Latest News

Serchhip Sub-Hqrs. YMA V&M Committee in Sports Complex-a Running Track siam an enfiah

Serchhip Sub-Hqrs. YMA Vigilance & Monitoring Committee chuan Serchhip Sports Complex-a Running Track siam chu nimin khan tlawhin tunhnaia ruahsur avanga tuihawk lut nasa lutuk chungchang pawh Department hotute nen an sawiho bawk.

Serchhip Sports Complex-a Running Track siam hnathawh tlawhtu YMA hruaitute hi UD&PA Department-a thawktute chuan lo dawngsawngin, he hna hi tunah chuan zawhfel a nih tawh thu leh hnathawktute pawh an haw tawh thu sawiin, tunah chuan he Complex Field-a hnathawh tur ang ang chu zawhfel a ni tawh tih an sawi a. Tun dinhmunah a hawn chiah hmabak a nih tawh thu leh Bye-Election in a nan avanga la hawnglo chauh an tih thu an sawi bawk.

Serchhip Sub-Hqrs. Vigilance & Monitoring Committee hruaitute chuan he hna thawh hi March 7, 2019 khan a hmunah an lo tlawh tawh thu sawiin, hemi tuma a ruala mi 6 tlan theihna tura siam a nih tur thu he hna thawktu ten an sawi laia tuna mi 5 tlanna tur chauh zawhfel ala ni chu pawi an tih thu an sawi a. Department aiawhte chuan Running Track hi a awm belh nan Fund dil belh mek anih thu sawiin, mahse hun a la duh rei deuh an rih thu an sawi bawk a ni.

Tunhnaia ruahsur avang khan Sports Complex Main Gate atangin Running Track-ah tuihawk lutin hei hian chirh a hnutchhiah nual a, hei hi YMA lam chuan tihfai ran tha an tih thu an sawi bakah Running Track sir chu tuihawk lut theilo tura laihkhuar tha an tih thu an sawi a. Department lam chuan a tul angin an lo bawhzui tur thu leh Company lam te pawh berawnin hma an lo lak nghal tur thu an sawi bawk a ni.

Serchhip Sports Complex-a Synthetic Running Track siam hna hi Syncotts International, New Delhi te chuan thawk a, Running Track hi a tira ruahman nghal a nih loh avang leh Football Ground siam hnua siamchawp a nih avangin International leh National Level-a intihsiakna thleng thei tur khawpin a zau tawklo tih kumin a Line rin dawn khan hriat a ni a. Hei vang hian kumin March 12 khan he hna thawktute leh Sawrkar lama viltute bakah Athletic Association of Mizoram aiawhte chuan a hmunah enfiahin a ruala mi 6 tlan theih ngei na tura siam an rawt bakah intihsiakna lian zawk pawh thleng thei turin International Standard a siam ngei nise tiin a hrana estimate siamin hmalak chhunzawm leh nise an ti a, hri leng in a rawn nan leh tak avangin tunah hian hmalak chhunzawm mumal theih a ni ta rihlo a ni.

Comments

Popular News (Last 30 Days)