Latest News

Mizoram-ah hri kai mi 99 hmuh belh leh an ni

Pathianni khan Mizoram-ah Sample 744 enfiah niin heng atang hian COVID-19 hri kai mi 99 hmuhchhuah an ni a, Sample enfiah atanga za zela 13.30 te chuan hri an kai a ni.

Pathianni khan ZMC RT-PCR Laboratory-ah Sample enfiah awm lovin District hrang hranga TrueNat Laboratory-ah Sample 137 enfiah niin hri kai 4 hmuhchhuah an ni a, heng hri kai hmuhchhuah te hi Siaha District leh Kolasib District-ah pahnih ve ve niin Siaha District-a hri kai hmuhchhuah pakhat hi CCC-a duty niin mahni inrinhlelhna neih avanga Sample enfiah a ni a, midang pathum te hi hri kai tawh nen inkawmhnaihna neih avanga inkhunghrang lai an ni.

Rapid Antigen Test hmangin Pathianni khan Sample 607 enfiah niin hri kai mi 95 hmuhchhuah an ni a, heng zinga 72 te chu taksa-a hri kai lanchhuahna nei an ni. Rapid Antigen Test hmanga hri kai hmuhchhuah te zinga 83 hi Aizawl District ami an ni a, hri kaina hriatloh leh chhui zui ngai mi 20 vel chauh an awm a ni. Lawngtlai District-ah hri kai mi 8 hmuh an ni a, Kolasib District-ah hri kai mi 2 hmuh niin Lunglei leh Siaha District-ah hri kai pakhat ve ve hmuh an ni bawk.

Nimin khan Mizoram-ah hri kai mi 199 te chu enkawl dam niin nizan hmasa khan mi 54 te chu anmahni enkawlna hmun atanga chhuahtir an ni ve leh bawk a, heti hian nizan dar 10:00 thlenga Mizoram-a hri kai hmuhchhuah tawh chu mi 12,087 niin heng zinga mi 9214 te chu enkawl dam an ni tawh a, hei hi hri kai hmuhchhuah atanga chhutin za zela 76.23 a ni a, tunah hian hri kai enkawllai 2833 an la awm mek a ni.

Hri kai zingah nunna chan mi 40 an awm tawh :

Mizoram-a COVID-19 hri kai hmuhchhuah zingah nimin khan nunna chan mi pahnih an awm belh leh. Nimin zing dar 8:30 vel khan R. Lalrohlua (57), Seling chu ZMC-ah a boral a, R. Lalrohlua hian May 4, 2021 khan COVID-19 hri a kai tih hmuhchhuah niin May 5-ah ZMC-ah admit a ni a, Zunthlum natna nei sa niin 4th IR Bn. mi leh sa a ni a, West Bengal Election inthlan-a duty a kal a ni. Nimin chawhnu dar 3:30 vel khan Lalrokimi (64) Venghlui chu COVID-19 Pneumonia vangin aZMC-ah a boral ve leh bawk a, ani hi tun thla ni 15-a hri kai hmuhchhuah niin April 18 khan ZMC-ah dahluh a ni a, Chuap thalo neisa a ni bawk. Heti hian Mizoram-a COVID-19 hri kai zingah nunna chan mi 40 an awm ta a, an zinga mi 25 zet chu May 2021 chhunga boral an ni.

Comments

Chhiar Hlawhte