Special Investigation Team on Forest Fire ten Serchhip District-a kangmei chhuahna an tlawh

Mizoram sawrkar in a din State Level Special Investigation Team (SIT) on Forest Fire chuan nimin khan Serchhip District rawn tlawhin kumin Thal chhunga kangmei chhuahna hmun te an tlawh a, kangmei chhuah thin dan leh hemi kawnga hmalak dan leh hmalak zel dan turte District thuneitute leh khawtlang hruaitute nen an sawiho a ni.

State Level Special Investigation Team (SIT) on Forest Fire te hian nimin zing khan Serchhip hi rawn thlengin tukthuan eikham ah Serchhip Chanmari Veng-a kumin-a ram kang chhuahna hmun tlawh hmasa berin a theih chin chin ke-in an fang kual a, hemi hnu hian Serchhip leh Keitum inkar, Dawngzawl ram leh a chhehvel-a ramkanna hmun tlawh lehin Serchhip District chhunga kumin-a ram kang nasa ber awmna, Thinglian ram chu Khawlailung leh Piler tlang atangin an thlir bawk a. Thinglian khua Special Investigation Team te hian tlawh duh hle mah se tunhnaiah ruahtui a tlak avangin a panna kawng lamah harsatna a awm theih avangin a hmunah an tlawh theilo a ni.

State Level Special Investigation Team (SIT) te hi District Bawrhsap, Kumar Abhishek leh SP, Stephen Lalrinawma bakah Thenzawl DFO, Margareth Lalramchhani, Addl. DC, Addl. SP leh District Level Committee on Fire Prevention-a Member ten lo dawngsawngin heng hmunah te hian an kalpui a, heng ramkang neitu khawtlang hruaitu VC leh YMA te nen pawh inkawmna neiin kumina ram kan dan chauh thlir lovin kum hmasa lama ram lo kan tawh dan hrang hrangte sawi hovin heng ram kang thinte a thlen tawh lohna tura tul nia an hriatte, a lo awm palh pawha rang taka thelh a nih theih dan tur nia an ngaihte an sawiho bawk a ni.

Kumin Thal chho-a Mizoram hmun hrang hranga kangmei chhuak chhui chiang tur leh hemi kaihhnawiha dan dinglai awm mek te zir-chiang a, a tul anga hmalak dan tur rawtna siam turin Mizoram Chief Secretary, Lalnunmawia Chuaungo, Chairman, State Executive Committee (SEC) ni bawk chuan Section 22(b), (g) and (h) of the Disaster Management Act, 2005 in thuneihna a pek angin State Level Special Investigation Team (SIT) a din a ni.

He Team-ah hian Chief Conservator of Forests (Administration) R.S. Sinha chu Chairman niin Disaster Management & Rehabilitation Department-a Director, John LT. Sanga chu Member Secretary niin C. Lalthanmawia, Director, Fire & Emergency Services leh J. Lalthafamkima Jongte, AIG (Operation), Police Headquarters te chu Member an ni bawk a, nimin-a Serchhip an rawn tlawhna ah hian an rawn tel kim thei a ni.

SIT-a Member Secretary, John LT. Sanga chuan kan Palai zawhna chhangin an hmalakna kawngah kangmei tuar nasa District hrang hrang aiawhte an kawm tawh bakah kangmei chhuahna hmun te tlawh vek an tum thu a sawi a, tuna Serchhip an tlawh bakah hian District dang tlawh zel an tum thu sawiin, Sawr-kar in hun a pek chhung ngeia report thehluh hman an inbeisei thu a sawi bawk.

SIT hian kangmei chhuah chhan, hemi kaihhnawih a Dan hman mek te leh kangmei in thil a tihchhiat chungchang te chipchiar taka zirin Notification chhuah, May ni 5, 2021 atanga chhiara thla hnih chhungin sawrkar-ah rawtna an thehlut dawn a ni.