Chief Minister thusawi nia tarlan CMO in sawifiah

Chief Minister’s Office chuan thuchhuah siamin tun thla ni 13-a Prime Minister leh hmarchhak State Chief Minister ten Virtual Meeting an neih tuma Chief Minister thusawi nia chanchinthar thenkhatin an tarlan chu an sawifiah.

Hemi chungchanga CMO thuchhuah chuan hemi tuma Chief Minister thusawi chu Media Outlet thenkhat chuan an kaihlek nia tarlangin, ‘Kan thulakna (source)-in a tarlan danin Mizoram Chief Minister chuan a State chhunga COVID hri punna chhanah Myanmar leh Bangladesh atanga refugee lo lut te puh thu leh tanpui an ngaih thu Prime Minister a hrilh’ tiin an tarlang tih an sawi a. Hei hi thu belhchian dawllo leh a ngaithlatu leh chhiartute tana ngaihtuahna hruai sual thei thil a nih avangin Chief Minister’s Office chuan a ngai thutak hle niin an tarlang.

He Meeting-ah hian Chief Minister, Zoramthanga chuan hripui leng chungchanga Mizoram dinhmun a sawifiahnaah Mizoram State chu Myanmar leh Bangladesh ri-a awm a nih thu leh dan lova luhruk theihna hmun tam tak a awm thu a sawi tih an thuchhuah ah chuan tarlangin, kum kaltaa COVID-19 dona chungchang a sawi ah Myanmar leh Bangl-adesh raltlan (refugee) te avanga hri kai kan pung tih khawiah mah sawina a awm lo tih an tarlang a. Myanmar ramah kumin February thlaa sipai sawrkarin mipui sawrkar a paihthlak tak avanga Myanmar rama cheng kan Mizo unau tam tak te ramri kan-a Mizoram chhungah himna zawnga an lo luh thu Chief Minister hian a sawi thu tih tarlangin, “Hripui thawh hnihna in nasa taka Mizoram a nuai leh tak avangin sawrkar chuan a sum neih ang angin hripui a do a ngai a, kan unau raltlan te tuamhlawm an ngai bawk a. African Swine Fever in Mizoram a run chhunzawm leh nghal bawk si avangin heng thil thleng te hian loh theih lohin Mizoram sum dinhmun pachhe tak chu na takin a nghawng thu a sawi a. Chief Minister chuan Prime Minister hnenah Mizoram-in tanpui an ngaih thu he meeting kaltlang hian a thlen a ni,” an ti.

CMO thuchhuah chuan tunlai khawvel thiamna sang tawh takah thuthar thehdarh pawh a awlsam lehzual ta tih tarlangin, “Thu belhchian dawllo thehdarh hian mi tam tak thinlung a hliam thei a; chi leh chi, hnam leh hnam inkarah khi a siam thei tih hriain thuthar thehdarhtute pawhin an thulakna (source) a dik tawk em tih finfiaha, fimkhur lehzuala thu kan puanzar thin a tul a ni,” an ti bawk.

Hetihlai hian nimin khan ZPM Thalaite chuan thuchhuah siamin  Prime Minister-in India hmarchhak Chief Minister-te a kawmnaah Mizoram Chief Minister-in Mizorama hrilêngin zual lam a pan chhanah khawchhak lam atanga kan unau râltlânte a puh mai bakah, he thila inrawlh tura Central Sawrkâr a pun hial mai chu dawizep thil tihah an ngai tih an sawi.