Vaccine pek dan siamthat a ngai - MPCC

Mizoram Pradesh Congress Committee (MPCC) Media Department chuan COVID-19 vaccine pek dan a felfailo nia sawiin, siamthat vat a ngai niin an sawi.

Nimin-a thuchhuah an siamah Mizoram sawrkar chuan January 16, 2021 atangin COVID-19 Vaccine a pe tan tih sawiin, June 5, 2021 thlengin Vaccine First Dose la tawh mi 2,66,613 leh Dose 1-na leh 2-na la zo tawh mi 52,191 an awm bawk tih an sawi a. Thla 6 chhungin State population (2011 census) atanga chhutin zaa 4.75 chiah COVID-19 Vaccine (dose 1-na leh dose 2-na) kan pe hman tihna a ni, an ti.

Hetihlai hian COVID-19 Vaccine pek danah kalphung fel tawk lo a awm nual nia sawiin MPCC chuan, Frontline Worker pawh ni lo, sawrkarin vaccine la hmasa tura a tihte zinga mi ni bawk si lo, Registration kalphung pangngai piah lama ngaihpawimawh chawp an tam hle niin an sawi a, hei hian vaccine petu damdawi lam hnathawkte pawh a tibuai hle niin an sawi a. Vaccine pekna hmun thenkhatah phei chuan hetianga ngaihpawimawh chawp an tam avang hian ni khata vaccine pek tura ruahman zatin a daih lo fo thin bakah vaccine petu thenkhatin an duhsak zawngte hnenah information pawimawh an pe ru fo tih hriat a ni bawk tih an sawi a ni.

MPCC chuan Mizoram mipui tam zawk hi COVID-19 Vaccine la duh hlir kan nih avangin hetianga duhsak bik neia vaccine pekna hi kalpui chhunzawm zel a nih chuan mipui thik thu a chhe hle dawn tih hre tura sawrkar chu chahin, “Vaccine inchuh buaina a thlen loh nan Vaccine pek dan a thil fello awmte hi siamtha vat turin Mizoram sawrkar kan ngen a ni,” an ti bawk.