MNF in kan ram humhim zel an tum dawn tih an sawi

MNF Party chuan, “Pathian in kan Ram atana min pek hi Pathian hmachhuanin humhim zel hi kan tum tlat a ni,” an ti.

Nimin khan MNF Sr. Vice President leh Deputy Chief Minister, Tawnluia hovin MNF Party hruaitute, MNF National Core Committee, MNF Political Affairs Committee, Speaker, Minister leh Dy. Speaker te chu a Pisa-ah thukhawmin July 26, 2021-a Assam Police-hoin Vairengte-a IR Camp te, India Force CRP Camp te palzut hnua an rawn bei thut leh la zui-a Vairengte Auto Rickshaw Stand lo lut zel a, mipuite kut an thlak leh Silai an hmetpuak hmasa chu an dem takzet tih an sawi a. Chief Minister in kan ram humhalhna atana hma a lakna te fakawm an tih thu sawiin, Home Minister-in puitling taka hma a lakna pawh an fak a, “Kan ram humhalhna tura Vairengte mipui, Pawl hrang hrangte leh Mizoram Ramri a khaw awm zawng zawng mipuite inpekna hi a ropuiin kan fak takzet a ni,” an ti a. Mizoram Police-te ram tana an huaisenna leh inpekna ropui an tih thu pawh sawiin, an Camp ngaia an awm leh thei hi an ti takzet tih an sawi bawk. MNF chuan, “Kan ram humhim nan hian Zoram mipuite theihtawpin I tangrual zel ang u,” tiin Mizoram mipuite an sawm bawk.