Inrinni-a Sample enfiah ah hri kai tlahniam hret

Inrinni khan Mizoram-ah Sample 2779 enfiah niin heng atang hian COVID-19 hri kai mi 193 hmuhchhuah leh an ni a, Sample enfiah atanga za zela 6.94 te chuan hri kaiin hri kai hmuhchhuah a tlahniam hret a ni.

Inrinni khan ZMC Laboratory-ah Sample 953 enfiah niin heng atang hian COVID-19 hri kai mi 74 hmuhchhuah an ni a, an vai hian Aizawl District-a Sample lak niin hri kai hmuhchhuah zinga a tam zawk te hi hri kai hmuhchhuah tawh nen inkawmhnaihna neih avanga inkhunghrang lai an ni a, State pawn atanga hnathawk tura rawn lut 10 zet awmin State pawn atanga rawn lut midang 2, Healthcare Frontline Worker 2 leh COVID-Free Certificate neih duh avanga Sample Test pakhat an awm bawk a ni.

Inrinni khan Mizoram District hrang hranga TrueNat Laboratory-ah Sample 218 enfiah niin heng atang hian hri kai mi 5 hmuh an ni bawk a, Lunglei District-ah hri kai nen inkawmhnaihna nei mi 3 leh Mamit District-a Zomuantlang-ah hri kaina hriatloh mi 2 te an ni.

Rapid Antigen Test hmangin Inrinni khan Mizoram-ah Sample 1608 enfiah ni bawkin heng atang hian hri kai 114 hmuh an ni bawk a, an zinga 66 te hi Aizawl District-a Sample enfiah niin Aizawl Dinthar Veng an hri kai mi 15 lai hmuh leh an ni a. Lawngtlai District-ah hri kai mi 23 zet hmuhchhuah ni bawkin Kolasib District-ah 14 hmuh an ni a, Lunglei District-ah hri kai mi 10 hmuh niin Siaha District-ah hri kai mi pakhat hmuh leh a ni bawk.

Heti hian nimin thleng khan Mizoram-a hri kai hmuhchhuah tawh chu 16,943 niin nimin khan hri kai 261 te chu enkawl dam leh an ni a. Heti hian nimin thleng khan Mizoram-a hri kai hmuhchhuah zingah 13,390 te chu enkawl dam ni tawhin hei hi hri kai hmuhchhuah atanga za zela 79.02 a ni a, tunah hian hri kai enkawllai 3471 an la awm mek a ni.

Hri kai zinga mi 82 zet an boral tawh :

Mizoram-a COVID-19 hri kai hmuhchhuah zingah nunna chan mi 82 zet an awm ta. Inrinni zing dar 3:20 khan Lalnunziri (64), Saron Veng Aizawl chu ZMC-ah boralin May 17-a hri kai hmuhchhuah a ni a, Inrinni zing dar 4:30 khan Lalramliani (59), Salem Veng Aizawl chu ZMC-ah boral ve lehin ani hi May 24-a hri kai hmuhchhuah a ni thung. Inrinni zan dar 9:30 khan Rualtinkhuma (48), Kanan Veng Aizawl chu ZMC-ah boral ve lehin June 11-a hri kai hmuhchhuah a ni bawk.

Nimin June 20 zing dar 1:00 khan Erichiya Devi (52), Muanna Veng Aizawl chu ZMC-ah boralin, Dr. Laltinchhawna (72), Zarkawt Veng pawh nimin zing dar 1:45 khan ZMC-ah a boral a, nimin zing dar 6:30 khan K. Biaksiami (70), Edenthar Veng chu ZMC-ah a boral ve leh bawkin an pathum hian June 3-a hri kai hmuhchhuah vek an ni.