Fall Army Worm vangin harsatna thleng leh mek

Vaimim eichhetu Pangang chi khat, Fall Army Worm (FAW) chu Mizoram hmun hrang hrangah a puang leh mek.

Agriculture Department-a Joint Director, James Lalsiamliana hnen atanga thudawn danin Mizoram hmun hrang hranga Vaimim chinna hmunah te chuan Pangang a puan thu an dawng a. Tunkar chho hian thu kimchang deuh dawn an beisei a, chutihlai chuan Vaimim chinna hmun chu Pangang puang hian a luhchilh deuh vek niin thu an dawng a. Inkharkhip avangin Official-te duh angin Vaimim chinna hmunah an lut tam thei lo chungin kum hmasa lama rannung thahna hlo an hman bante chu Vaimim chingtute hian an hmang tangkai a, theih ang angin Official-te pawhin zirtirna pe-in a hmunah leh ralkhat atangin an tanpui a, thenkhat chuan sahbawn sen tui hmangin Pangang hi an tihlum ve bawk a, a tangkai hle niin Joint Director chuan a sawi.