Mizoram Boundary Committee-in Mizoram-Assam Boundary siamfelna atan Inner Line of 1875 tha an ti

Mizoram sawrkarin Mizoram leh Assam ramri buai ngaihtuah tura a din, Boundary Committee chuan Mizoram leh Assam Boundary siamfelna atan Inner Line of 1875 chu Mizoram hmarlam ramri demarcate awmchhun a nih avangin hman tha an tih thu leh an dinna ngaiah an la ding reng tih an sawi.

Mizoram sawrkar in tunhnaia a din Boundary Committee hian nimin khan thutkhawm hmasa ber chu an Chairman, Deputy Chief Minister Tawnluia hovin Forensic Science Laboratory Conference Hall-ah an nei a, he hunah hian Member te bakah sawmbik te an tel tha hle a, he Meeting hian Mizoram-Assam Boundary siamfelna atan Inner Line of 1875 chu Mizoram hmarlam ramri demarcate awmchhun a nih avangin hman tha an tih thu leh an dinna ngaiah an la ding reng tih sawiin, ramri buaina chu tharum hmanga tihfel chi ni ah an ngai lo tih an sawi a, inbiakna leh sawihona hmanga tihfel theih nise tha an tih thu an sawi bawk.

Mizoram Boundary Committee thutkhawm chuan July 26, 2021-a Assam Police ten Vairengte a Mizoram Police Post rawn luhchilh thut a, an rawn luahlan (outnumber) leh silai an hmetpuak hmasa chu an dem takzet tih sawiin, kan ramchhunga he pumpelh theih thil thleng avanga mi engemaw zatin nunna an chan leh hliam an tuar chu pawi an ti takzet tih an sawi a. Huaisen taka Mizoram Police te leh Vairengte mipuiten an lo dolet leh an Post ngai an luah leh thei chu ropui an tiin an chhuang tih an sawi bawk.

Hei bakah hian Boundary Commission in kum 2018-a Memorandum a lo siam tawh chu a tul anga siamrem leh ennawn rel bawkin hemi atan hian Sub-Committee/Working Group din an rel a, Ramri chungchang hi hnam thil a nih avangin Mizo mipuite tangruala thapui thawh zel leh harsatna a lo awm deuh pawh a tuarchhel taka lo dawh hram hram tura ngenin, ramri buaina avanga hnamdangte chunga harsatna siam lo turin an ngen a. Mizoram-Assam ramri buai chungchanga Sawrkar hmalakna te tha an tih thu leh huaisen taka hma la zel tura ngenin, Boundary Committee hian kan pi leh pute chenna ram chin chu humhim zui zel turin theihtawp a chhuah dawn tih an sawi bawk.