MLA Fund atangin Vawk thi phumna tur laih leh a ni

Serchhip District-ah African Swine Fever (ASF) avanga Vawk thi an la awm belh zel avangin Serchhip Mualvawm-a Slaughter House ram-ah Vawk phumna tur laih belh leh a ni.

Serchhip District-ah ASF avanga Vawk thi an awm avang hian bialtu MLA, Lalduhoma hmalakna in June 23 khan MLA Fund hmangin Slaughter House ram-ah hian Vawk phumna tur hi laih a lo ni tawh a, hemi tum hian Vawk phumna tur khur 21 laih niin heng te hi mipui ten tangkai takin an hmang zui a, heng khur laihsa te hi hman vek a nih tawh avang leh Vawk thi ala awm zel avangin bialtu MLA hian MLA Fund atanga sum rawn ruahman lehin he sum hmang hian nimin khan Vawk thi phumna tur hi laih leh a ni a, nimin khan khur 15 chu hman theih tura laih leh niin heng khur pakhat ah hian Vawk pakhat aia tam te pawh phum theih tura ruahman a ni.

Helai ram neitu AH & Vety Department a thawktute chuan Vawk thi te hi phum duh hun a inan loh avangin helai ram hman dan ah hian khuahkhirhna khauh tak kenkawl theih a ni lo tih an sawi a. Tunhnaia mi thenkhat ten Vawk an phum an vur thatloh chungchangah, mipuite chu an Vawk phum te damdawi nen tha tak leh uluk taka chhilh thin turin an chah bawk a. Vawk thi phumna tura bialtu MLA in sum a rawn rua-hman chu lawmawm an tih thu sawiin, helai hmun hi Vawk thi phumna tur hmun nei remchanglo te tana ruahman a nih thu leh Vawk vulhtu tam zawk chuan anmahni ram-ah an phum thu an sawi bawk a ni.

ZPM Serchhip Block chuan hri avangin Vawk a lo thi a nih pawhin, a thih atanga a rang thei ang bera Vawk ruang tuamna tur sarang pawh Bialtu MLA chuan kan awmna Veng khawtlang hruaitu/VC hnenah min chhawpsak vek bawk tih sawiin, hman tangkai tum turin an chah a. Vawk hri in min kian sanin Vawk thi pawh awm tawhlo se tih chu an duhthusam a ni tih an sawi bawk.