NEUM ten a huho-a chawlh lak tum an thulh leh rih

NHM Employees Union Mizoram (NE-UM) chuan Vawiin atanga ni thum (3) chhung a huho-a chawlh lak an tum chu an thulh rih tih an sawi.

Nimin-a thuchhuah an siamah NEUM hian thuchhuah an siam leh Minister hnena lehkha an thehluh chungchangah nimin khan Health Minister in Cheif Secretary hnena Meeting lo neihpui tura a hriattir angin Health Department leh DP-&AR-a Secretary bakah Finance Commissioner leh Mission Director NHM te nen Meeting hi an nei tih an sawi a. He Meeting hian an harsatna sutkian anih theih nan Study Group siam tura a tih thu leh Study Group-ah hian Secretary H&FW, Secretary DP&AR, Finance Commissioner leh Mission Director NHM te telin July 14, 2021 atang hian hma an la nghal ang tih an sawi a.

Heng bakah hian an hlawh lak regular loh chungchangah regular zawka hlawh an lak theih nan Advance allocation neih theih dan tur ngaih-tuahpui turin Finance Commissioner chu hriattir nghalin an Meeting minute hi Chief Minister office-ah file kaltir nghal turin tih a ni bawk tih an sawi a. He Meeting hian an harsatna leh an duh angte hma an lakpui nghal dawn avangin Chief Secretary leh Officers dangte chungah pawh lawmthu an sawi tih NEUM chuan sawiin, an ngen angin Vawiin atanga ni thum chhung Mass Casual Leave lak an tum chu tun dinhmunah chuan thulh rih a ni tih an sawi a. An beisei anga thil a kal lo a nih chuan a tul angin hma an la chhunzawm zel ang tih an sawi bawk.