Hnahthial leh a chhehvel-a NH. 54 siam mekah hmanraw tha tawklo an hmang niin hria

Hnahthial leh a chhehvel a kawngpui (NH. 54) siam hnathawh kalpui mekah ABCI Infrastructure Pvt. Ltd. ten Retaining Wall siamna atana hmanrua an hman te chu a tha tawklo nia an hriat a ni.

Nimin khan YMA Sub-Hqrs Hnahthial, Hnahthial Town VC Association leh Hnahthial Thalai Pawl tangkawp te chuan NH. 54 siamthat hna thawh meka ABCI Infrastructure Pvt Ltd hnuaia lungrem (Retaining wall) te hi a hmunah enfiahin an hmanrua te chu thalo niin an hriat thu leh Company hotute chu dawhkan kilpui a sawipui an tum thu an sawi a. Heng pawl pathum te hi Group hnih-ah inthenin Hnahthial atanga Leite inkar leh Hnahthial atanga Thiltlang inkara ABCI lungrem te hi an enfiah a, hmun 7 velah Lungrem chim hmuh niin thenkhat chu an lo siam tha mek bawk a, chim ma ithei thei tura ngaih khi leh awn a awm nual bawk niin an sawi.

YMA Sub-Hqrs. Hnahthial President, B. Lalhmingliana chuan nimin a hnathawh hrang hrang an enna ah Contractor-te lung hman chu a chhiat hlawm thu leh an Cement chawhpawlh sa pawh thalo an tih thu sawiin, “An lung hman tam zawk chu Ni sa leh ruahtui dawl zo lo, kut lawng pawha hmeh nawi mai theih a ni a, Cement an hman pawh hian a hneh lovin kheuh khawh theih a awm nual a ni,” tiin Company hotute hi tunkar Zirtawpni hian YMA Sub-Hqrs. Office Hnahthial-ah hian an koh thu  a sawi a. “ABCI ten an hnuaia hnathawk te hmanrua an pek hi a chhe hlawmin a lungawithlak loh takzet a ni,” tiin Hnahthial leh a chhehvela hmasawnna hnathawhte chu tha taka thawh a nih theih nan an vil zui reng dawn tih a sawi bawk.