Latest News

Chanchin thar thenkhat :

Sample thawn leh dawn

Mizoram-a COVID-19 hri leng mek chu eng natna ber/natna hrik (variant) nge a nih tih hre turin tunkar hian sample 100 vel thawn leh tum a ni a, IDSP hotu Dr. Pachuau Lalmalsawma chuan kar hmasa lama Sample thawn an tum tawh thu uluk lehzuala tih a ngaih avang leh ZMC lam an la buai avangin remchang hmasa ah thawn an tum ta zawk niin a sawi. Tunhnaia COVID-19 natna hrik thar Delta Variant B.1.617.2 hmuh a ni chu mak an ti lemlo nia sawiin, “Tunhnaiah hian inkaidarh a awl em em mai a, chuvangin hetiang variant hi a awm kan lo beisei sa a ni a, mak kan ti lem lo a ni,” a ti. RT-PCR Result sample hi National Institute of Biomedical Genomics (NIBMG), Kalyani, West Bengal thawn thin a ni a. March ni 27-ah vawi 2-na thawn niin sample 218 thawn zingah Delta variant 4 hmuh a ni a. NIBMG hi Mizoram West Bengal, Jhar-khand leh hmarchhak bial ten an intawm avangin test a muang thin hle niin a sawi bawk.


Project Mizoram hnuaiah sem

Aizawl District Bawrhsap hmalakna a NGO Samarpann, Mumbai te nen thawhhona 'Project Mizoram' hnuaiah Inrinni khan Aizawl District chhunga Containment Zone-ah ei leh in tur chi hrang hrang a thlawna sem a ni a, a bultanna atan Saron Veng Containment Zone- a cheng chhungkaw 100 hnenah buhfai, dal, alu, tel leh adt sem niin, DC Office atangin Priyank Kishore IAS Asst Commissioner chuan a hmunah hlanna a nei a, hetiang hian Containment Zone dangah pawh la sem zel tura ruahman a ni.


MSU in raltlan te an tlawh

Mizo Students' Union (MSU) General Hqrs., Aizawl leh Myanmar Refugee Relief Committee (MRRC) te chuan kar kalta khan Tuipuiral khaw hrang hranga Myanmar raltlan te tlawhin an dinhmun an enfiah bakah chhawmdawlna te an hlan a, MSU President, J. Lalmuanzuala chuan raltlan te chu an awmna khawtlang hruaitute thu awih taka thlamuang taka awm tur a chah bawk.


MLA hovin thingtiak phun

Mamit Joint VC te chuan Inrinni khan an bialtu MLA, H. Lalzirliana hovin Mamit khawdai National Highway 44(A) kawng kamah thingtiak phun hnatlang an nei a, he hunah hian bialtu MLA chuan thing chu phun mai a tawk lo tih sawiin, a puitlin thlenga enkawl a ngai tih a sawi a. Kumin ah Mizoram hmun hrang hrangah kangmei nasa tak a chhuah laia ram kang ven hna thawk tha lawmman pakhatna an dawng chu chhinchhiah tlak a tih thu a sawi bawk.


PC Party in sawrkar an phut

Peoples' Conference Party chuan Lock-down thlahdul hlei theilo khawp dinhmuna kan din avang leh Covid-19 hripui avanga kan thih mawlh mawlh a; a ni tela hrikai thar kan pun chhoh zel lai hian chak taka hripui do nana tun aia nasa zawka insengso ngam tur leh thildang zawng aia hripui leng ti ziaawmna tura hmalakna tun aia nasa zawka bei ngawrh lehzual tura Mizo-ram sawrkar an phut thu an sawi

Comments

Chhiar Hlawhte