Lenkawl

Mizoram Forest Service Association (MFSA) chuan kan ram-a thing leh Mau, luitui te renchem taka hmang chunga humhalh zel turin mipuite an sawm.

Tui Hna

Tui ti thianghlim turin ngen

Niminpiah-a Serchhip District-a Sample enfiah atangin COVID-19 hri kai mi 10 hmuh belh niin an vai hian tunhnaia State pawn atanga rawn lut an ni.

Tui harsatna sawihona nei

COVID-19 Medical Operational Team (MOT) chu nimin khan thukhawmin Mizoram-a COVID-19 hri inkaichhawnna chhutchah a la nih loh avangin May ni 3-a inkhuahkhirhna kallai a tawp hnuah a aia khauha ni 7 dang inkhuahkhirh an rawt a, Vawiin-a sawrkar thuneitu sang thutkhawma ngaihtuah turin an thlen ang.

Niminpiah khan Mizoram-ah Sample 3712 enfiah leh niin hri kai 139 hmuhchhuah leh an ni a, Mizoram-a COVID-19 hri kai hmuh tawh chu 5879 an tling tawh a ni.

Mizoram Governor, PS. Sreedharan Pillai chuan Baptist Church of Mizoram (BCM) hruaitute chu hrileng laka himna tura an hmalakna te chhunzawm zel turin a chah.

Health Minister Dr. R. Lalthangliana hovin nimin khan Lunglei DC Conference Hall-ah sawrkar mi pawimawh ten COVID-19 hri leng mek chungchang an sawiho a. He hunah hian Health Minister chuan COVID-19 hrilengin zual lam a pan zel avangin mipuite kan fimkhur lehzual a tul takzet ih a sawi.

Serchhip Sub-Hqrs. YMA hruaitute chuan nimin khan an Secretary, PC. Vanlalluna hovin kar kalta Nilaini atanga kangmei tuartu Thinglian leh Hmunzawl khua te an tlawh a, heng khua ten kangmei thelhna kawnga hma an lak dan te thlirin, khawtlang in a tul anga an hman turin buhfai leh Dal an hlan nghal bawk a ni.

Serchhip District chhung Thinglian leh Hmunzawl inkar ram kang avanga Thinglian ram kang chu nimin khan thelhmih a ni ta a, nimin khan IAF Helicopter chuan tui hmangin tum thum kang hi a thelh a, nimin chhun khan ruah sur bawkin kangmei hi thunun theih a ni ta tih Thinglian YMA hruaitute chuan an sawi a ni.

Serchhip District-a COVID-19 hri kai hmuhchhuah tawh zingah enkawllai mi 74 awm mekin an zinga 72 te chu Nursing School CCC-ah enkawl an ni.

Serchhip Bial Bye-election neih a Vote tla te chhiar tura ruat, Counting Supervisor leh Counting Assistant te chuan nimin khan Training neiin Vawiin-ah Micro-Observer tura ruat ten Training an nei ve leh ang.

COVID-19 hri leng hluar thar leh mek avanga mipui khawsak phung khuahkhirhna kengkawh turin nimin atang khan Serchhip-ah COVID-19 Executive Duty te VC Area hrang hrangah an Duty leh tan a, VC tam zawkah chuan VLTF duty hmuh tur an awm tawhlo thung.

Mizoram-a Vawk natna hri, African Swine Fever (ASF) lenna hmuna Vawk thi chu nimin thleng khan 1,473 a tling tawh.

Thenzawl DFO, Margareth Lalramchhani chuan kumin ah kangmei avanga ramngaw tam tak tihchhiat a nih avangin kumin ah tingtiak tam zawk phun turin hma an la dawn tih a sawi.

VLTF ten SOP an zirho

Niminpiah khan Mizoram-ah Sample 3305 enfiah niin heng atang hian COVID-19 hri kai mi 229 hmuhchhuah an ni a, Mizoram-a he hri kai hmuhchhuah a nih atanga ni khat-a hri kai hmuhchhuah an tam ber ni a nih bakah April, 2021 hi thla khat chhunga hri kai hmuhchhuah an tam ber thla a ni dawn ta bawk a ni.

Mizoram sawrkar-a Home Department chuan COVID-19 hri leng vanga inkhuahkhirhna kalpui mekah Lengpui Airport kaltlanga khualzin rawn lut te fimkhur zawka ILP pekchhuah an nih theih nana registration tihna mPASS Flight chu tlemin a siam danglam a nih thu an sawi.

Sawkar laipui chuan COVID-19 hri leng avanga harsatna tawkte tanpuinan buhfai a thlawna sem turin ruahmanna a siam a. He ruahmanna kalpui turin Mizoram pawh a inbuatsaih mek.

Nimin khan Health Minister, Dr. R. Lalthangliana hovin Aizawl Municipal Corporation (AMC) Councillor te leh Aizawl City Area Local Council hotuten COVID-19 laka Aizawl khawpui a him theihna tura hmalak ho dan tur hrang hrang an sawiho.

Mizoram-a rawn lut khunghran leh an ni dawn

Disaster Management and Rehabilitation (DM&R) Department hotute chu nimin khan an Minister, Lalchamliana hova thukhawmin National Disaster Management Authority (NDMA)-a Mitigation Project thehluh tawh te chungchang an thlirho.

Niminpiah khan Mizoram-ah Sample 3488 zet enfiah leh niin COVID-19 hri kai mi 103 zet hmuhchhuah leh an ni a, Mizoram-a hri kai hmuhchhuah hi 5513 zet an tling tawh a ni.

Assam leh West Bengal inthlana Mizoram atanga venhim hna thawka duty Mizoram Police lo haw zingah COVID-19 hri kai an awm nual a, hriat theih chinah mi 108 in hri an kai tih hmuhchhuah a ni.

Industrial Growth Centre, Luangmual-a Zoram Oxygen chuan Medical Oxygen supply chungchangah tun thlengin Mizoram-ah harsatna ala awmloh thu an sawi.

Kum 18-44 inkarte tana Covid-19 hri danna (vaccine) pek tur chungchangah Mizoram-a hri danna dawng thei turte a thlawna pek tur a nih leh nih loh hriat theih a la ni lo.

Serchhip Bial Assembly bye-election neih zawh taka Service Voters te Vote thlak chuan Serchhip DC Office a rawn thleng mek a, nimin thleng khan Postal Ballot 41 te chuan Serchhip DC Office hi a rawn thleng tawh a ni. Serchhip Assembly Bial-ah hian Service Voters 198 awmin heng mite hian Vote an thlak theuh theihna turin Postal Ballot hi thawnchhuah a ni a, heng atanga Vote chhiar hmaa rawn thleng chin chu pawm tur a ni dawn a ni.

Serchhip District chhunga ramkang tam zawk chu thelh mih ni tawh mahse nimin tlai thleng khan Thinglian leh Hmunzawl inkar-a ramkang chu thelhmih theih ala ni lo thung.

Serchhip District-a COVID-19 hri kai hmuh-chhuah tawh chu mi 200 an tling ta a, nimin khan hri kai mi 64 zet hmuh belh leh niin heng te hi State pawn atanga rawn lut an ni.

Serchhip Bial Assembly bye-election a vote tla te chu tun Pathianni lo awm tur, May 2, 2021 zing dar 8:00 atangin chhiar a ni dawn a, inbuatsaihna pawh peihfel thawhkhat a ni tawh a, Vote tla chhiar tura ruat te pawhin Vawiin atang hian Training an nei tan dawn a ni.

Pathianni khan Mizoram-ah Sample enfiah tlem deuhin COVID-19 hri kai hmuhchhuah pawh an tlahniam hret a, amaherawh chu Sample enfiah atanga za zela 5.22 te chuan hri an kai a ni.

Tunhnaia Serchhip dai vel-a ram kang hrang hrangte chu nizan hmasa khan thelhmih kim a nih hnuah nimin khan Thenzawl leh Serchhip inkar chu nasa takin a kang leh a, kangmei hi Serchhip leh Thenzawl inkar, Zehtet leh Thuhruk inkar mawnglam atanga intan nia hriat niin Mat lui hnaih Leilet bial ko samfaina hal atanga intan nia hriat a ni a, kangmei hian kawngpui a kan hman avang leh kawngchung lam hi a awih deuh avangin duh anga thelh theih a ni lova, he thu buat-saih lai thleng hian kangmei hi thelh mek ala ni. Nimin-a kangthelhtute hi Thenzawl DFO, Margareth Lalramchhani chuan a hmunah awm a awm chilh a, hei bakah hian Forest Department hian Thinglian leh Hmunzawl inkar ram kang chu a hmunah enfiah tur nimin vek khan in tir nghalin kangthelhtute mamawh thil chi hrang hrang an pe nghal bawk a ni.

Nimin khan Serchhip District-a COVID-19 hri kai hmuhchhuah mi pathum te chu hri lakah fihlimin anmahni enkawlna hmun atanga chhuahtir an ni.

Niminpiah April 25, 2021 khan khawvel pumah ‘World Malaria Day’ hman niin he Ni hi Pathianni a nih avangin Mizoram-ah chuan nimin khan a remchan anga hun hman a ni.

PM in Mizoram CM rawn bia

Tunhnaia Lunglei khawpui hnuaia kangmei chhuak rapthlak tak chu zaa 90 aia tam thelh a ni tawh.

Inrinni kalta thleng khan Mizoram chuan COVID-19 vaccine dose 2,99,870 a dawng tawh.

Congress Thalai, Mizoram Pradesh Youth Congress Committee (MPYCC) chuan Mizoram sawrkar in kawlphetha chhit man ba a rulh loh chuan Eng rawn pek chhunzawm loh ah an vau mek niin an sawi.

COVID-19 hri leng avanga inkhuahkhirhna kalpui mek chungchang chu nimin khan Health Minister, Dr. R. Lalthangliana hovin sawrkar mi pawimawh ten an thlirho.

Mizoram Governor PS. Sreedharan Pillai leh Mizoram Presbyterian Kohhran hruaitute chu nimin chawhma lam khan COVID-19 hrileng dona chungchang sawihoin Aizawl-a Raj Bhavan-ah an in kawm.

Mizoram Governor, PS. Sreedharan Pillai chuan nimin khan Central YMA hruaitute chu Raj Bhavan-ah kawmin Covid-19 hrileng dona kawnga YMA leh tlawmngai pawl dang te hmalakna bakah thil pawimawh dang te sawiho a. Governor hian nimin vek khan Presbyterian Kohhran hruaitute chu a kawm bawk a ni.

Tunhnaia Serchhip leh Keitum inkar Dawng-zawl leh a chhehvel ram kang te, Chanmari Veng chhuahlam ram kang leh Chhiahtlang lama ramkang te chu nizan thleng khan mi tlawm-ngai ten an la thelh a, tunhnaia Serchhip Kawlri lama ramkang pawh nimin khan rawn kang thar lehin mi tlawmngai ten an thelh nghal a ni.

Inrinni zing dar 5:00 vel khan Serchhip leh Thenzawl inkar-ah Wagon R Car pakhat chu chesualin vanneihthlak takin mihring nunna chan an awmlo.

Serchhip District-a COVID-19 hri kai hmuh mi pali te chu nimin khan hri lakah fihlimin anmahni enkawlna atanga chhuahtir an ni.

Inrinni thleng khan Mizoram-ah mi 1,66,417 te hnenah COVID-19 Vaccine Dose 1-na pek a ni tawh a, an zinga mi 41,313 te chu Dose 2-na pek an ni tawh bawk.

Kangmei vangin harsatna

Mizoram sawrkar-a Minister pawh lo ni tawh, PC. Zoram Sangliana chu Inrinni khan a boral a, nimin khan vuiliam a ni.

Inrinni khan Mizoram-ah Sample 2300 enfiah leh niin heng atang hian hri kai 105 hmuhchhuah leh an ni a, kumin a nikhat-a hri kai hmuh an tam ber tum nia hriat a ni.

Inrinni kalta, April 24, 2021 kha ‘National Panchayati Raj Day’ a ni a, Mizoram atangin Village Council pali (4) te chuan National Panchayat Award an dawng a ni.

Lunglei DC Office Staff te hnathawh chak zawk leh langtlang taka kalpui anih theihnan leh District mipuite nena thawhhona tha tak a awm chhunzawm zel theihnana ruahman, Corruption Risk Assessment (CRA) chu Zirtawpni khan Lunglei DC Office-ah kalpui tan a ni.

Mizoram-ah hri leng a hluar avanga inkhuahkhirhna khauh zawk kalpui mek chu May 3, 2021 zing dar 4:00 thleng kalpui chhunzawm tura tih a ni a, inkaihhruaina thenkhat pawh tih danglam hret a ni.

Excise & Narcotics Department hotute chuan Myanmar-a sipaiin mipui rorelna paihthlaa thuneihna an chan leh atangin Mizoram-ah ruihhlo tawlh ruk a tam phah nia an hriat thu sawiin, kumin ah damdawi hmansual avangin Mizoram-ah mi 24 an thi tawh niin  an sawi bawk.

COVID-19 chi thar la hmu lo

Presbyterian Kohhran in naktuk Pathianni hmanga Pastor Bial Inkhawmpui neih tura an lo rel tawh chu COVID-19 hri hluar leh meka sawrkar in inkaihhruaina a siam ah Sakhaw biakna te hawn a remchan rih tak loh avangin May 21-23, 2021 chhunga neih tura tih a ni ta zawk a, hemi hun a hmang theilo an awm anih chuan Inkhawmpui neih dan tur chu sawrkar SOP ruahman angin Bial Standing Committee relfel tura dah a ni bawk.

 Presbyterian Serchhip Chhim Veng Kohhran te chuan nimin khan Serchhip Sub-Hqrs. YMA Anti-Drug Squad (SADS) te hnenah ruihhlo dona kawnga a tul anga hman turin Rs. 2000/- an hlan.

Tunhnaia Vawk hri leng mek avangin Ser-chhip District-a hri lenna hmunah Vawk thi a awm belh lo tih Serchhip DVO, Dr. R. Lalmakthanga chuan sawiin, Vawk thi hi 9 a ni mek a, amaherawh chu Vanchengte khua ah Vawk thi pakhat erawh a awm thu sawiin, hemi enfiah tur hian Serchhip atangin Veterinary Officer, Dr. H. Vanlalrawna chu kalin hei hi hri leng kaihhnawih a thi a nih erawh a rinawm loh tih a sawi bawk. Hetihlai hian nimin thleng khan Mizoram a ASF lenna hmuna Vawk thi chu 1193 an tling tawh a, nimin bik khan Vawk thi 29 awm belh lehin Lungsen-ah 11 zet a thih belh leh a, Lung-lei Electric Veng-ah 10 a thi bawk a ni.

Serchhip District-a COVID-19 hri kai enkawllai mi pakhat chu nimin khan enkawl dam niin Serchhip District-ah hri kai enkawllai 14 an awm mek.

Serchhip District Bawrhsap leh Superintendent of Police te chuan nimin khan sawrkar mi pawimawh dangte nen Serchhip-a hri leng laka mipui himna tura kaihhruaina siam bawhzui a nih dan an enfiah.

Serchhip IOC Veng-a PHE Booster Pump chawmtu Electric Transformer chhia thlakna tur Transformer thar chu nizan hmasa khan Serchhip rawn phurh thlen niin nimin khan bun nghal a ni a, nimin tlai khan dan pangngaia Tui pump chhunzawm nghal a ni.

Niminpiah khan Mizoram-ah Sample 3200 enfiah niin hri kai mi 62 hmuhchhuah an ni a, a hma ni aiin hri kai hmuhchhuah zat an tlahniam leh hret a ni.

ZPM Thalaite chuan African Swine Fever avanga Vawk thi te leh Sailulak leh Leng khua a Chinghnia in a sehhlum Sial thi te sawrkar in ngaihven se an duh thu an sawi.

Chief Secretary Lalnunmawia Chuaungo chuan Northeast Frontier Railways (NFR) in Bairabi leh Sairang inkara KM 51.38-a thui Rel kawngin a siam mek chu nimin khan a tlawh a, Bairabi - Sairang Railway Project hi December 2023-ah zawh hman tum niin Sairang Rel Station atang hian Rel 10 vel tal lutchhuak tura beisei a ni.

Nimin khan Serchhip District-ah Sample 94 enfiah niin hri kai mi pahnih hmuh belh leh an ni.

Serchhip bial Assembly bye-election neih a Service Voters 198 ten Vote an thlak theihna tura Postal Ballot thawnchhuah ah nimin tlai dar 3:00 thleng khan 27 chuan DC Office a thleng tawh.

PHE Serchhip WATSAN Division-a Sr. Executive Engineer, Er. F. Lalsanglura chuan hun engemaw chhung hi IOC Veng atanga chhim lam-ah tui sem a khaihlak dawn tih sawiin, mipuite chu tui renchem turin a chah.

Serchhip Kawnpui VLTF te chuan Serchhip Bazar Area-a dawr te chu Vawiin chhun dar 12:00 atang hian hawn an remti dawn lo tih an sawi a, hemi chungchanga kan zawhna chhangin Serchhip Kawnpui VLTF hruaitute chuan mipui nitin mamawh zawrhna dawr te chu khar a ni dawnlo tih sawiin, dawr dang erawh dawr duh an awm a nih chuan a dawrtu tur ten an Veng zel-a VLTF te atanga lehkha lain hawn phalsak an ni dawn tih an sawi a, hei hian inkhuahkhirhna kal mek chhung a awh dawn tih an sawi bawk. Hei bakah hian Serchhip Kawnpui VL-TF te chuan an huamchhunga Dawr bungraw unload tur te chuan tlai dar 5:00 atanga zan dar 8:30 chhunga unload tur a nih thu an sawi a, Thlai, chawhmeh leh sa zuar te pawh an area ami an nih chuan inzawrh phal a nih thu an sawi bawk.

COVID-19 hri darh zel tur laka mipuite himna tura kaihhruaina siam mipui ten tha taka an zawm theihna turin hmalak mek zel a ni.

Nimin April 22 khan khawvel pumah ‘Earth Day, 2021’ hman a ni a, Serchhip District chhungah pawh DFO Thenzawl hmalakna in he ni pual hian Forest Range hrang hrangah hun hman a ni.

Tunhnaia thenawm ram Myanmar atanga Serchhip District chhunga raltlan rawn lut chu mi 70 chuang an ni tawh nia chhinchhiah a ni a, a tlangpuiin heng raltlan te hi mahni chhungte bel-a rawn kal niin a then chuan hmundang an pan leh tawh a ni.

Aizawl tuilakna ah Tui chim chin a hniam zel

Niminpiah khan Mizoram-ah Sample 2259   enfiah niin COVID-19 hri kai mi 73 hmuhchhuah leh an ni a, a hma ni aiin hri kai hmuh hi an tlem hret a ni.

Nimin khan Health Minister, Dr. R. Lalthangliana hovin COVID-19 hri vei lo pung leh hluai chungchangah hri kai leh inkhunghranna hmun, Community Quarantine Centre/Covid Care Centre ngaihtuah belh chungchang sawihona neih a ni a. Inkhawmna leh zirna In te chu hri kai enkawlna atana hman theih nise an duh tih an sawi.

Niminpiah leh nimin a Serchhip District-a Sample enfiah atangin COVID-19 hri kai mi 3 hmuh leh niin Serchhip District-a hri kai mi pahnih te chu ZMC lama enkawl tura thawn an ni thung.

Nimin khan Serchhip District-ah COVID-19 hri danna pek chhunzawm leh niin Frontline Worker mi 266 te hnenah Dose 2-na pek leh a ni.

Mizo thalai tam zawk Assam Rifles-a an luh theihna tura Serchhip-a awm 8th Assam Rifles ten Pre-Recruitment Training an buatsaih chu nizan hmasa khan a kharna neih a ni a, Pre-Recruitment Training hi kumin January 20 atangin neih tan niin kumin May thla a Sipai la runpui neih turah Serchhip thalai te Sipai an tan theihna tura hmalakna kawng khat niin mipa 49 leh hmeichhia 31 ten an hming an pelut a, amaherawh chu he Sipai lakna neih tur hi hri leng avanga sawn hlat a nih tak avangin training pawh hi a hun hmain khar a ni ta a ni. Nizan hmasa a Pre-Recruitment Training kharna hun hi Assam Rifles Commandant, Col. J. Mutum SM chuan a hmanpui a ni.

PHE Department in Serchhip khawpui, Bazar lam area chawmna atana IOC Veng-a Booster Pump an dah a Electric Transformer-ah harsatna a awm avangin Booster Pump atanga Electric khawl hmanga Tui an pump-na ah harsatna a thleng mek a, tunah hian PHE Department hotute nen siam-that hna thawh mek niin siamthat hun tur erawh sawilawk theih a ni lo thung. Hemi hmalam hian helai hmuna Diesel Engine hmanga Tui an pump-na chu alo chhe tawh bawk a, mipuite chu Tui renchem tura ngen an ni bawk.

Mizoram sawrkar in COVID-19 hri hluar mek vanga mipui kaihhruaina thar a tihchhuah chuan Serchhip-ah pawh zawm a hlawh tha tan viau a, nimin lamah mipui vakchhuak an tlemin sumdawnna hmun tam tak khar a ni bawk.

SVEEP Quiz Competition

COVID-19 hrileng kara mipui him zawkna turin leh awlsam zawk nan Mizoram sawrkar chuan mipuite'n mahni In lum atanga awlsam taka Doctor an râwn theih nan e-Sanjeevani OPD Telemedicine a chhawpchhuak a. Mobile Phone/Laptop/Personal Computer hmangin April 21, 2021 (Nilaini) atang hian nitin dar 2:00 pm - 4:00 pm chhungin, Inrinni leh Pathianni tiam lovin Medicine, Surgery, Obs & Gynae, Paediatrics leh Oncology OPD hawngin rawn theih an ni.

Niminpiah khan Mizoram-ah Sample 2605 enfiah leh niin COVID-19 hri kai mi 90 hmuh leh an ni a, Mizoram-a hri kai enkawllai chu mi 500 aiin an tam leh tawh.

Chief Minister, Zoramthanga chuan COVID hripui avanga nunna chan an awm chu pawi an ti takzet tih a sawi.

Vawk pul hri, African Swine Fever (ASF) avangin State chhungah Vawk 1119 a thi tawh niin AH&Vety Department chuan a chhinchhiah a, Report-in a tarlan danin African Swine Fever lenna huamchhung ni lo ah a thih chhan hriat loh Vawk thi an awm a, heng Vawk thi te hi khaw hrang hranga mi niin Chawngte-ah 72, Durtlang-ah 10 leh Serchhip-ah 5, a vaiin 87 a ni.

ZNP Party in an party atanga an hnawhchhuah tih an sawi an Party Vice President, H. Lalrinmawia chuan an Party Treasurer leh midang pathum te chu tun thla ni 19 khan an Party atanga hnawhchhuah an rel thu a sawi.

School Education Minister, Lalchhandama Ralte chuan hri leng avangin Academic Session thar tan hun tur hriat theih ala nih loh thu a sawi.

COVID-19 hri kai enkawl kawngah harsatna nasa lutuk an la tawk lo tih sawrkar thu-puangtu, Dr. Pachuau Lalmalsawma chuan a sawi.

Tunhnaia Mizoram chhungah COVID-19 hri kai pung nasa chuan COVID-19 hri danna (vaccine) lak duha inchuhna thlengin hri danna sem chhuaktute lu a ti hai hle nia thudawn a ni a, sawrkar laipui in ruahmanna a siam angin thla thar May thla atangin kum 18 chunglam te hnenah hri danna hi hi pekchhuah tum a ni.

ASF Epicentre-ah puang

Niminpiah khan Mizoram-ah Sample 2038 enfiah niin COVID-19 hri kai mi mi 91 zet hmuhchhuah an ni a, kumin chhunga ni khat-a hri kai hmuhchhuah an tam ber ni a ni.

Nimin khan Supply Department Director, Ramdinliani hovin Mamit District chhunga ‘Fortified Rice Scheme’ kalpui dan tur sawihona neih a ni.

Serlui bialtu MLA, Lalrinsanga Ralte chuan nimin khan Vairengte-a Screening Point chu tlawhin COVID-19 thawh hnihna lo thleng leh-a Vairengte Screening Point-a duty te mamawh leh inbuatsaih dan te a enpui.

Mizoram chhungah COVID-19 kai thar nasa taka an pun leh tak avangin nimin zing dar 4:00 atanga tun thla ni 26 (karleh Thawhtanni) zing dar 4:00 thleng atan mipui punkhawm leh chetvel chungchangah inkaihhruaina thar siam a ni a, AMC Area leh District khawpui-ah te chuan mahni In leh Compound te chhuahsan khap a ni.

Serchhip District Bawrhsap leh District Level Task Force on COVID-19 Chairman, Kumar Abhishek chuan Serchhip District-a VLTF te hnenah lehkha thawnin COVID-19 dona kawnga an inpekna ropui tak avangin lawmthu a hrilh a. Mizoram-ah COVID-19 lo hluar lehin Serchhip District-ah ngei pawh hri vei an awm leh tak avangin khawtlang, VLTF leh sawrkar in tang-ruala hri do beihpui an thlak leh a ngai dawn tih a tarlang a. Mizoram sawrkar in ruahmanna a siam hrang hrangte mipuite himna tura an Veng leh khua-a lo kalpui turin a sawm bawk.

Mizoram sawrkar in COVID-19 hri leng vanga mipui kaihhruaina thar, nimin zing dar 4:00 atanga hman tur a tihchhuah chuan nimin lamah Serchhip mipui zawm a hlawh lutuk lo niin a lang a. ‘Tumahin mahni In leh compound an chhuahsan tur a ni lo tih’ a nih laiin phalna nei zinga tarlan ni lo khawlai-a chhuak an tam viau a, Bazar leh hmun lunlai-ah te pawh hmai tuamna hmang lova chhuak hmuh tur an awm nual tho a ni. Inkaihhruaina thar ah ‘Hmunkhata mipui pungkhawm tur ven nan Bazarpui-a thlai leh thildang zawrh chu khap a ni’ tih a ni chungin Serchhip Bazar-ah erawh dan pangngaiin thlai leh chawhmeh dang te zawrh chhunzawm a ni bawk.

Niminpiah-a Chhingchhip-a Sample enfiah atangin COVID-19 hri kai mi pathum hmuh an ni a, Serchhip District-ah COVID-19 hri kai enkawllai mi 13 an awm mek a ni.

Mizoram sawrkar in COVID-19 hri leng avanga inkhuahkhirhna dan thar a siam bawhzui dan tur chungchangah nimin tlai khan Serchhip khaw chhunga VC hrang hrang aiawhte leh District thuneitute chu an thukhawm.

Nimin khan Serchhip-ah Rapid Antigen Test hmangin Sample 56 enfiah niin hri kai an awm lova, TrueNat Laboratory-a Sample 5 enfiah te atangin hri kai hmuh an awmlo bawk.

Pathianni khan Mizoram-ah Sample 607 enfiah niin COVID-19 hri kai mi 45 zet hmuhchhuah an ni.

Work Plan & Budget sawiho

Lok Sabha Speaker, Om Birla chuan nimin tlai khan India rama State leh Union Territory zawng zawnga Legislative Assembly leh Legislative Council Speaker leh Chairman te chu Video Conference kaltlangin Meeting a neihpui.

Mizoram State Cooperative Service Association chuan Cooperation Minister, C. Lalrinsanga chu MSCS a enkawl danah an lungawizia leh a laka an lawmzia lantir nan nimin khan thilpek an hlan.

Mizoram Milk Producers’ Cooperative Union (MULCO) chuan COVID-19 hripui leng vangin an bawnghnute siamchhuah an hralh tlem a, kum 2020-21 khan bawnghnute litre 17,20,763 lakhawm in litre 14,88,061 an hralh.

Serchhip District AH & Vety Officer, Dr. R. Lalmakthanga chuan African Swine Fever (ASF) chu enkawlna mumal ala awm loh avangin Department lama mithiam ten tih tur an tih te zawm hram hram turin mipuite a ngen.

Mizoram Badminton Association (MBA) buatsaih, MBA Official & Inter District Team Championship 2021 khelh zawh takah Serchhip District Badminton Association atanga kal te chuan Medal 15 an la. MBA Official & Inter District Team Championship 2021 hi April 12-17 chhung khan Aizawl-ah khelh niin Team inelna Category 9 leh Open inelna Category 16-ah te inelna neih a ni a. Serchhip District Badminton Association atanga kal te hi Team inelna Category 5-ah leh Open inelna Category 13-ah telin Gold 5, Silver 4 leh Bronze 6 an la a, Serchhip atanga kal te Medal lak hi Junor Level-ah a ni tlangpui a ni.

Serchhip Joint VC te hmalakna in Serchhip Damdawi In OPD-a inentir turte tan hulhliap zar hna thawh a ni.

Serchhip District Task Force Committee on COVID-19 chu nimin khan an Chairman Serchhip District Bawrhsap, Kumar Abhishek hova thukhawmin COVID-19 invenna tura sawrkar ruahman hrang hrangte tha taka kalpui a nih theih nana thil tul hrang hrangte an rel.

Tunhnaia Serchhip District chhung Keitum khua a Vawk thi te Sample enfiah atangin Vawk hri hlauhawm, African Swine Fever (ASF) kai hmuhchhuah an awm.

Zirtawpni khan Serchhip District-ah COVID-19 hri kai mi 3 hmuh niin Inrinni khan hri pakhat hmuhchhuah a ni bawk.