Latest News

Chanchin thar thenkhat :

Thingphun dan tur sawiho

Tun thla ni 11-a Lunglei-a Green Mizoram Day hman dan tur ngaihtuahin nimin khan Lunglei District Level Committee on Green Mizoram chuan Online hmangin Meeting an nei a, kumin a Green Mizoram Day-ah hian thupui atan ‘Tuihna leh boruak tha siam nan thing i phun ang u’ tih chu hman a ni ang. He Meeting in ruahmanna an siam dan chuan June 11-ah hian Green Mizoram Day hi SOP zawm chungin hman a ni anga, a hawnna hi HATIM, Pukpui-ah neiin Planting Agency, mahni thingphun enkawl tha leh kangmei veng tha khua thlanchhuah te lawmman siam sak an ni ang. He hunah hian Forest Department chuan April Par, Vaube, Cassia Fistula, Thlado, Thak-thing, Champaca, Tlaizawng leh thingkung chi dang engemawzat phun tur an neih thu an sawi a ni.


Containment Zone nihna hlip

Tunhnaia COVID-19 hri kai thahnem tak hmuh an nih avanga May ni 5, 2021 atanga tuma tlawhpawh theihlohna hmun, Containment Zone a puan Zokhawthar khua-ah hri kai an tlem tak avangin nimin atang khan Containment Zone a puanna hi hlih a ni a. Amaherawh chu African Swine Fever lenna hmun, Infected Area-ah Zo-khawthar hi puan ala nih avangin Zokhawthar a motor lut leh chhuak turte chuan SDO (Sadar), Champhai hnenah in report hmasak zel tur niin Zokhawthar paltlangin Myanmar lam atangin mihring luh leh bungrua lakluh phal a ni lo thung.


MPCC ten thilpek an hlan

Congress Party chuan nimin khan ZMC-SHRF a thawktu ten an mamawh tur thil chi hrang hrang Rs. 70,000/- hu an hlan a, heng thilpek te hi ZMC aiawhin Medical Superintendent, Dr. HC. Laldina leh Nursing Superintendent Lalbiaknguri ten an lo dawng a, an thilpek hlan te hi thei leh thlai te bakah thawktu ten PPE Suit hak avanga dehydration harsatna an neih changa an mamawh, Coconut water box 18 a tel bawk a ni. Tun dinhmunah ZMC-SRHF ah hian hri kai enkawl mi 218 awmin an zingah hian naute pahnih an awm mek a ni.


HSLC result chhuak dawn

Mizoram Board of School Education (MB-SE) chuan naktuk, June 3, 2021 chhun dar 12:00 khian HSLC Examination 2021 result tihchhuah a tum a, MBSE website - www.mbse.edu.in ah en theih a ni ang. Covid-19 hrileng avangin MBSE Office-ah result hi tarchhuah a ni dawn lova, mamawh zual tak takte tan result bu lei theihin a awm thung dawn a ni. Result zawt duh tan Phone number 2390993 leh 2390992-ah zawh theih a nih dawn bakah Whatsapp hmangin 9862372293/9612191614/8731058063/8794158384-ah te zawh theih a ni anga, Lunglei, Lawngtlai, Siaha leh Hnah-thial District tan Phone number hran dah a ni bawk.


Ration Buhfai khul sak dawn

Malsawm HOUSE, Home Appliances, Multibrand Show Room, Aizawl chuan mal-sawmna an dawn atangin Hrangturzo bial chhunga chhungkaw 590 (AAY family) tan June/July/August (2021) thla chhung Ration Buhfai an khul sak dawn tih an sawi a, Covid-19 hripui avanga mi harsa ten harsatna an tawh ang zelin la khul chhoh sak zel an tum tih an sawi bawk.

Hetihlai hian Mizoram Business Coordination Committee (MBCC) Chairman leh Liando Auto Works neitu, David R. Malsawm-tluanga chuan Keitum khua a BPL leh AAY te Ration buhfai June thla quota chu a khul sak  bawk a ni.

Comments

Chhiar Hlawhte