Latest News

Dedicated Covid Health Centre hawn thar a ni

Mizoram Rural Bank (MRB) Head Office sak zawh hlim, Aizawl ami chu COVID-19 hri kaite enkawlna tur hmun, Dedicated Covid Health Centre (DCHC) atan ruahman niin nimin khan Medical Operational Team on COVID-19 Chairman, Dr. ZR. Thiamsanga chuan a hawng.

Dedicated Covid Health Centre (DCHC) hawnna hunah hian Dr. ZR. Thiamsanga chuan COVID-19 hri kai zinga a na zualte enkawlna, Zoram Medical College-a Dedicated Covid Hospital (DCH) chu damlo na zual an tam avangin engtiklai pawh hian a khat deuh reng tih sawiin, damlo na zual admit belh tur pawhin harsatna tawh chang a tam thin tih a sawi a. Hei vang hian sawrkar hotuten ngaihtuahna sengin ZMC-a damlo enkawl that lam pan tawh, mahse enkawl uluk deuh la ngai si te enkawlna tur an ruahman thu leh hemi atana MRB Head Office a lo awm remchang chu a lawmawm takzet tih a sawi a, hei hian ZMC a khum inchanlohna thui takin a chhawk zangkhai ngei dawn a ni, a ti a. ZMC-ah ICU telin khum 247 neih mek a nih thu leh tunah hian khum 60 awmna Ward pahnih peihfel tep tawh niin, Third Wave laka inpuahchahna atan naupang enkawlna tur bik, Pediatric ICU pawh ruahman a nih tawh thu a sawi.

He hunah hian Mizoram Rural Bank (MRB) Chairman, Vadde Jaya Chandra pawhin India ram-a Rural Bank 43 zinga Head Office mahni puala nei thei 5 zingah an tel ve ta tih sawiin, India hmarchhak ah phei chuan MRB chiah mahni puala Head Office nei thei an nih thu a sawi a. Head Office chu kum 6 chhunga sak a nih thu leh luah hlan an nghahhlelh thu sawiin, a hmunhma duhsak taka petu Mizoram sawrkarin hripui leng dona atan an mamawh tih an hriatin phal taka an remtih nghal thu a sawi a, Mizoram sawrkar leh mipuite tan an lo tangkai ve thei chu lawmawm an tih zawk thu leh an mamawh chhung hman an phal thu a sawi bawk. MRB Chairman chuan an hnena Bank Account neite zingah COVID-19 hri kai an awm chuan an inenkawlna senso rulhna tur COVID loan an ruahman thu sawiin, thla bi hlawh neite tan cheng nuai 5 thleng leh thlabi hlawh neilo te tan cheng nuai 3 thleng an pek theih tur thu a sawi bawk.

He huna tarlan a nih danin June 1, 2021 khan DCHC tihpuitlinna atan mawhphurtute an inruat a, DCHC thar hi khum 50 awm theihna tura ruahman niin a bultan nan Khum 10 dah phawt a ni a. Heta thawk tur Staff Nurse 24 lak fel tawh an ni a, Ward Superintendent 2 leh NHM Nurse 6 thawk turin tihfel an ni tawh bawk. Medical Attendant mi 20 lak tur zingah mi 17 lak fel an ni tawh bawk a, training pek fel vek tawh an ni a. DCHC thar hi ZMC-a COVID-19 hri kai enkawl, an dinhmun ziaawm deuh tawh, uluk taka vil zui la ngaite dahna tura ruahman niin, Oxygen leh Medical equipments tul dangte a thuam a ni.

Comments

Popular News (Last 30 Days)