Champhai-ah School kal theih dan tur rel

Nimin khan Champhai-ah District Bawrhsap hovin sawrkar sikul zirlai inziaklut awm zat leh Schooll kal theih dan tur chungchang sawiho a ni.

District Disaster Management Authority (DDMA) ruahmanna ah he sawihona Champhai DC Conference Hall-a neih ah hian Champhai District Bawrhsap, Maria CT. Zuali chuan hri leng avanga hun rei tak School khar a nih tawh thu sawiin, School leh a chhehvelte uluk taka vawnhim a tul thu leh sawrkar School te zirlai tam zawk hip thei tura tanlak a tul thu a sawi a. Zirtirtute chu School naupangte hmasawnna tur ngaihtuah chung zela theihtawp chhuah turin a chah a, hun tawn dan ang zela inherdanglam thiam a tul thu a sawi bawk.

Hei bakah hian Bawrhsap chuan Hrileng laka him theih nan Champhai District lut chhuakte uluk taka vil reng a nih thu leh, inkhuah-khirh that avangin tundinhmunah hrileng a ziaawm rih thu a sawi a. Sawrkar hnathawkten sawrkar rawih an nih anga mawhphurhna leh tih tur bitukte tha taka an hlen a ngaih thu pawh a sawi bawk.

DDMA Champhai thukhawm chuan COVID-19 hrileng vanga Online Class kalpui thin chu District chhung khaw thenkhatah inbiakpawhna Internet a awmloh/mumal loh avang leh, Smartphone neih remchan loh avanga harsatna awm thinte ngun taka a ngaihtuah hnuah, Champhai khawpui pawn, hrileng laka fihlim leh him ah te Covid-19 laka him tlanna tur inkaihhruaina sawrkarin a duante zawm chung zela sikul kal a nih theih dan tur ruahman tha an ti a. Champhai khawpui School te erawh hrileng awm dan te thlir chungin huapzau zawka inrawnkhawmna neih nise tih a ni bawk. School Education Department Champhai hotute chu School hrang hrangte zirlai neih dan, zirtirtu awm dante mumal taka zirchianga COVID-19 inkaihhruaina bawhchhe lova School hawn a nih theih nana ruahmanna mumal tak siama DC Office-a thehlut tura tih an ni.

School Education Department report danin June 23, 2021 thleng khan Champhai District chhunga Sawrkar enkawl Primary School 76-ah zirlai 4,083, Middle School 69-ah 3,586, High School 42-ah 2,080 leh Higher Secondary School 2-ah zirlai 743 te an awm a. A thlawna zirlaibu sem tur ngai zat za zela 60 (60%) dawn a nih tawh thu leh tun thla chhungin dawn kim theih beisei a nih thu te tarlan a ni bawk.

He hunah hian hri leng meka Champhai District dinhmun pawh thlirho niin tun dinhmunah hri kaite chu State pawn atanga lokal khunghran te an nih tlangpui tih tarlan niin tun ang zela fimkhur taka kal a nih chuan sawkar in inkaihhruaina a duante zawm chungin District hmun thenkhat, Champhai khawpui pawn Covid-19 hri laka fihlim khuaah inkhuahkhirhna kengkawh chunga School hawn a him thute pawh sawiho a ni.