DM&R Secretary in VLTF hnenah ngenna siam

Disaster Management & Rehabilitation Department Secretary, Lalbiaksangi chuan Village Level Task Force (VLTF) te chu hri leng kaihhnawih ah sawrkar thawhpui zel tura ngenin a sawm.

COVID-19 dona kal meka VLTF te hnenah lehkha a thawn ah DM&R Secretary chuan kan ram-a hripui a lo reh theihna tura VLTF-te inpêkna a ropuiin, a thim a var pawh thlu hlei theilo leh, chu hripui hlauhawm tak kai ve mai theia an dinzia pawh hrechang thei lova an fehchhuah thin dân a hriatin Sawrkar-in ropui a tiin lawmthu a sawi tih a tarlang a. Sawrkar-in theihtâwp chhuahin hma la bawk mahse, kan ram-a hri kai kan pun dânin ziaawm lam ala pan thei hrihlo tih tarlangin, Mizoram-in damlo inenkawlna tur hmunhma leh hmanrua kan neih mêk dinhmun en hian kar lovah buai namena buai lova ding mai thei dinhmunah kan ding ta tih a tarlang a ni.

Chuvangin, hri darh zel tùr vên chu mut mawh hnar mawha neih a tul tâin Sawrkar chuan a hriat thu leh AMC Area-ah Total Lockdown puan a ni leh ta tih pawh a tarlang a, Mizoram pum huap Total Lockdown puan nilo mahse hripui laka kan him lehzual theih nan fîmkhur leh thahnem ngai taka thawkchhuak tûrin a sawm thar leh a. VLTF te tha tichak a, a tul anga Veng/Khaw chhungah mipui ten Covid Appropriate Behaviour (CAB) an zawm that lehzualna turin YMA te thawhpui turin sawrkar chuan sawm bawkin, Vêng/khaw tina YMA Branch leh Section te tangkai taka kan hmang mêk ang hian, in sangmar-a tha thara thawhhona tha lehzuala lo thawhpui zel turin a ngen a. Hripui vânga chhûngkua chhuan chham mai thei dinhmuna ding te chhanchhuah kawngah leh he hripui darh zel tùr vênna kawnga thahnem ngai taka Sawrkar thawhpui zel tùrin a sawmin a ngen bawk.