Lenkawl

Pradhan Mantri Awas Yojana (Urban) hnuaia Serchhip District-a In sak tanpuina diltute dilna ngaihtuahin nimin khan Serchhip-ah District Screening Committee thutkhawm neih a ni.

Serchhip Sub-Hqrs. YMA chuan tunhnaia Mizoram leh Assam inrina-a buaina thleng chungchanga Assam Chief Minister chet dan chu an dem thu an sawi.

Tunhnaia ramri-a buaina thleng nghawng kal zelah Serchhip District-ah Tuialhthei a harsa mek zel a. Serchhip-a PB. Lalzuithanga Filling Station chuan Permit nei te hnenah chiah Oil hi an pe thei tawh tih sawiin, tunah hian Tripura-a Oil phur turin Motor pakhat a thang mek thu leh Silchar lamah Tanker pathum a tan mek thu an sawi a, karleh lamah chuan Oil hi rawn thleng tura an beisei thu an sawi bawk. Thenzawl-a Mizofed Pump chuan BPCL Tanker a len avangin Tripura-a Oil la turin an Motor an tir theilo tih an sawi a, R. Lallura Filling Station chuan Tripura-ah Motor pakhat a thang mek tih sawiin, Zozo Filling Station chuan an Motor chu Tripura-a tirh theih a ni lo tih an sawi bawk.

Nimin khan Serchhip District-ah ASF vanga Vawk thi 63 awm belh lehin Serchhip District-ah hian ASF vangin Vawk 2699 zet a thi tawh a ni.

July 27-29, 2021 chhung khan ICAR-ATARI Zone-VII hnuaia awm State hrang hrang – Megha-laya, Manipur, Mizoram, Nagaland leh Tripura te chuan kum 2020 chhunga an hmalakna hrang hrang thlirhona hun chu biakhmuhtheihna hmangin an nei a, he hunah hian Mizoram-a KVK hrang hrangte pawhin an hmalakna te an tarlang a ni. He hunah hian kum 2020 chhunga hma la tha te hnenah Award semna neih niin KVK Serchhip (North Vanlaiphai) chu ‘Best KVK for implementing Poshan Programme in the year 2020-21’ hlan an ni a, KVK Lunglei (Hnahthial) chu ‘Best NICRA KVK’ hlan an ni bawk.

Nimin-a Thalai Kristian Pawl (TKP) Day pual hian TKP Ebenezer Unit, Serchhip P&E Veng te chuan Serchhip Blood Bank-a dah turin thisen Unit 17 an pe a, thisen petute hi mipa 9 leh hmeichhia 8 niin Serchhip Blood Bank-ah kalin thisen hi an pe a ni.

Baptist Church of Mizoram (BCM) hnuaia thalai pawl, Thalai Kristian Pawl (TKP) chuan nimin khan an dinchampha vawi 70-na an hmang.

Serchhip DC Office-a Election Officer hna chelh tura ruat, Lalrinchhani Ralte chuan nimin khan Election Officer kalchhuak tur, Vanlalhmachhuana hnen atangin mawhphurhna a la ta a, Lalrinchhani Ralte hi LAD-a Deputy Director hna chelhlai niin Vanlalhmachhuana hi Mamit-ah SDO (Sadar) hna chelh turin a awm dawn a ni.      Hetihlai hian nimin khan Mizoram sawrkar chuan thuchhuah siamin North Vanlaiphai-a SDO (Civil), Dorothy Muansangi chu LAD-ah Deputy Director hna chelh tura sawn a ni ve leh thung a, North Vanlaiphai-a SDO (Civil) tur hi dah an awm hriat a ni rihlo thung.

Niminpiah khan Serchhip District-ah CO-VID-19 hri kai mi 3 hmuh belh leh niin Serchhip District-a hri kai hmuhchhuah chu mi 828 an tling tawh.

Sample Collection Kiosk

Mizoram-ah ni khat-a COVID-19 hri kai hmuhchhuah zat ala tlahniam thei tak tak lova, niminpiah khan Sample 6795 enfiah niin hri kai 774 hmuh leh an ni a, Sample enfiah atanga za zela 11.39 te chuan hri an kai a ni.

Mizoram sawrkar-a Home Department chuan tunhnaia Mizoram leh Assam ramri-a innghirnghona thlengah Assam sawrkar in an tihsual thupbo nana ruihhlo chungchanga Mizoram sawrkar a puhna chu nimin khan a chhanglet.

COVID-19 hri kai nasa taka pung chho mekin Mizoram a tihbuai viau laiin, ramri-a buaina chuan nasa takin a nghawng zui mek.

Health Minister Dr. R. Lalthangliana chuan nimin khan Aizawl khawpui huamchhunga COVID Care Centre (CCC) tura buatsaih mek te chu a hmunah tlawhin an inbuatsaihna kalmek te a enpui.

Sawrkar laipui Flagship Programme hnuaia intunnun tum mek Vairengte leh Saihapui ‘V’ a Kuthnathawktu te huan-ah Assam Police te an inkulh avangin Kuthnathawktu ten an huan an enkawlzui thei lova, kum tam tak an lo enkawl tawh an huan te chu an chan mai dawn nia hriain an mangan thu an sawi.

Mizoram sawrkarin Mizoram leh Assam ramri buai ngaihtuah tura a din, Boundary Committee chuan Mizoram leh Assam Boundary siamfelna atan Inner Line of 1875 chu Mizoram hmarlam ramri demarcate awmchhun a nih avangin hman tha an tih thu leh an dinna ngaiah an la ding reng tih an sawi.

Niminpiah khan Mizoram-ah Sample 7232 enfiah leh niin heng atang hian COVID-19 hri kai 1100 zet hmuhchhuah leh an ni a, heti hian Mizoram-a hri kai hmuhchhuah pawh 36,397 an tling tawh a ni.

Serchhip District Bawrhsap chuan nimin khan thuchhuah siamin Serchhip District-a Filling Station te chu khar vek turin a ti a. Law & Order kengkawhtu te, Medical Duty leh Medical Emergency chau hPetrol leh Diesel pekchhuah theih niin Petrol leh Diesel an neih zat pawh mumal taka chhinchhian endik a ni dawn a ni.

Serchhip District chhunga Thenzawl khua ah COVID-19 hri kai hmuhchhuah an pun zel avangin nimin khan Community Covid Care Centre (4C) chu hman tan a ni.

RAMRI BUAI LEH HNAM ‘REVIVAL’ - Dr. Ramdinthara Sailo

Serchhip District Consumer Association leh Food & Drugs Administration-a Inspector te chuan tunhnaia Serchhip a Buhfai thenkhat, Plastic Rice ni awm a ngaih theih lei an awm thu report awm chu bawhzuiin nimin khan Plastic Rice ni a sawi hi zirchianna an nei a. Heng buhfai te hi FDA lama mithiam ten uluk taka enfiahin chi hrang hrang hmanga an test atanga a lan danin Plastic Rice ni awma ngaih theih a nilo tih an sawi a. Chuvang chuan Plastic Rice ni lovin buhfai hlui leh chhia, a buk ti rit tura a siamtu emaw, a packtuten an telh ve niin a lang mah zawk tih an sawi a. Hemi chungchang ah hian ngaihthat lohna tur engmah hmuhchhuah a awm lo a ni tih an sawi bawk. Hemi chungchanga zawhfiah duh leh hriatfiah duh nei tan anmahni hnenah zawh theih a nih thu an sawi bawk.

Nimin khan Serchhip District-a khaw 13-ah African Swine Fever (ASF) vangin Vawk 44 a thi leh a, Vawk 64 suat leh a ni bawk.

Niminpiah khan Serchhip District-ah hri kai mi 13 zet hmuhchhuah leh an ni a, an zinga mi 2 tihloh chu Thenzawl khua vek an ni.

Serchhip District Sports Committee (SDSC) hruaitute chuan nimin khan Serchhip District Urban Development Officer (DUDO), Albert Vanlalliantluanga chu a Pisa-ah kawmin Serchhip Sports Complex chungchang an sawiho.

Tunkar Thawhtanni zan-a Serchhip Police te kut atanga tlanchhuak Johan MS. Zuala (34), Serchhip Saron Veng chu nimin khan Serchhip Police ten an man leh.

Sawrkar in inren turin ngen

Kolasib District Bawrhsap Dr. H. Lalthlangliana chuan Vairengte-a silai hmehpuah chu Assam Police-ten tihloh theih loh dinhmun a an nawrna vang a nih thu leh he thil thleng avanga nunna chan leh hliam an awm chu pawi a tih thu a sawi.

Mizoram Governor leh Mizoram University-a Chief Rector, Dr. Haribabu Kambhampati chuan nimin khan Mizoram University (MZU)-a Pro Vice Chancellor Prof. JK. Patnaik leh Registrar Prof. Lalnundanga te chu Raj Bhavan-ah a kawm.

Nimin khan Deputy Chief Minister, Tawnluia hovin Mizoram pawna thudik puanchhuah leh thehdarh chungchang ah kalphung tha zawk tur ngaihthuah a ni a, he hunah hian Information and Public Relations Department changtu Minister, Lalruatkima bakah phai lam chanchinbu leh TV-a thawk Mizo Journalist-te an tel a ni.

Mizoram sawrkar-a Home Secretary chuan Union Home Secretary hnenah lehkha thawnin Mizoram ei leh bar lakluhna kawngpui Assam in an danpin chungchang a thlen.

Assam Police ten July 26, 2021 (Thawhtanni) a Mizoram rawn luta buaina an siam vanga State pahnih inkara harsatna awmte sukiang turin nimin khan State pahnih Chief Secretary te chuan inbiakna an nei a, Mizoram leh Assam inrina NH. 306-ah Central Armed Police Forces (CAPF) duty chhunzawm turin remtih a ni.

Accreditation Card sem

Mizoram-a COVID-19 hri kai hmuhchhuah chu an la pung zel a, niminpiah khan sample 5206 enfiah leh niin heng atang hian hri kai 727 hmuhchhuah an ni a, Sample enfiah atanga za zela 13.96 te chuan hri an kai a ni.

Mizoram-a sumdawng, dawrkai, thlai leh thei zuartute chu an thil zawrh pakhat mah chheprelh lo tur leh a man (Rate) pangngai aia tova hralh lo tura hriattir an ni.

Nimin khan Health Minister Dr. R. Lalthangliana hovin Dedicated COVID Hospital (DCH), Zoram Medical College harsatna tawh chungchang leh damlote enkawltu Volunteers Frontline Workers indaih-lohna chungchang sawiho a ni.

PHE Department-in Serchhip mipuite châwmtu tui lâkna, Greater Serchhip Water Supply Scheme chu nimin khan Govt. Serchhip College-a zirlai naupang ten tlawhin, Tuikum lui-a tui an lâkna atanga tui an sem chhuah thleng a hmuna kalin an en.

Serchhip Sub-Hqrs. YMNA huamchhunga awm North Vanlaiphai Joint YMA chuan kan ram chhanna atana theihtawp chhuahtu Vairengte-a YMA te inpekna chu ropui an tih thu leh an chhuan thu sawiin, an bialtu MLA leh Home Minister, Lalchamliana’n ramri chungchangah theihtawp a chhuahna leh a thawh chu ropui an tih thu an sawi a. Heng hmalakna te an chhuang hle tih lantirna atan Vairengte Joint YMA ten a tul tul-a an hman atan Rs. 10,000/- chu nimin khan an hlan bawk.

Serchhip District chhunga Buangpui khua chuan COVID-19 vanga inkhuahkhirh mek Thenzawl khawtlang tan niminpiah khan eitur - Buhfai, Chawhmeh, thlai leh thei chi hrang hrang thahnem tak an pe a, Thenzawl Town Task Force Committee chuan an chungah thinlung taka lawmthu an sawi thu sawiin, heng te hi AYUSH Hospital CCC leh Veng hrang hrang a chhungkaw thahnem tak hnenah YMA Branch ten an semchhuak leh tih an sawi bawk.

Mizoram chhung District hrang hranga VC hruaitute chuan All Mizoram Village Council Association chu din thar leh tha tiin hruaitu tur pawh an inruat nghal.

Serchhip District chhunga ASF hri lenna khaw 18-ah nimin khan Vawk thi 60 zet chhinchhiah belh leh a ni.

Niminpiah khan Thenzawl-ah COVID-19 hri kai mi5 hmuhchhuah belh leh niin nimin khan hri kai mi 7 hmuh belh leh an ni bawk a, heng te nen hian Serchhip District-a hri kai hmuhchhuah chu 819 an tling tawh.

Tunhnaia ramri-a buaina thleng avanga POL Supply khaihlak thei dinhmuna kan din tawh avangin Serchhip District Bawrhsap chuan Serchhip District chhunga Filling Station ten POL pekchhuah dan khuahkhirhna a siam a. Hei hi Supply Department Director in Order alo siam tawh behchhana siam niin he ruahmanna aia tam hian POL hi pekchhuah tur ni lovin Bur-a dawh phal a ni lo bawk. Hei bakah hian Filling Station neitute chuan Petrol hi litre 2500 leh Diesel hi litre 4000 a awmin DCSO hnenah hriattir tur a ni bawk ang.

Tunhnaiah Serchhip District chhungah Malaria hri kai hmuhchhuah an awm leh tak avangin nimin khan Serchhip Zawlpui Phai-a ram riak thin te chu an thisen enfiah sakna neih a ni a, he hunah hian mi 39 te thisen enfiah niin Malaria hrik kai hmuh an awm lova, ramriak mi te hman thin Thosilen 20 chu damdawi hmanga chiah sak an ni bawk. Serchhip District-ah hian kumin chhungin nimin thleng khan Malaria hrik pai mi 24 hmuhchhuah an ni tawh a ni.

Tunhnaiah Mizoram leh Assam ramri-a buaina chhuak thar a awm avanga Mizoram mamawh rawn lut khaihlak avanga mipui tana harsatna thleng palh theih chungchangah Ser-chhip-a Legal Metrology Enforcement Staff te leh Serchhip District Consumers Association hruaitute chuan nimin khan Serchhip-a Dawr lian zual te chu tlawhin, mipui nitin mamawh an chhekkhawl dan an enfiah a, dawrkar ten bungrua an neih dan te hi fel taka chhinchhiahin bungrua lo chheprelh an awmlohna turin a tul anga hmalak zel an tum thu an sawi bawk.

Serchhhip DC Office-a thawk pakhat chu tunhnaia RT-PCR hmanga a Sample enfiah ah hri a kai tih hmuhchhuah a nih avangin Serchhip DC Office chu mipui tan dawr theih a ni rihlo a. Nimin khan Serchhip DC Office-a thawktute hi RT-PCR hmanga an Sample enfiah tura lak niin Ningani-ah result a chhuah beisei a ni a, hemi hma hi chuan dawr theihloh ala ni zui dawn a ni.  

Serchhip District Hospital-a thawklai leh District Surveillance Officer ni bawk. Dr. Lal-hlunpuii chu Aizawl East-ah Senior Medical Officer hna chelh turin sawn a ni a, Serchhip District Hospital-a thawk tur hian Kawrthah CHC-a thawk mek, Dr. Lalngaihawmi Chhangte (Public Health) chu rawn dah a ni thung.

Niminpiah khan Serchhip District-ah hri kai mi 7 hmuhchhuah belh leh niin Serchhip District-a hri kai hmuhchhuah chu 807 an tling ta.

African Swine Fever (ASF) avangin nimin thleng khan Serchhip District-ah Vawk thi ala awm belh zel a, nimin khan Vawk thi 73 zet chhinchhiah belh leh a ni.

Serchhip Police ten rukruk kaihhnawih thubuai-a an man, damdawi In-a enkawllai chu nizan hmasa khan Serchhip District Hospital atanga tlanchhuakin he thu buatsaih lai thleng hian man leh tumin zawn mek a ni.

Remna zawng thuai turin hrilh

Assam nen ramri chungchangah buaina lian tak a awm avangin Cachar District (Assam) leh Vairengte lam atanga POL, LPG leh Essential Commodities dangte lakluhna kawngpui chu tun dinhmunah a remchan rih loh avang leh mipuiin harsatna kan tawh loh nan Mizoram Sawrkar hmalakna-in Tripura atangin LPG leh POL chaw-lut turin IOCL hotute nen Supply Department chuan ruahmanna an siam a. Hemi chungchang leh ruahmanna siam dante chu nimin khan Director, Food, Civil Supplies & Consumer Affairs chuan President, All Mizoram Petroleum Dealers Association hnenah a hriattir a ni.

Niminpiah khan Mizoram-ah Sample 6392 enfiah niin heng atang hian COVID-19 hri kai 1118 hmuhchuah an ni a, Mizoram-ah ni khat a hri kai hmuhchhuah an tam ber ni niin ni khat-a hri kai sang chuang hmuh an nih vawikhatna a ni bawk.

Mizo Students’ Union (MSU) General Hqrs. chuan kan sawrkar hruaitute'n mipui duhdan taka huai taka thutlukna an siam chu lawmawm an tih thu an sawi.

MZP General Hqrs. chuan July 26, 2021 tlai-a Mizoram sawrkar in Assam Police te a chhanlet dân chuan MZP a tilawm zual hle tih an sawi.

Joint Action Committee on Inner Line Reserved Forest Demand chuan Mizoram Police ten hnehtu chan an chang zawk chu lawmawm an tih thu an sawi.

MNF Party chuan, “Pathian in kan Ram atana min pek hi Pathian hmachhuanin humhim zel hi kan tum tlat a ni,” an ti.

School Education Minister leh Rural Development Minister te bakah Serlui bialtu MLA te chuan nimin zing khan Saihapui 'V' a Mizoram Police duty-na hmun an tlawh.

Niminpiah lama Assam Police-ten Mizoram ramri-a IR Duty-na hnehchhuh an tumna hmun, Vairengte Auto Rickshaw Stand bul chu nimin khan Home Minister, Lalchamliana chuan a hmunah a tlawh a. Assam Police rawn luh tumna hmun thenkhatah Mizoram Police a tul anga dah zel an nih thu a sawi bawk.

Nimin khan Serchhip District-a ASF hri lenna hmunah Vawk thi 103 zet chhinchhiah thar niin ni khat-a Vawk thi chhinchhiah thar a tam ber tum nia hriat a ni.

Serchhip bialtu MLA, Lalduhoma chuan nimin khan lehlang-a a bial rawn tlawhin African Swine Fever (ASF) hri leng avanga harsatna tawk te tan Vawk In tihfaina tur Bleaching Powder a sem.

Serchhip District Bawrhsap, Kumar Abhi-shek chuan nimin khan thuchhuah siamin Mizoram-Assam ramri-ah buaina a awm avangin ni tin mamawh, ei leh bar lakkhawm chungchang ah Serchhip District chhûnga mipuiten harsatna kan tawh loh nan mahni ei leh in mamawh tawk aia tam inchhekkhawl loh tur a ni tih a tarlang a. Dawrkai leh sumdawngten dawr bungrua chheprelh emaw, Maximum Retail Price (MRP) aia to emaw a hralh loh tur a ni tih pawh tarlangin, hemi zawm lo chu dan anga hrem an ni ang tih a tarlang bawk. Hei bakah hian khawtlang hruaitute chu heng chungchangah hian mumal taka ruahmanna siama mahni Veng chhûng theuha hma la turin a ngen bawk.

Supply Department Director chuan nizan khan thuchhuah siamin ramri chungchangah Assam nen harsatna leh buaina kan lo tawh chhoh tak avangin POL-a sawrkar leh mipui ten har-satna liantham kan tawh loh nan The Mizoram Trade Articles (Licensing and Control) Order, 1987 para 24 & 25 in thuneihna a pek angin Petrol leh Diesel pekchhuah theih zat bithliah a siam thar a. Hemi ang hian Scooty tan litre 2, Two Wheeler dang tan litre 4, LMV/Sumo/Pik up Truck/Gypsy/Medium Truck tan litre 10 zel leh Truck tan litre 50 zel pekchhuah a ni anga, buhfai leh nitin mamawh phur Truck te chu an challan enin an kalna leh hawna daih tur pek an ni anga, bur-a dawh phal a ni lovang.

Serchhip District-ah COVID-19 hri kai hmuh-chhuah an la awm belh ve zel a, hetihrual hian hri kai zingah enkawl dam an awm belh ve zel bawk.

Kargil Vijay Diwas hmang

Pathianni khan Mizoram-ah Sample 1810 enfiah niin COVID-19 hri kai mi 547 hmuh thar leh an ni a, Sample enfiah atanga zaa 30.22 te chuan hri an kai a. Hetihlai hian July 21-24, 2021 chhunga Sample enfiah runpui-a hri kai hmuhchhuah 822 te ziahluh thar an nih avangin Pathianni a hri kai ziahluh thar chu 1369 zet an ni thung.

ZPM Thalaite chuan COVID kai te enkawlna tur damdawi In siam belh turin sawrkar an phut tih an sawi.

Kolasib District Bawrhsap, Dr. H. Lalthlangliana chuan, “Mizoram sawrkar chu engti zawng mahin tawlh kan tum lo, kan tawlh ai chuan a nih nih ni turin tan kan la ang,” a ti.

Tourism Minister, Robert Romawia Royte chuan nimin khan Chite Veng-a Convention Centre sakna tur hmun leh sa tura ruahmanna siam dante a hmunah kalin a enfiah.

Mizoram Legislative Assembly Speaker, Lalrinliana Sailo chuan nimin khan 'CHILDLINE 1098 Awareness Video Clip' chu nimin khan Video Conference hmangin a tlangzarh.

Congress Legislature Party (CLP) chuan Total Lockdown avanga eizawnna kawnga talbuai te, dinhmun harsa taka khawsa mek Mizoram mipuite dawmkanna tur Relief Programme liantham tak duangchhuak thuai turin MNF sawrkar an ngen tih an sawi.

Home Minister Lalchamliana chuan Mizoram Sawrkar chuan Assam leh Mizoram inkar ramri buai chu muanawm takin, Dawhkan kil-a chinfel thuai a nih a beisei tih sawiin, “Boruak tha tak hnuaia inbiakna a awm leh theih nan Mizoram Sawrkar chuan Assam Sawrkar pawh a tihtur tha taka ti turin a beisei a ni,” a ti.

African Swine Fever (ASF) avangin Serchhip District-ah nimin thleng khan Vawk 2356 zet a thi tawh.

Presbyterian Serchhip Field Veng Kohhran atanga Missionary-a chhuaka Champahour, Ruprai Bial, Tripura Mission Field-a thawk mek, Ramhlimawmi (SMB Contract Missionary) chu nimin zing khan COVID-19 vangin Tripura (Agartala)-ah a boral a. A ruang hi nimin khan Serchhip rawn panpui niin ruahman lawk ang chuan Vawiin hian Serchhip rawn thlenpui a nih hnuah vuiliam nghal tur a ni ang. Ramhlimawmi hian a pasal Vanlalpeka (Sponsore Missionary), Suarhliap khua leh a fa thla 6 mi a pawmlai mek a kalsan a ni.

Zirtawpni leh Inrinni khan Thenzawl-ah CO-VID-19 hri kai mi 24 zet hmuhchhuah belh leh an ni a, heti hian tunhnai chho ah Thenzawl-ah hian hri kai mi 32 zet hmuhchhuah an awm leh tawh a ni.

Nimin khan Mat Lui-a Chawm kai-ah ruang pakhat hmuh niin enfiah a nih hnuah Mangkhama (56), Serchhip Darnam Veng-a khawsa tih hriat a ni.

Tunhnaia Serchhip District chhunga Buh natna chi khat rawn leng chu Inrinni khan Serchhip-a thuthar thehdarhtu thenkhat te chuan a hmunah an zirchiang a. Heng thuthar thehdarhtu thenkhat te hian Piler khua te Lo neihna hmun chu tlawhin, he Buh natna Rice Blast, Mizo ten Buh hmuih tia an hriat lar rawn lanchhuah dan leh a enkawl dan te Agriculture Department atangin R. Lalrinawma MAS, ADOA bakah Serchhip District FOCUS DMU atangin Lal-lawmpuii SAC leh Sangnunmawia SAC te chuan an hrilhfiah a ni.

PHE Serchhip WATSAN Division-a thawk te chuan Serchhip khawpui chawmna atana Tuikum tui an lakna hmun tihfai hnatlang Inrinni khan an nei.

PAB pawm thlirhona nei

Inrinni khan Mizoram-ah Sample 4619 enfiah atangin COVID-19 hri kai mi 938 hmuhchhuah leh an ni a, Mizoram-ah ni khat-a hri kai hmuhchhuah an tam ber tum niin Mizoram-a hri kai hmuhchhuah chu an la pung zel a ni.

Zoram Medical College-ah COVID-19 damlo enkawlna atana damdawi an hman te chu tun dinhmunah an ngah tawk a, ventilator pawh nei tha tawkin, Ventilator thar 10 rawn bun turin phai lam atangin Company Rngineer te an rawn kal dawn.

Vawk natna hlauhawm tak, African Swine Fever (ASF) lenna chhana ngaih, Mizoram State pawn atanga Vawk laluttu chu chhuichhuah a la ni lova, hetihlai hian March 21, 2021 hnu lama Vawk thi avanga sum hloh (economic loss) chu cheng vbc. 120 vel a tling tawh nia ngaih a ni.

Inrinni khan Union Home Minister, Amit Shah hovin India hmarchhak state Chief Minister-te chu Shillong khawpui-ah inhmukhawmin North East State tinte kaihhnawih thu pawimawh hrang hrang an sawiho a. He hunah hian Mizoram atangin Chief Minister, Zoramthanga chu telin tunhnaia ramri-a buaina chungchang a sawilang.

Aizawl Theological College (ATC) Alumni-in 'Oxygen for Tahan' ti-a vehbur an khawnkhawn atanga Myanmar-a mi harsate tanpuina tur thawhkhatna chuan Tahan a thleng tawh.

State Immunization Officer Dr. Lalzawmi chuan Mizoram pumah tluang taka Covid hri danna (vaccine) pekchhuah a nih zel thu a sawi a, mipuite chu dawt leh insawithaihna a awm a nih pawha vaccine lak chu a him a ni tih hriaa la theuh turin a sawm.

Kikawn Welfare Committee chuan nimin khan Serchhip SP Conference Hall-ah Vanlalmuana, 3rd Bn. MAP chawimawina hun an buatsaih a, he hunah hian chawimawina thuziak leh pawisafai an hlan a ni. Kikawn Welfare Committee hruaitute chuan COVID-19 hri len laia hri kai pawh huama Vanlalmuana inpekna chu ropui an tih thu leh chawi-mawi phu an tih thu an sawi a ni. He hun hi Serchhip SP, Stephen Lalrinawma pawhin hmanpuiin hetianga khawtlang in chawimawina an hlan chu lawmawm a tih thu leh Vanlalmuana hi Department pawhin chawimawina an hlan tawh thu a sawi bawk.

Serchhip District Addl. DC. Lalmuansanga Ralte chuan nimin khan thupek tichhuakin Mizo-ram sawrkar DM&R Department-in Order a tihchhuah bawhzuina atana Serchhip District Bawrhsap in hri leng avanga inkaihhruaina chungchanga tun thla ni 17-a Order alo tihchhuah tawh chu July 31, 2021 zanlai dar 12:00 thlengin a ngai angin Serchhip District chhungah hman chhunzawm tur a nih thu a tarlang a. He thupek zawmlo te chu Dan hmangin hrem theih an nih tur thu a tarlang tel bawk.

Nimin khan Serchhip District khaw 14-ah ASF vangin Vawk 46 thi lehin khaw 8-ah Vawk 50 suat leh a ni bawk.

Serchhip District chhung Lungpho khua a rawlthar pakhat chu hri leng avanga inkhung-hranna hmunah boralin niminpiah khan vuiliam a ni.

Consumer te thubuai ngaihtuahtu, 'District Forum' chu 'District Commission' tia thlak a nih hnuah Serchhip District Commission President atana ruat thar, Dr. HTC. Lalrinchhana hovin nimin khan Serchhip District Consumers Association te chuan Virtual Meeting an nei a. He hunah hian Consumer Court-a Case pending neih lai te pawh tinung thar lehin Court hi function leh thuai turin hmalak nise an ti a ni.

Niminpiah khan Serchhip District-ah COVID-19 hri kai mi 3 hmuhchhuah niin an vai hian Thenzawl khua vek an ni.

Agriculture Department hmalakna in kumin hian Serchhip District chhunga khaw 19-ah Vaimim chin niin heng khua-a Vaimim tharchhuah te hi sawrkar chuan a lei sak leh dawn a. Vaimim beitu rannung, Fall Army Worm (FAW) chu kumin hian awm leh mahse Vaimim tharchhuah lamah erawh nghawng nei lemlo tura ngaih a ni.

Serchhip-a Agriculture Department chuan Sub-Mission on Agroforestry (NMSA) Small Nursery atangin nimin khan Zawngtah tiak 9050 an semchhuak.

MCAB hmalakna thlirho

Mizoram-ah COVID-19 hri kai hmuhchhuah an la pung zel a, niminpiah khan Sample 5308 enfiah niin hri kai 847 hmuhchhuah leh a ni a, Sample enfiah atanga za zela 15.95 in hri kaiin Mizoram-a ni khat a hri kai hmuhchhuah tam ber ni a thleng leh a, Mizoram-a hri kai hmuhchhuah pawh mi sing thum aiin an tam ta a ni.

Mizoram sawrkar chuan Mizoram leh Assam ramri buai ngaihtuahtu tur Boundary Committee chu Deputy Chief Minister, Tawnluia kaihhruaina hnuaiah a din.

Serchhip District chhunga Baktawng Tlangnuam (Chhuanthar) ah COVID-19 hri kai hmuhchhuah thahnem tak an awm avangin nimin khan nimin khan a khaw pum Sample la-a enfiah hna thawh tan a ni.

Indian Medical Association (IMA), Mizoram State Branch-in COVID-19 hri kaite endik nawn (Exit Test) nei lova inchhuah tir dan thar chu mithiam zirchianna (Scientific evidence) behchhan a nih avangin himah an ngaih thu an sawi.

Health Minister Dr. R. Lalthangliana chuan Mizoram District tin ten COVID-19 dona kawnga hma an lak dan chu lawmawm a tih thu sawiin, Sample enfiahna hmanrua, Sample Test Kit (RAgT) chungchangah harsatna a awm loh thu a sawi bawk.

Niminpiah khan Mizoram-ah Sample 4378 enfiah leh niin heng atang hian COVID-19 hri kai mi 625 hmuhchhuah leh an ni a, Sample enfiah atanga za zela 14.27 te chuan hri hi kaiin Mizoram-a COVID-19 hri kai hmuhchhuah chu 29,645 an ni tawh a ni.

Lok Sabha MP in sawipui

Nimin khan Health Minister Dr. R. Lalthangliana hovin Aizawl khawpui leh a chhehvel hmun thenkhata Sample Test runpui, Mass Testing neih mek chungchang sawihona neih a ni.

ZPM Thalai Serchhip Block chuan Serchhip District chhunga Mualcheng (Artahkawn) leh North Vanlaiphai inkar kawngpui siam mek chu a hna a chhiain a lungawithlak loh an tih thu an sawi.

Serchhip DC Office-a Election Officer leh Serchhip BDO hna chelh mektu Vanlalhmachhuana chu Mamit DC Office-ah SDO (Sadar) hna chelh tura sawn a nih avangin nimin khan Serchhip DC Office-a thawktute leh Serchhip BDO Office-a thawktute chuan a thlahna hun an hmang a, nimin vek khan Serchhip Officers Club te pawhin thlahna hun an hmang bawk.

Serchhip DC Office Election Branch-a thawktute chuan nimin khan Serchhip-a kum upa te enkawlna hmun, Beiseina In (Old Age Home) chu tlawhin Artui case khat leh T-Shirt an hlan a, helai hmunah hian mi panga (5) awm mekin Election Office-a thawktute hi Election Officer, Vanlalhmachhuana hovin an kal a ni.

Niminpiah khan Serchhip District-ah COVID-19 hri kai mi 7 hmuhchhuah belh leh niin nimin khan mi 4 enkawl dam an ni bawk.

Nimin khan Serchhip District-ah khaw 16 ah ASF vangin Vawk 63 lai a thi leh a, Vawk 79 suat leh a ni bawk.

Govt Serchhip College NSS Unit buatsaihin nimin khan 'NSS Award 2021' semna neih niin Judithi Lalchanpuii hnenah he Award hi hlan a ni.

Serchhip District chhung khaw 25-a Thingtlang Lo-a Buh chin te chu kumin hian Buh natna chi khat, Rice Blast chuan a bei mek a, Agriculture Department chuan a theih anga hma lain damdawi nen tan an la mek.

Kumin chhungin Serchhip District-ah Malaria hri kai mi 23 zet hmuhchhuah ni tawhin Malria vangin mi 2 an boral tawh bawk a. Kumin a Malaria hri kai hmuhchhuah te hi thla thum (3) chhunga hmuhchhuah vek niin nikum (2020) kumtluan-a Serchhip District-a Malaria hri kai hmuhchhuah aiin an tam tawh zawk a ni.

Serchhip District-a mi 39,224 te hnenah CO-VID-19 Vaccine Dose 1-na pek ni tawhin an zinga 10,626 te chu Dose 2-na pek an ni tawh.

Serchhip District chhunga African Swine Fever (ASF) hri lenna hmunah nimin khan Vawk thi 69 awmin Vawk 60 suat leh a ni bawk.

Serchhip Vengchung Branch YMA chuan nimin khan an dinchampha vawi 83-na an hmang.

Niminpiah khan Serchhip District-ah CO-VID-19 hri kai mi pahnih hmuhchhuah niin nimin ah hri kai zingah enkawl dam an awm belh lo thung.

 Central YMA in lawmthu sawi

Niminpiah khan Mizoram-ah Sample 4530 enfiah leh niin heng atang hian COVID-19 hri kai 725 zet hmuhchhuah leh an ni a, Mizoram-a hri kai hmuhchhuah chu sing thum an tling dawn hnai tawh a ni.

Mizoram Police CID (Crime) chuan kum 2009 atang khan thubuai ziaklut tanin kumin hian kum chanve chhungin thubuai 10 ziahluh an nei tawh.

Mizoram Pradesh Congress Committee (MPCC) chuan Mizoram sawrkar in Aizawl khaw-pui chhunga Mass Testing a nei tan chu lawmawm an tih thu an sawi.

Aizawl Municipal Municipal Corporation (AMC) huamchhungah Total Lockdown kalpui a nih leh tak avang leh Containment Zone-a puan Veng a tam tak avangin thei leh thlai sem dan tur ruahmanna an siam tih Horticulture Department Director, Dr. Elizabeth Saipari chuan a sawi.

COVID-19 chungchanga Mizoram sawrkar thu puangtu leh State Nodal Officer, Dr. Pachuau Lalmalsawma chuan Mizoram-ah COVID-19 hrik, Delta Variant bakah Alpha Variant leh Eta Variant a awm tih finfiah a ni tih sawiin, Mizoram District hrang hrangah heng hrik thar hi a awm theih tawh thu a sawi bawk.