Latest News

Serchhip Sub-Hqrs. YMA in hnathawh thalo siamtha leh turin Company hotute an ngen

National Highway-54 Chhiahtlang leh Chhingchhip inkar-a laihzauh leh siamthat hna thawh mek chu nimin khan Serchhip Sub-Hqrs. YMA Vigilance & Monitoring Committee chuan tlawhin hnathawh tha tawklo nia an hriat te chu siamtha leh turin an ngen.


NH. 54 Chhiahtlang leh Chhingchhip inkar hi KRAM Infracon Pvt. Ltd. chuan a siamthat leh laihzauh hna hi an thawk mek a, tunhnaia ruahsur-ah kawngpui zauhna atana lungrem thenkhat chu chhiain hemi enfiah tur hian YMA te hi an kal a, Sub-Hqrs. YMA VMC hruaitute chuan he hna thawh mekah hian lungrem nghetlo lai leh Culvert siam tawh sa chim a awm nual tih an hmuh thu sawiin, heng te hi siamtha leh turin KRAM Infracon Pvt. Ltd. hotute chu an ngen a. He huna tel ve Company lam aiawhte chuan tunhnaia ruahsur avanga hnathawh chhia te chu an siamthat leh nghal tur thu sawiin, an lungrem chim te pawh hnathawktu Contractor ten an hna an uluk tawkloh vang a nih thu leh hnathawktute hi anmahni lamin an vil reng hman bikloh thu an sawi a, hmun tam takah an hnuaia Mizo Contractor te hnathawh thalo avangin lungrem chim a awm thu an sawi bawk.

Heng hnathawh te an enfiah hnu hian YMA Sub-Hqrs. VMC hruaitute hi KRAM Infracon Pvt. Ltd. Camp, Chhiahtlang leh Chhingchhip inkar ami ah kal nghalin an hotute nen inkawmna an nei nghal a. He hunah hian YMA hruaitute chuan kawngpui siamthat hna thawh meka hnathawh thalo te chu an rang lama siamtha leh tur te, Mizo Contractor an chhawr zinga hna thawk thalo te chu chhawr tawhlo mai tur te leh hnathawk ho te hnathawh lai chu uluk zawka vil turte in Company hotute chu an ngen a. Company lam chuan tuna hnathawh chhia te hi a thawktu Contractor te siamtha leh tura an hriattir tawh thu sawiin, an kawng siam tawha thalo leh chhia zawng zawng chu an siamthat leh vek tur thu an lo sawi bawk.

YMA hruaitute chuan Serchhip khawpui chhung Sesah lui-a kawngpui chhuat, Company lamin concrete-a an siam chu duhthu a samloh avangin sawiselna a tam tih pawh he hunah hian sawiin, tuna an kawng chhun tawh chu kawng chhuat zawng zawng awh tura siamtha leh turin an ngen a, Company lam chuan Vawiin (June 17, 2021)-ah an lo enfiah nghal tur thu leh a rang lama hma an lo lak tur thu an sawi bawk a ni.

Comments

Chhiar Hlawhte