Latest News

Zirlai tithate chawimawi

Serchhip District Superintendent of Police, Stephen Lalrinawma chuan Serchhip District Executive Force (DEF) fa te zinga HSLC pass thar te hnenah nimin khan chawimawina a hlan.

Serchhip SP Conference Hall-a HSLC Pass thar, District Executive Force (DEF) fa te chawi-mawina leh lawmpuina hunah hian Serchhip SP, Stephen Lalrinawma chuan zirlai hlawhtling, HSLC Pass thar te chu a lawmpui thu sawiin, an kal zelna turah taihmakna, rinawmna leh tih hram hramna nen bei-a Subject hrang hranga Letter Mark hmu zel tura a duhsak thu a sawi a. An zir thiamna te chu midang tan, ram tan leh khawtlang tana an thawhna atana hman tum tura chahin, hna hmuh leh thawhna atana mahni tan chauha hman tum lo tur leh midangte tana malsawmna atana hman tum turin a chah bawk.

Nimin-a he hun hman hi Serchhip SP Office-a RO, Insp. H. Biakchhuma chuan kai-hruaiin Serchhip Addl. SP, PC. Laltanpuia pawhin zirlai naupang hlawhtling te chu a lawmpui thu sawiin, tunlai khawvel-ah thiamna sangin Technology lamah hmasawnna a sang zel a. Heng te hi tangkai tak leh hmasawnna atana hman tum tura chahin, chutihrual chuan an mahni tichhe thei a nih avanga fimkhur taka hman tum turin a chah bawk a ni.

Kumin HSLC Result chhuaka Police fa tithate chawimawina leh lawmpuina hun hi hri leng kara neih a nih avangin sawrkar in SOP a siam zawm chungin hun hman a ni a, tun tumah hian zirlai mi 9 te hnenah chawimawina hlan an ni.

Comments

Popular News (Last 30 Days)