Latest News

College Zirlaite harsatna tawh theih chungchangah MZP in H&TE Minister an kawm

Mizo Zirlai Pawl (MZP) General Hqrs. hruaitute chuan nimin khan Higher & Technical Education Minister, Dr. R. Lalthangliana kawmin College zirlai ten harsatna an tawh theih thil pawimawh an sawipui.

H&TE Minister Pisa-a an inkawmna ah hian MZP hruaitute chuan UGC in October 2018-a thuchhuah a siam, University Grants Commission Notification on Refund of fees and Non-Retention of Original Certificates-in a tarlan anga zirlai College-a Admission ti tawh ten engemaw rokhawlhna avanga an zirlai an chhunzawm theihloh emaw, zirna hmun an thlak duh chuan Notification zulzuiin, ‘Huntiam chhungin Admission Fee an pek tawh chu College in an lo pe let leh (Refund) tur a ni,’ ti-a tarlan chu Mizoram College hrang hrangah hman ve anih theih nan hma la turin a ngen a. Minister chuan MZP hruaitute ngenna chu tha taka lo dawngsawngin, hemi chungchangah hian H&TE Commissioner hovin Mizoram Principals' Council ten Meeting an neih tur thu leh a tul anga bawhzui anih tur thu a lo sawi niin MZP chuan an sawi.

MZP chuan hrileng vanga harsatna nasa tak kan tawh mek laiin zirna chungchanga zirlaite harsatna tawh te ngun takin an vil reng tih pawh sawiin, Zirlaite Admission chungchangah te, School Fee chungchangah te a tul angin hma an la chhunzawm zel tih an sawi a. Hemi chungchanga zirlaite harsatna hriaa School Education Minister hmalakna leh School Education Department leh Mizoram Board of School Education (MBSE) thawktute inpekna leh zirtirtute thawhrimna chu chhuanawm an tih thu an sawi a. MZP-in sawrkar enkawl High School/Higher Secondary School-ah zirlaiten Admission chungchanga harsatna an tawh loh nan hmala tura Education Minister hnena a thlen anga hmalak nghal a ni leh thuchhuah siam a ni nghal pawh lawmawm an tih thu an sawi. Hei bakah hian MZP chuan Hrileng vanga Class pangngai kal theih anih loh laia zirlaite tana tha leh zung nasa taka senga Online Class kaltlanga zirtirna tha tak petu zirtrtute thawhrimna chu lawmawm an tih thu pawh sawiin, mimal enkawl zirna In thenkhat, sawrkar thuchhuak bawhchhia a School Fee 70% aia sang la luite chunga sawrkar in khauh taka hma a la pawh lawmawm an tih thu an sawi a, hma la chhunzawm zel turin sawrkar chu an ngen bawk.

Comments

Popular News (Last 30 Days)