Latest News

Serchhip DC Office kaltlanga Sawrkar School Chhawm te hnenah Water Filter sem an ni

Serchhip Deputy Commissioner Office hmalakna a Serchhip District chhunga sawrkar School te ti hmasawna zirlai naupang an neih tam theihna tura hmalakna, 'School Chhawm rawh' (Adopt a School) kalpuina tura thlanchhuah School 4 te hnenah nimin khan Water Filter semchhuah a ni.

'Adopt a School' hnuaia zirna In thlanchhuah te hnena Water Filter semna hun nimin chawhnu-a Serchhip DC Meeting Hall-a neih ah hian District Bawrhsap, Kumar Abhishek chuan he hun hman anih theihna tura thilpek petu, Neetisha Verma IRS, Deputy Commisioner, Custom Department, Aizawl Division leh a thawhpui te chungah lawmthu lawmthu sawiin, anni hmalakna zara hetianga Water Filter sem a ni chu lawmawm a tih thu a sawi a. 'Adopt a School' kalpui mek a Nodal Officer ruat theuh te chu an School te tana an mawmawh tur zawt kualin zirlaiten tui thianghlim an in theihna tur, Water Filter chu an mamawh te zing ami anih angin he hmalakna hnuaia School 4 te hnenah hian Water Filter hi pek an nih thu a sawi a. Nodal Officer te chu an School enkawl theuh tana tangkai leh an mamawh an hmuh theihna hnar lo dap chhunzawm zel tura ngenin, theihtawp a bawhzui anih tur thu a sawi bawk.

Bawrhsap chuan Adopted School te tana thilpek pe duh mimal leh Company anga an awm anih chuan engtik lai pawh a an inhawn reng thu sawiin, Serchhip BDO Vanlalhmachhuana, Khumtung Govt. Primary School Nodal Officer hmalakna a PHE Department ten inthiarna tur an buatsaih sak chu lawmawm a tih thu leh he School tan hian Water Filter hi BDO Office in an lo pek tawh thu sawiin, lawmthu a sawi bawk.

School Chhawm te tana Water Filter petu Neetisha Verma chuan Zirna In tih changtlun nana Serchhip Bawrhsap hmalakna a 'Adopt a School' buatsaih a ni chu lawmawm a tih thu a sawiin, mihring puitlinna kalkawnga kailawn pawimawh tak pakhat chu zirna School anih thu leh amah pawhin a ngai pawimawh hle tih a sawi a, zirlai naupang ten hlawhtlinna an chan theihna tur chuan hriselna tha an neih a pawimawh tih sawiin, hemi kawnga pawimawh tak pakhat chu tui thianghlim an in theih dan tur ngaihtuah sak anih thu leh chumi atan chuan Water Filter hi pe an ni tih a sawi a, heng School Chhawm tura thlanchhuah Zirtirtute hnenah hian Water Filter hi a hlan nghal a ni.

Serchhip Addl. DC, Lalmuansanga Ralte kaihhruai he hunah hian Serchhip DEO, Zohmangaihi pawhin thu sawiin zirna tih hmasawn duhtu District Bawrhsap Serchhip District in a nei chu lawmawm a tih thu a sawi a, Academic Session liamta atanga 'Adopt a School' kalpui anih hnu ah kum hmasa lam aiin heng zirna In hrang hrangah hian zirlai inziaklut an tam zawk tih a sawi a. He ruahmanna kalpui a nih hnuah zirna In te hawn mumal la ni lo mah se zirna In te a pangngai-a hawn a nih hunah chuan nasa leh-zuala hmasawnna hmuh tur a awm ngei a beisei thu a sawi bawk.

Serchhip District chhunga sawrkar School te ti hmasawna zirlai naupang an neih tam theihna tura hmalakna, 'School Chhawm rawh' (Adopt a School) hi Serchhip DC Office hmalakna niin kumin January 27 khan a hawnna neih a lo ni tawh a, he hmalakna kalpuina tur hian a tirah Serchhip District chhunga zirna In 5 thlanchhuah niin a hnuah School dang pakhat chu chhawm tura lak leh niin tunah hian School 6 chu chhawm mek a ni a. Heng School tinah hian DC Office-a Officer te chu Nodal Officer atan ruat an ni.

Nimin-a he hun hmanna ah hian Water Filter 14 semchhuah niin Govt. M/S-I Bungtlang leh Govt. P/S-II East Lungdar te hnenah pali (4) ve ve pek niin Govt. M/S Khum-tung leh Govt. H/S Thenzawl te hnenah pathum (3) ve ve pek an ni.

Comments

Chhiar Hlawhte