Lenkawl

 

May thla Pathianni vawi hnihna-a hman thin Nu te ni, Mothers’ Day chu nimin khan khawvel hmun hrang hrangah hman a ni a, Nu te hriatrengna leh chawimawina hun atan hman a ni. Mother’s Day hi Salvation Army India Eastern Territory-ah chuan chawhma inkhawmah an hmang thin a, Naupang leh thalai ten an nu te hnenah pangpar leh thilpek hlanin he ni pual hian thuchah ngaihthlak a ni bawk. Kum 1936 July - August thlaa chhuak ‘Sipai Tlangau’ a Darnghaka, YPSM, Thiltlang Corps-in a ziah atanga a lan danin, kum 1936 vel atang khan Mizoram-ah hian Nu te ni hi hman a lo ni tawh a ni.

Nikum September 19-a Serchhip District Court-a Additional District & Sessions Judge Circuit Court hawn a nih hnuah a tum khatna atan tun thla ni 7 leh 8 khan Serchhip hmuhah Judge rawn thuin thubuai ngaihtuah a ni.

Nikum 2025 chhung khan Mizoram-ah mitthi 8,080 an awm nia chhinchhiah a ni a, heng zinga 5,183 te chu mipa niin hei hi mitthi zawng zawng atanga chhutin za zela 64.14 (64.14%) a tling a. Hetihlai hian nikum chhung vek khan Mizoram-ah naupiang 21,873 an awm bawk.

Sawrkar kum kalta nikum April 2025 atanga kumin March 2026 inkar chhung khan Mizoram sawrkarin naupang leh tleirawlte harsatna chingfel tura a ruat, Child Welfare Committee (CWC) chuan case 1321 leh Juvenile Justice Board (JJB) in case 261 an chingfel.

Mizoram Tourism Service Association (MTSA) leh Tourism Staff Welfare Association (TSWA) chuan sawrkar in April 30, 2026-a pension-a chhuak R. Lalrodingi a ruai (re-employ) nawn chu lawmawm an tih thu an sawi.

Lunglei District Jail-a tang te chhuah tura document lem siamtu Jeremia Lalthangtura chu Police ten thu an zawhfiah hnuah District Jail Lunglei-a a nghet lova Ambulance driver hna thawk mek C.Laltlanhlua (31) , Republic Vengthlang, Aizawl chu a inhnamhnawih ve ngei nia hriat niin tun thla ni 7 khan District Jail-ah hian dahluh an ni.

ZPM Thalaite chuan NH-06 Sairang leh Kawnpui inkar kawng siam chu Inrinni khan a hmunah enfiah lehin Furpui hmachhawn zo tura NHIDCL leh ZPM Sawrkar hmalakna ah an lawm tih an sawi.

School Education Minister Dr. Vanlalthlana chuan tunhnaia Board Exam result an tihchhuah dan chu thil thar a ni lo tih sawiin, danglamna an siam kawngah dawih taka ke pen an tum lo tih a sawi.

Sawrkar kum liamta 2025-26 chhung khan Mizoram-ah khualzin mi 9,80,618 chhinchhiah an ni a; heng zinga mi 9,66,060 chu India mi niin, rampawn mi (foreigner) 14,558 an awm a, hriat theih chinah kum 17 chhunga Mizoram a khualzin rawn lut an tam ber kum a ni.

Central YMA chuan ruihhlo dona kawnga hma an lakna kal mekah Inrinni zing khan Aizawl khawpui chhunga Veng pasarih  - Zemabawk, Thuampui, Bawngkawn, Ramhlun North, Chanmari, Zarkawt leh Electric Veng-a hmun lun laiah Street Campaign hi an buatsaih a;  Central YMA hruaituten hmanpuiin Branch YMA hruaitute leh CEC Member ten an tawiawm a, tunkar Inrinni hianhmun 8-ah neih leh a ni ang. Central YMA hnuaia ruihhlo do pawl, Central Anti-Drugs Squad chuan tun thla (May) ni 1 atanga Zrtawpni thleng khan ruihhlo chi hrang hrang - Heroin hàwng 8, Tictac bûr 185, Chhin sen 2, Ganja gram 8 leh Zu ûm 24 an man tawh a; hemi kaihhnawihah hian mi 42 manin Excise & Narcotics Department hnenah mi 2 an hlan a, midang 40 hi Counselling Class an neihpui bawk.

Chief Minister Lalduhoma chuan Inrinni zing khan Lunglei Municipal Council (LMC) Office tlawhin LMC Chairman Lalzuithanga leh a thawhpui Councillor zawng zawngte bakah Official ten an lo dawngsawng a. Chief Minister hnenah hian LMC Chairam Lalzuithanga chuan LMC hmalakna kawng hrang hrang leh Lunglei khawpui hmasawnna tura mamawh hrang hrang awm te a lo thlen a, Chief Minister chuan an mamawh thlente chu theihtawpa ngaihtuah pui a tum tih a sawi a ni. He hunah hian Chief Minister hi Health Minister Lalrinpuii leh MLA Clement Lalhmingthanga, V. Malsawmtluanga, T. Lalhlimpuia leh Lalramliana (Papuia) ten an tawiawm a. Hemi hnu hian Chief Minister hian Aizawl a pan leh nghal a ni.

Doordarshan Kendra (DDK) Aizawl Director (News) Nampibou Marinmai chuan Inrinni khan Ngopa-a Assam Riffle Camp tlawhin an Commander Sub. SK. Singh a kawm a, an hmalakna te leh ramri venhimna kawnga hma an lakna te an sawidun nghal bawk.

Lawngtlai atanga Myanmar-a bungrua dah tura kal Tipper (MZ-07/A-1792) chu nimin zing khan Serkawr leh Kawlchaw inkarah chesualin kawngthlang ah a tlanliam a, he Motor khalhtu Laltlanhlua (24) leh 2nd Driver C. Zomuanpuia (37), Lawngtlai-a khawsa te chu a boral.

Lunglei Thuamluaia Mual-a 2 Mizo Battalion National Cadet Corps (NCC) buatsaih ‘NCC Fest & Parasailing Camp’neih mek chu Inrinni khan Health Minister Lalrinpuii chuan khuallian niin a hmanpui a, he hunah hian NCC Alumni te, NCC leh thalaite tana thawh hlawk tak takte leh ram pum huapa mi hmingthate chawimawina hun hman a ni bawk. Mizoram-a NCC Fest & Parasailing Camp hmasa ber hi May ni 5 atang khan neih niin Vawiin thleng hian neih a ni dawn a, NCC chungchang hriat zauna tur leh NCC zawm tura thalaite fuih phurna tura ruahman niin, North East State hrang hrang atangin NCC Cadet thahnem tak an rawn tel a. May ni 5 atangin 2nd Bn. MAP Ground, Luangmual-ah Parasailing Camp hi kalpui tan niin, NCC Fest hi May ni 8 leh ni 9-ah C. Thuamluaia Mual-ah nghah a ni thung.

Zoram Medical College & Hospital-a Department of Pediatrics leh Department of Obstetrics & Gynaecology te tangkawp chuan Inrinni kata, May 10, 2026 khan 'Neonatal Resuscitation Program Day' an hmang a, ZMC&H-a Dean, Professor Swati M Patki chuan a hmanpui a ni. He program hi Indian Academy of Pediatrics (IAP) leh National Neonatology Forum (NNF) bultum in ram pum a State 35 leh UT tinah a ruala hman ho tura duan niin a hmaan hun atan May 10, 2026 hi ruat a ni a. Nausen pianghlim harsatna nei te chhanchhuah dan training hrang hrang Nurse leh Doctor tam thei ang ber te hnenah pek a ni. India ramah hian nausen piang 10 zelah 1 hi thawk lama harsatna neiin an lo piang thin a, a hun taka buaipui nghal anih chuan nausen tam tak chhanchhuah an lo ni ta thin a ni. He training-ah hian naupang Doctor, Gynaecologist, Medical Officers, Interns leh Nurse thahnem tak telin nausen pianghlim harsatna neite chhanchhuah an lo nih zel theih nan leh Mizoram in Infant Mortality Rate (IM...

Tunhnaia District Jail. Lunglei-a tang te document lem hmanga chhuah chungchang chu Police ten chhui mekin hemi chungchanga an hmalakna leh thil awmdan chu Vawiin khan an puangchhuak a, hemi chungchang ah hian hmalak mek zel a ni. Police thuchhuah a ngai ngaiin....

Tunhnai khan PHE Department-a Engineer thenkhat chu aan awmna hmun siksawi a ni a, hemi ang hian PHE Serchhip WATSAN Division-a EE nilai, Er. Isaac Lalchhuanmawia chu Mamit WATSAN Division-a EE hna chelh tura sawn a ni a, a aiawh tur hian Khawzawl WATSAN  Division-a EE nilai Er. Liantluanga Chohte chu rawn awm tura tih a ni.

Serchhip-a Addl. DC hna chelhtu Lalrinzuala chu hmundang-a thawk tura deputation-a a kal hnuah Serchhip-a Addl. DC hna chelh tur hian Ngopa-a SDO (Civil) hna chelh mektu Dorothy Muansangi chu rawn dah thar a ni a, ani hi tunhnai khan Junior Administrative Grade-a kaisang a ni. Serchhip Addl. DC tura ruat Dorothy Muansangi hi hun engemaw chen Serchhip District-a lo awm tawh thin a ni.

Serchhip District Superintendent of Police Gavit Gogna IPS chuan thuchhuah siamin Serchhip IOC Veng, DC Office peng atanga hmarlam, New Serchhip lam hawi zawnga ft. 40-a thui chu kawngpui insuihfinna lai (Junction) pawimawh a nih avangin mipui leh lirthei he kawng hmangtu te him zawk nan ‘No Parking Area’ atan puan a nih thu a tarlang a. He thupek hi May 8, 2026 atanga thuleh awm hma chu hman tur niin thupek zawm lo te chu Section-177 MV Act hmanga hrem an nih tur thu a tarlang bawk.

Mizoram Food & Allied Industries Corporation Limited (MIFCO) chuan Lakhuihthei leh Sapthei tui in nghal mai theih tura an siam, Ready To Serve (RTS) beverages chu niminpiah tlai khan Chhingchhip-a an hmunpui-ah an tlangzarh.

Chief Minister Lalduhoma chuan kan ramah ruihhlo a hluar avangin kan thalai tam takte nun a chhe mek tih sawiin, kaihruaitu tha an mamawh thu a sawi a. “Kan thalai tam tak ten NCC zarah nun kawng dik an zawh a, ram tana mi hmantlak ni turin an inzir mek a ni,” a ti.

India hmarchhak-a Cooperation Secretary-te leh Cooperative Societies-a Registars te inhmuhkhawmna chu nimin khan Mizoram Assembly House-a Legislative Hall-ah neih a ni a, he hun hi Ministry of Cooperation-a Secretary Dr. Ashish Kumar Butani chuan a kaihruai a ni.

All India Radio (AIR) kum 90 tlin lawmna pualin nimin zing khan AIR Aizawl chuan a huho a ke-a kal, Walkathon a huaihawt a, Tuikhuahtlang AIR Station atanga Millennium Centre thleng a huhoin AIR-a thawktute leh lo thawk tawh thin bakah mipui thahnem tak an kal a ni.

Mizoram-a Private School neitu intelkhawm pawl, Mizoram Independent Schools Association (MISA) chuan MBSE-in kumin HSLC Ieh HSSLC result a tihchhuah danah Merit List, Subject Topper, Letter hmuh zat leh Division a tilang ta lo chuan zirlai naupangte a tihnual nia sawiin, pawi an tih thu an sawi.

Nimin khan Aizawl Khatla-a Royale Lalawi Hotel Conference Hall-ah UNNATI Scheme in a tum te inzirtirna leh inhrilhfiahna hun buatsaih a ni a, Commerce & Industries Minister F. Rodingliana chuan khuallian niin a hmanpui a ni.

Siaha District Bawrhsap leh District Disaster Management Authority Chairman VL. Hruaizela Khiangte chuan Disaster Management Act, 2005 Section 34(m) tlawhchhana thupek tichhuakin Fur lo thleng tura leimin laka invenna atan October, 2026 thla tawp thleng huam turin Siaha khawpui chhungah In sak emaw, hmunhma chei vel emaw hna thawh khap a nih thu a tarlang a, tul bik thil a awm a nih chuan DC Office atanga phalna lak tur a nih thu a tarlang bawk.

Nimin khan Lawngtlai-ah Bawrhsap Donny Lalriatsanga kaihhruaiin Lawngtlai District a SASCI hnuaia hnathawhte thlirhona neih a ni a, Bawrhsap chuan SASCI hnuaia hna-thawhte chu kum khat chhung atana tih a ni a, amaherawh chu harsatna neuh neuh a awm thin avanga duh anga hnathawh a chak thei lo thin chu veiawm a tih thu a sawi a. Heng hian sum hmuh zel tur a dal thei tih sawiin, chak thei ang bera hna thawk turin hnathawktute chu a chah a ni.

Mzoram Legislative Assembly Speaker Lalbiakzama chuan nimin khan Aizawl-a BSI Hall-ah ‘LushAIGent : Agentic AI’ a tlangzarh a, thiamna ril bik nei Mizo kutchhuak tlangzarh theih a ni chu lawmawm a tih thu a sawi a ni. LushAIgent hi Mizo mipuite, a bikin Sap tawng emaw, Hindi emaw thiam lutuk lo te pawhin an hman tangkai theih tura duan a ni a. Mizo tawngin tha takin a biak theih a, a hmangtu zawhna te Mizo tawng ngeiin, fiah takin a chhanglet thei a ni. Mizo tawng leh English bakah Hindi, Bengali, Tamil, Telugu leh tawng dangte tiamin India ram tawng hrang hrang 12 a thiam a.Type kher ngai lovin Voice Note hmanga biak theih a ni. Hei bakah hian tawng danga mi dangin thu an thawn rang takin a hmangtu tawng thlan (entirnan, Mizo tawng)-in a lo letling nghal zung zung thei a. tawng danga thuziah te pawh fiah tak leh awmze nei takin a letling thei a. Sap tawng emaw tawng danga a hmangtu in thu a ziah sa pawh tawngkam mawi zawk leh grammar dik zawkin a chulmam sak thei a ni.

World Red Cross Day 2026 chu nimin khan Aizawl-a P&E Department Conference Hall-ah hman niin DM&R Department changtu Minister Prof. Lalnilawma chuan khuallian niin a hmanpui a, Mizorma-ah a vawi khatna atana ‘World Red Cross Day’ hman a ni chu lawmawm a tih thu a sawi bawk a ni. World Red Cross Day hi kumtin in thupui thlanbik neiin khawvel pumah May ni 8-ah hman thin a ni a, kumin hian mihring mihrinna a inpumkhatna, ‘United in Humanity’tih chu thupui atan hman niin khawvel hmun hrang hranga Red Cross Member, midangte tanpuina atana nun hlante hriatrengna atan te, midangte tanpui tura inzirtirna ni atan leh Red Cross kalphung inhrilh-hriatna hun atan te hman thin a ni a. Mizoram-ah chuan Mizoram Taxi Association member-te tan First Aid Training buatsaih niin Taxi driver zinga mi chhuanawm thlanchhuah mi pali te hnenah chawimawina hlan a ni bawk.

Tunhnaia High School Leaving Certificate (HSLC) leh Higher Secondary School Leaving Certificate (HSSLC) Exam result tihchhuah taka Serchhip District chhunga Police fa pass thar te lawmpuina hun chu nimin khan Serchhip SP Conference Hall-ah hman a ni a, he hun hi Serchhip SP Gavit Gogna IPS chuan hmanpuiin HSLC leh HSSLC pass thar zirlaite chu an kal zelna turah duh thlang thiama, thuawh tak leh taima taka lehkha zir turin a fuih a. Lehkha zir mai bakah an hriselna vawng thaa taksa sawizawi ngai pawi-mawh turin a chah bawk a ni. Nimin-a he hun hman hi Serchhip SDPO Rinzuali MPS chuan kaihruaiin HSLC pass thar mi 12 leh HSSLC pass thar mi 5 te hnenah SP hian lawmpuina thu-ziak a hlan a ni.

Serchhip District-ah Silai leh hmanraw dang hmanga Ramsa leh Sava te veh leh kah khapna thupek tihchhuah a ni.

Serchhip District-a Neihloh khua sawn tura hmalakna kal mek chu nimin khan Bawrhsap Paul L. Khuma hovin Serchhip District-a sawrkar Official-te leh Neihloh khawtlang hruaitute chuan an sawiho a. Neihloh khua hi leimin avanga chhiatrupna thlen theihna hmun nia hriat a nih avangin sawnchhuah tum a ni.

Aizawl Municipal Corporation (AMC) Inthlanpui neih zawh taka Corporator thlan thar mi 19 te lakluhna Inkhawm chu nimin khan neih niin hemi rual hian Mayor leh Deputy Mayor thlan nghal a ni a, Executive Corporator tur mi 4 (pali) te pawh ruat nghal an ni bawk.

Mizoram Larsap, General (Dr) Vijay Kumar Singh chuan Kelsih-a Tribal Reserch Institute (TRI) leh Ropuiliani Tribal Freedom Fighters Museum (RTFFM) sak hna thawh mekte chu nimin khan a hmuhah kalin a enfiah.

Union Minister of State for Petroleum & Natural Gas and Tourism Suresh Gopi chuan nimin khan Kolasib tlawhin District chhunga sawrkar Department hrang hranga hotute a kawm.

World AIDS Orphan Day chu nimin khan Aizawl-a I&PR Auditorium-ah Gan Sabra buatsaihin hman a ni a, Mizoram State Commission for Protection of Child Rights, Chairperson Jimmy Laltlanmawia chuan he hun hi a hmanpui a ni.

Mizo Zirlai Pawl (MZP) chuan Mizoram sawrkar chu tun thla, May ni 14 ralhma ngeiin sawrkar hnathawk pension tawh a rawih nawnna order sut turin an ngen.

Aizawl Lammual-a 33KV Gas Insulated Power Sub-Station dahna tur hmun leh Lammual chhunga hmun pawimawh hrang hrang sak turte Power mamawh dan tur leh hrui kal tir dan tur chu nimin zing khan P&E Minister F. Rodingliana hovin Lammual Advisory Committee hotuten an enfiah.

Mizoram Police leh Women and Child Development Department tangkawp chuan Rudrapur (Uttarkhand) atangin Mizo hmeichhia panga (5) chhanchhuakin he thil kaihhnawihah mi paruk man an ni bawk.

Mizo Tawng bik atana duan Mizo AI hmasa ber, ‘Hriatna Mizo Chatbox’ chu hlawhtling taka enchhin a ni a, he model hian tunah chuan Google, Facebook leh model dang Gemini leh Meta ten an tih theih loh Mizo tawngka a biak theih a nei tawh a. He application hian Model lo awm tawh ten an tih theih loh leh an phak loh hi a rawn ti thei tura beisei niin Text Based chauh lo audio based interaction te pawh a theih tawh a ni. Hriatna Mizo Chatbox hi iOS app store (iPhone) leh Google play store-ah te download theihin a awm a. Version 1.0 hi 2023 khan released tawh niin tunah hian Bashini (Central Govt.) initiatives ni pah fawmin tihchangtlun mek zel a ni. Mizomade Team te hian Stage 3 an paltlang tawh a ni.

Nimin khan Guwahati-a Novotel Conference Hall-ah World Resources Institute (WRI) huaihawtin 'CSR Workshop on Clean Energy for Development in Northeast India' neih a ni a, he hunah hian Adviser to Chief Minister leh Mizoram CSR Cell Chairman TBC. Lalvenchhunga chu khual zahawm niin a tel a ni. Nimin-a he hun hmanah hian TBC. Lalvenchhunga chuan Renewable Energy (RE) chungchanga Mizoram sawrkar hmalakna te tarlangin, sawrkar laipui Scheme 'PM Surya Ghar: Muft Bijli Yojana' (Roof-top Solar) chu chak zawka kalpui a nih theih nan Mizo-ram sawrkar chuan Central Subsidy awmsa bakah State Subsidy a pek belh a. Hma kan sawnpui hle a. Solar Policy thar pawh duan a ni, a ti.

Nikum (2025) July thla leh kumin January thla inkar chhunga dan lova ramdang (Myanmar) atanga Sikret lakluh Champhai-a man te chu nimin khan tihchhiat a ni a, heng Sikret te hi packet 3,09,712 zet niin brand hrang hrang a ni a, tualchhung-a an hralhna rate-a chhuta cheng nuai 200 man vel a ni.

Nimin khan Champhai-ah Myanmar atanga raltlan rawn lutte leh a thlengtu khawtlang mipui harsa zawkte tana himna leh eizawnna siamsak tura hmalakna, PATHRISE Project 2026 chung-chang thlirho a ni a, raltlan rawn lut te tana hriat tur pawimawh leh khawtlang mipuite pawhin an lo hriat tur hrang hrang sawiho nghal a ni.

Mizoram Larsap General (Dr) Vijay Kumar Singh chuan Mizoram State BJP President Dr. K. Beichhua chu nimin khan Lok Bhavan-a leng ah sawmin thil pawimawh hrang hrang an sawidun a. An thil sawidun zingah hian Fur laia Mizoram a inkalpawhna kawng tha tak a awm theih dan tur bakah Ayushman Bharat Pradhan Mantri Jan Arogya Yojana (AB PM-JAY), Golden Card chungchang te a tel a ni.

Mizoram hmun hrang hrangah tunlai hian Sawh-thing hralhna man a sang chho mek nia thudawn a ni a, Indo Myanmar Boarder bul Vaphai-ah chuan May ni 4 khan Sawhthing leitute'n kg-ah Rs. 54-a an lak hnuah May ni 5 khan Rs. 59 in an la leh tih Vaphai khua Sawhthing buaipuitu te chuan an sawi a. Burma ramri dep-ah hian Burma lam atanga Sawhthing a rawn luh leh luh loh chu Sawhthing man tidanglamtu lian tak a ni tel nia an hriat thu sawiin, Sawhthing hi a tam tawh loh laiin mamawhna a la san tho si avangin a man hi pung chho zel turin Sawhthing lam buaipuitute chuan an rin thu an sawi a ni.

Mizo Territorial Army (Mizo TA) lak thar te thlahna hun chu tun thla ni 11 khian Assembly Annexe Building Conference Hall-ah neih a ni dawn a, hei hi 166 Infantry Battalion Territorial Army(Home & Hearth), Assam-a thawk tura Mizoram atanga recruit batch hmasa ber, mi 144 te thlahna hun tur niin mipa 135 leh hmeichhia 9 an ni. Heng Mizo Territorial Army te thlahna hun hman dan tur hi nimin khan Territorial Army Establishment & Coordination Committee Chairman Lt.Col.(Retd) Clement Lalhmingthanga hovin Secretariat Conference Hall-I ah sawiho a ni a, he hunah hian Mizo Territorial Army tana hmalakna hrang hrangte thlirho niin harsatna awm te pawh sawiho a ni a. an chenna hmun lailawk chu tun aia changtlung leh nuam zawka siam dan tur chungchangte pawh an sawiho bawk a ni.

Mizoram Larsap, General (Dr) Vijay Kumar Singh chuan nimin khan lehlangin Serchhip District a rawn tlawh a, Chhingchhip-a Sainik School bakah Serchhip-a 14 Assam Rifles Battalion Hqrs. leh Shalom Special School te tlawhin Zirlai, Zirtirtu, Ex-Servicemen leh Sipaite a kawm a ni.

Nimin khan Chief Minister Lalduhoma hovin Neihloh Village Planning Committee chu thukhawmin Neihloh khaw thar tur Master Plan an thlirho a, Neihloh khuaa chhungtinte chu an In thar sakna tur cheng nuai 15 pek vek tura ruahman a ni.

Serchhip District Magistrate chuan Myanmar atanga phalna nei lova Serchip District-a Sawh-thing lakluh, phurh leh lei leh hralh khapna thupek a tichhuak.

Tunhnaia Serchhip-a thli leh ruah thawk ah khan Serchhip Field Veng-a Serchhip Auditorium chung thenkhat chu thli hian tichhiain ruahtui lut theiin a awm a, nimin khan UD&PA Department chuan Auditorium chung hi Silpauline in an khuh tha a ni. Serchhip Auditorium hi thiah tura Tender tihchhuah ni tawhin he Tender hi tunhnai khan cancel leh rih a ni thung nia thudawn a ni.

Samaritan Association for the Blind chuan nimin khan Special Blind School kum 25 tlinna chu Durtlang Presbyterian Kohhran-a M. Suaka Hall-ah an lawm a, he hun hi Chief Minister Lalduhoma chuan khuallian niin a hmanpui a ni.

New Delhi-a cham mek Sports Minister Lalnghinglova Hmar chuan niminpiah tlai khan Ministry of Youth Affairs and Sports-a Secretary Hari Ranjan Rao chu kawmin Mizoram a Sports hmasawnna tur, a bikin Hockey chungchanga hmalak dan tur an sawidun.

Mizoram Police ten tha tak leh khauh lehzual-a an hna an thawh theihna tur atana duan, 'Year of Discipline' chu nimin khan Home Minister K. Sapdanga hovin a hawnna neih a ni.

Health Minister Lalrinpuii chuan nimin khan khum 50 awmna tur Hnahthial District Hospital sak mek chu tlawhin Hospital sak hna thawktu, North East Consultancy Services (NECS) chu an huntiam, kumin December chhung ngei a sa zo hman turin a hrilh.

Watershed Development Component-Pradhan Mantri Krishi Sinchayee Yojana 2.0 (WCD-PMKSY 2.0) Conference chu nimin khan Aijal Club-ah neih a ni a, Rural Development and Administration Department changtu Minister Prof. Lalnilawma chuan khuallian niin a hmanpui a ni.

Mizoram sawrkar leh Ministry of Jal Shakti, Department of Drinking Water & Sanitation chuan Jal Jeevan Mission (JJM) 2.0 kalpuina tura inremna (Memorandum of Settlement) chu nimin khan New Delhi-ah an ziak.

Mizoram sawrkar hnuaia Department hrang hrang leh zirna In te tana buatsaih ‘Government Online Excellence Awards, 2025’ chu nimin khan Taxation Auditorium-ah semchhuah a ni.

Nizan hmasa zanlai pelh hret hnu khan Lawng-tlai Chandmary Veng-a Ainehliana Building-ah kangmei a chhuak a, he In hi chhungkaw pahnih in dawr bungrua dahna atana an luah niin bungrua engmah chuh hman a ni lo a, mihring thi leh hliam an awm lo bawk a ni. Kangmei hi mi tlawmngai leh Fire Department ten thelhin In dang a kangkai tur an veng hman a, bungrua cheng nuai 40 man vel a kangral nia chhut a ni.

Kumin February 25-a Kolasib leh Thing-dawl inkar, Hmawngkhawthlir-a Bike leh Truck insu-a mi pakhat in nunna a chan phahna a Truck khalhtu ni ngeia hriat Samsul Islam, Patharkandi, Karimganj chu niminpiah khan Lawngtlai-ah man a ni a, he Motor insutna ah hian Bualpui khuaa cheng Lalrosiama (40) chu boralin Truck khalhtu hi a tlanbo nghal a, Police ten an chhui zel hnuah Samsul Islam hi man a ni ta a ni.

Nimin khan Champhai-ah District AIDS Prevention Control Committee (DAPCC) chu an Chairman leh Bawrhsap Mohammad Aaquib hovin an thukhawm a, he hunah hian an District a HIV/AIDS dinhmun thlirho niin kum 2025-2026 chhung khan mi 6,558 te thisen enfiah niin HIV hrik pai mi 80 hmuh an ni a, hri kai chhan ah mipat hmeichhiatna chu tam berin mi 62 an ni a, Syringe thianghlim lo hmang mi 11, mipat mipatna mi 2, nu in a naupai-ah mi pakhat leh chhan hriat loh mi 4 an awm bawk a ni.

Mizoram Legislative Assembly-a Subject Committee-V te chuan nimin khan an Chairman Lalramliana (Paipuia) kaihhruainain UD&PA hnuaia Aizawl Convention Centre; MINECO, Khatla leh Zodin Multilevel Car Parking-a hna-thawhte chu a hmunah tlawhin an enfiah a. Department-a thawktute leh Contractor te kawmin Works component hrang hrangte an zirchian bakah an hnathawhte chak zawka hma lak theih dante an sawiho a ni. He hunah hian Subject Committee-V Members Lalchhuanthanga, H. Lalzirliana, R. Rohmingliana, Prova Chakma leh Jeje Lalpekhlua tean tel a ni.

Mizoram Legislative Assembly Speaker Lalbiakzama chuan nimin khan Aizawl Kulikawn-ah  natna hrik zawnchhuah leh enfiahna, Agilus Diagnostic Ltd. a hawng a, Agilus Diagnostics Ltd. hi SRL Diagnostics tih ni thinin, India rama Diagnostic network lian leh rintlak ber zinga mi niin kum 1995 khan din a ni a. Kum 29 zet ram mipuite hriselna endik leh damdawi lam hna (diagnostic excellence) an lo thawk tawh a ni. Agilus Diagnostics Ltd. hian natna hrik zawnchhuah leh enfiahna (Accurate Diagnosis) test chi hrang hrang 3,600 chuang an nei a, chung zingah chuan Pathology (thisen, zun, etc.), Radiology (X-ray, Ultrasound), leh Molecular Diagnostics (genetics leh cancer enfiahna) te a tel a ni.

Kum 2026-2028 chhunga Sub-Hqrs. YMA Serchhip Office Bearers atana thlan thar te chuan hruaitu kalchhuak te hnen atangin nimin khan an mawhphurhna an la ta.

Kristian Thalai Pawl (KTP) New Serchhip Branch te chuan nimin khan an dinchamphaphak pualin Serchhip Blood Bank-ah thisen Unit 21 an pe a, thisen petute hi Mipa 16 leh hmeichhia 5 an ni. New Serchhip Branch KTP hi May 5, 1980 khan din niin kumin hi a kum 46-na a ni a, an dinchamphaphak pual hian thisen hi pein tlawmngaia thisen petute chungah AVBD Ser-chhip Branch chuan lawmthu an sawi a ni.

Mizoram Board of School Education (MBSE)-in kumin-a Higher Secondary School Leaving Certificate (HSSLC) Exam result a tihchhuah taka science, Arts leh Commerce Stream-a pakhatna theuhte chawimawina hun chu nimin khan Mizo Zirlai Pawl (MZP) chuan buatsaihin Minister Prof. Lalnilawma chuan khuallian niin a hmanpui a ni.

Mizoram State Policy Coordination Committee (MSPCC) chu nimin khan thukhawmin Bana Kaih Scheme hnuaia hmalakna tur pawimawh hrang hrang an sawiho.

New Delhi-a cham mek Chief Minister Lalduhoma chuan nizan hmasa khan Union Minister of Road Transport & Highways Nitin Gadkari kawmin Mizoram-a kawngpui chungchang an sawidun.

Mizoram State Healthcare Society Chief Executive Officer (CEO) Dr. Lalhriatzuali Ralte chuan hriattirna tichhuakin, Mizoram Universal Healthcare Scheme (MUHCS) Empannelled Hospital ni lo ah damlo admit theih a nih thu leh damlo admit turte chu nunna chhan nana enkawl nghal ngai, Emergency bik chauh a nih thu a tarlang.

Central Seat Allocation Board (CSAB) hotute chuan Mizoram a zirlai naupangte tana CSAB leh JOSAA Counseling kaltlanga Engineering zir theihna remchang bawhpelh lo turin zirlaite an chah.

Chakma Autonomous District Council (CADC)-a BJP chuan Zoram People’s Movement (ZPM) kaihhruai Mizoram State sawrkar chuan Financial Year 2025–2026 atana sawrkar hnathawk hlawh tang chu Financial Year 2026–2027 1st Quarter allocation nen a la pekchhuah loh avangin an dem thu an sawi a. Hetianga dik lo taka tihkhawtlai a ni hian Mizoram chhunga Autonomous District Council-te chu State Sawrkar-in a ngaihthah zia leh thliarhranna a nei chhunzawm zel tih chiang takin a pholang niin an sawi.

Tourism Minister Lalnghinglova Hmar chuan nimin khan Tourism changtu Secretary to Government of India Bhuvnesh Kumar chu New Delhi-ah kawmin Mizoram Tourism hmasawnna an sawi dun.

Chief Minister Lalduhoma chuan zan hnih riaka New Delhi-a a zin hnuah nimin khan rawn hawin Chief Minister's Office-a Officer ten Commissioner & Secretary to CM Vanlaldina Fanai hovin a Bangla-ah an lo hmuak a ni.

School Education Minister leh Aizawl North-II Bialtu MLA Dr. Vanlalthlana chuan nimin khan a Pisa-ah a bial chhunga zirlai titha te hnenah lawmpuina thuziak leh laptop a hlan a; hemi rual hian Mizoram Board of School Education (MBSE) buatsaih HSLC leh HSSLC Examination, 2026-a High School leh Higher Secondary School zinga zirlai pass vek (100% pass) School panga (5)- Holy Child School, Rosebud School, Ramthar Veng Presbyterian English School, St. Joseph Higher Secondary School leh St. Stephen's Higher Secondary School hnenah lawmpuina thuziak a hlan bakah zirlaite fuihna thu a sawi bawk a ni.

All India Radio (AIR) Aizawl chuan All India Radio kum 90 tlin lawmna kal zelah nimin khan Musical Concert an buatsaih a, he hun hi IPRP&S Minister B. Lalchhanzova’n Khuallian niin hun a hmanpui a ni.

Lunglei District chhung Lungsen Aspirational Block huamchhunga nu leh naupang hriselna atana hmalakna, Project BLOOM (Better Living through Outreach, Optimal Maternal & Child Health)-a hmalakna chu nimin khan Lunglei-ah Bawrhsap Navneet Mann hovin thlirho a ni.

Nimin khan Lawngtlai-ah Lawngtlai District Education Committee chu thukhawmin kumin a HSLC leh HSSLC Exam result tihchhuah tak te chu uluk takin an thlirho a, tun aia dinhmun tha zawk hauh thei tura hmalak nise tiin School-in a mamawh bungrua leh building siamthat ngai leh tul dangte chu ziakin thuneitu sang zawk hnenah thlen nise an ti a. Raltlan School - Council Veng Camp, Bethel Camp leh College Veng Camp-a awm mekte chu a theih chin chinah tanpui nise an ti bawk.

Ruihhlo ngai Hulhliap Short Stay Centre chhuak te tana buatsaih After Care Skill Development training chu nimin khan MFM Skill Training Centre, Dawrpui Vengthar-ah neih tan leh a ni a, tun tumah hian Hulhliap SSC chhuak mi 27 ten Assistant Electrician leh Aluminium Fabrication-ah training an nei dawn a ni. Tun thleng hian Assistant Electrician Batch 5, Aluminium Fabrication Batch 4, Food Processing Batch 2 leh Plumbing Batch khat kalpui tawh ah mi 168 an training tawh a ni.

Mizoram sawrkar-a School Education Department chuan kum 2026-2027 Academic Session a Class XI zir turte School luh hun a inrual theih nan Class tan hun atan karleh Nilaini, May 13, 2026 a ruat a, hemi ni hian Class-XI ten Class tan vek tur a ni ang.

Mizoram Rajya Sabha MP K. Vanlalvena chuan niminpiah tlai khan Lianpui khua a pi pu sulhnu awmna, Lungphun ropui chu a tlawh a, Lungphun ropui hi July ni 14, 2025 khan Archaeological Survey of India chuan India rama hmun pawimawh, National Importance atan a puang a, National importance atana puan a nih theih nan K.Vanlalvena hian Parliament-ah a lo auchhuahpui tawh nghe nghe a ni. Lungphun ropui awmna Lianpui khua hi Zahmuaka thlah Palian Lal Lianpuia thlangthlakna hmasaber a ni a, a hming chawiin Lianpui tih a ni a, Duhlian tawng hmang ah chuan Mizoram-a khaw upa berte zinga mi a ni. Lianpui ramah hian pi leh pu te sulhnu tam tak a awm bakah Mizorama tlangsang zinga mi Zopuitlang pawh a awm bawk a ni.

Aizawl Smart City Ltd huaihawt ‘Program on Awareness of Bio-Medical Waste’ chu nimin khan Aizawl-a P&E Department E-in-C Conference Hall-ah neih a ni a, he hun hi Health & Family Welfare Department-a Commissioner & Secretary K. Lalrinzuali chuan khuallian nia hmanpuiin Bio-Medical Waste Rules 2016-in a phut angin felfai taka kum khat (1) chhunga Aizawl Smart City Ltd. hmalakna hnuaia Common Bio Medical Waste Treatment Facility Tuirial Airfield kaltlanga bawlhhlawh sawng-bawlna kan nei ve ta chu hmasawnna ropui tak a nih thu a sawi a. He hunah hian Aizawl khawpui chhunga damdawi In leh inentirna chi hrang hrang- Clinic, Sub-Centre, ran damdawi In leh a dangte a bawlhhlawh hrisel zawka sawngbawl mek a nih dan leh kal zel dan turte sawiho a ni.

Serchhip Police te chuan nimin khan Serchhip Sailiamkawn-a Police Checkpost-ah Sapzu tam tham tak leh a neitu nia hriat mi pahnih an man a, thubuai siam sak nghal an ni.

IOCL in Retail Selling Price thar a tihchhuah angin Mizoram chhunga eirawngbawlna Gas man chu May 1, 2026 atanga hman turin bithliah thar a ni leh ta a, hemi ang hian Vairengte tih loh Mizoram hmundang ah chuan kg. 14.2 a rit Domestic Cylinder man chu bur khat zelah Rs. 1065 a ni anga, kg. 19-a rit Commercial Cylinder chu bur khat Rs. 3544.50 a ni anga, kg. 19-a rit Xtra TeJ chu Rs. 3567/- leh kg. 10-a rit Composit Cylinder chu Rs. 766/- a ni ang. Domectic Cylinder hi Home Delivery kalpuina ah chuan bur khat-ah Rs. 70/- belh tur a ni anga, Godown-a hralh anih erawh chuan Rs.33.43 zel paih tur niin Home Delivery kalpui theih lohna, Point Delivery kalpuina ah chuan Rs.7.53 belh zel tur a ni.

Baptist Mipa Pawl (BMP) chuan nimin khan an dinchampha vawi 46-na chu Unit hrang hrang ah an lawm a, BMP hi May 4, 1980 khan Thingsai khuaah din tan a ni.

Zan khat riak-a Mizoram-a rawn zin Union Textiles Minister Giriraj Singh chuan nimin khan Zemabawk-a Sericulture Training Institute (STI) leh Mizoram Handloom and Handicrafts Development Corporation Limited (ZOHANDCO) Office tlawhin an hmalakna hrang hrangte a thlirpui.

New Delhi-a cham mek Chief Minister Lal-duhoma chuan nimin khan NITI Ayog Member kalchhuak tur Dr. VK. Paul chu Delhi-a Mizoram House Chanakyapuri-ah kawmin Mizoram tana hmasawnna tur hrang hrang an sawidun a, Dr. VK Paul chuan a hun chhunga Mizoram sawrkar nen tha taka an thawh dun avangin lawmthu a sawi a, Chief Minister Lalduhoma hmalakna hrang hrang fakin, NITI Aayog nen thawhona tha tak an nei thei chu lawmawm a tih thu a hrilh a. Mizoram chu State ralmuang tak a nih thu State dangten an hriatpui thu a tarlang bawk a ni.

Union Minister of State for Coal and Mines, Satish Chandra Dubey chuan Saitual District-a hmasawnna leh sawrkar inrelbawlna kalpui mek te thlirho leh enfiah turin nimin khan Saitual a tlawh. Ni hnih cham tura Mizoram-a lo zin Union Minister of State for Coal and Mines Satish Chandra Dubey hian nimin khan New Delhi atangin Lengpui Airport a rawn thleng a, hemi hnu hian Saitual a pan nghal a. Saitual Deputy Commissioner, Srinivas Sadi leh District hotu dang ten lo dawngsawngin thutkhawm pawimawh an nei nghal a, tualchhung inrelbawl dan leh hmasawnna hnathawh hrang hrang kalpui mek dinhmun an thlirho a ni. Union Minister of State for Coal and Mines Satish Chandra Dubey hi nizan khan |am Dil-ah riakin Vawiin hian District chhunga hmasawnna hnathawh hrang hrangte chu a hmunah kalin a enfiah dawn a ni.

Mizoram sawrkarin khualkhuaa thite ruang phurh man a tumsakna, 'Assistance for Transportation of Bodies of Deceased Persons within Mizoram' kaltlangin ruang 2,144 phurhna man cheng nuai 225.83 pek a ni tawh.

Kum hnih chhunga Mizoram-a thar Sawhthing man san ber lai a thleng mek a, nimin khan Mualkawi Secondary Collection Centre-ah sumdawngten Sawhthing kg. 1 Rs. 59.50-a lei turin auction an chhang a, SCC dangah pawh Rs. 50 chunglama auction chhanna engemaw zat a awm a. Nimin vek khan sawrkarin Rapchung Tehcnology leh Tapchhak Technology hmingpua Sawhthing tihrona khawl Society-te hnena pekchhuah tura a siam chu enchhina (trial run) neih a ni.

Sialkal Range Development Council (SRDC) chu khaw paruk chauh huam ni lovin khaw 15 huam tura din tum a ni.

Health Minister Lalrinpuii’n Mizoram Universal Health Care Scheme (MUHCS) hnuaiah kumin April ni 1 atanga MUHCS Bill pek chhuah tawh zawng zawng chu cheng nuai 700 anih thu sawiin, damlo mi 2615 enkawl an nih tawh thu a sawi.

Union Textiles Minister Giriraj Singh chuan ni hnih cham turin niminpiah khan Aizawl a rawn thleng a, nimin khan Mizoram a chhuahsan leh a ni.

Department of Personnel and Administrative Reforms (DP&AR) Minister K. Sapdanga chuan Officer ten an thiamna leh theihna an tihpun zel a pawimawh thu sawiin, Artificial Intelligence (AI) chu tangkai taka an hman theih a beisei thu a sawi.

PHE Department changtu Minister Prof. Lalnilawma chuan nimin khan ‘Faina Puitu mobile application’ a tlangzarh.

Information & Public Relation Department Director K. Vanlalsangi chuan nimin khan Aizawl Art Gallery-ah ‘Tanpuia 13th Solo Painting Exhibition’ a hawng a, Tanpuia chu Mizote zingah Mizoram pawna Solo Painting Exhibition buatsaih thei awmchhun a nih thu sawiin chhuanawm a tih thu a sawi bawk.m Tanpuia hian kum 1999 atangin Solo Exhibition hi Aizawl bakah Bangalore leh Kolkata-ah te a buatsaih tawh a, tun tumah hian May 9 thlengin Exhibition hi neih a ni ang.

Mizoram Lok Sabha MP Richard Vanlalhmangaiha chuan nimin khan Thingdawl VC-II ah Futsal Ground a hawng a, Futsal Ground peihfel a ni chu lawmawm a tih thu sawiin, hmeichhia te pawhin hmang tangkai ngei se a duh thu a sawi bawk. He Futsal Ground hi Member of Parliament Local Area Development (MPLAD) Fund 2024-25 atanga cheng nuai 15 senga siam a ni a. Futsal ground hawnna denchhen hian Tournament buatsaih nghal a ni bawk. Nimin-a Futsal Ground hawnna hunah hian Kolasib DC H. Dolianbuaia pawhin thu a sawi a ni.

Zo Re-Unification Organisation (ZORO) chuan Myanmar Sawrkar, mipuite thlan Sawrkar inti in May 3, 2026 zing-a Chin Hills, Falam Township chhung Khawpuichhip khua Thlawhtheihna leh Bomb hmanga a beihna ah mi 7 an thi leh mi thahnem takin hliam an tuar chu an dem takzet tih an sawi a. ‘Myanmar democracy sawrkar, mipui thlan a ding ta’ tia chhuang taka an puan chu a hming mai a nihzia leh Sipai thuneihna hnuaia la awmin nunrawng takin a mipuite a la bei chhunzawm ta zel tih lan chiantirtu chiang tak a nih thu an sawi a. He chetna hian UN DRIP article chiang takin a palzutin a kalh nia sawiin, “Hetiang innghaisakna hi ZORO chuan thleng tawh lo turin a duh takzet a, UNO-ah pawh thlen ngei a tum a ni,” an ti.

Serchhip Sub-Hqrs. YMA Inkhawmpui vawi 8-na chu kar kalta Ningani leh Zirtawpni khan Thenzawl-ah neih niin Chief Minister leh Bialtu MLA Lalduhoma chuan khuallian niin a hmanpui a. YMA hmalakna tur hrang hrang an rel zingah Khawhar In-ah khawhar hla (Van ngaih hla) leh Pathian pawlna hla bak sa tam lo tura inzirtirna neih nise an ti.

Chief Minister Lalduhoma chuan kan ram leh hnam hi nghet taka a din zel theih nan kawng hrang hrangah kan fimkhur a tul thu a sawi.

Serchhip District Disaster Management Authority (DDMA) chu April 30, 2026 khan Serchhip DC Meeting Hall-ah thukhawmin chhiatrupna thleng palh thei laka inven dan leh chak zawka hmalak dan tur an sawiho.

Chief Minister Lalduhoma chuan Zirtawpni khan a Bial chhung, Thenzawl khuaa tunhnaia thli leh ruah thawk avanga vanduaina tawk te chu an awmna hmunah a tlawh a, kar kalta Thawhtanni (Aril 27, 2026)-a thlipui leh ruahpui sur khan Thenzawl-ah hian chenna In 8 chu luah tlak lohvin a len chhia a, heng bakah hian In chhe nasa zual 9 awmin, chhe nasa lutuk lo 54 bakah sawrkar In leh vantlang In chhia 13 a awm a, electrict ban tlu 15 a awm bawk a ni. Chief Minister chuan heng vanduaina thlenna hmun te hi tlawhin SDRF leh CM Relief Fund atangin zangnadawmna a hlan nghal a ni. He hunah hian Chief Minister hi SDO (Civil) Thenzawl leh sawrkar mi pawimawh ten an tawiawm a ni.

Kar kalta Ningani, April 30, 2026 khan District Bawrhsap Paul L. Khuma kaihhruaiin Ser-chhip District Headquarters Land Committee chu Serchhip-a Village Council area paruk (6) chhunga ram pass dilna te ngaihtuahin Serchhip DC Meeting Hall-ah an thukhawm a, Committee-in ram pass dilna a ngaihtuahte hi a vaiin 12 niin an zinga 9 te chu House Site dilna a ni a; a dang 3 te chu Periodic Patta dilna te an ni. Land Committee chuan House Site dilna 9 te chu remtihpuiin, recommend tlak ah a ngai a; Periodic Patta dilna pathum zinga 2 pawh pawmpuiin, pakhat dang erawh chu Serchhip Town planning Area chhunga awm a nih avangin recommend a ni ve lo thung a ni. Committee-in ram pass dilna a ngaihtuah takte hi Serchhip VC area 6 – New Serchhip North, New Serchhip South, Chanmari, P&E, Vengchung leh Dinthar area ami te an ni.

Aizawl khawpui chhungah mi In-a awm 'Awmpui' (domestic workers) mi 5000 chuang an awm a, an zinga a tam ber hi thingtlang atanga lo kal nia hriat an ni.

Ramchhunga State hrang hrang Goods and Services Tax (GST) dinhmun tarlanah Mizoram GST chu nikum 2025 April thla chhunga khawn aiin za zela 17 in a tlahniam.

Chief Minister Lalduhoma chuan Mizo ten India rama Regional Rural Bank thangduang tak, Mizoram Rural Bank kan nei chu a hlu hle tih a sawi.

Home Minister K. Sapdanga chuan tunhnaiah Mizote sawrkar laipui hnaa lut an tlem hle tih sawiin, tan tlan a ngai takzet tih a sawi.

Mizoram RGGLV Distributor Association President Vanlalvuta Chinzah chuan eirawngbawlna gas renchem kawngah tan lak chhoh zel a ngai tih a sawi.

Mizoram-ah kumin kumtir lam thla thum (January atanga March 2026) inkar chhung khan natna chi khat Ngawr (Tuberculosis) vangin mitthi 44 an awm.

Central YMA hnuaia ruihhlo do pawl, Central Anti- Drugs Squad (CADS) ten kumin January 20 atanga May 1 thlenga ruihhlo chi hrang hrang an man te chu Inrinni zing khan Aizawl-a Central YMA Hall-ah tihralna hun hman niin he hun hi Home Minister K. Sapdanga chuan a hmanpui a, Central YMA President R. Lalngheta pawhin a telpui bawk a ni. Tun tuma ruihhlo an tihral te hi Heroin (No.4) Hawng 317 (kg 4 vel); Ganja gram 49.230; Codein bur 1215; AP, Pregabalin, Nap 10 leh a dangte tablets 8401 leh rakzu um 31 te a ni.

Mizo Zirlai Pawl (MZP) Hqrs. Hnahthial chuan Inrinni zing khan Hnahthial-a hnamdang awm te kokhawmin mi 105 chhinchhiahin an Inner Line Permit (ILP) an enfiah sak a, MZP chuan hnamdang te chu ILP chu nei ngei ngei tur leh Dan ang taka hna thawk turin an hrilh a, Mizote nena tha taka thawhhona nei tur leh midangte tana hnawksaka awmlo turin an chah bakah Hnamdang sponsor-tu Mizote chu Dan dik takin an mi sponsor-te an thawk em tih ngaihven tur leh ILP validity ngai pawimawh zual turin an chah bawk.

Mara Autonomous District Council hnuaia VC paruk (6)-a Seat ruak pasarih (7)-ah tunhnai khan by-election neih niin BJP chuan seat 4 an la a, ZPM in seat 2 leh Indepadent in Seat khat an la bawk.

Phawngpui National Park chu Nungcha inthlahpun hun a nih dawn avangin May ni 1, 2026 atanga kumin October ni 31 thleng khar a ni tih Forest Department chuan an sawi a, hemi chungchanga Chhimtuipui Wildlife Division-a Dy. Conservator of Forest-in hriattirna an tihchhuaha tarlan a nih danin, Furpui lo thleng tur leh National Park chhunga nungcha chi hrang hrangte inthlahpun hun a lo inherchhuah leh tan avangin Nungchate ralmuang leh him taka an awm theih nan leh nungcha leh ramngaw te anmahni-a an insiamthat theih nan Phawngpui National Park chu May ni 1 atanga October ni 31 thleng khar a ni a. Hemi hun chhung hian mipuitan Phawngpui National Park chu tlawh theih a ni lova, ramsa leh nungcha humhalh kawnga Department hmalakna chu tawiawm turin mipuite ngen an ni.

Mizoram Entrepreneurs' Chamber buatsaih ‘Mizoram Entrepreneurs' Conference’ vawi 1-na chu Inrinni khan Aizawl Zonuam-a Woodland Hills-ah neih niin Commerce & Industry Secretary Dr. H. Lianzela chuan khuallian niin a hmanpui a, Entrepreneurs te chu kan ram economy than zelna tura mi pawimawh tak an nih thu sawiin, ‘Ease of doing business’ ah hmasawn turin hma an la mek tih a sawi a. Kan ramah Chawlhni kawr aia hnathawh kawr neih tam zawk a tul thu a sawi bawk.

Mizoram Board of School Education (MBSE) in kumin-a Higher Secondary School Leaving Certificate (HSSLC) Exam a buatsaih ah Serchhip District-a zirna In hrang hrang ten an titha thawkhat hle.

Serchhip Police te chuan tunhnaiah Whatsapp ah ‘RTO-E-Challan.apk’ tih thehdarh a nih thu sawiin, he thil hi inbumna a ni tih avangin mipuite chu fimkhur turin an chah.

Tunhnai ruahsur nasa leh thli tleh avanga P&E Department in Tuikum Pump House-a kawlphetha an pekna line chhia chu nimin tlai khan siamthat a ni leh ta a, nizan dar 6:30 atang khan dan pangngaiin tui pump pawh chhunzawm leh a ni. He Line chhia avang hian mipuite hnena tui sem pawh a khaihlak nasa hman hle a ni.

Mizoram Board of School Education (MBSE) chuan pawl 12 zirlaite tana kumin-a Higher Secondary School Leaving Certificate (HSSLC) Exam a buatsaih result chu nimin khan tichhuakin Zirlai exam 12,243 zinga 10,734 ten hlawhtlinna changin za zela 87.67 pass ang a ni a, Arts Subject bikah Serchhip District chu District titha ber a ni.

Sub-Hqrs. YMA Serchhip Inkhawmpui vawi 8-na chu zanin hian Thenzawl-ah neih tan a ni dawn a, naktuk zan-ah a tiak ang.