Lenkawl

Serchhip District Football Association in a buatsaih, Independence Day Football Tournament chu nimin khan Serchhip Sports Complex-ah khelh \an a ni.

Sports, Youth Affairs & Tourism Board chu nimin khan  Chief Minister, Zoramthanga hovin CM Cabinet Meeting Room-ah \hukhawmin an hma-lak dan tur an sawiho.

PRISM Party leh JAC on Innerline 509 Square Mile Demand te chuan Mizoram Map siam thuai turin sawrkar an duh thu an sawi.

MPC Party chuan General Assembly neia hruaitu thar thlanna an neih hnua Elected OB-te inrawnkhawmna a\anga an party dinna Press Conference hmanga an puan chu mimal thu-neihna hmanga hmalak a ni lo tih an sawi.

Naktuk August 1, 2019 a\ang hian Aizawl Municipal Corporation (AMC) chuan Aizawl khawpui ah Plastic hman an khap dawn.

Agriculture Minister, C. Lalrinsanga chuan nimin khan Aizawl-a Mizoram New Capital Complex (MINECO)-ah Fostering Climate Resilient Upland Farming Systems in the North East (FOCUS) Mizoram Project Management Office chu a hawng a. FOCUS hi Mizoram District 4-ah kalpui mek a ni.

Mizo thuam inbel, siam chhuah leh humhalh chungchangah nimin khan Central YMA aiawh leh ZOHANDCO-a thawk te chu ZOHANDCO Chairman, C. Lalrammawia hovin a Office-ah an inkawm.

|halai Kristian Pawl (|KP) Serchhip Pastor Bial te chuan nimin a |KP dinchampha pual khan Serchhip khawpui chhung hmun hrang hrang ah Vantlang tana hna \angkai thawkin hnatlang an nei.

FCS&CA Department chuan Mizoram-a eirawngbawlna Gas man leh subsidy pekchhuah zat tur a bithliah thar a. Hemi ang hian Mizoram pumah Vairengte chu eirawngbawlna Gas man tlawmna ber niin Kg. 14.2-a rit eirawngbawlna Gas bur khat man chu Rs. 769.43/- a ni ang.

Tun thla ni 19-a Mualkhang Huanmawi bula leimin avanga harsatna thleng mekah Serchhip-a Cement lei tur a awm tawh lo a, In sa mek leh hna-thawk mek mi \hahnem takin harsatna an tawk mek a ni.

Mizoram sawrkar in MR-a zirtirtu hna thawk tur a lak tur atan nimin khan Interview chu hmun hrang hrangah neih \an a ni a, Serchhip-ah pawh interview hi neih \an a ni bawk.

BJP Mizoram Pradesh President, Prof. JV. Hluna chuan tunhnaia BJP-in Missionary Cell a din chhan leh nihphung hre chiang lova Kohhran hruaitu inti \henkhat sawiseltute chu Politics chhiain a chhumhmin te an ni tih a sawi.

I&PR Minister, Lalruatkima chuan tunhnaia Party pakhat hruaitute thusawi chuan ram hmasawnna lam a kawk lo hle tih sawiin, “Vision sawi tur pawh neilo, Vision pawh nei peih lovin mipui te'n duh taka Chief Minister atan an dah hi fiamthu thawh nan hmang tawh lo turin thurawn kan pe a ni,” a ti.

ZPM-in Party pakhata inchhunfin tura hma an lakna MPC Party in a zawm ve theih tak loh avangin MPC Vice President, Lalthansanga (Chatea) hovin MPC hruaitu mi 10-in nimin khan an Party a\anga banna an thehlut.

Serchhip East Block MNF chuan sawrkar hmalakna \ha taka kalpui a nih theih nana enfiaha mipuite hnena a \ul anga puangzar turin Vigilance & Media Cell a din thar a. Chairman-ah B. Vanlal-ngura, Vengchung, Vice Chairman-ah C. Ram-engmawia, Tuikhuah Veng, Secretary-ah MC. Malsawma, Darnam Veng, Asst. & Fin. Secretary-ah Chalthansanga, New Serchhip leh Treasurer-ah H. Lalbiakzauvi, Vazar Veng te ruat an ni.

National Sub-Junior Badminton Ranking Tournament chu nimin khan Guwahati-ah khelh \an a ni leh ta a, Mizoram a\ang pawhin Mipa ah mi 15 leh Hmeichhia-ah mi 8 telin an zingah hian Serchhip a\angin mi 4 an tel.

Vawiin July 30, 2019 hi Baptist Church of Mizoram (BCM) hnuaia |halai Kristian Pawl (|KP) dinchampha vawi 68-na a ni a, he Ni hi hmun hrang hrangah urhsun taka hman a ni ang.

Serchhip Police te chuan kumin a Green Mizo-ram Day denchhena an thing\iak phun te enkawl zuiin nimin zing khan hnatlang an nei.

Serchhip-a Urban Development & Poverty Alleviation Department chuan nimin khan an hnuaia Self-Help Group te kokhawmin an hnathawh dan tur chungchang zirhona neiin Faina chungchang zirhona an nei dawn.

Mizoram-ah Vawk natna, Porcine Reproductive and Respiratory Syndrome (PRRS) chu \um thum a leng tawh nia chhinchhiah a ni a, PRRS leng avang hian Mizoram-ah Vawk 11,079 a thi tawh nia chhinchhiah niin Vawk thi avanga sum hloh hi cheng nuai 1062 vel nia chhut a ni a, kumin ah PRRS leng a awm hriat ala ni lo thung.

Serchhip-a hmunhlui humhalhtu pawl, Ser-chhip Heritage Society in Kawlri tlang-a hmun-hlui humhalha hma an lakna kal zelah Inrinni khan Pastor Chhawna Memorial Prayer Cabin an sak chu hawn a ni.

Mizoram Sawrkarin District thar pathum a siam mekah Ngopa RD Block huamchhunga khaw awm zawng zawng leh Lengteng Constituency chhunga khaw tam zawkten Saitual District chhunga awm ngei an duh thu an sawi.

Serchhip Sub-Hqrs. YMA chuan Rajya Sabha MP, Ronald Sapa Tlau in MP Fund a pek a\angin Morgue Van atana siam tur Pik-Up (4X4) chu Inrinni khan leiin Serchhip rawn thlenpui a ni ta a. Serchhip Sub-Hqrs. YMA hian hemi atan hian MP Fund, Rs. 7,20,000/- an hmu a ni.

Serchhip-a awm 8th Assam Rifles te chuan Inrinni khan Mizoram Upa Pawl (MUP) Member te tan Tuberculosis (TB) natna chungchang zirhona an buatsaih.

Central K|P-in Kristian |halai chanchinbu kum 50 tlin lawm nana Inter-Branch K|P Quiz a buatsaih Elimination Round Result chu puan ni tawhin Serchhip District a\angin Chhiahtlang Hmar Veng leh Kei\um Kawn Branch te an tling.

Mizoram Police te chuan tunhnai khan dan lova Myanmar a\anga Aizawl khawpui chhunga Vawk lakluh tum 100 chuang manin heng zingah hian PRRS vei 6 finfiah a ni tawh a. Kawng laka Vawk thi \henkhat chu rep a nih mek laiin man a ni bawk.

MZP General Hqrs. chuan Inrinni khan College S.U. leh hnampual zirlai pawl hruaitu degree nei tharte lawmpuina leh chawimawina hun hmangin he hun hmanpuitu Agriculture Minister, C. Lalrinsanga chuan MZP hmalakna te chu sawiseltu awm \hin mah se kan hnam in a hlawkpui zia leh rah \ha a chhuahna hi Zofate hian an theihnghilh tawh dawn lo, a ti.

Govt. Serchhip College chuan nimin khan an College-a zirlai lut thar te lawmna hun, Fresher Social an hmang a, he College Principal thar tur, PC. Lalremsiama chuan khuallian niin a hman-pui a ni.

UD&PA Department hnuaia Serchhip-a Street Vendors/Hawkers te chuan nimin khan kum 2019-2020 chhunga an hruaitu tur thlanna an nei.

Nimin khan Serchhip DC’s Office Chamber-ah District Monitoring Committee on Accessible Election chu \hukhawmin Election Commission of India (ECI) in tun inthlan hnuhnung bera Acessible Elections chungchanga report a rawn dil chungchang sawiho a ni.

Serchhip Ar Vulh Association (SAVA) chuan nimin khan Assembly vawikhatna an nei a, Serchhip DVO, C. Zarzokima chuan khuallian niin a hmanpui a ni.

Nimin a Lunglei-a sawrkar mi pawimawh te leh tlawmngai pawl aiawhte \hukhawm chuan hnamdang dan lova awm leh ILP hmang diklo te dapchuah runpui chu hun remchang hmasa berah neih nise an ti.

Tunhnaia North East State Under-19 Women Football Championship a Champion, Mizoram Team te chawimawi hun chu nimin khan Loch Hall, 46 Assam Rifles hmunpui ah neih a ni a, Sports Minister, Robert Romawia Royte chuan a hmanpui.

Art & Culture Minister, R. Lalzirliana chuan Hnam changkang zawk te apiangin an Hnam thil te Lemchan kaltlanga puanchhuah an ngai hlu tih a sawi.

Mizoram Pradesh Congress Committee (MPCC) President, Lal Thanhawla chuan sawrkar dinglai chuan a term a hmang ral dawn lo nia sawiin, “Eirukna sual avangin MNF sawrkar hi tla thei reng dinhmunah a ding mek a.An hotupa tiamin MNF hruaitu lawkte chuan eiruk thubuai pahnih pathum an nei a, lung In tang thei reng an ni,” a ti.

School Education Minister, Lalchhandama Ralte chuan tunhnaia MR Teacher 881 lak thar turah Hnam Run list a awm lo tih sawiin, “Thingtlang thleng phak Education Gospel kalpui kan tum a, thingtlang lama zirtirtu neilo te leh indaihlohna nasa tak awm phuhru turin hma kan la a ni,” a ti.

National Health Mission (NHM) Team te chuan nimin khan Champhai District Hospital tlawhin Supportive Supervision an nei.

Mizo Academy of Letters (MAL) leh INTACH (Mizoram Chapter) buatsaih Mizo \obul chhuina, ‘Symposium on Chhinlung’ chu nimin khan MBSE Conference Hall, Aizawl-ah neih a ni a. Art & Culture Minister, R. Lalzirliana chuan khuallian niin a hmanpui.

PHE Department hnuaia Swachh Bharat Mission (Gramin) leh Central YMA \angkawp in an buatsaih Faina kawnga hma la \ha te chawimawina leh Faina kawnga Mizoram thlen chin lawmna hun, Swachh Mahotsav (Faina Kut) chu nimin khan Aizawl Vanapa Hall-ah hman niin Serchhip District chu SBM (G) hnuaia hma la \ha District pathum thlanchhuah zingah a tel.

Chief Minister, Zoramthanga chuan Zu do beihpui chu hmanah khan hmalakna lo \an tawh ni ila chuan nunna tam tak kan chhan hman tawh ang, a ti.

Mizoram-a naupiang leh thi zawng zawng te chhinchhiah vek an nih theihna turin sawrkar chuan hma a la mek.

Tun thla ni 8-a Serchhip District chhunga dan lova Vawk lakluh an man te chu Court in thu a remna angin nimin khan lilam a ni.

Nimin khan Serchhip Town chhunga hriselna lama thawktu Health Workers leh Accredited Social Health Activist (ASHA) te tan 'Capacity Building Programme' chu neih a ni.

Zoram Entu Pawl (ZEP) Drop-in-Centre Serchhip-a thawk te chuan kumin hian Serchhip Town chhungah HIV hrik pai hmuhchhuah nasa taka a pun thu sawiin, mutmawh hnarmawh-a neih a \ul tawh thu an sawi.

MPC Party chuan tun thla ni 22-a ZPM in ECI Registration an neih an lawm \uma Lalduhoma’n MPC Party Policy Six Basic Needs, ZPM party Policy atana a puang chu Party zahlohna leh palzutna lian takah an ngai tih thuchhuah siamin an tarlang a. MPC Party mi leh sa te bum nan MPC Founder, Brig. T.Sailo-a hming leh a Policy Six Basic Needs chu hmang tawhlo se an duh takzet tih an tarlang a. ZPM MLA te dinhmun sawi \hin pawh thu diklo a nih thu tarlangin, “Pu Lalduhawma’n Independent MLA pasarih te ZPM MLA anga a sawi hi thu belhchian dawllo a ni a, ZPM party thar hian Election pawh a la hmachhawn lo a, chuvangin ZPM party hian MLA pakhat mah a la nei lo,” an ti bawk.

BJP Mizoram Pradesh President, Prof. JV. Hluna chuan nimin khan Aizawl-a an Office-ah thuthar thehdarhtute kawmin, July 17, 2019 khan BJP Mizoram hnuaia Missionary Cell din a nih thu puan a nih thu leh a tum ber chu Mizo Kristian Missionary te India ram khawi hmunah pawh, an rawngbawlna hmuna Local mi te’n diklo taka diriam emaw, harsatna emaw siamsak an nih changa Mizo Kristian kan nihna anga a theih dan kawng kawnga an thlavang hauh \hin a nih thu a sawi bawk.

Tun thla ni 2-a BSUP Complex, Durtlang-a chhiat tawhna a nunna chan chhungte hnenah nimin khan Ex-Gratia semchhuah a ni.

PRISM Party chuan tunlaia India leh Naga te inbiaknaa Mizote dinhmun aia \haa Naga te dah tumna awm anga lang chu tihhlawhtlin anih phawt chuan chumi ang dinhmunah chuan kan awm ve turah an ngai tih an sawi a. Mizoram sawrkar in ramri a pawm chin a tihchian thar mil Mizoram Map an siamchhuah thar thu an sawi bawk.

Mizo Students’ Union (MSU) General Hqrs. chuan Mizoram sawrkar-a Education Department-in Muster Roll-a Zirtirtu a lak turah sawrkar thuneitute nen inremna an siam thu an sawi.

Congress hi kan tla zawi lo - Lal Thanhawla Mizoram Pradesh Congress Committee (MPCC) hruaitu thlanna chu nimin khan neih niin President nilai, Lal Thanhawla chu chuhtu awm lovin President-ah tlingah puan a ni a. Vice President-ah H. Liansailova leh Treasurer-ah Zodintluanga te pawh chuhtu awm lovin tling ah puan an ni bawk.

Govt. Serchhip College-a NSS Unit chuan niminpiah khan Plastic leh Polythene hmang tlem tura inzirtirna hun Kei\um khua ah hmangin High School leh In hrang hrang an tlawh a. He huna thu sawitute chuan Plastic/Polythene te hi an \awih mai theih loh thu leh \awihral turin kum 400 vel tal a ngai tih sawiin, halral a nih pawhin boruak chhia, Carbon Monoxide, Carbon Dioxide, Flourine leh a dangte a khuchhuak-ah hian a tel a, heng te hi mihring tana \halo chi hlir a nih avangin hman tlem chu a pawimawh ber tih an sawi bawk.

Serchhip-a Legal Metrology-a thawk te leh Serchhip District Consumers Association chuan niminpiah khan Thenzawl khuaa sum-dawnna dawr hrang hrangte enfiahin Dawr 3 a\angin MRP thaichhiat leh a aia to-a zawrh te an man a, heng dawr a\ang hian item 17 vel \heuh man niin Office-a in report tura koh an ni. Heng sumdawng te hi thubuai pahnih siam sak niin heng te hi thil zawrh funna-a inziak tur awmlo/tihchhiat leh MRP-a inziak aia to-a thil zawrh te a ni.

Mizoram sawrkar-a Deputy Chief Minister, Tawnluia chu damlohna avanga thla ruk (6) chhung vel zet Max Hospital, New Delhi a enkawl anih hnuah nimin khan Aizawl-ah a rawn haw leh ta a. Mizoram sawrkar-a Minister leh MLA \hahnem takin Lengpui Airport-ah an lo hmuak a ni.

Mizoram mamawh lakluhna kawngpui pawimawh ber, NH. 54 Mualkhang dai-a leimin in a hnawh mek chu nimin khan Supply Minister, K. Lalrinliana chuan tlawhin he kawng min avang hian ei leh bar-ah Mizoram tan harsatna a awm a rinloh thu a sawi.

Tunhnaia Serchhip Police ten Dan lova Serchhip District chhunga Vawk lakluh an man zinga la dam 25, Court-a thubuai chinfel tawh te chu Vawiin, July 25, 2019 khian District Veterinary Officer enpuina hnuaiah Slaughter House, Ser-chhip-ah lilam (Auction) hmanga tihral a ni dawn a, mipui a duh apiang tan chhan theih a ni ang.

Social Welfare Department hnuaia District Child Protection Unit (DCPU) buatsaihin Serchhip-a Home hrang hrang enkawltute tana Capcity Building Programme chu nimin khan Serchhip-a I&PR Conference Hall-ah neih a ni a.

Serchhip District Magistrate, Sangchhin Chin-zah chuan nimin khan thupek thar tichhuak lehin Serchhip District-ah Vawk leh Vawksa a siam lakluh khap a ni tih a tarlang a.

Serchhip District Coordination Committee on FOCUS chu nimin khan an Chairman, Serchhip District Bawrhsap Sangchhin Chinzah hova a Office-ah \hukhawmin an hmalak tawhna te an thlir bakah hmalak zelna tura ruahmanna te an thlirho a. Vawk leh Sial vulhna lama hmalakna tura ruahmanna te chu pawm a ni.

Ministry of Parliamentary Affairs hmalakna a ram chhung rorelna In hrang hranga hnathawhna ah lehkha aia Information Technology hmanga kalpui tura ruahmanna, National e-Vidhan Application (NeVA) chungchang zirhona chu nimin khan Aizawl-ah neih a ni.

Mizoram sawrkar-a School Education Department leh Door-darshan Kendra (DDK) Aizawl te chuan kum khat chhunga thawhhona tur, Memorundum of Agreement (MoA) chu niminpiah tlai khan an ziak.

Kum 2019-2020 chhunga Mizoram State Sports Council Budget ngaihtuahin niminpiah tlai khan Mizoram State Sports Council (MSSC) General Body Meeting neih a ni a, he hun hi MSSC President leh Sports Minister ni bawk, Robert Romawia Royte chuan a kaihruai a ni.

Zoram People’s Movement (ZPM) chuan Bairabi Zophai, Ch. Chhunga leilet-a Chawlhbuk sak thuai a nih theih nana hma turin Mizoram sawr-kar an phut thu an sawi.

Serchhip District Hospital-a thawk, Dr. K. Lallawmzuala (Medicine) leh Dr. K. Van-lalhriati (Pediatrician) te chuan Serchhip District Hospital-a Anti-Tobacco Cell-a thawk te nen nimin khan Thenzawl CHC-ah a thlawna inentirna an buatsaih a. Medicine-ah mi 148 leh Pediatrics (naupang lam thiam)-ah mi 103, an vaiin mi 251 an inentir a. Zuk leh hmuam nghei duh \hahnem takin Anti-Tobacco Cell a thawk te hi an pan bawk a, hetiang hun buat-saih a ni chu mipui te an lawm hle a ni.

Chief Minister, Zoramthanga chuan MPSC hnuaia hnalak kal mek leh hna lak tur Advertisement tihchhuah tawh chu MPSC in a lak chhunzawm theih nan hma a lak nghal tur thu a sawi.

Serchhip District Anti-Tobacco Squad te chuan nimin khan Serchhip P&E Veng huam-chhunga sawrkar Pisa hrang hrang leh Serchhip AOC Veng vel-a sawrkar Pisa te tlawhkualin Dan in puipunna hmun leh vantlang hmuna meizuk a khapna bawhchhia mi 4 an man leh a, heng mite hi Dan in a phut angin pawisa chawitir an ni.

Serchhip Sub-Hqrs. YMA chuan nimin khan Executive Committee \hutkhawm neiin tunhnaia Serchhip-a leimin avanga chhiatna tuar te chhawmdawlna atan Vehbur khawn nise an ti.

Tun thla ni 8-a Serchhip District chhunga Dan lova vawk laluttu manchhuah te chu Rs. 1000/- chawitira hrem an ni.

Nimin khan Serchhip-ah AH&Vety Department buatsaihin FOCUS Serchhip District hnuaia Community Animal Health Worker te tan an hnathawh dan tur chungchang zirhona neih a ni a, he zirhona hun hi District Bawrhsap, Sangchhin Chinzah chuan hmanpuiin FOCUS hmalakna chu kuthnathawktute tana thil \ha a nih thu a sawi.

 * SAROA te an lungawilo Serchhip Bazar-a lirthei dinna hmun \hen-khat siam danglam chu nimin a\ang khan hman \an a ni a, Serchhip Auto Rickshaw Owners Association te chuan an Stand thar tur chu an duhloh thu an sawi thung.

Yonex Sunrise All India Sub-Junior Ranking Tournament (Under-15 leh Under-17) chu Pathianni a\ang khan Manipur khawpui, Imphal-ah khelh \an niin tunkar Inrinni khian zawhfel a ni ang.

Nimin khan Serchhip-ah Confiend Pensioners Committee (CPC) din thar niin hruaitu tur pawh insiamrem nghal a ni.

Zirtawpni kalta zing dar 4:00 vela Mualkhang dai leimin in National Highway-54 kawngpui meter 200 vel zeta thui a hnawh chu laih tlang tumin PWD Highway Division-5 te chuan ngawrh takin hna an thawk chho mek a, a reilo berah chawlhkar thum (3) vel hun a la duh an rin thu thawktuten an sawi.

Inrinni kaltaa Tuipui 'D'-a chesuala tuitla nia rin, T. Rochuailova lawngleng chu nimin khan suar-ah kehchhe veka hmuh a ni a, amah tak hi he thu buatsaih lai hian hmuh ala ni lo.

Nimin tlai khan MSU General Hqrs. hruaitute chuan School Education Minister, Lalchhandama Ralte chu Office-ah hmuin Muster Roll Teacher lak tura Written Exam buatsaih tura ngenna ziakin an thlen.

Zoram Peoples’ Movement (ZPM) chuan tunhnaia Election Commission of India a\anga Party Registration an dawn thar chu nimin khan an lawm.

MNF President leh Chief Minister, Zoramthanga chuan Mizoram ramri buai chinfel tum dan (Strategy) mumal tak an nei tih sawiin, tuna lo puanzar chi a nih loh thu a sawi.

ZPM Leader, Lalduhoma chuan MPC chu tun dinhmun ah an zingah Party angin tel lo mah se an \hian\ha ah an ngaih thu leh a rem chinah thawkho zel turin ZPM hi an la inhawng reng tih a sawi a. ZPM MLA te chu eng Party mah zawm thei an nih loh thu a sawi bawk.

Tripura Relief Camp 6-a Bru awmte endik hna thawh hnihna chu Inrinni khan zawhfel a ni a, chhungkaw 4,263 chu Mizoram mi ngei an ni tih fiah a ni.

Tunhnaia Mizoram sawrkarin sum harsatna nasa tak a tawk ni awma sawi chu thu dik tawk lo a nih thu Mizoram sawrkar-a Finance Department hotute’n an sawi.

PRISM Party leh ZORO te chuan Inrinni khan Aizawl-a Sikul Pui kawt-ah ‘Self Determination Day’ an hmang a, PRISM President leh ZORO President ten thu an sawi.

India in zalenna a sual laia India sipai (Freedom Fighter), Darthawma, Lunglei Chanmari ami chu nimin zing khan boralin vuiliam nghal a ni.

ZPM |halai chuan School Education Minister, Lalchhandama Ralte chu zirlaite hmakhua ngaia bang ngam se an duh thu an sawi.

Central YMA Kumpuan Committee hnuaia Suppy Reduction Service (SRS) Batch 9-na ten ruihhlo an mankhawm chi hrang hrang Rs. 82,17,625/- hu a\anga cheng nuai 25.02 hu chu Inrinni zing khan Chief Minister, Zoramthanga’n Aizawl-a Central YMA Office, Tuikhuahtlang-ah a halral.

Mizoram People's Conference (MPC) chuan Zoram Peoples Movement (ZPM) nena an thawhhona a tawp tih Inrinni khan Aizawl Press Club-a thuthar thehdarhtu te hmaah an puang.

Serchhip Bazar-a Taxi, Auto Rickshaw leh Private Motor dahna siam thar te chu Vawiin a\ang hian hman \an a ni dawn a, Auto Rickshaw neitute chuan an Stand thar turah an lungawi loh thu SDPO hnenah an thlen thung.

Central K|P buatsaihin Inrinni khan Mizoram District Hqrs. hrang hrangah Inter-Branch K|P Quiz Competition 2019 Elimination Round neih a ni a, Serchhip-ah pawh K|P Branch 11 ten he intihsiakna hmasa hi an nei.

Serchhip Sub-Hqrs. YMA Anti-Drug Squad te chuan Serchhip-a Taxi, Auto Rickshaw leh Maxi Cab neitute chu ruihhlo dona kawnga thawhhona thuthlung an ziahpui.

Home Minister, Lalchamliana chuan nimin khan Tanhril-ah Central Women's Jail a hawng.

Tunhnaia din thar Serchhip Ar vulh Association hruaitute chuan nimin khan Serchhip DVO, Zarzokima hi a Office-ah kawmin Ser-chhip a Ar Vulhtute mamawh leh thil \ul hrang hrang an sawipui a, DVO hian  Ar vulhtute hi \ha taka lo dawngsawngin inkawmhona hun\ha tak an nei a. DVO hian Serchhip a Ar vulhtu te tan hmasawnna tur leh training te pawh nei tura rua-hmanna te pawh siam an tum thu a lo hrilh a ni. Serchhip-a Ar vulh lama tuimi leh Ar vulha eizawngte hian tun thla tir khan inhmuhkhawm neiin pawl thar hi an din a, Charman-ah C.Lalhmunliana, Vice Chairman-ah KL Hmingliana, Secretary-ah K. Lalruatkima, Asst. Secretary-ah T. Biakcham-liana, Treasurer-ah Lalremruati leh Fin. Secretary-ah T. Tlanghmingthangi te ruat an ni.

Serchhip District Anti-Tobacco Squad leh Legal Metrology Department te chuan nimin khan Serchhip-a Dawr \henkhat enfiahin Dawr pahnih a\angin Dan lova rampawn a\anga lakluh leh mipuite hnena zawrhchhuah Sikret an man a, heng an Sikret man te hi Cartoon 32 niin Cartoon khat-ah hian bawm 10 zel a awm a, a vaiin an Sikret man hi bawm 320 a ni a, Section 36 of Legal Metrology Act, 2009 leh Rule 6 of Legal Metrology (Packaged Commodities) Rules, 2011 hmanga manin Office lama inlan tura hriattir an ni. Heng ramdang a\anga lakluh Sikret te hian COTPA Dan an zawmloh bakah sawrkar ah dan anga Chhiah an pek \hin loh avangin man theih a ni.

Nimin khan Serchhip District chhunga Health Worker te tan Chhang khatna hman dan chung-chang zirhona Serchhip-ah neih a ni.

Tunhnaia Serchhip District chhunga ruahsur nasa avang khan Serchhip District-ah In luahlai leh sak mek chhe vek 5 awmin In dinglai \hiah ngai pahnih (2) a awm bawk.

MZP General Hqrs. chuan nimin khan Aizawl-ah 'Ramchhan Kawngzawh' neiin MZP President, L. Ramdinliana Renthlei chuan ramri chungchangah MZP te chuan nasa taka hma an lo lak tawh thu a sawi a. Kan Sawrkar hrawn tawh ten zirlaite hmalakna an bawhzui ngam lo \hin leh zirlaite thlavang an hauh ngam lo \hin chuan zirlaite rilru a ti na hle tih a sawi.

Serchhip Tarpi tlang chu humhalh tura enfiah mek a ni a, helai vela mimal in Inhmun leh a kaihhnawia hma an lo lakna te pawh titawp nghal tura hriattir an ni.

Khawlailung VC leh khawtlang \angrual chuan an khuaa H. Lalrintluanga chenna In tur an sak sak.

Social Rehabilitation Board chu nimin khan Chief Minister, Zoramthanga hova \hukhawmin Board hmalakna tur hrang hrang leh thawh tur hmanhmawh zual bik te an sawiho.

Mizoram sawrkar-in Board hrang hrang a din thar zing ami, Industrial Development Board chu nimin khan an Chairman, Dr. R. Lalthangliana, Commerce & Industries Minister hovin Secretariat Conference Hall, New Capital Complex-ah an \hukhawm.

Thubuai ziahluh-ah inrawk leh rukruk thubuai a tam Mizoram Police DIG (Northern Range) huamchhungah May, 2017 a\anga June, 2018 (thla 12 chhung) aiin May, 2018 a\anga June, 2019 (thla 12 chhung) in thubuai ziahluh 333 zetin a tlem zawk a. Thla kalta thla 12 chhung khan rukruk leh inruk thubuai ziahluh a tam thu leh mihring hmanga sumdawnna ah fimkhur a \ul thu sawilan a ni.

Serchhip District Anti-Tobacco Squad te chuan nimin khan New Serchhip huamchhunga sawrkar Pisa \henkhat te tlawhchhuakin puipunna hmun leh sawrkar Pisa-a meizuk khapna dan te bawhchhia an awm leh awmloh an dap a, heng sawrkar Pisa hrang hrang an tlawhna ah hian meizuk phallohna hmuna mei zu mi 2 manin Dan in a phut angin pawisa chawitir an ni.

Serchhip-a Excise & Narcotics Department te chuan niminpiah zing khan Serchhip-ah Burma Zu tia hriat, BEDC leh Beer \hahnem tak manin tlai lamah BEDC hi tam tham tak an man belh bawk.

Karleh Thawh\anni a\anga hman \an turin Serchhip Bazar-a lirthei dahna hmun \henkhat sik-sawi a ni a, Taxi leh Auto Rickshaw dinna \hin chu sawn a ni.

Nizan hmasa khan Sailulak khuaah YMA leh VDP ten Myanmar a\anga lakluh nia hriat, Methamphetamine \hahnem tak an man a, heng damdawi man leh a kengtute hi nimin khan Serchhip rawn thlenpui an ni.

Nimin khan Kolasib DC’s Conference Hall ah District Level Committee on Child Labour chu an Chairman, Zoengsanga DC kaihhruaina hnuaiah an \hukhawm.

Mizoram Calendar 2020-a hman turin Information & Public Relations chuan thlalak lama tui mi a duh apiang tan Mizoram lanna thlalak mawi leh hlutawm an lak te thehlut turin a sawm a.

Mizo Zirlai Pawl (MZP) chuan naktuk, July 19, 2019 chawhma dar 11:00 a\angin Aizawl-ah 'Ram Chhan Kawngzawh' an huaihawt dawn.

Zoram People’s Movement (ZPM) chu Election Commission of India chuan, Section 29A of the Representation of the People Act, 1951 tlawhchhanin July 2, 2019 khan Mizorama Regional Political Party pakhat atan a ziaklut ta.

Serchhip Sub-Hqrs. YMA in Rajya Sabha MP, Ronald Sapa Tlau hnena an lo thlen tawh \hin angin Ronald Sapa Tlau hian MP (LAD’s) Fund a\angin mitthi phurhna(Morgue Van) leina tur sum a rawn sanction fel ta a. He sum hmang hian Serchhip Sub-Hqrs. YMA hian Motor leiin an enkawl zui dawn a ni.

Serchhip-II VC leh Dinthar Branch YMA chuan tunhnaia leimin avanga an huamchhunga leimin leh In chhia senghawi hnatlang nimin khan an nei.

Serchhip District chhunga Police te tan ni thum (3) chhung awh tur Ruihhlo hmansual chung-chang leh Ruihhlo dona Dan chi hrang hrangte zirhona hun chu nimin khan Serchhip SP Conference Hall-ah neih \an a ni.

Sawrkar laipui in India rama zirna kalphung thar tura a duan, ‘New Education Policy-2019’ chungchang sawihona leh inrawnkhawmna, ‘District Level Consultation Meeting on Draft New Education Policy 2019’ chu nimin khan DIET Serchhip-ah neih a ni.

Serchhip District pumah  mi 64,937 an cheng Economic & Statistic Department hnuaia District Research Office, Serchhip in Serchhip District Statistical Handbook an buatsaih hmasak ber chu nimin khan Serchhip District Bawrhsap, Sangchhin Chinzah chuan a tlangzarh a. He lehkhabu-a tarlan a nih danin District pumah mi 64,937 chengin za zela 97.911 in ziak leh chhiar an thiam a ni.

Nimin khan Aizawl-a Health Directorate Conference Hall-ah Anti-Dengue Month hman a ni, he hun hi Mizoram sawrkar-a Health & Family Welfare Board Vice Chairman, Dr. ZR. Thiamsanga MLA chuan hmanpuiin kumin ah June thla thlengin Mizoram-ah Dengue vei mi 10 hmuhchhuah an nih tawh thu leh Dengue avanga thi erawh an awmloh thu tarlan a ni.

Kar hmasa a Fur ruahsur khan Mizoram District zawng zawngah mipui harsatna leh buaina thlenin tun thlenga Disaster Management & Rehabilitation Department-in report an dawn tawh dan chuan Mizoram chhung District 8-a thing-tlang khaw 205-in ruah sur leh a kaihhnawih thil dang vangin chhiat an tawk a. Heng khaw 205-a chhiat tawkte hi chhungkaw 1968 an ni a, mi 3 in nunna an chan a, midang 3 in hliam an tuar bawk a. In 1523 chhiain mi 4322 vel hmun him lamah suanchhuah an ni a, Relief Camp 66-ah mi 5070 an awm mek bawk.

Mizoram sawrkar in Technical Course zir tur thlanna a Chakma te Category-I a\anga paih tura a dilna a thehluh chu Supreme Court in a hnawl.

PRISM Party President, Vanlalruata chuan ramri buai chingfel tura sawrkar in hma a lak dan chu a chak tawklo hle tih sawiin, mipui chhan ngam sawrkar kan mamawh takzet niin a sawi.

MNF |halaite chuan Chief Minister, Zoramthanga’n MLA leh Minister te chu zalenna zau tak a pe tih an sawi.

Home Minister, Lalchamliana chuan lirthei intlanchhawk chu traffic jam tihreh nana damna famkim ‘permanent solution’ ni lo mah se tunah rih chuan kan thil tih theih, mitin tana \angkai leh \ha nia a lan thu a sawi.

Mizoram sawrkar chuan Mizoram-a College 7-ah Principal dah tharin Serchhip College-ah thawk turin Principal dah thar a ni bawk. Mizo-ram Public Service Commission (MPSC) chuan tunhnai khan Higher & Technical Department hnuaia College Principal turin mi 7 te lak thar turin rawtna a siam a, heng mite hi sawrkar chuan Appointment pein an thawhna tur a tifel a, Govt. Serchhip College-a thawk turin Dr. Harendra Sinha chu dah niin ani hi J. Buana College-a thawklai a ni. College Principal dah thar zingah hian Govt. Serchhip College-a thawklai Dr. C. Sangluaii chu Govt. Aizawl College-a Principal tura dah a ni bawk.

Nimin chhun khan Ramkinlova (44), New Serchhip Venglai chu Electric an siamna ah Electric current in manin damdawi In panpui a nih hnuah a boral.