an ni tawh a ni.

Inrinni khan Mizoram-a hri kai zingah nunna chan awm lovin tun thla chhunga hri kai boral an awmloh ni hmasa ber a ni a, nimin lamah erawh hri kai zingah nunna chan mi pathum lai awmin nimin chhun dar 12:25 khan Ruallawma (86), Saron Veng Aizawl chu ZMC-ah a boral a, nimin tlai dar 5:50 khan Lalchhuanawmi (42), Electric Veng Aizawl chu ZMC-ah a boral bakah nizan dar 6:20 khan Thanthuama (65), Ramhlun South chu ZMC-ah hian a boral ve leh bawk a, heti hian nimin thlengin Mizoram-ah hri kai 65 an boral tawh a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »