RT-PCR chungchanga PIL ngaihtuah tan a ni

Lunglei Civil Hospital-a RT-PCR khawl bun a nih theihna tura Gauhati High Court, Aizawl Bench-a PIL lut chu nimin khan ngaihtuah tan a ni.

Judge pahnih awmna Divisional Bench chuan nimin khan he PIL hi ngaihtuahin, mipuite tana thil tha ber tur chhawpchhuah sak chu sawrkar mawhphurhna a ni tih leh thubuai hi mipui tana thil pawimawh tak a ni tih a sawi a. “DIPR Press Release June 2-a tihchhuah ah RT-PCR Laboratory dinna tur DPR cheng vbc. 7.8 NEC-a dil mek a nih thu tarlan chuan Mizoram in hri leng dona kawngah Sample Test theihna tur a mamawh belh ngei tih a lantir a. Hetihrual hian he thuchhuah vek hian Hospital and Medical Education Director in khawl bun tura kumin May 7-a thupek a lo tihchhuah tawh chu a kalh a ni,” a ti. High Court chuan Ministry of Home Affairs in kumin March 23 khan RT-PCR hmanga Sample test zat tipung turin  State leh UT te chu thu a pe tih pawh sawiin, hetiang a nih laia Mizoram sawrkar in Lunglei Civil Hospital chu sawi loh, District khawpui Hospital-ah te pawh RT-PCR Laboratory din tura hma a lak loh chhan chu a hrethiam lo tih a sawi a. Hei vang hian Central sawrkar-a thupek siamtu, Ministry of Home Affairs Secretary pawh PIL hmanga khin mek, Respondent zingah a telh nghal a. Kumin May 7-a HME Director in RT-PCR khawl bun tura thupek a lo tihchhuah tawh bawhzui a nih dan leh thawktu awm zat dinhmun te zawtin, he thubuai karleh Nilaini-a ngaihtuah leh a ni ang.