Hri leng avanga Online Class kalpui ah zirlai zatve velin Online Class an chhim theilo

School Education Minister Lalchhandama Ralte chuan hri leng avanga Online Class kalpui ah internet nei thalo thingtlang kilkhawr tak takah an awm nual tih sawiin, “Zaa 50% bawr zetin Online Class hi an chhim thei lo tih te hriat a ni,” a ti.

COVID-19 hripui leng avanga School hawn theih a nih loh chhunga zirna kalpui dan tur rawtna leh kaihhruaina siamtu Committee chuan nimin khan School Education Minister, Lalchhandama Ralte hnenah rawtna an siam thehlutin he hunah hian Education Minister chuan COVID-19 avangin hun rei tak zirna pangngai kalpui hleih theih a ni lo tih sawiin, Online Class kan neih theih dante a inchen lo em em tih a sawi a. He rawtna hi a rang thei ang bera hman a nih theih nan enzui nghal a ni dawn tih sawiin, Online Class han neih hian internet nei tha lo thingtlang kilkhawr tak takah an awm nual tih a sawi a, zaa 50% bawr zetin Online Class hi an chhim thei lo tih te hriat a ni, a ti a, Online Class nei theite nen khairual nan thingtlang hmun thenkhat, VLTF ten an phalnaah chuan regular-a class kal tawh mai a tha em tih te ngaihtuah ngai nia a hriat thu a sawi bawk.

Kumin May 25-a School Education Minister, Lalchhandama Ralte hova hri len chhunga zirna kalpui zel dan tur chungchang sawihona neih ah khairual taka zirna kalpui a nih theih nan kaihhruaina siam tur Committee hi HRD Board Vice Chairman, L.Thangmawia kaihhruaina hnuaiah din niin he Committee-ah hian Education Department lam bakah ICT lama mithiam te pawh an tel a. He Committee hian COVID-19 hri len chhunga zirna kalpui dan turah State pumpuia sikul zawng zawngten an zawm tur Inkaihhruaina, ‘Guidelines for Education during prevalence of COVID-19 Pandemic’ siamin, he Guidelines kalpui tur hian Department awmsa bakah State Level Committee leh Local Committee siam tura rawt a ni.

Guidelines hi Ministry of Education, Govt. of India in Inkaihhruaina a siam (PRAGYATA) behchhana siam niin Mizoram zirna mil turin her rem a ni a. Inkaihhruaina chi hrang hrang Online, Partially Online leh Offline-a zirna kalpui dan tura inkaihhruaina te siam a ni a. Zirtirtu, nu leh pa, zirlai leh sawrkar mawhphurhna hrang hrangte tarlan a ni bawk. He rawtna leh kaihhruaina siam nan hian DEO leh SDEO office behchhanin survey pawh neih a ni a, hrileng hian zirlai nuai 3 bawr vel a nghawng nia chhut a ni.

SOP thar ber milin zirlaite tel lova zirtirtute sikul kaltir rawt a ni a, a kalphung chipchiar tur chu Department lamin a duang chhunzawm ang. YMA kumpuan 'Zirna Uar Kum' a lo nih bawk avangin hri len chhunga zirna kalpui tur hian YMA te nen zau zawka thawhhona neih theih beisei a ni bawk. Hri len chhunga zirna kalpui nan hian sikul hrang hrangin sum an mamawh belh phuhruk nana Special provision siam tura rawtna siam a ni bawk ni.