Aizawl District-ah hri leng vanga harsatna thlirho

Nimin khan Aizawl-ah District Bawrhsap, Dr. Lalhriatzuali Ralte hovin COVID-19 avanga harsatna an tawh hrang hrang thlirhona neih a ni.

Aizawl DC Conference Hall-a he hun hman ah hian Aizawl SP, C. Lalruaia chuan lockdown chhunga duty thenkhat hri kai an awm avanga harsatna an tawh thu a tarlang a. Social Welfare Department aiawh atangin Centre 45 zingah Ccentre 38-a awm zawng zawng vaccine First Dose pek a nih tawh thu tarlan a ni bawk a. Maxi Cab Owners’ Association (MCOA)-ah member 200 vel Aizawl District chhungah an awm thu leh thla hnih chhung lockdown chuan an eizawnna a nghawng dan te sawilangin, MCOA aiawhte chuan sawrkar in an rate te ennawn leh se an duh thu an tarlang bawk.

Zoram Taxi Drivers’ Association hruaitute chuan an District-ah member 2500 vel an awm thu sawiin, intlanchhawk hman mekah zing dar 9:00 hmalam leh tlai dar 5:00 hnu lamah mahni tlan ni nilo ah tlan theih nise an eizawnna nasa takin a puih an beisei thu leh, District danga passenger thlah phal tura ngenna an thlen bawk a. Mizoram University leh Mizoram College Teachers’ Association aiawh ten lockdown laia zirlaiten harsatna an tawh te sawiin, Online Class chuan result lam a nghawnglo nain, Teaching quality erawh offline a phak lo tih an sawi bawk.