Lenkawl

Chhingchhip-a Sainik School chuan Inrinni khan '10th Founder Day' hmangin he hun hi Adviser to Chief Minister TBC. Lalvenchunga chuan Khuallian nin a hmanpui a ni.

Serchhip Vengchung Branch YMA ten an huamchhunga chenna In pakhat sak that hna an thawh chu zofel thawkhatin Vawiin lam hi chuan luahluh theih beisei a ni.

 

Serchhip District Volleyball Association (SDVA) chuan Inrinni (May 26, 2026) khan Serchhip Kawnpui VC Hall-ah kum 2026-2028 chhunga an hruaitu tur thlanna neiin President-ah VL. Hruaitluanga (Bazar Veng); Sr. Vice President-ah R. Lalhnehzauva (Vengchung); Vice President-ah Zothansanga (Chhim Veng); General Secretary-ah Jeremy Lianhmingthanga (Vengchung); Joint Secretary-ah C. Zoramthara (Darnam Veng) leh Ramthianghlima Ralte (Chanmari Veng); Treasurer-ah C. Lalhruaitluangi (Chhiahtlang Kawn Veng) leh Fin. Secretary-ah Lalmuanawmi (P&E Veng) te thlan an ni.

India rama khawchin thlirlawktu ber Indian Meteorological Department (IMD) chuan kumin hian chawlhkar khat zetin Fur a lo thleng hma dawn niin an hrilh lawk a, IMD Aizawl Director Sudheer Kumar Dwivedi chuan Fur (Monsoon) hi June ni 1-ah lo thleng tlangpui thin a ngaih a nih laiin kumin hian May ni 26-ah a lo thleng dawn ni a ngaih a nih thu sawiin, “Ni 7-in a lo thleng hma tura ngaih a ni,” a ti a. Chutih rualin ni 4-in a hma emaw, a tlai emaw thei tih a sawi bawk. Nikum-ah khan May ni 27-a Fur intan tura ngaih kha May ni 24-ah a thleng a. Kum 2020 atanga nikum inkar chhunga India rama fur lo thlen tlai ber chu kum 2023 kha June 8-ah a thleng a ni.

Chief Minister Lalduhoma chuan Sawhthing chu kan ram leilung tichhe tam lo zawng leh a hralhna lama kan lo hlawkpui zawk theih nan Organic kan uar a tul thu sawiin, tun dinhmuna beisei aia Sawhthing rate a sang chho chu engkim chunga roreltu Pathian hnathawh a ni tih an hriat thu a sawi.

Inrinni khan ‘Hmar Martarte Ni’ vawi 36-na chu Churachandpur (Manipur)-a Saikawt Playground-ah hman niin Mizoram Legislative Assembly Speaker Lalbiakzama chuan khuallian niin a hmanpui a ni.

Mizoram-a Chhul hmawr (cervical) Cancer zirchiangtu University of Melbourne leh Christian Medical College Vellore atanga lo kal leh SHE-CAN Project Mizoram te chuan Zirtawpni khan Health Minister Lalrinpuii chu a Pisa-ah kawmin an zirchianna leh hmalakna te an hrilh a. Heng mite hian Chhul hmawr Cancer chu mahni a in test theihna kit a awm thu sawiin, Mamit District-a khaw pali-ah zirchianna hi nei tawhin, hmeichhia kum 30 - 49 inkar te chu mahnia in test in an sample te chu ZMC&H Lab-ah test tura pek leh thin a ni a. He zirchianna ah hian hmeichhia 500 chuang enfiah zingah chuan natna lang chhuak lemlo Cancer intan thei tur dinhmuna ding mi engemawzat hmuhchhuah an nih bakah mi 3 chu cancer tan tir (pre-cancer) an ni tih hmuhchhuah an ni a, Mizoram State Cancer Institute(MSCI), Zemabawkah enkawlna pek nghal an ni.

DM&R Minister Prof. Lalnilawma hovin Zirtawpni khan Chief Secretary Conference Hall-ah DM&R Official te leh District tin-a Bawrhsap te chuan furpui lo thleng turin chhiatrupna leh harsatna hrang hrang a thlen thulh a inpuahchahna leh a kaihhnawih thil pawimawh hrang hrangte an sawiho.

Mizoram-a rawn zin Union Minister of State for Consumer Affairs, Food & Public Distribution (CAF&PD) Nimuben Jayantibhai Bambhaniya-i chuan Mizoram-ah mi tinin eikhawp hnianghnar an neih reng theih nan theihtawp an chhuah dawn tih a tiam.

Mizoram Police Cyber Crime Police Station te chuan YouTube-a mipat-hmeichhiatna lam hawi thawnthu ngialngan tak tak chhiar thin mi pahnih an man a, heng mite hi Henry Lalrinpuia (29), Hunthar, Aizawl leh Vanlalhmangaihzuala (35), Phuldungsei nia insawi te an ni a, heng mi ten YouTube kaltlanga video an tihchhuah te hian mipuite rilru hruai khaw lovin, a bik takin naupangte rilru a tihbuai theih avangin heng an thiltihte hi Bharatiya Nyaya Sanhita, 2023 leh Information Technology Act, 2000 hnuaia hrem theih a ni. Mizoram Police chuan Social Media leh Online platform dangah te hetiang mipat hmeichhiatna lam hawi thlalak, video leh thawnthute thehdarh chu dan kalh a ni tih hre turin mipuite a chah nawn leh bawk.

Lunglei-a Mizoram State University hmun tura ruahman pakhat, Serkawn-a Melte ram chu H&TE Minister Dr. Vanlalthlana hovin enfiah a ni a, H&TE Minister chuan Mizoram State University din turin sawrkar a inpeih thawkhat tawh tih sawiin, tihfel ngai te tihfel a nih chuan hna tan mai theih a nih thu a sawi bawk.

Health Department chuan tunhnaia Mizo-ram-a COVID-19 hri a darh thar anga sawi chu hlauhthawnawm anih loh thu an sawi.

Khawzawl District tlawha rawn zin Union Minister of State for Consumer Affairs, Food And Public Distribution Nimuben Jayantibhai Bambhaniya-i chuan Inrinni khan Chawngtlai khua tlawhin Handloom Training Centre leh PMAY-G hnuaia In sakte tlawhin SHG member-te nen an inkawm bawk.

Mizoram Universal Health Care Scheme (MUHCS) 2.0 atana inziahluh hun tawp ni, May 15, 2026 thleng khan online hmangin chungkaw 46,228 inziaklut an awm a, nikum aiin inziaklut hi a let chuangin an tam zawk a ni.

Mizoram-a rawn zin Union Minister of State for Consumer Affairs, Food & Public Distribution Nimuben Jayantibhai Bambhaniya-i chu nimin khan Chief Minister Lalduhoma chuan CM Bangla-ah kawmin thil pawimawh an sawi dun a. Chief Minister hian Open Market Sales Scheme (OMSS) hnuaia buhfai tam zawk lei phalsak chungchang sawipuiin, OMSS atanga lei a rem loh pawha Bharat Rice atanga lei phalsak turin a ngen a. NFSA Mizoram Rice allocation Quota tihpun chungchang leh Central Sector Scheme awm thin, 'Storage & Godown' tihnun thar leh chungchangte sawipuiin Union Minister chuan a lo bawhzui tur thu Chief Minister hi a hrilh bawk a ni.

Mizoram District tin atanga School thlanbik 118-ah nimin khan ‘Foundational Learning Study’ (FLS) 2025-2026 neih a ni a, Serchhip District-ah pawh zirna In thlanchhuah pahnih ah he hmalakna hi kalpui a ni.

India ram pumah nimin zing dar 6:00 atang khan Tuialhthei (Petrol leh Diesel) man tihsan a ni a, Mizoram-ah pawh tihsan nghal a ni. Indian Oil Corporation Limited (IOCL)-in Rate thar a siam angin Petrol litre khat Rs. 101.91 leh Diesel litre khat Rs. 90.59 a ni tawh dawn a, Tuialhthei man sanna hi Petrol-ah litre khat zelah Rs. 2.96/- leh Diesel-ah Rs. 2.82/- a ni. MIZOFED thuneitute chuan Mizoram-ah Petrol litre khat Rs. 102.11 leh Diesel litre khat Rs. 90.80 leh HP-ah Rs. 110.75 anih tawh thu an sawi bawk.

Serchhip DC Office Complex-a ni hnih (2) chhung awh ‘NMBA-Hriselna Kutpui’ neih chu nimin tlai khan zawhfel a ni ta.

India ram-a Chhiarpui neih mekah Census Operation (House Listing & Housing) 1st Phase 2027 chu zawhfel a ni a, Mizoram District 11-ah April ni 1 atanga April ni 15 chhunga mahni In lum atanga inziaklut, Self-Enumeration ti mi 12,655 an awm a ni.

Higher & Technical Education (H&TE) Minister Dr. Vanlalthlana chuan nimin khan Lunglei Pukpui-a Mizoram Engineering College (MEC) chei that mek te, Serkawn Melte-a Mizoram State University (MZSU) hmunpui tur leh Govt. J. Buana College (GJBC) Campus hmun tur ruahman bakah Theiriat-a Mizoram Polytechnic Lunglei (MPL) hmunhma te tlawhin an dinhmun a enfiah.

Nizan hmasa a Aizawl Chanmari-a Bike leh Scooter insutna ah Zonuntluangi (23), Thingsulthliah khua chu thiin nimin khan vuiliam a ni. He chetsualna hi nizan hmasa dar 12:00 vela thleng niin CCTV Footage atanga a lan danin Bike hi Wrong Side-a tlanin Scooter hi a su a, a hnunga Wrong Side tho-a tlan Bike chuan Scooter a chuang Zonuntlungi hi a su zui a, ka pawh chhawn lohin a boral zui a ni. He thil thlenga Bike khalhtu mi pahnih te hi man ni tawhin Aizawl Police Station-ah thubuai ziahluh nghal a ni bawk.

Hmeichhia leh naupang te himna atana Passenger phur Motor zawng zawng-a ‘Panic Button’ vuah chu mipui nawlpui ten an hriatthiam theihna tura inhrilhhriatna tur Video siam thar chu nimin khan Social Welfare, Woman and Child Development Minister Lalrinpuii chuan a Pisa-ah a tlangzarh.

Saitual Bawrhsap Srinivas Sadi chuan Ngopa Joint Action Committee (JAC) te chu NH-102B kawngpui an dan mek chu titawp turin a ngen. Nimin-a thuchhuah a siamah Bawrhsap Srinivas Sadi chuan Ngopa JAC ten NH-102B kawng siam mek chungchanga lungawilohna lantirna vanga kawng an dan chu sût tura ngenin, he kawng siam (Package-II Part-2) vanga In thiah ngai 6 te zangnadawmna atan cheng nuai 857 chuang chu NHIDCL lamin pek turin an buaipui mek thu a sawi a. Ngopa Town Area chhunga kawng siam quality chhe lutuk nia sawi pawh SDO (C) Ngopa kaihhruaina in 'Monitoring Team' din a nih thu leh Joint VC te pawh telin ni tin kawng siam hi an endik dawn tih a sawi a. An lungawilohna te chinfel a nih theih nan hian theihtawp chhuaha hma an lak mek thu a sawi bawk a ni.

Mizoram puala din NCC Group Headquarters Office thar chu nimin khan National Cadet Corps (NCC) Director General Lt. Gen Virendra Vats chuan Level 2, New High Court Parking Complex, MINECO-ah a hawng a, Mizoram sawrkar-ah mi pawimawh hrang hrang ten he hun hi an zawm a ni.

Jail-a tang mek chhungten dan leh hrai emaw, an chhungte Jail-a tang mekte harsatna emaw chungchangah thurawn an lak vat theihna tura duan, 'Mulaqat Legal Aid Helpdesk' chu nimin khan Central Jail leh Central Women’s Jail, Aizawl-ah Justice Nelson Sailo chuan a hawng a, kar tin Thawhtanni, Nilaini leh Zirtawpni-ah te hawn thin a ni ang.

Chief Minister Lalduhoma chuan Mizoram Cooperative Apex Bank (MCAB) chu a thlen chin apiangah mipuiten an chhawr tangkai tih a sawi.

Election Commission of India (ECI)-in a bik taka Electoral Roll ennawnna, Special Intensive Revision (SIR) thawh thumna kalpuina tura a ruahman zingah Mizoram State a tel avangin nimin khan hemi chungchangah hian Political party hrang hrang hruaitute chu Chief Electoral Officer (CEO) Mizoram Dr. Lalrozama hovin an thukhawm.

Chief Minister Lalduhoma chuan YMA chu kan tana ram rotling a nih thu a sawi.

Hulhliap Short Stay Centre atanga chhuak te tana tun thla ni 4 atanga ‘Hulhliap Short Stay - Aftercare, Skill Training & Handholding Course’ kalpui chu nimin khan Aizawl-ah kharna neih a ni a, he Training-ah hian Assistant Electrician (Batch 5-na), Aluminium Fabrication (Batch 4-na) leh Basic Food Processing (Batch 3-na) te tan Training neih a ni.

Union Minister of State for Consumer Affairs, Food And Public Distribution,Nimuben Jayantibhai Bambhaniya-i chuan nimin khan Khawzawl-a sawrkar hmun pawimawh leh hmalakna hrang hrangte a hmunah a tlawh.

Serchhip Vengchung Branch YMA chuan an huamchhunga chhungkaw pakhat te chenna In chu tunhnaiah thli in a tihchhiat avangin nimin atang khan hnatlangin a sak that hna an thawk.

Nimin khan Lawngtlai-ah sawrkar laipui in ruahmanna a siam hmanga hmalakna hrang hrang kalpui a nih dan thlirin District Development Co-ordination and Monitoring Committee (DISHA) chu an Chairman leh Lok Sabha MP, Richard Vanlalhmangaiha hovin an thukhawm a, he hunah hian Lok Sabha MP chuan Sawrkar laipui atanga scheme lo kal thin te tha leh rintlaka thawha, a hun tak zawh thin a pawimawh thu sawiin, a bik takin Line Department ten mawhphurhna lian tak an neih thu a sawi bawk.

Champhai North Bialtu MLA Er. H Ginzalala chuan nimin khan a Bial chhung, Vaikhawtlang ah Baibing tharchhuah te awlsam zawka Nizung chakna hmanga an rêp rona tur, Solar Dryer hawngin Baibing rep hralhchhuah tur, ‘Zo Baibing’ tia vuah chu a tlangzarh nghal bawk.

Police Training School (PTS), Thenzawl-a hmasawnna ruhrel din thar hrang hrangte chu nimin khan Home Minister K. Sapdanga chuan a hawng.

PHE Department hotute chuan nimin khan Thenzawl tana tui lak dan tur leh Neihloh khaw thar din tura tui pek dan tur a hmunaah an enfiah a, he hunah hian Chief Engineer (CE), Zone-I Er. Lalropuia leh thawktu dangte Aizawl atanga rawn kalin Serchhip atangin EE leh SDO ten an lo tawiawm a ni. PHE Department hotute hian Thenzawl tui tlan ber Vanva Tuikhuah hna thawh tan mek leh leilungte chu hnathawktu Contractor te nen enhoin, Thenzawl tana tui hnianghnar zawk nei thuai thei tura hmalak dan turte an thlir a. Hemi hnu hian Neihloh khaw thar dinna hmun tura Tuitam lui Solar hmanga pump chhuah tur chu enfiahin Tuizem lian dahna tur leh thil tul hrang hrangte an enfiah nghal bawk a ni.

Nasha Mukt Bharat Abhiyaan (NMBA) Serchhip District hmalakna in hriselna kawnga harsatna nei ten man chawi lova Doctor thiam an pan theihna hun, ‘NMBA-Hriselna Kutpui’ chu nimin khan Serchhip DC Office Complex-ah neih tan a ni a, Vawiin hian chhunzawm lehin zawhfel a ni ang.

Ngopa Joint Action Committee (JAC) chuan NH 102B Package 2 hna a chhiat lutuk avanga lungawi loh lantir nan nimin zing dar 7:00 atang khan tiamchin awm lovin Total Bandh an huaihawt a, hei hian awmzia a neih loh chuan Vawiin hian Manipur panna kawng dan zui an tum bawk.

Mizoram sawrkar General Administration Department enkawl sawrkar quarters luah dilna leh pekna online hmanga kalpuina, ‘Quarters Allotment Management System’ (QAMS) leh State pawna Mizoram House-te online hmanga book-na ‘Mizoram House Online Reservation System’ te chu nimin khan Chief Minister Lalduhoma chuan a hawng.

 

Sawrkar laipuiin Chhiah chawi dan thar a duan, New Income-Tax Act, 2025 chungchang inzirtirna chu nimin khan Aizawl-a Taxation Auditorium-ah neih a ni a, he hunah hian Dan thar pawimawh zual, Digital-a file dan leh TDS chung-chang te sawifiah a ni a, heng bakah hian tlangmi (Tribal) te tana dan hlui Section 10(26) hnuaia Scheduled Area-a Tribal-te Income Tax ngaihna-thiamna (exemption) kha, Dan thar Schedule III, Sl. No. 19-ah chhunzawm zel a nih thu te tarlan a ni bawk a. He Dan thar hi kumin April 1 khan hman tan a ni tawh a ni.

Election Commission of India chuan a bik taka Electoral Roll ennawnna, Special Intensive Revision (SIR) thawh thumna neih a nih tur thu nimin khan puangin Mizoram tiamin State 16 leh Union Territory 3-ah SIR hi kalpui a ni dawn a, July 1, 2026-a kum 18 tling chin te chu Electoral Roll-ah thun tur an ni ang.

All India Service (AIS) leh Central Service-a Mizote kan luh theih nan inbuatsaihna tura Mizoram sawrkarin a buatsaih ‘UPSC Grooming’ chu niminpiah khan School Education Minister Dr. Vanlalthlana chuan a Pisa-ah a hawng.

 

Rural Development & Administration Department (RD&AD) Minister Prof. Lalnilawma chuan nimin zing khan Lunglei Circuit House Conference Hall-ah Rashtriya Gram Swaraj Abhiyan (RGSA) hnuai atangin Lunglei District chhunga Village Council 22 te hnenah Computer Set leh Printer a hlan a, he hunah hian Minister chuan Rural Local Body-te'n sawrkar laipui duhsakna chang a, hmasawnna hna thawhna tur an dawng thin chu a nihlawhthlak hle tih sawiin, VC-te'n Own Source Revenue (OSR) atan VC Act thar hmangin Property Tax leh Animal Registration Tax te an khawn tan tawh thu a sawi a, heng Fund te hi khawtlang tana tangkai thei ang bera hmang turin a chah nghal bawk.

Cheng vbc. 189.78 senna tur Mizoram Ginger Unique Selling Proposition Project Sustainable Ginger Cultivation & Value Chain Development Project chu Chief Minister Lalduhoma leh DoNER Minister Jyotiraditya Scindia ten nimin khan hawngin he Project-a Sustainable Cultivation, Farm Mechanization leh a dangte hi Ministry dangte nena thawkho (Convergence) a kalpui tur a ni a, Post-Harvest Management & Processing chu NEC (Focussed Development Component) Fund atanga thawh tur a tih niin cheng vbc. 30.13 chheh hran a ni a. Project hawnna neih zawh veleh Ministry of DoNER chuan cheng vbc. 30.13 hi NEC-ah hian sanction nghalin rang taka pawisa an rawn sanction avang hian Chief Minister Lalduhoma chuan lawmthu a sawi a ni.

Mizoram Cooperative Apex Bank (MCAB) chuan Reserve Bank of India (RBI) hnuaia Scheduled Bank an hmuh lawmna nizan hmasa khan neiin Chief Minister Lalduhoma chuan MCAB chu a thlen chin apiangah mipuite pawhin an chhawr tangkai tih a sawi.

Kumin 2026-a Higher Secondary School Leaving Certificate (HSSLC) result chhuaka Science, Arts leh Commerce Stream-a Mizo zirlai tithate chawimawina hun chu nimin khan Mizo Students’ union (MSU) leh Mizoram Cooperative Apex Banks Pvt. Ltd. te buatsaihin Aizawl Vanapa Hall-ah neih a ni a, he hun hi Health Minister Lalrinpuii chuan khuallian niin a hmanpui a ni. Nimin-a HSSLC-a tithate chawimawina ah hian Science Stream-a titha mi pali te, Commerce Stream-a titha mi pathum leh Arts Stream-a titha zirlai pathum te hnenah chawimawina hlan an ni a, MCAB Chairman Lalnunsanga Rokhum leh MSU President B. Lalkhawngaihzuala te pawhin thu an sawi bakah zirlaite tan Career guidance chungchang inzirtirna neih a ni bawk.

 

Adviser to Chief Minister (Technical) leh Champhai North Bialtu MLA Er. H. Ginzalala chuan nimin khan Hnahlan PHC-a hman tur X-Ray Machine a hawng a, X-Ray khawl hman theih tura hawn a ni ta chu lawmawm a tih thu sawiin,  Hnahlan leh a chhehvel khua ten tangkai taka an hman a beisei thu a sawi a. Damloh nikhuaa X-Ray ti tura Champhai pan vang vang ngai tawh lova anmahni khaw hmun a chhawp hnaih a ni chu hmasawnna ropui tak a nih thu sawiin, he khawl an neih theihna tura tha leh zung sengtu zawng zawng te chungah lawmthu a sawi bawk. Ramri hrul a awm an nih avangin Hnahlan PHC chu tih changtlun a tul hle thu Bialtu MLA chuan sawiin, PHC mamawh hrang hrang bakah thildang tangkai turte neih belh zel a nih theih nan theihtawp chhuah a tul thu a sawi bawk.

Mizoram Food, Civil Supplies & Consumer Affairs Department chuan kumtin-a a lo tih thin angin kumin (2026)-ah Fur khawchhiat lai a khaw thenkhat tlawhpawh harsa, leh ei leh bar lakluh harsatna thin khua ten buhfai an tlakchham loh nan buhfai chhekkhawl lawk (Monsoon stocking) a kalpui leh a. Heng khaw hrang hrangten Furpui chhunga anmahni chawmtu Supply Centre 70-ah an mamawh tur zat buhfai quintal 1,66,655.90 chu thlen kim a ni tawh tih an sawi a. Hei vang hian mipuite, a bik takin thingtlang hmun kilkhawr zawka chengte Furpui a lo thleng a nih pawhin buhfai-ah harsatna a awmlo a ni tih mipuite an hriattir nghal bawk a ni.

Serchhip-a awm 14th Assam Rifles te chuan nimin khan District Hospital Serchhip Blood Bank a dah turin thisen Unit 10 an pe a, thisen petute hi mipa vek niin Serchhip Blood Bank-ah kalin thisen hi an pe a ni.

Ngopa Joint Action Committee (JAC) chuan NH 102B Package-2 siam mekah an ngenna in awmzia a neih loh chuan Vawiin, May 14, 2026 (Ningani) hian Total Bandh huaihawt an tum tih an sawi a. Ngopa JAC chuan NH 102B Package-2 siam mekah hian hna a chhiain a nih tur ang a ni lo nasa nia sawiin, zangnadawmna hnawl chungchang te, khaw chhung kawng peng hrang hrang laihchhiat siam that leh loh te, kawng zau zawng a nih tur ang tling lo lutuk te, hmanraw hman a chhe lutuk leh thil dang tam takah a nih tur ang a ni lo nasa nia sawiin, hemi chungchang ah hian NHIDCL, Contractor leh Chief Secretary hnenah hma lakpui tura an ngenna chuan awmzia a nei lo nia a lan thu an sawi a. Hemi chungchanga ngenna an siam hian awmzia a neih loh chuan Vawiin atang hian Ngopa khawchhung ah Total Bandh huaihawt a ni dawn thu leh awmzia a nei lo zel a nih chuan NH 102B chu tiamchin awm loa khar a ni dawn tih an sawi a ni.

Rural Development & Administration Department changtu Minister Prof. Lalnilawma chuan nimin khan Siaha leh Lawngtlai tlawhin VC te hnenah Computer a sem a, Lawngtlai-ah District Panchayat Resource Centre (DPRC) a hawng nghal bawk.

Labour, Employment, Skill Development and Entrepreneurship (LESDE) Department changtu Minister Lalnghinglova Hmar chuan nimin khan ‘Mizoram Labour Link’ Mobile App tlangzarhin he Application hi ni tin inhawhfa thinte (Daily Labourer/Workers) leh a chhawrtu tur (Employer) indawr tawnna tur (Digital Platform) atana duan a ni.

Nimin khan Siaha-a District Rural Resource Centre-ah District Development Coordination & Monitoring Committee (DISHA) thutkhawm chu an Chairman leh Lok Sabha MP Richard Vanlalhmangaiha hovin neih a ni a, he hunah hian Lok Sabha MP chuan Quarter tina neih thin DISHA meeting chu a pawimawh thu sawiin, Department tinte thawhhona tha a awm theih nana hmaraw pawimawh tak a ni tih a sawi a, in bengvar tawna District hmasawnna tura infinchhuah tawn thin turin a fuih bawk. DISHA thutkhawm ah hian Department hrang hrang hnuaia Sawrkar Laipui Scheme khawihtu ten nikum lama DISHA Meeting hnuhnung bera ruahmana an siam te chu a dinhmun thlirho a ni a, an hmalak tawhna te bakah harsatna an neih te sawizauna an nei a ni. DISHA hi sawrkar laipui hmalakna niin District hrang hranga sawrkar laipui hmalakna te vil a, a khawihtu Department hrang hrangten thawhhona tha an neih theih nana hmalakna a ni.

Nimin khan Ghaziabad (Uttar Pradesh)-a SDGI Global University chuan Convocation hmasa ber hmangin Mizoram Larsap, General (Dr) Vijay Kumar Singh chuan khuallian niin a hmanpui a, he University hi Uttar Pradesh Private University Act, 2019 hnuaiah July ni 14, 2023 khan din niin zirlai 5,500 dawn an awm a, Sundar Deep Educational Society-in an enkawl a ni.

Ministry of DoNER hnuaia cheng vbc. 189. 78 senga kalpui tur Mizoram Ginger Unique Selling Proposition (USP) – Sustainable Cultivation & Value Chain Development Project chu nimin khan Chief Minister Lalduhoma leh DoNER Minister Jyotiraditya Scindia ten online-in an hawng.

Mizoram Veterinary Service Association Annual General Conference vawi 44-na chu nimin khan AH&Vety Rest House, Selesih-ah neih niin AH&Vety Minister C. Lalsawivunga chuan khuallian niin a hmanpui a. MVSA hi October 15, 1975-ah din niin tunah hian AH & Vety Department-ah MAH&VS post 115 awmah thawklai 73 an awm mek a ni.

Kumin chhungin Serchhip District-ah African Swine Fever (ASF) vangin Vawk 676 zet a thi tawh a, Vawk 385 suat a ni tawh bawk.

Niminpiah khan East Lungdar-ah ‘Nu te ni’ denchhenin nu chhuanawm te chawimawina hun hmangin mi pahnih te hnenah chawimawina hi hlan an ni.

Mizoram-a Science NGO upa ber, Mizoram Science Society (MSS) chuan Mizoram-a a hmasa ber atan Mizoram Science Award chu nimin khan Aizawl Mission Veng-a cheng, Dr. L.N. Tluanga hnenah an hlan a, Mizoram Science Award hi Mizote zinga Science leh a kaihhnawih lama khawtlang leh ram tana hnuhma nei tha te, Scientific research lama mi hmingtha leh thawhhlawk te hnena hlan thin tura Mizoram Science Society(MSS)-in a duan a ni a, he Award hian tangkafai Rs. 50,000/- kengtelin Award dawng tura thlan Dr. LN Tluanga hi a taksa a chak loh ve deuh tawh avangin Aizawl Hospital-ah enkawl mek niin Award pawh hi damdawi In-ah hian hlan a ni.

Mizoram-a Sangha khawitute intawhkhawmna, Mizoram Fish Farmers' Meet chu nimin khan Aizawl-a Dawrpui Multipurpose Hall-ah neih a ni a, he hun hi Chief Minister Lalduhoma chuan telpuiin Sangha tharchhuah tam lama hma kan sawn theih nan Fisheries Minister kaihhruaina hnuaiah thapui thawh mek a nih thu a sawi a ni.

 

Nimin khan Serchhip khuaa nu chhuanawm (exceptional mother) chawimawina hun Serchhip DC Pisa-ah hman niin Serchhip Venglai-a cheng A. Lalawmpuii hnenah he chawimawina hi hlan a ni.

Serchhip khawpui chhung paltlangtu kawngpui chu cheitha turin sum ruahman ni tawh mah se blacktop hna tan hun tur erawh hriat ala ni lo.

Khawvel pum-a Nurse te Ni, International Nurses’ Day 2026 chu nimin khan khawvel hmun hrang hrangah hman niin Serchhip-ah leh Aizawl-ah te pawh he ni pual hian hun hman niin Tuichawng-a Health & Wellness Centre-a thawklai Lalenthangi Hnamte hnenah ‘National Florence Nightingale Award’ hlan a ni bawk.

Sub-Hqrs. YMA Serchhip hruaitute chuan nimin khan PWD Serchhip Division-a Sr. Executive Engineer, Er. Zokhuma chu a Pisa-ah kawmin Serchhip Mat Phai kaltlanga Zote South panna kawng siam mek chungchang an sawipui a. PWD Sr. EE chuan tunhnaia Social Media-a lo lang lung chang tha lo chhekkhawl chu a hmunah an enfiah tawh thu sawiin, hman tlak a nih loh avangin hmang lo tura thawktute an hriattir thu a sawi a, he kawng hi meter 2.5-a zau tura rua-hman a nih thu pawh sawiin, Zote South khaw-chhunga kawngpui zim zual te pawh a theih anga zauh tura ruahmanna awm te a lo hrilh bawk a ni. Hei bakah hian Sub-Hqrs. YMA hruaittute hian Serchhip khawpui chhung kawngpui siam mek chungchang pawh PWD hotute hi an sawipui nghal bawk a ni.

Zonet TV Pvt. Ltd. buatsaih ‘Miss Mizoram 2026’ thlanna neih zawh taka 2nd Runner-Up lawmman dawngtu Vanlaltanpuii chu nimin khan MJA Serchhip District chuan lawmpuina hun an buatsaih.

Mizoram-a Volleyball inelna ngaihhlut hlawh Pro Volleyball League (PVL) vawi 9-na chu nizan hmasa khan khelh tan a ni leh ta a, June 13 khian khelh zawh a ni ang.

Aizawl Municipal Corporation (AMC) Term 4-na a Executive Council Meeting hmasa ber chu nimin khan Mayor H. Lalremtluanga kaihhruaiin a Pisa-ah neih a ni a, he hunah hian Deputy Mayor leh Executive Council Member te bakah Municipal Commissioner leh AMC-a Officer dangte an tel a ni.

Health & Family Welfare Minister Lalrinpuii chuan cheng nuai 601.34 senga sak Sub-District Hospital Tlabung building thar chu nimin khan a hawng.

Mizoram sawrkar-a Fisheries Department leh Central YMA te chuan Luidung Humhalh tura thawhhona thuthlung nimin khan an ziak a, tun tum thu thuthlung an ziah tum thumna a ni.

Aizawl-a Helen Lowry Higher Secondary School chuan 28th Graduation Commencement Program chu nimin khan ‘Reaching New Heights’ tih thupui-a hmangin an hmang a, he hun hi Adviser to Chief Minister TBC. Lalvenchhunga chuan a hmanpui a, kan kalna lama hlawhtlinna kan chan thuai theih nan tumruhna leh taihmakna a pawi-mawh thu sawiin, zirlaite chu harsatna hmachhawn ngam tur leh inelna sang tak hmachhawn ngam turin a chah bawk. He huna tarlan a nih danin Helen Lowry School hi January 17, 1950 khan zirlai naupaang 10 neia bultan niin Mizoram-a English Medium School hmasa ber a ni a, kumin a HSSLC Exam-ah khan zirlai 224 ten exam beiin 196 an pass a, Commerce-ah zirlai pass vekin Arts-ah 85.53% leh Science-ah 82.76% an pass a. HSLC-ah zirlai 84 ten exam hmachhawnin 79 an pass bawk.

Mizo Hmeichhe Insuihkhawm Pawl (MHIP) General Hqrs. chuan Mizoram Police leh Uttarakhand Police ten May ni 5, 2026-a Beauty Queen Salon & Spa, Rudrapur, Uttarakhand a thawk tur leh inzawrh luihtirtu a puh Lalnunsiami (30), Kolasib, New Diakkawn leh a pasal anga a neih, Spa neitupa Mohmmad (31), Bareilly, Uttar Pradesh, tuna Rudrapur-a awm mek manchhuah an ni ta chu lawmawm an tih thu an sawi a. “Hetiang thil bawlhhlawh a mahni Mizo puite hnukluttu hi kan dem tak zet a, Dan hnuaiah an phutawk hremna an hmuh ngei theihnan theihtawpin hma kan la zel ang,” an ti bawk.

Doordarshan News Director Nampibou Marinmai chuan nimin khan Sports & Youth Services Department changtu Minister Lalnghinglova Hmar chu a Pisa-ah kawmin khawtlang, khua leh District level-a infiamna lama thil thlengte tha zawk leh kimchang zawka puanzar a nih theihna atan Sports & Youth Services Department leh Doordarshan ten thawhhona tha zawka an kalpui theih dan tur te an sawidun a. Sports Minister chuan Doordarshan nen tang-kawpin infiamna lam coverage tha zawk siam tura ngenin, hei hian infiamna lama thawhhona a tihchak a beisei thu a sawi bawk.

Mizoram State Policy Coordination Committee (MSPCC) chu nimin khan P&PI Department Conference Room-ah Vice Chairman Dr. KC. Lalmalsawmzauva kaihhruaia thukhawmin Commerce & Industries (C&I) Department leh Horticulture Department atanga Handholding Scheme hnuaia loan leh CM Special Package dilna lut te an enfiah a. C&I Department atanga an Department Nodal Committee in dilna 28 a 'recommend' chu an enho hnuah Partner Bank te hnenah thawn turin 18 an pawm a. Horticulture Department atangin CM Special Package dilna 176 pawm sak a ni bawk.

Lunglei District Development Co-ordination and Monitoring Committee (DISHA) chu nimin khan an Chairman leh Lok Sabha MP Richard Vanlalhmangaiha hovin Lunglei DC Conference Hall-ah an thukhawm a, he hunah hian sawrkar laipui ruahmanna hnuaia hma-sawnna hnathawh hrang hrang thlirho niin MGNREGS hnuaiah Lunglei District-a khaw 106-ah Job Card nung 20,077 awm mekin, kum 2025–2026 chhungin ni 100 inhlawhna siam a ni tih tarlan a ni a, PMUY hnuaia a thlawna gas connection pek chhungkaw 919 an awm thu pawh tarlan a ni bawk.

Union Minister of Law and Justice Arjun Ram Meghwal chuan nimin khan Mamit khawtlang hruaitute leh NGO te chu Mamit-a Tourist Lodge-ah kawmin an harsatna te a ngaihthlak sak a, Sawrkar Laipuiin theih anga puih a tum thu sawiin, mipuite harsatna sutkian chu Sawrkar in a tum ber a ni tih a sawi a. Hei bakah hian Union Minister hian NABARD hruaitute hmuin an hnathawh te a enpui bawk. He hunah hian Mamit Bawrhsap Suvigya S Chandra leh SP Manny Bhushan Singh te pawh telin mipuiin harsatna an neih chu a rang lama bawhzui an tum thu an sawi a, harsatna an neihah te office pan hreh lo turin an fuih bawk.

 

Serchhip Police te chuan Mobile Phone rukbo report an dawn pali te chu CEIR Portal kaltlanga an chhuichhuah hnuah nimin khan a neitute hnenah an hlanlet.

Mizoram Police ten ‘Year of Discipline’ atana kum 2026-2027 an puan chu nimin khan Mizoram chhunga an Unit hrang hrangah Programme siamin a taka hman tan a ni.

Ministry of DoNER-a Secretary Sanjay Jaju chuan nimin khan Thenzawl tlawhin DoNER hnuaia hnathawh tur ruahman te a hmun ah a tlawh.

KMMTTP and Railway Impacts Study Committee chu nimin khan Secretariat Conference Hall-ah thukhawmin an hmalakna an thlirlet bakah hmalak zel dan tur an sawiho. Kaladan Multi Model Transport Transits Project (MKKTTP) and Railway Impacts Study Committee thutkhawm hi an Chairman T. Lalhlimpuia MLA chuan kaihruaiin nikum lam atanga nasa taka hma an lak tawh thu te, thil tam tak hmuhchhuah an neih thu te, Sawrkar leh mipui in buatsaih a tul thu te a sawi a. Study Committee-a Member Zomuana chuan presentation neiin Study Committee hmalak tawhna entirin an thlirho a, hmachhawp awm mek te uluk takin an thlir a, activity kalpui zel dan tur ruahmana thar an siam bawk. He hunah hian Department hrang hrang aiawh Committee Member te pawhin an Department in MKKTTP leh Railway in Mizo mipui te tana remchang a siam tura mipuite leh thalaite buatsaih dan tura rawtna an neih te an sawi a, thlirho leh tura mumal zawka ziak a thlen tura tih an ni.

State Level DISHA Committee (SLDC) thutkhawm chu nimin khan an Chairman leh Chief Minister Lalduhoma hovin neih a ni a, he thutkhawm ah hian Mat Multipurpose Dam buaipui mek chu cheng vbc. 274 senna tur Project duan fel a nih tawh thu leh Brahmaputra Board ten a thawhna tur sum an dap zui dawn thu a sawi bawk.

Chief Minister Lalduhoma chuan 166 Infantry Battalion Territorial Army (Home & Hearth) a thawk tur Mizo thalai thlanchhuah hmasa ber mi 144 te chu nimin khan Aizawl-a Assembly Annexe Building Conference Hall atangin a vailiam.

Ram lei leh hralh bakah inremna hrang hrang siam nana hman thin ‘Non Judicial Stamp Paper’ aiah ‘e-stamping’ hman a nih theih nan nimin khan  LR&S Department leh Stock Holding Corporation of India ten thawhhona thuthlung an ziak.

Khawzawl leh Ngaizawl inkar kawng siamna a eirukna awm nia sawi chungchanga mawhphurtu a puh Assembly Speaker hlui Lalrinliana Sailo laka ACB in thubuai ziahluh phalna an dil chu Mizoram sawrkar chuan remti in April 23, 2026 khan Prosecution sanction a tichhuak a. He thubuai ah hian Lalrinliana Sailo hian hnathawktute hnen atangin sum a dawng nia puh a ni.

Mizoram Police te chuan tunhnaia Beauty Queen Salon & Spa, Rudrapur, Uttarakhand-a thawk tur inzawrh luihtir chungchanga a mawhphurtu zinga mi nia puh Lalnunsiami (30), Kolasib New Diakkawn chu an man a, Aizawl a lak a nih hnuah Women and Child Development Department enkawlna hnuaiah an awm rih nia thudawn a ni.

Kum khata ni 125 inhlawhna tur Viksit Bharat – Guarantee for Rozgar and Ajeevika Mission (Gramin) Act, 2025 (VB-G RAM G) chu rampum ah July ni 1 atang khian hman tan a ni dawn a, he hmalakna hian thingtlang khawsak a chawikan phah beisei niin he Scheme atan hian cheng vbc. 95,692 dahhran a ni tawh a, kum 20 chhung lo hman tawh MGNREGA a thlak dawn a ni.

Mizoram Public Service Commission (MP-SC) chuan thuchhuah siamin MPSC Online Portal chu khawl lama harsatna a awm avangin One Time Password (OTP) chu SMS/message kaltlanga dawn theih a nih loh thu leh Candidate-te’n harsatna an tawh avanga pawi an tih thu an sawi a. Hei a vang hian Commission-in May 8, 2026-a Notification a lo chhuah tawh Post hrang hrang tana Departmental Examination buatsaih turah applicant-te in-register hman lo an awm avangin Departmental Exam la ‘clear’ lo te tan dilna thehluh (submit) hun chu May 18, 2026 (Thawhtanni), tlai dar 4:00 thleng pawhsei a ni tih an tarlang.

Information & Public Relations Department Director K. Vanlalsangi chuan nimin khan Lawngtlai leh Siaha District tlawhin I&PR Department-a thawktute bakah Mizoram Journalist Association (MJA) member te a kawm a. Heng District pahnih a tlawhna ah hian I&PR Director chuan Sawrkar thuchhuak dik taka thehdarh bakah Department-te hmalakna kawng hrang hrang puanzar kawngah DIPRO Office chuan mawhphurhna an nei lian hle tih tarlangin, sawrkar rintlaka thawk thin turin a chah a. MJA leh I&PR te chu ram leh mipuite tana thawkho, inngheng tlat an nih angin ram leh mipuite tana thawkho zel turin a fuih bawk a ni. I&PR Director hian heng District pahnih-a an Office hmunhma te a hmunah enin Fur ruahtui tlak hmaa thawmthat ngai te a enpui a, an mamawh hrang hrangte an lo thlen nghal bawk a ni.

 

May thla Pathianni vawi hnihna-a hman thin Nu te ni, Mothers’ Day chu nimin khan khawvel hmun hrang hrangah hman a ni a, Nu te hriatrengna leh chawimawina hun atan hman a ni. Mother’s Day hi Salvation Army India Eastern Territory-ah chuan chawhma inkhawmah an hmang thin a, Naupang leh thalai ten an nu te hnenah pangpar leh thilpek hlanin he ni pual hian thuchah ngaihthlak a ni bawk. Kum 1936 July - August thlaa chhuak ‘Sipai Tlangau’ a Darnghaka, YPSM, Thiltlang Corps-in a ziah atanga a lan danin, kum 1936 vel atang khan Mizoram-ah hian Nu te ni hi hman a lo ni tawh a ni.

Nikum September 19-a Serchhip District Court-a Additional District & Sessions Judge Circuit Court hawn a nih hnuah a tum khatna atan tun thla ni 7 leh 8 khan Serchhip hmuhah Judge rawn thuin thubuai ngaihtuah a ni.

Nikum 2025 chhung khan Mizoram-ah mitthi 8,080 an awm nia chhinchhiah a ni a, heng zinga 5,183 te chu mipa niin hei hi mitthi zawng zawng atanga chhutin za zela 64.14 (64.14%) a tling a. Hetihlai hian nikum chhung vek khan Mizoram-ah naupiang 21,873 an awm bawk.

Sawrkar kum kalta nikum April 2025 atanga kumin March 2026 inkar chhung khan Mizoram sawrkarin naupang leh tleirawlte harsatna chingfel tura a ruat, Child Welfare Committee (CWC) chuan case 1321 leh Juvenile Justice Board (JJB) in case 261 an chingfel.

Mizoram Tourism Service Association (MTSA) leh Tourism Staff Welfare Association (TSWA) chuan sawrkar in April 30, 2026-a pension-a chhuak R. Lalrodingi a ruai (re-employ) nawn chu lawmawm an tih thu an sawi.

Lunglei District Jail-a tang te chhuah tura document lem siamtu Jeremia Lalthangtura chu Police ten thu an zawhfiah hnuah District Jail Lunglei-a a nghet lova Ambulance driver hna thawk mek C.Laltlanhlua (31) , Republic Vengthlang, Aizawl chu a inhnamhnawih ve ngei nia hriat niin tun thla ni 7 khan District Jail-ah hian dahluh an ni.

ZPM Thalaite chuan NH-06 Sairang leh Kawnpui inkar kawng siam chu Inrinni khan a hmunah enfiah lehin Furpui hmachhawn zo tura NHIDCL leh ZPM Sawrkar hmalakna ah an lawm tih an sawi.

School Education Minister Dr. Vanlalthlana chuan tunhnaia Board Exam result an tihchhuah dan chu thil thar a ni lo tih sawiin, danglamna an siam kawngah dawih taka ke pen an tum lo tih a sawi.

Sawrkar kum liamta 2025-26 chhung khan Mizoram-ah khualzin mi 9,80,618 chhinchhiah an ni a; heng zinga mi 9,66,060 chu India mi niin, rampawn mi (foreigner) 14,558 an awm a, hriat theih chinah kum 17 chhunga Mizoram a khualzin rawn lut an tam ber kum a ni.

Central YMA chuan ruihhlo dona kawnga hma an lakna kal mekah Inrinni zing khan Aizawl khawpui chhunga Veng pasarih  - Zemabawk, Thuampui, Bawngkawn, Ramhlun North, Chanmari, Zarkawt leh Electric Veng-a hmun lun laiah Street Campaign hi an buatsaih a;  Central YMA hruaituten hmanpuiin Branch YMA hruaitute leh CEC Member ten an tawiawm a, tunkar Inrinni hianhmun 8-ah neih leh a ni ang. Central YMA hnuaia ruihhlo do pawl, Central Anti-Drugs Squad chuan tun thla (May) ni 1 atanga Zrtawpni thleng khan ruihhlo chi hrang hrang - Heroin hàwng 8, Tictac bûr 185, Chhin sen 2, Ganja gram 8 leh Zu ûm 24 an man tawh a; hemi kaihhnawihah hian mi 42 manin Excise & Narcotics Department hnenah mi 2 an hlan a, midang 40 hi Counselling Class an neihpui bawk.

Chief Minister Lalduhoma chuan Inrinni zing khan Lunglei Municipal Council (LMC) Office tlawhin LMC Chairman Lalzuithanga leh a thawhpui Councillor zawng zawngte bakah Official ten an lo dawngsawng a. Chief Minister hnenah hian LMC Chairam Lalzuithanga chuan LMC hmalakna kawng hrang hrang leh Lunglei khawpui hmasawnna tura mamawh hrang hrang awm te a lo thlen a, Chief Minister chuan an mamawh thlente chu theihtawpa ngaihtuah pui a tum tih a sawi a ni. He hunah hian Chief Minister hi Health Minister Lalrinpuii leh MLA Clement Lalhmingthanga, V. Malsawmtluanga, T. Lalhlimpuia leh Lalramliana (Papuia) ten an tawiawm a. Hemi hnu hian Chief Minister hian Aizawl a pan leh nghal a ni.

Doordarshan Kendra (DDK) Aizawl Director (News) Nampibou Marinmai chuan Inrinni khan Ngopa-a Assam Riffle Camp tlawhin an Commander Sub. SK. Singh a kawm a, an hmalakna te leh ramri venhimna kawnga hma an lakna te an sawidun nghal bawk.

Lawngtlai atanga Myanmar-a bungrua dah tura kal Tipper (MZ-07/A-1792) chu nimin zing khan Serkawr leh Kawlchaw inkarah chesualin kawngthlang ah a tlanliam a, he Motor khalhtu Laltlanhlua (24) leh 2nd Driver C. Zomuanpuia (37), Lawngtlai-a khawsa te chu a boral.

Lunglei Thuamluaia Mual-a 2 Mizo Battalion National Cadet Corps (NCC) buatsaih ‘NCC Fest & Parasailing Camp’neih mek chu Inrinni khan Health Minister Lalrinpuii chuan khuallian niin a hmanpui a, he hunah hian NCC Alumni te, NCC leh thalaite tana thawh hlawk tak takte leh ram pum huapa mi hmingthate chawimawina hun hman a ni bawk. Mizoram-a NCC Fest & Parasailing Camp hmasa ber hi May ni 5 atang khan neih niin Vawiin thleng hian neih a ni dawn a, NCC chungchang hriat zauna tur leh NCC zawm tura thalaite fuih phurna tura ruahman niin, North East State hrang hrang atangin NCC Cadet thahnem tak an rawn tel a. May ni 5 atangin 2nd Bn. MAP Ground, Luangmual-ah Parasailing Camp hi kalpui tan niin, NCC Fest hi May ni 8 leh ni 9-ah C. Thuamluaia Mual-ah nghah a ni thung.

Zoram Medical College & Hospital-a Department of Pediatrics leh Department of Obstetrics & Gynaecology te tangkawp chuan Inrinni kata, May 10, 2026 khan 'Neonatal Resuscitation Program Day' an hmang a, ZMC&H-a Dean, Professor Swati M Patki chuan a hmanpui a ni. He program hi Indian Academy of Pediatrics (IAP) leh National Neonatology Forum (NNF) bultum in ram pum a State 35 leh UT tinah a ruala hman ho tura duan niin a hmaan hun atan May 10, 2026 hi ruat a ni a. Nausen pianghlim harsatna nei te chhanchhuah dan training hrang hrang Nurse leh Doctor tam thei ang ber te hnenah pek a ni. India ramah hian nausen piang 10 zelah 1 hi thawk lama harsatna neiin an lo piang thin a, a hun taka buaipui nghal anih chuan nausen tam tak chhanchhuah an lo ni ta thin a ni. He training-ah hian naupang Doctor, Gynaecologist, Medical Officers, Interns leh Nurse thahnem tak telin nausen pianghlim harsatna neite chhanchhuah an lo nih zel theih nan leh Mizoram in Infant Mortality Rate (IM...

Tunhnaia District Jail. Lunglei-a tang te document lem hmanga chhuah chungchang chu Police ten chhui mekin hemi chungchanga an hmalakna leh thil awmdan chu Vawiin khan an puangchhuak a, hemi chungchang ah hian hmalak mek zel a ni. Police thuchhuah a ngai ngaiin....

Tunhnai khan PHE Department-a Engineer thenkhat chu aan awmna hmun siksawi a ni a, hemi ang hian PHE Serchhip WATSAN Division-a EE nilai, Er. Isaac Lalchhuanmawia chu Mamit WATSAN Division-a EE hna chelh tura sawn a ni a, a aiawh tur hian Khawzawl WATSAN  Division-a EE nilai Er. Liantluanga Chohte chu rawn awm tura tih a ni.

Serchhip-a Addl. DC hna chelhtu Lalrinzuala chu hmundang-a thawk tura deputation-a a kal hnuah Serchhip-a Addl. DC hna chelh tur hian Ngopa-a SDO (Civil) hna chelh mektu Dorothy Muansangi chu rawn dah thar a ni a, ani hi tunhnai khan Junior Administrative Grade-a kaisang a ni. Serchhip Addl. DC tura ruat Dorothy Muansangi hi hun engemaw chen Serchhip District-a lo awm tawh thin a ni.

Serchhip District Superintendent of Police Gavit Gogna IPS chuan thuchhuah siamin Serchhip IOC Veng, DC Office peng atanga hmarlam, New Serchhip lam hawi zawnga ft. 40-a thui chu kawngpui insuihfinna lai (Junction) pawimawh a nih avangin mipui leh lirthei he kawng hmangtu te him zawk nan ‘No Parking Area’ atan puan a nih thu a tarlang a. He thupek hi May 8, 2026 atanga thuleh awm hma chu hman tur niin thupek zawm lo te chu Section-177 MV Act hmanga hrem an nih tur thu a tarlang bawk.

Mizoram Food & Allied Industries Corporation Limited (MIFCO) chuan Lakhuihthei leh Sapthei tui in nghal mai theih tura an siam, Ready To Serve (RTS) beverages chu niminpiah tlai khan Chhingchhip-a an hmunpui-ah an tlangzarh.

Chief Minister Lalduhoma chuan kan ramah ruihhlo a hluar avangin kan thalai tam takte nun a chhe mek tih sawiin, kaihruaitu tha an mamawh thu a sawi a. “Kan thalai tam tak ten NCC zarah nun kawng dik an zawh a, ram tana mi hmantlak ni turin an inzir mek a ni,” a ti.

India hmarchhak-a Cooperation Secretary-te leh Cooperative Societies-a Registars te inhmuhkhawmna chu nimin khan Mizoram Assembly House-a Legislative Hall-ah neih a ni a, he hun hi Ministry of Cooperation-a Secretary Dr. Ashish Kumar Butani chuan a kaihruai a ni.

All India Radio (AIR) kum 90 tlin lawmna pualin nimin zing khan AIR Aizawl chuan a huho a ke-a kal, Walkathon a huaihawt a, Tuikhuahtlang AIR Station atanga Millennium Centre thleng a huhoin AIR-a thawktute leh lo thawk tawh thin bakah mipui thahnem tak an kal a ni.

Mizoram-a Private School neitu intelkhawm pawl, Mizoram Independent Schools Association (MISA) chuan MBSE-in kumin HSLC Ieh HSSLC result a tihchhuah danah Merit List, Subject Topper, Letter hmuh zat leh Division a tilang ta lo chuan zirlai naupangte a tihnual nia sawiin, pawi an tih thu an sawi.

Nimin khan Aizawl Khatla-a Royale Lalawi Hotel Conference Hall-ah UNNATI Scheme in a tum te inzirtirna leh inhrilhfiahna hun buatsaih a ni a, Commerce & Industries Minister F. Rodingliana chuan khuallian niin a hmanpui a ni.